Ithando Lisisiza Sihlule Ukusaba

1. Ngiziphi ezinye izinto ezijayelekileko esizisabako?

UBUJAMO obulandekako benzeka kwambala. U-Nestor nomkakhe u-María, bebafuna ukuyotjhumayela la kunetlhogeko yabatjhumayeli khona.b Nabazakukghona ukwenza lokho, bebatlhoga ukwenza amatjhuguluko endleleni abaphila ngayo. Bebasaba ukuthi nabangenza njalo angeze basathaba kwamambala nakufuze baphile ngemali encani kunale ebebanayo. Lokha u-Biniam nakazokuba nguFakazi kaJehova enarheni la umsebenzethu uvinjelwe khona, walemuka ukuthi njengomuntu kaZimu uzokuhlunguphazwa. Lokho kwamthusa tle. Ebekumthusa khulu yindlela umndenakhe ebewuzokusabela ngayo, nawungezwa ukuthi ufumene ikolo etja. U-Valérie wafumana ukuthi unobulwele obuyingozi khulu bekankere begodu kwaba budisi ukuthi afumane udorhodere ozomsiza, ahloniphe iinkolelo zakhe ngokwalokho okutjhiwo yiBhayibheli ngeengazi. Kuyazwisiseka ukuthi bekasaba bona kungenzeka ahlongakale.

2. Kubayini kufuze sisebenze budisi ukuhlula ukusaba kwethu?

² Kghani khewaqalana nokusaba okunjalo? Inengi lethu khelaqalana nakho. Nasingafundi ululawula indlela esisaba ngayo, lokho kuzokwenza bona senze iinqunto ezingasizihle, ezingenza ukuthi ubuhlobo bethu noJehova bungakhambi kuhle. Ngilokho uSathana akufunako begodu ulinga nokusebenzisa ukusaba kwethu bona asenze singayilaleli imithetho kaJehova, ehlanganisa umyalo wokutjhumayela iindaba ezimnandi. (IsAm. 12:17) USathana mumbi, akanazwela begodu unamandla kodwana ungakghona ukuzivikela kuye. Njani?

3. Khuyini engasisiza sihlule ukusaba?

³ Nasiqiniseka ukuthi uJehova uyasithanda nokuthi usehlangothini lethu, singayihlula imizamo kaSathana. (Rhu. 118:6) Ngokwesibonelo, umtloli weRhubo 118:6 waqalana neenkhathi ezigandelelako. Bekanamanaba amanengi, kuhlanganise nawaseenkhundleni eziphezulu (amavesi 9,10). Ngezinye iinkhathi, bekangaphasi kwegandelelo elikhulu (ivesi 13) begodu wafumana ukukhalinywa okuqinileko okuvela kuJehova (ivesi 18). Nanyana kunjalo, umrhubi lo wabhina wathi: “Yeke angesabi.” Khuyini okungenzeka yamenza wazizwa avikelekile godu aphephile? Bekazi ukuthi nanyana uJehova amkhalimile, njengombana anguBabakhe wezulwini bekamthanda khulu. Umrhubi lo bekaqiniseka ukuthi nanyana ngibuphi ubujamo angaqalana nabo, uZimakhe onethando bekahlala akulungele ukumsiza ngananyana ngisiphi isikhathi.—Rhu. 118:29.

4. Ngikuphi ukusaba esingakuhlula nasiqiniseka ukuthi uZimu uyasithanda?

⁴ Kufuze siqiniseke ngokuthi uJehova uyasithanda. Ukuqiniseka okunjalo kuzosisiza sikghone ukuhlula izinto ezintathu esijwayele ukuzisaba; (1) ukusaba ukuthi kungenzeka singakghoni ukutlhogomela umndenethu, (2) ukusaba abantu (3) nokusaba ukufa. Abantu esikhulume ngabo esigabeni sokuthoma bakghona ukuhlula ukusaba abaqalana nakho ngombana bebaqiniseka ngokuthi uZimu uyabathanda.

