Kubayini UZimu Angayiphenduli Yoke Imithandazo?
UBabethu wezulwini, uJehova uZimu uyakuthabela begodu uyakufuna ukulalela imithandazwethu esuka ehliziyweni. Kodwana kunezinto ezingamvimba bona angayiphenduli imithandazwethu. Ngiziphi izintwezo begodu khuyini ekufuze siyikhumbule nasithandazako? Nanzi ezinye iinqophiso zeBhayibheli.
“Nawuthandazako, ungasolo ubuyelela into yinye kanengi.”—Matewu 6:7.
UJehova akafuni sibuyelele imithandazo esiyibambe ngehloko namkha esiyifunde encwadini yomthandazo. Kunalokho, ufuna sikhulume naye ngokusuka ehliziyweni. Cabanga indlela ongazizwa ngayo kube bewunomngani ohlala akutjela into yinye ngamalanga. Abangani abathandanako batjelana koke ngokusuka ehliziyweni. Nasisebenzisa amezwethu nasithandazako, sitjengisa uJehova ukuthi ufana nomngani kithi.
“Nanibawako, anifumani ngombana nibawa ngomnqopho omumbi, ukuze nikusebenzise eenkanukweni zenu zenyama.”—Jakopo 4:3.
Kuyazwisiseka ukuthi uJehova angekhe ayiphendula imithandazwethu nangabe sibawa izinto esazi kuhle ukuthi akafuni sizenze namkha sibe nazo. Ngokwesibonelo, kghani uJehova angayiphendula na imithandazo yomuntu ogembulako obawa itjhudu lokuthumba, kube ngapha usitjelile ukuthi uzizwa njani ngokuba marhamaru nokukholelwa ezintweni ezingekho? (Isaya 65:11; Lukasi 12:15) Angekhe salindela uJehova bona aphendule imithandazo enjalo! Bona uZimu asiphendule nasithandazo, kufuze siqiniseke ukuthi iimbawo zethu zikhambelana nalokhu asitjela khona eBhayibhelini.
“Ofulatheza indlebakhe kobana angezwa umthetho, ngitjho nemithandazwakhe isinyenyiso.”—IzAga 28:9.
Ekadeni, uZimu akhenge ayiphendule imithandazo yabantu ebebangayilaleli imithethwakhe elungileko. (Isaya 1:15, 16) UJehova akakatjhuguluki. (Malaki 3:6) Nangabe sifuna uJehova aphendule imithandazwethu, kufuze senze koke esingakghona ukukwenza bona simlalele. Kuthiwani-ke, nangabe esikhathini esidlulileko senza izinto ezingakalungi? Kghani lokho kutjho ukuthi uJehova angekhe asilalela? Awa! UZimu uzosilibalela nangabe sitjengisa ukuthi siyazisola ngezono esazenzako bese senza okusemandlenethu ukwenza izinto ezizomthabisa.—IzEnzo 3:19.