Khuyini Engasisiza Sibe Nengomuso Elingcono?

Njengombana kuhlathululiwe eenhlokweni ezidlulileko, abantu balinge ukufumana ingomuso elingcono ngokuthembela ezintweni ezifana netjhudu, ifundo, ukuba nemali nokuba mumuntu olungileko. Nanyana kunjalo, ukulinga ukufumana ingomuso elingcono ngezintwezi kufana nokuya endaweni ongayaziko usebenzisa umebhe okungasiwo. Kghani lokho kutjho ukuthi akunasinqophiso esingasithemba? Awa!

LAPHO ESINGAFUMANA KHONA ISINQOPHISO ESIPHUMA PHAMBILI

Nasenza iinqunto, kanengi sikhuluma nomuntu omdala kithi nohlakaniphileko. Ngendlela efanako singafumana isinqophiso esingasithemba malungana nengomuso lethu emuntwini omkhulu nohlakaniphe ukudlula thina. Singafunda ngeseluleko sakhe encwadini eyathonywa ukutlolwa eminyakeni ezii-3 500 edlulileko. Incwadi leyo liBhayibheli.

Kubayini ungalithemba iBhayibheli? Ngombana umTloli walo muMuntu omkhulu nohlakaniphe ukudlula woke umuntu. Uhlathululwa ngokuthi ‘ngoMdala weminyaka’ begodu ‘bekanguZimu nini nanini.’ (Danyela 7:9; IRhubo 90:2) UnguZimu “owadala isibhakabhaka, unguZimu yena! Owabumba iphasi.” (Isaya 45:18) Usitjela ukuthi igama lakhe nguJehova.—IRhubo 83:18, NW.

IBhayibheli alitjho ukuthi omunye umhlobo wabantu ungcono kunomunye, ngebanga lokuthi livela kuMbumbi wabo boke abantu. Iseluleko salo asiphelelwa sikhathi begodu sizuzise abantu abanengi, abavela eendaweni ezihlukahlukeneko. Liyincwadi efumaneka ngamalimi amanengi ephasini loke ukudlula ezinye iincwadi.a Yeke abantu bakufumana kulula ukulifunda, balizwisise bebasebenzise lokho abakufunda kilo. Lokho kuvumelana neBhayibheli nalithi:

“UZimu akakhethi, kodwana kizo zoke iintjhaba umuntu omesabako begodu enze okulungileko uyamukeleka kuye.”—IZENZO 10:34, 35.

Njengababelethi abathanda bebanqophise abantwana babo, uJehova uZimu unguBaba onethando osisiza ngeliZwi lakhe iBhayibheli. (2 Thimothi 3:16) Ungalithemba iliZwi lakhe ngebanga lokuthi nguye owasenzako begodu uyakwazi okusenza sithabe.

SINGALITHEMBA IBHAYIBHELI

Singakuthemba lokho okutjhiwo liBhayibheli ngekusasa ngebanga lezehlakalo nendlela abantu abaziphatha ngayo namhlanjesi, iBhayibheli elakubikezela eminyakeni ezii-2 000 edlulileko.

IZEHLAKALO

“Isitjhaba sizokulwa nesitjhaba, umbuso ulwe nombuso. Kuzokuba nokusikinyeka kwephasi okukhulu, nokutlhayela kokudla nezifo ezibulalako eendaweni ngeendawo.”—LUKASI 21:10, 11.

INDLELA ABANTU ABAZIPHATHA NGAYO

“Emihleni yokuphela kuzakufika iinkhathi ezibudisi okubudisi ukuqalana nazo. Ngombana abantu bazakuba ngabazithandako, abathanda imali, abazikhakhazisako, abazibona bangcono kunabanye, abahlambalazi, abangalaleli ababelethi, abangathokoziko, abangakathembeki, abanganalo ithando lemvelo, abangafuni isivumelwano, abarhwayeli, abangazibambiko, abanelaka, abangakuthandi okuhle, abathengisa abanye, abanekani, abakhukhumele ngokuzigqaja, abathanda ukuzithabisa kunokuthanda uZimu.”—2 THIMOTHI 3:1-4.