UKUSABA UKUTHI KUNGENZEKA SINGAKGHONI UKUTLHOGOMELA UMNDENETHU

5. Ngibuphi ubujamo obungenza ihloko yomndeni itshwenyeke? (Qala isithombe esingaphandle.)

⁵ Ihloko yomndeni emKrestu, ikuqala njengokuqakathekileko ukutlhogomela umndenayo. (1 Thim. 5:8) Nawuyihloko yomndeni, mhlamunye mva nje ngesindabelaphi, wabona ngasuthi uzokulahlekelwa msebenzakho. Kungenzeka kwakutshwenya khulu ukuthi nakungenzeka lokho uzowutlhogomela njani umndenakho, uzoyibhadala ngani indlwakho begodu uzozibhadala njani iinsentjenziswa zendlwakho. Kungenzeka bewusaba nokuthi nawungalahlekelwa msebenzakho ngeze wakghona ukufumana omunye. Mhlamunye njengo-Nestor no-María, ekukhulunywe ngabo phambilini, kungenzeka bewungaqiniseki nakuziwa ekutjhugululeni umsebenzakho wokuziphilisa ngombana lokho bekuzokuthinta indlelakho yokuphila. USathana uphumelele khulu, asebenzisa iqhingeli ukwenza abantu basabe.

6. Khuyini uSathana alinga ukusenza siyikholwele?

⁶ USathana ulinga ukusenza sikholelwe ukuthi uJehova akanandaba nathi nokuthi angeze asisize sitlhogomele imindenethu. Umphumela walokho uba kukuthi singaphetha ngokobana kufuze senze nanyana yini ukuthi singalahlekelwa msebenzethu ngitjho nanyana lokho kutjho ukungazilaleli iinkambiso zemiTlolo.

7. Khuyini uJesu asiqinisekisa ngayo?

⁷ UJesu, owazi uBaba ukudlula nanyana ngimuphi omunye umuntu, uyasiqinisekisa ukuthi uZimu ‘uyakwazi esikutlhogako ngitjho singakambawi.’ (Mat. 6:8) UJesu uyazi ukuthi Jehova uhlala akulungele ukusitlhogomela. Njengombana simaKrestu, simalunga womndeni kaZimu. Singaqiniseka ukuthi njengombana ayiHloko yomndeni, uJehova uzokusebenzisa ikambiso ekweyoku-1 kaThimothi 5:8

8. (a) Khuyini ezosisiza sihlule ukusaba ukuthi ngeze sakghona ukutlhogomela umndenethu? (Matewu 6:11) (b) Singabalingisa njani abatjhadikazi abasesithombeni abanikela omunye udadwethu ukudla?

⁸ Nasikholelwa kwamambala ukuthi uJehova uyasithanda begodu uyayithanda imindenethu, angekhe kube budisi ukukholelwa ukuthi sizokufumana nanyana yini esiyitlhogako. (Funda uMatewu 6:31-33.) UJehova uyafuna ukusitlhogomela begodu ungumTlhogomeli onethando nophanako. Nakadala iphasi, wenza okungaphezu kwezinto ezisisekelo esizitlhogako bona siphile. Ngokuzithandela wazalisa iphasi ngezinto ezizosinikela ithabo lamambala. (Gen. 2:9) Ngitjho nanyana ngezinye iinkhathi kungasikunengi esinakho bona siphile, kodwana kuzosisiza ukuhlala sikhumbula ukuthi nanyana kunjalo sisaragela phambili siphila. UJehova akabhalelwa kusinikela lokho esikutlhogako. (Mat. 6:11) Kutlhogeka kwaphela ukukhumbula ukuthi koke esikudelako, akusililitho nakumadaniswa nalokho uZimethu osithandako azosinikela khona, kokubili nje nesikhathini esizako. Ngilokho u-Nestor no-María abakulemukako.—Isa. 65:21, 22.

