“Nje, Sengiyakuthanda Ukutjhumayela!”

UKULAHLEKELWA LITHABO

Ngokudanisako, lokha nangithoma ukuba litlawana, itjhebiswano lami noJehova lathoma ukufadalala. Abantu engifunda nabo bebabonakala banetjhaphuluko engamadinisekiko bese ngabona ngathi mina ngiyalahlekelwa. Ngazizwa nginomthwalo womthethokazi eminengi evela kubabelethi neenkambiso zakaJehova netjhibiswano lami noJehova belibonakala limthwalo kimi. Nanyana ngingazange ngikuzaze ukuba khona kwaJehova kodwana besele ngithoma ukutjhidelana kude naye.

Nanoma kunjalo, bengiqinisekisa ukuthi ngiyaya esimini kodwana besele ngenza nje. Nakufuze ngiye esimini, bengikhamba ngaphandle kokulungiselela, lokho kwenza kwababudisi ukuthomisa ikulumiswano nabantu nokuragela phambili sikhuluma. Ngebanga lalokho, bekungidanisa ukutjhumayela, okwabangela ukuthi ngibe nombono ongakafaneli. Benginokuzibuza ukuthi ‘Kungenzeka njani ukuthi umuntu aragele phambili qobe veke, inyanga nenyanga enza umsebenzi lo?’

Nasele ngineminyaka eli-17, ngasele ngithoma ukufuna ukuzijamela. Ngebanga lalokho, ngapaka umthwalwami, ngakhamba ekhaya, ngaya e-Australia. Kwaba budisi kubabelethi bami ukungibona ngikhamba. Bebatshwenyekile kodwana bebazitjela ukuthi ngizokuragela phambili nokulotjha uJehova.

Nangifika e-Australia, itjhebiswano lami noZimu lafadalala ukuya phambili. Besele ngizikatelela ukuya esifundweni. Into ebeyingibasela khulu, bekukubona abantu abalingana nami bathabile ngokuthi emini baye esifundweni bese ebusuku, bakhambe baye eendaweni zokusela nokujida. Nangiqala emva, ngiyalemuka ukuthi ukuphila kwami bekumabatha ngoba ngakelinye ihlangothi bengilotjha uJehova bese ngakelinye, ngithanda iphasi, bekungekho la ngidzimelele khona.

ISIFUNDO ESIQAKATHEKILEKO EBENGINGAKASILINDELI

Ngemva kweminyaka emibili, ngahlangana nodade owangenza ngathoma ukucabaga ukuthi mara ipilwami itjhingaphi. Besihlala sibodabe abahlanu abangakatjhadi komunye umuzi, sakhetha ukumema umjikelezi nomkakhe u-Tamara ukuthi bazokuhlala nathi iveke yoke. Kwathi indodakwakhe nayisabambekile ngezinto zebandla, thina sathola isikhathi sokuhlala noTamara besicoce naye. Ngakuthanda lokho. Bekamumuntu ophasi, ebekulula ukukhuluma naye. Into eyangikara khulu kukuthi bekamumuntu onetjhebiswano eliseduze noJehova kodwana kumnandi ukuhlala naye.

U-Tamara bekamafulufulu. Indlela ebekathanda ngayo iqiniso nokutjhumayela beyenza nabanye bakuthande ukumlingisa. Bekathabile ukunikela uJehova okuncono khulu, kukulapho mina ngidanile ngokunikela uJehova okuncani khulu. Indlela ebekabona ngayo izinto nethabo lakhe kwaba nomthelela ekuphileni kwami. Isibonelo sakhe sangisiza ukuthi ngicabange ngeqiniso elisisikelo elisemTlolweni elithi uJehova ufuna soke simlotjhe ‘ngethabo nangehlokomo.’—Rhu. 100:2.

UKUVUSELELA ITHANDO NGOKUTJHUMAYELA

Nami bengifuna ukuthaba njengoTamara kodwana ukuthi ngithabe, bekutlhogeka ngenze amatjhuguluko amakhulu. Kwathatha isikhathi kodwana kancani kancani ngathatha amagadango afaneleko. Ngathoma ukulungiselela nangiya esimini nokuthatha ubuphayona iinkhathi ezinengana. Lokho kwangisiza ukuthi ngisuse ukwesaba bengizithembe. Njengombana besele ngithoma ukujayela ukusebenzisa iBhayibheli, ngathoma ukwaneliseka. Ingasikade, ngathoma ukubaliphayona lesikhatjhana inyanga nenyanga.

Ngathoma ukuba nabangani beminyaka engafaniko ebebenza kuhle eqinisweni nabamthandako uJehova. Isibonelo sabo esihle sangisiza ukuthi ngiqalisise imigomwami bengathoma ukuba nehlelo elihle lokufunda iBhayibheli. Ngathoma ukukuthanda ukutjhumayela, ekugcineni ngaba liphayona lesikhathi esizeleko. Ngemva kwesikhathi eside, ngazizwa ngithabile begodu ngisekhaya nangisebandleni.

