Ukuthanda UJehova Kuzosenza Sifune Ukubhajadiswa

1-2. Ngokuya ngokomtlolo wezEnzo 8:27-31, 35-38, khuyini eyakhuthaza isikhulu esimTopiya bona sibhajadiswe?

UYAFUNA na ukubhajadiswa ube mlandeli kaKrestu? Ukuthanda uZimu kukhuthaze abantu abanengi bona babhajadiswe. Cabanga ngesikhulu ebesisebenzela indlovukazi yeTopiya.

² Isikhulu seTopiya akhenge siriyade, senza okuthileko ngesikufunde emiTlolweni. (Funda izEnzo 8:27-31, 35-38.) Sakhuthazwa yini bona senze njalo? Kuyakhanya ukuthi besikuthanda ukufunda iliZwi lakaZimu, besifunda umtlolo ka-Isaya lokha nasikhwele ikarana. UFlebhe nakakhuluma naso, sathokoza ngalokho uJesu asenzele khona. Kodwana kubayini isikhulwesi besiya eJerusalema? Kungombana besele sithanda uJehova. Sikwazi njani lokho? Besilotjha uJehova eJerusalema. Kungenzeka nokuthi salisa ikolo esabelethelwa kiyo sahlanganyela nesitjhaba esilotjha uZimu weqiniso. Ukuthanda uJehova ngikho okwasikhuthaza safuna ukubhajadiswa saba mlandeli kaKrestu.—Mat. 28:19.

3. Khuyini engavimbela umuntu bona abhajadiswe? (Qala ibhoksi elithi, “Umumuntu Onjani?”)

³ Ukuthanda uJehova kungakukhuthaza bona ufune ukubhajadiswa. Kodwana ithando lingabuya likwenze usabe ukubhajadiswa. Sikutjho ngaliphi lokho? Cabanga ngananzi iimbonelo. Kungenzeka uthanda umndeni nabangani bakho abangamlotjhiko uJehova, bese utshwenyeka ngokuthi nawungabhajadiswa angekhe basakuthanda. (Mat. 10:37) Kungenzeka ukuthi uthanda izinto owazi kuhle ukuthi uJehova uzihloyile begodu kubudisi ukuzilisa. (Rhu. 97:10) Kungenzeka ukhule uhlanganyela ekolweni namkha emaholideyini angamthabisiko uZimu. Kungenzeka uyazithanda izinto ebenizenza ngamaholideyi lawo. Lokho kungakwenza kube budisi ukulisa ukwenza izinto ezingamthabisiko uJehova. (1 Kor. 10:20, 21) Umbuzo okufuze uwuphendule ngothi, “Khuyini namkha ngubani engimthanda khulu?”

NGUBANI EKUFUZE SIMTHANDE KHULU?

4. Khuyini ekufuze ikukhuthaze bona ubhajadiswe?

⁴ Zinengi izinto ezihle ozithandako nezikuthokozisako. Isibonelo salokho, ngaphambi kokufunda iBhayibheli naboFakazi bakaJehova kungenzeka besele ulithanda. Kungenzeka besele umthanda noJesu. Njengombana sewazi aboFakazi bakaJehova, kungenzeka uyakuthanda ukuba nabo. Kodwana ukuthanda zoke izintwezo akusikho okuzokwenza unikele uphila kwakho kuJehova begodu ubhajadiswe. Into ekufuze ikwenze ufune ukubhajadiswa, kuthanda uJehova. Nawuthanda uJehova ukudlula nanyana yini, angeze wavumela izinto zikukhandele bona umlotjhe. Ukuthanda uJehova kuzokukhuthaza bona ubhajadiswe begodu kuzokusiza bona uhlale uthembekile nangemva kokubhajadiswa.

5. Ngimiphi imibuzo esizokucoca ngayo?

⁵ UJesu wathi kufuze uthande uJehova ngehliziywakho yoke, ngomphefumulwakho woke, ngengqondwakho yoke nangamandlakho woke. (Mar. 12:30) Khuyini ezokwenza uthande bewuhloniphe uJehova kangako? Ukufunda ngendlela uJehova asithanda ngayo kuzokwenza nathi simthande. (1 Jwa. 4:19) Khuyini okhunye okuzokulandela nasele sithanda uJehova ngendlela leyo?b

6. Ngokuya ngokomtlolo wamaRoma 1:20, khuyini engasisiza sifunde ngoJehova?

⁶ Funda ngoJehova endalwenakhe. (Funda kwebeRoma 1:20; IsAm. 4:11) Cabanga ngokuhlakanipha kwakhe okuvezwa yindlela adale ngayo iintjalo neenlwana. Funda ngendlela umzimbakho odalwe ngayo. (Rhu. 139:14) Cabanga godu ngendlela uJehova anamandla ngakhona ngokwenza ilanga, cabanga nangezinye iinkwekwezi ezimabhiliyoni azenzileko.c (Isa. 40:26) Nawenza njalo, uzokuhlonipha uJehova ngokungeziweko. Ukwazi ukuthi uJehova uhlakaniphe kangangani nokuthi unamandla amakhulu, ngikho okuzokwenza ube mnganakhe. Bona uthande uJehova kufuze wazi okungeziweko ngaye.