9. Khuyini ongayifunda esibonelweni saka-Nestor no-María?

⁹ U-Nestor no-María bebathabela ukuphila kwabo okumabothobotho e-Colombia. Bathi, “Sacabanga ngokwenza ukuphila kwethu kube lula sidzimelele emsebenzini wokutjhumayela kodwana besisaba ukuthi ngeze sathaba nasinganayo imali eyaneleko.” Khuyini eyabasiza bahlula ukusabokhu? Bacanga ngezinto ezinengi uJehova abenzela zona ukutjengisa indlela abathanda ngayo. Baqiniseka ukuthi uJehova uzobatlhogomela, balisa imisebenzabo ebhadela kuhle. Bathengisa indlwabo, bafudukela engcenyeni yenarha la kutlhogeka khona abatjhumayeli bevangeli lomBuso. Bazizwa njani ngesiqunto abasithathako? U-Nestor uthi: “Sibone ukubaliqiniso komtlolo kaMatewu 6:33. Akhenge sitlhoge litho begodu siphila ukuphila okuthabisako nje.”

UKUSABA ABANTU

10. Kubayini kuzwisiseka ukuthi umuntu usaba omunye umuntu?

¹⁰ Abantu banomlando omubi wokulimazana. (UMtj. 8:9) Ngokwesibonelo, abantu abazisebenzisi kuhle iinkhundla zabo, iinlelesi zenza ubugebengu obukhambisana nenturhu, kunabanye abaphatha kumbi abanye esikolweni, babathuke bebathusele kuthi abanye bawaphathe kumbi amalunga wemindenabo. Akusirari ukuthi abantu basabana bodwa! USathana ulinga njani ukusebenzisa ubujamobu ukusenza sisabe abantu?

11-12. USathana ukusebenzisa njani ukusaba abantu ukuthi asithusele?

¹¹ USathana usebenzisa ukusaba abantu bona asikatelele ukuthi sibe namabanga asenza sifune ukulisa ukutjhumayela. Ngaphasi kokulawula nguSathana, urhulumende uvimbela umsebenzethu begodu uyasihlunguphaza. (Luk. 21:12; IsAm. 2:10) Ephasini lakaSathaneli, abantu barhatjha iindaba ezimamala ngaboFakazi bakaJehova. Abanye bayawakholwela amanga la, yeke bahlekisa ngathi, basihlasele bebasilimaze. (Mat. 10:36) Inga-kghani indlela kaSathana le iyasirara? Awa. Kade asebenzisa iindlelezi kusukela ekhulwini lokuthoma.—IzE. 5:27, 28, 40.

¹² Ukusaba ukuphikiswa borhulumende akusingiso kwaphela isikhali uSathana asisebenzisako. Kwabanye, ukusaba ukuthi imindenabo izokusabela njani ngeqiniso, kukhulu ukudlula ukusaba ukuhlunguphazwa. Bazithanda khulu iinhlobo zabo begodu bafuna nazo zazi uJehova bezimthande. Kubazwisa ubuhlungu ukuthi iinhlobo zabo azimhloniphi uZimu neenceku zakhe. Kobunye ubujamo, iinhlobo ebeziphikisa ekuthomeni ngokukhamba kwesikhathi zalamukela iqiniso. Akhesithi amalunga womndenethu akasafuni litho elisihlanganisa nabo ngebanga leenkolelo zethu ezitjha. Sizokwenza njani?

13. Ukuqiniseka kwethu ukuthi uZimu uyasithanda kuzosisiza njani siqalane nokulahlwa malunga womndenethu? (IRhubo 27:10)

¹³ Angasiduduza amaqiniso amahle afumaneka kuRhubo 27:10 (Ufunde.) Nasikhumbula indlela uJehova asithanda ngayo, sizizwa sivikelekile nasiqalene nokuphikiswa. Siyaqiniseka ngokuthi uzosivuza ngokukghodlhelela kwethu. UJehova uzosinikela koke esikutlhogako ukuthi siragele phambili ngokuphila, asisize sibe nommoya ophasi begodu sithabe, sihlale sitjhidelene naye. Ngilokho u-Biniam, ekukhulunywe ngaye ekuthomeni, akubonako.