UMLINGANI ENGIZOKUPHAYONA NAYE ISIPHELANI

Ngemva komnyaka, ngahlangana no-Alex, isokana elinomusa nelithanda uJehova nesimu. Bekayinceku esizako begodu besele aphoyone iminyaka esithandathu. U-Alex godu besele aphoyone isikhatjhana eMalawi, la bekunetlhogeko yabatjhumayeli khona. Lapho, bekahlala neenthunywa zevangeli, ezamkhuthaza bona abeke umsebenzi womBuso qangi ekuphileni kwakhe.

Sino-Alex satjhada ngo-2003 begodu siragele phambili sisekonzweni yesikhathi esizeleko. Sifunde iimfundo ezinengi ezikarisako begodu uJehova usibusise ngendlela engekhe sakghona ukubala ngayo.

UMNYANGO ODOSELA EEMBUSISWENI EZINENGI

Ngo-2009 basibawa ukuthi sibe ziinthunywa zevangeli eTimor-Leste, inarha encani ese-Indonesia ezele iinhlengele. Sarareka besathaba ngesikhathi sinye. Ngemva kweenyanga ezihlanu, safika ehlokodorobha, iDili.

Kwatlhogeka ukuthi senze amatjhuguluko amakhulu endleleni esasijayele ukuphila ngayo. Kwatlhogeka ukuthi sizivumelanise nesiko lendawo, ilimi, ukudla nobujamo bendawo. Esimini besizibonela ngawethu ukuthi kunjani ukutlhaga, ukungabi nefundo nokugandeleleka. Nasitjhumayela besihlangana nabantu abaphatheke kumbi emzimbeni nemmoyeni ngebanga lepi nenturhu.a

Ukutjhumayela bekuthabisa tle! Ngokwesibonelo, ngakhe ngahlangana nomntazana oneminyaka eli-13, ibizo lakhe linguMaria.b Ummakhe bekaqeda ukuhlongakala begodu bekudlula isikhathi eside angamboni uyise. Njengabo boke abantazana abalingana naye, u-Maria bekanganawo umnqopho ekuphileni. Ngikhumbula ngesinye isikhathi nakalila njengombana angitjela indlela azizwa ngayo. Nanyana kunjalo, bengingazi ukuthi ngingathini ngombana bengingakghoni ukukhuluma kuhle ilimi lakhe. Ngathandaza kuJehova ngimbawa bona angisize ngimkhuthaze, ngemva kwalokho ngathoma ukufunda imitlolo ekhuthazako. Ngemva kweminyaka embalwa eyalandelako, iqiniso lakutjhugulula ukuphila kwaka-Maria nendlela acabanga ngayo nomqophwakhe ekuphileni. Wabhajadiswa begodu nje, kunabantu afunda nabo iBhayibheli. Namhlanjesi u-Maria unomndeni omkhulu wabantu abalotjha uJehova begodu sekanendawo angayibiza ngokuthi likhaya lakhe.

UJehova uyawubusisa umsebenzi wokutjhumayela eTimor-Leste. Nanyana abatjhumayeli abanengi bakhona babhajadiswe eminyakeni elitjhumi edlulileko, inengi labo limaphayona, ziinceku zebandla nabadala. Abanye basebenza ema-ofosini wokutjhugulula, basiza ekugadangiseni iincwadi ezizokufundwa babantu bendawo. Kwangithabisa ukubabona nababhina emhlanganweni, bamomotheka kunye nokubabona bakhula ebuhlotjeni babo noJehova.

BENGISITHABELA ISABELO SAMI

Isabelo sethu eTimor-Liste besihluke khulu endleleni ebesiphila ngayo e-Australia kodwana nanyana kunjalo, bengisithabela. Ngezinye iinkathi besipakelana khulu ngebhesini, ngaphakathi bekunabantu ebebathengisa iimfesi ezonyisiweko nemifino ehlukahlukeneko. Ngamanye amalanga besiraga iimfundo zeBhayibheli emizini emincani netjhisako ngaphakathi, phasi bekungakahlwengeki begodu bewunande uhlangana neenkukhu zigijimisana. Nanyana kunjalo, iintjhijilo ebesiqalana nazo bezingasililitho nangizimadanisa nethabo ebengiba nalo.

Nangiqala emva, ngiyabathokoza ababelethi bami ngombana benze koke abangakwenza bona bangifundise ngoJehova begodu bangisekele nanyana bengibatshwenya ngesikhathi ngisesemutjha. Izaga 22:6 zibe liqiniso ekuphileni kwami. Bobabili, umma nobaba, bayazikhakhazisa ngo-Alex nami, bathabile ngokusibona sisetjenziswa nguJehova. Kusekela ngo-2016, besisolo sisekonzweni yokujikeleza esimini yegatja le-Australasia.

Nanje angikholwa ukuthi khekwaba nesikhathi la bengibona ngathi ukutjhumayela kusitjhijilo. Nje, ngiyakuthanda ukutjhumayela! Ngibone ukuthi naphezu kweentjhijilo esingaqalana nazo, ithabo lamambala lifumaneka ngokulotjha uZimu ngehliziyo yoke. Kwamambala, iminyaka eli-18 yokulotjha uJehova ngino-Alex, ibe minyaka ethabisa khulu kwamambala ekuphileni kwami. Nje ngiyazwisisa ukuba liqiniso kwalokho okwatjhiwo nguDavida nakathi, ‘Boke abaphephela kuwe bathabe. . . . Nalabo abakhathalela ibizo lakho basase kuwe.’—Rhu. 5:12.