7. Bona uthande uJehova khulu, khuyini ekufuze uqiniseke ngayo?

⁷ Kufuze uqiniseke ngokuthi uJehova unendaba nawe. Kghani ukufumana kubudisi ukukholelwa ukuthi uMdali wezulu nephasi uyazi ngawe nokuthi unendaba nawe? Nakunjalo, khumbula bona uJehova ‘akasikude komunye nomunye wethu.’ (IzE. 17:26-28) “Uhlolisisa ihliziyo enye nenye” begodu uyakuthembisa njengombana uDavida atjela uSolomoni ukuthi “nawumfunako uzamfunyana.” (1 Kron. 28:9) Ekhabolakhona, unobangela owenza ufunde iBhayibheli nje, kungombana uJehova uthi, “Ngikuthande ngethando lanini nanini.” (Jor. 31:3) Nawukuthabela lokho uJehova akwenzela khona, ukumthanda kwakho kuzokukhula.

8. Ungatjengisa njani ukuthi uyamthanda uJehova?

⁸ Enye indlela yokutjengisa ukuthi uyamthanda uJehova, kuthandaza ukhulume naye. Njengombana umtjela ngezinto ezikutshwenyako begodu umthokoza ngakho koke akwenzela khona, ithando lakho ngaye lizokukhula. Ubuhlobo bakho noJehova buzokuqina, khulukhulu nawubona indlela aphendula ngayo imithandazwakho. (Rhu. 116:1) Uzokuqiniseka ngokuthi uyakuzwisisa. Kodwana bona utjhidelane noJehova, kufuze uzwisise indlela enza ngayo izinto. Kufuze wazi bona ufuna wenzeni. Okukuphela kwendlela ezokusiza ufumane ilwazelo kufunda iliZwi lakhe iBhayibheli.

9. Ungatjengisa njani ukuthi uyalihlonipha iBhayibheli?

⁹ Funda ukuhlonipha iliZwi lakaZimu, iBhayibheli. LiBhayibheli kwaphela elisitjela iqiniso ngoJehova nangomnqophwakhe ngathi. Nawufunda iBhayibheli qobe, wenze isifundo somuntu mathupha begodu usebenzisa lokho okufundako, uzokutjengisa ukuthi uyalihlonipha iBhayibheli. (Rhu. 119:97, 99; Jwa. 17:17) Kghani unalo ihlelo lokufunda iBhayibheli? Kghani uyalisebenzisa bona uqiniseke ukuthi ufunda iBhayibheli qobe langa?

10. Khuyini eyenza iBhayibheli libe ngelikhethekileko?

¹⁰ Enye yezinto ezikhethekileko ngeBhayibheli, kukuthi likhuluma ngabantu abazibonele ngewabo izenzo zakaJesu. Ngiyo kwaphela incwadi enembileko esitjela lokho uJesu asenzela khona. Njengombana ufunda ngalokho uJesu akwenzako nakakhulumako uzokufuna ukuba mnganakhe.

11. Khuyini ezokusiza bona uthande uJehova?

¹¹ Thanda uJesu begodu indlela othanda ngayo uJehova izokuthuthuka. Kubayini kunjalo? Kungombana uJesu wamlingisa ngokupheleleko uYise. (Jwa. 14:9) Yeke, nawuragela phambili ufunda ngoJesu, uzokuzwisisa begodu uthande uJehova. Akhucabange ngezwela uJesu alitjengisa abantu ebebaqalelwa phasi ngombana batlhagile, bagula begodu babogaboga. Cabanga godu nangeseluleko uJesu akunikela sona qobe langa nokuthi sikuthuthukisa njani ukuphila kwakho nawusisebenzisako.—Mat. 5:1-11; 7:24-27.

12. Njengombana ufunda ngoJesu, khuyini ozokufuna ukuyenza?

¹² Nawucabanga ngokuzidela kwakaJesu ngebanga lezono zethu, asizazi ukuthi ukumthanda kwakho kuzokuqina. (Mat. 20:28) Nawuzwisisa ukuthi uJesu bekazimisele ukukufela, lokho kuzokwenza bona utjhuguluke ufune uJehova akulibalele lapho utjhaphe khona. (IzE. 3:19, 20; 1 Jwa. 1:9) Njengombana uragela phambili nokuthanda uJehova noJesu, lokho kuzokwenza ufune ukuba nalabo abamthandako.

13. Khuyini uJehova akunikele yona?

¹³ Thanda labo abathanda uJehova. Umndenakho ongakholwako kunye nabangani kungenzeka bangazwisisi ukuthi kubayini ufuna ukuzinikela kuJehova. Kungenzeka bakuphikise. UJehova uzokusiza ngokukunikela umndeni ozomlotjha nawo. Nawuhlala utjhidelene nomndeni lo, uzolifumana ithando nesekelo olitlhogako. (Mar. 10:29, 30; Heb. 10:24, 25) Kungenzeka ukuthi ngokukhamba kwesikhathi nomndenakho uzokuhlanganyela nawe ekulaleleni nekulotjheni uJehova.—1 Pit. 2:12.

