Abantu Bathini Ngokuthandaza?
“Nangithandazako, ngizizwa ngasuthi uZimu useqadi kwami, ungibambe ngesandla begodu uyanginqophisa nangizizwa ngilahlekile.”—MARÍA.
“Umamakwami wahlongakala ngemva kweminyaka eli-13 alwisana nekhensa. Ngikhumbula ngithandaza kuZimu qobe langa begodu bengizwa ukuthi uZimu ungilalele nangisebuhlungwini. Ngazizwa nginokuthula.”—RAÚL.
“Umthandazo usisipho esiligugu uZimu asiphe abantu.”—ARNE.
KuMaría, uRaúl no-Arne, nabanye abanengi umthandazo usisipho esikhethekileko. Umthandazo kibo utjho ukuthi bangakhuluma noZimu, bamthokoze bebabawe nesizo lakhe. Bakholelwa lokho iBhayibheli elikutjhoko ngokuthandaza kuZimu nalithi: “Nakhu esiqiniseka ngakho ngaye, ukuthi nanyana yini esiyibawa ngokuvumelana nentandwakhe, uyasizwa.”—1 Jwanisi 5:14.
Ngakelinye ihlangothi, abanye bakufumana kubudisi ukukholelwa lokho iBhayibheli elikutjhoko ngomthandazo. USteve uhlathulula indlela azizwa ngayo ngokuthandaza uthi: “Nangineminyaka eli-17, abangani bami abathathu bahlongakala eengozini ezimbili ezihlukileko. Omunye wahlongakalela engozini yekoloyi kwathi ababili baminza elwandle.” Wenzani uSteve? “Ngathandaza kuZimu ngambuza ukuthi kubayini avumele koke lokhu bona kwenzeke kodwana akhenge ngifumane ipendulo. Yeke ngazibuza, ‘Kubayini kufuze ngithandaze?’” Ngebanga lokuthi abanengi bazizwa ngasuthi imithandazwabo ayiphendulwa, bayazibuza bona inga-kghani kufuze baragele phambili nokuthandaza?
Kunamabanga amanengi enza abantu bazizwe ngasuthi umthandazo awubasizi ngalitho. Abanye bathi uZimu uyayazi imirarwethu neentlhogo zethu, yeke asitlhogi ukumtjela ukuthi sitshwenywa yini.
Abanye bacabanga ukuthi uZimu akafuni ukulalela imithandazwabo ngebanga lemitjhapho abayenza esikhathini esidlulileko. UJenny uthi, “Umrarwami omkhulu kukuthi ngizizwa ngingasililitho.” “Ngenze izinto engizisola ngazo, nje-ke ngizitjele ukuthi angifanelwa kulalelwa nguZimu.”
Uzizwa njani ngokuthandaza? Nangabe nawe uzizwa ngendlela efanako ngokuthandaza, ungaduduzeka ngokwazi bona iBhayibheli lineempendulo ezanelisako. Singakuthemba okutjhiwo liBhayibheli ngomthandazoa begodu lingasisiza sifumane iimpendulo zemibuzo efana nale:
Kghani uZimu uyayizwa imithandazwethu?
Kubayini uZimu angayiphenduli yoke imithandazo?
Ungathandaza njani bona uZimu akuzwe?
Ukuthandaza kungakusiza njani?
a IBhayibheli linemithandazo eminengi yabantu ebebalotjha uZimu kuhlanganise neyakaJesu. ImiTlolo yesiHebheru, ngokujayelekileko ebizwa ngokuthi yiTestamende eliDala inemithandazo engaphezu kweli-150.