14. Khuyini oyifunda esibonelweni saka-Biniam?

¹⁴ UBiniam waba nguFakazi kaJehova nanyana bekazi ukuthi angaqalana nokuhlunguphazwa okubuhlungu. Tjheja ukuthi ukwazi kwakhe bona uJehova uyamthanda kwamsiza njani u-Biniam ahlule ukusaba abantu. Uthi “ukuhlunguphazwa bekuyinto ebuhlungu khulu ukudlula nanyana yini ongayicabanga kodwana ebengikusaba ukudlula urhulumende bekukuphikiswa mndenami. Bengisaba ukuthi isiqunto sami sokubanguFakazi kaJehova sizokudanisa ubabami ongakholwako nokuthi umndenami uzokucabanga ukuthi ngibhalelwe.” Nanyana kunjalo, u-Biniam bekaqiniseka ukuthi uJehova uhlala anendaba nalabo abathandako. U-Biniam uhlathulula uthi: “Ngacabanga ngendlela uJehova angisiza ngayo nabanye bona sikghodlhelele zomnotho ezibogabogako, ubudisi, ukukhethululwa nokuhlaselwa mphakathi. Bengazi ukuthi nanginamathela kuJehova, uzongibusisa. Ngabotjhwa iinkhathi ezinengana begodu ngihlunguphazwa, ngazibonela ngewami indlela uJehova asisiza ngayo nasimtlhoga khulukhulu lokha nasihlala sithembekile.” UJehova waba nguBaba wamambala ku-Biniam begodu abantu bakhe babamndeni kuye.

UKUSABA UKUFA

15. Kubayini kuzwisiseka ukusaba ukufa?

¹⁵ IBhayibheli liyavuma ukuthi ukufa linaba. (1 Kor. 15:25, 26) Singazizwa sitshwenyeke khulu nasicabanga ngokufa, khulukhulu nange sigula namkha sigulelwa babantu esibathandako. Kubayini sisaba ukufa? Kungombana uJehova wasibumba sinesifiso sokuphila ngokungapheliko. (UMtj. 3:11) Ukuba nombono ofaneleko ngokufa kungasisiza sivikele ukuphila kwethu. Ngokwesibonelo, kungasikhuthaza ukuthi senze iinqunto ezihle naziza endleleni esidla ngayo nesizibandula ngayo. Kungasisiza sifune isizo labodorhodere, imitjhoga etlhogekako besibalekele nokufaka ukuphila kwethu engozini.

16. USathana ukusebenzisa njani ukusaba kwethu ukufa ukuthi asithusele?

¹⁶ USathana uyazi ukuthi siyakuthanda ukuphila. Uthi sizokudela zoke izinto esinazo, ngitjho nobuhlobo bethu noJehova ukwenzela ukuthi siragele phambili nokuphila. (Job. 2:4, 5) Lawa mamala ahlaza! Nanyana kunjalo, nguye “oneendlela zokubangela ukufa.” USathana ulinga ukusebenzisa ukusaba kwethu okungokwemvelo, ukusenza bona silahle uJehova. (Heb. 2:14, 15) Kobunye ubujamo, abakhambisani bakaSathana bathusela ukuthi bazokubulala iinceku zakaJehova nazala ukulahla ukukholwa kwazo. Obunye godu ubujamo, USathana ulinga ukusebenzisa ukugula okumasikizi ukuthi singathembeki kuJehova. Abodorhodere namkha amalunga wemindeni engakholwako bangasigandelela bona samukele ukufakelwa iingazi, okuyinto engakhambisani nomtheko kaZimu. Omunye angasikatelela ukuthi samukele ukulatjhwa okungakhambelani neenkambiso ezingokomTlolo.