14. Ngokomtlolo weyoku-1 kaJwanisi 5:3, khuyini oyifumene ngokulalela iinkambiso zakaJehova?

¹⁴ Thanda uJehova begodu uhloniphe iinkambiso zakhe. Ngaphambi kokuthi wazi ngoJehova, kungenzeka bewuziquntela ukuthi khuyini elungileko nengakalungi. Kodwana ngemva kokufunda ngoJehova sewuyabona ukuthi iinkambiso zakhe zilungile. (Rhu. 1:1-3; funda yoku-1 kaJwanisi 5:3.) Cabanga ngeenluleko zeBhayibheli ezikhuluma ngamadoda, abafazi, ababelethi nabantwana. (Efe. 5:22–6:4) Uwabonile amatjhuguluko emndeninakho njengombana usebenzisa iinlulekwezi? Kghani sewumumuntu ongcono ngebanga lokulalela iseluleko sakaJehova esimalungana nokukhetha abangani? Kghani sewumumuntu othabileko? (IzA. 13:20; 1 Kor. 15:33) Akunakuzaza ukuthi iimpendulo zemibuzo le kube ngu-iye.

15. Khuyini ekufuze uyenze nawufuna isizo lokusebenzisa iinkambisolawulo zeBhayibheli?

¹⁵ Ngezinye iinkhathi ungakufumana kubudisi ukusebenzisa iinkambisolawulo zeBhayibheli ozifundako. Kungebangelo uJehova asebenzisa ihlanganwakhe bona akunikele iincwadi ezihlathulula iBhayibheli bezikusize ukghone ukuhlukanisa okulungileko nokungakalungi. (Heb. 5:13, 14) Nawufunda bewuzindle ngeencwadezi uzokubona ukuthi zisiza kangangani begodu uzokufuna ukuba yingcenye yehlangano kaJehova.

16. UJehova ubahlele njani abantu bakhe?

¹⁶ Thanda uJehova begodu usekele ihlanganwakhe. UJehova uhlele abantu bakhe ngamabandla begodu uJesu uyihloko yawo woke. (Efe. 1:22; 5:23) UJesu uhlele isiqhema esincani samadoda azesiweko bona adose phambili ekuhleleni umsebenzi wokutjhumayela. Isiqhema samadoda lawo sibizwa ngokuthi, ‘yinceku ethembekileko nehlakaniphileko,’ umsebenzaso kukuthi sikusize utjhidele kuJehova begodu uvikele ubuhlobo bakho naye. (Mat. 24:45-47) Enye indlela inceku ethembekileko nehlakaniphileko esisiza ngayo kuqinisekisa ukuthi kukhethwa amadoda afanelekako bona abebadala, ukwenzela bona asinqophise bewasivikele. (Isa. 32:1, 2; Heb. 13:17; 1 Pit. 5:2, 3) Abadala bazimisele ukukusiza ngendlela abangakghona ngayo, bakududuze bebakusize utjhidele kuJehova. Kodwana into eqakatheke khulu abangakwenzela yona kukusiza ukuthi ufundise abanye ngoJehova.—Efe. 4:11-13.

17. Ngokomtlolo webeRoma 10:10, 13, 14, kubayini sifundisa abanye ngoJehova?

¹⁷ Siza abanye bafunde ngoJehova bebamthande. UJesu watjela abalandeli bakhe ukuthi bafundise abanye ngoJehova. (Mat. 28:19, 20) Siyawulalela umyalo lo ngombana siyazi ukuthi kufuze siwulalele. Kodwana njengombana ithando lakho ngoJehova likhula, uzozizwa njengompostoli uPitrosi noJwanisi, abathi: “Angekhe silise ukukhuluma ngezinto esizibonileko nesizizwileko.” (IzE. 4:20) Kuyasithabisa ukusiza umuntu bona afunde ngoJehova. Cabanga ukuthi isithunywa sevangeli uFlebhe sathaba kangangani nasisiza isikhulu seTopiya bona sifunde iqiniso elisemitlolweni besibhajadiswe! Nawulingisa uFlebhe begodu ulalele umyalo kaJesu wokutjhumayela, utjengisa ukuthi unguFakazi kaJehova. (Funda kwebeRoma 10:10, 13, 14.) Nasele uzizwa njalo ungazibuza umbuzo njengesikhulu seTopiya, uthi: “Khuyini engivimbela bona ngibhajadiswe?”—IzE. 8:36.

18. Sizokufunda ngani esihlokweni esilandelako?

¹⁸ Nawuqunta ukubhajadiswa, uthatha isiqunto esiqakatheke khulu okhewasithatha ekuphileni kwakho. Ngebanga lokuthi ligadango eliqakatheke khulu, kufuze ucabangisise ngokuthi litjho ukuthini. Khuyini ekufuze uyazi ngokubhajadiswa? Khuyini ekufuze uyenze ngaphambi nangemva kokubhajadiswa? Imibuzo leyo izokuphendulwa esihlokweni esilandelako.