Kwenzeka njani ukuthi iBhayibheli likghone ukubikezela izinto ezenzeka namhlanjesi ngendlela enembileko? Ungavumelana nalokho okwatjhiwo ngu-Leung, we-Hong Kong, nakathi: “Iimphorofido zeBhayibheli zatlolwa kade. Akukghonakali ukuthi umuntu abikezele izintwezi bezenzeke ngendlela leyo. Kuyatjho ukuthi iBhayibheli livela emuntwini omkhulu kunathi.”

IBhayibheli lineemphorofido ezinengi esele zizalisekile.b Lokho kuyasiqinisekisa ukuthi kwamambala iBhayibheli liliZwi lakaZimu. UJehova uthi, “NginguZimu begodu akakho ofana nami omemezela isiphetho ekuthomeni.” (Isaya 46:9, 10) Yeke ngamabanga azwakalako, ungalithemba iBhayibheli ngalokho elikutjhoko ngengomuso.

ISINQOPHISO ESINGAKUZUZISA NJE NESIKHATHINI ESIZAKO

Nawulandela iinqophiso ezifumaneka eBhayibhelini, uzokuzuza. Cabanga ngeembonelo ezilandelako.

ISELULEKO ESISEBENZAKO MALUNGANA NEMALI NOMSEBENZI

“Singcono isandla sinye esizele ukuzotha, kunezimbili ezizele ukutjhabatjheka kanye nokugijimisa ummoya.”—UMTJHUMAYELI 4:6.

UNGABA NJANI NOMNDENI OTHABILEKO

“Ngamunye wenu kufuze athande umkakhe njengombana azithanda yena; ngakelinye ihlangothi, umfazi kufuze ayihloniphe khulu indodakhe.”—EFESU 5:33.

UNGAZWANA NJANI NABANYE ABANTU

“Lisa ukuhluthuleka, utjhide elakeni, ungathakasi ngabenzi bobumbi! Lokho sekubanga ukona kwaphela.”—IRHUBO 37:8.

Ukusebenzisa lokho iBhayibheli elikutjhoko kuzokwenza uthabele ukuphila nje begodu ube nengomuso elithabisako. EBhayibhelini sifumana iinthembiso zakaZimu zokuba nengomuso elithabisako okuhlanganisa

UKUTHULA NOKUVIKELEKA

‘Bazokuthabela ukuthula okukhulu.’—IRHUBO 37:11.

WOKE UMUNTU UZOKUBA NENDAWO YOKUHLALA NOKUDLA

“Bazakwakha iinkumba bebahlale kizo, batjale iindiribe, bagome isithelo sakhona.”—ISAYA 65:21.

AKUNAMUNTU OZOKUGULA NAMKHA AFE

“Ukufa angekhe kusaba khona, namkha isizi namkha ukulila namkha ubuhlungu angekhe kusaba khona.”—ISAMBULO 21:4.

Khuyini ekufuze siyenze nasizakuba nengomuso elinjalo? Cabanga ngalokho okutjhiwo sihloko esilandelako.

a Nawufuna imininingwana malungana nokutjhugululwa nokufumaneka kweBhayibheli iya ku-www.jw.org/zu uqale ngaphasi kwesithi IZIMFUNDISO ZEBHAYIBHELI > IBHAYIBHELI NOMLANDO.

b Ukuthi ufumane okwengeziweko qala isiThala saka No.2 2018 esinesihloko esithi, Kazi Ingomuso Lisiphatheleni? Ngaphasi kwesihlokwana esithi Iimphorofido Ezizalisekileko. Esigandangiswa boFakazi bakaJehova. Ungayifumana ku-www.jw.org. Qala ngaphasi kwesithi ILAYIBHRAYI> ABOMAGAZINI.