17. Ngokukhambisana neyebeRoma 8:37-39 kubayini kunganatlhogeko yokusaba ukufa?

¹⁷ Nanyana singafuni ukufa, siyazi ukuthi uJehova ngekhe alisa ukusithanda ngitjho nanyana singafa. (Funda yebeRoma 8:37-39.) Umngani kaJehova nakahlongakalako, uhlala asemkhumbulwenakhe, ngasuthi usaphila. (Luk. 20:37, 38) Uyakululukela ukumvusa aphile godu. (Job. 14:15) UJehova ubhadale isikolodo esiphezulu khulu ukwenzela bona umuntu “abe nokuphila okungapheliko.” (Jwa. 3:16) Siyazi ukuthi uJehova usithanda kangangani nokuthi unendaba nathi. Yeke, kunokuthi silahle uJehova lokha nasigulako namkha sithuselwa kukufa, sitjhidela kuye ukuthi asiduduze, asinikele ukuhlakanipha namandla. Ngilokho u-Valérie nendodakwakhe abakwenzako.—Rhu. 41:3.

18. Khuyini ongayifunda esibonelweni saka-Valérie?

¹⁸ Nakaneminyaka ema-35, u-Valérie wafumana ukuthi unekankere engakajayeleki neyingozi khulu. Tjheja indlela ithando elamsiza ngayo ukuthi ahlule ukusaba ukufa. Uthi: “Ukwazi lokhu kwatjhugulula ukuphila kwami ngobusuku bunye. Bengitlhoga ukuhlinzwa okukhulu nangizakuragela phambili ngiphila. Ngakhuluma nabodorhodere abanengi kodwana boke akhange bafune ukungihlinza ngaphandle kokusebenzisa iingazi. Bengisaba kodwana nangicabanga ngomthetho kaZimu ngabona ukuthi angekhe ngavuma ukulatjhwa ngokufakelwa iingazi! Ukuphila kwami koke, uJehova ungitjengisile ukuthi ungithanda kangangani. Nje, besenginethuba lokumtjengisa ukuthi nami ngimthanda kangangani. Qobe nangifumana iindaba ezimbi, bengilwela ukuwenza uJehova azikhakhazise ngami, ngingavumeli ukuthi uSathana athumbe. Ekhukhambeni kwesikhathi, ngahlinzwa ngokuphumelelako ngaphandle kokusetjenzizwa kweengazi. Nanyana ukuphila kwami kubogaboga, uJehova uhlala anginikela koke engikutlhogako. Ngokwesibonelo, emhlanganweni waphakathi neveke, ngaphambi kokuthi ngifumane ukuthi ngiphethwe yini kwacocwa ngesihloko esithi, ‘UkuQalana Nobudisi Banamhlanjesi NgesiBindi.’c Isihlokwesi saba lisizo khulu kithi. Besihlala sisifunda qobe. Iinhloko ezinjengalezi nokuba nobuhlobo obuhle noJehova, kunikele mina nobabakwami ukuthula kwangaphakathi bekwasisiza saba nombono omuhle senza neenqunto ezihle.”

UKUHLULA UKUSABA

19. Khuyini ezokwenzeka esikhathini esingaphelisi ihliziyo?

¹⁹ Ngokusizwa nguJehova, amaKrestu ephasini loke ahlule iintjhijilo begodu aphumelela lokha nakaphikiswa nguDeveli. (1 Pit. 5:8, 9) Nawe ungaphumelela. Esikhathini esingaphelisi ihliziyo, uJehova uzokunqophisa uJesu nabakhambisani bakhe ukuthi ‘batjhabalalise imisebenzi kaDeveli.’ (1 Jwa. 3:8) Ngemva kwalokho, abantu bakaZimu abamlotjha basephasini angeze ‘basasaba begodu bazakuba kude nokwethusako.’ (Isa. 54:14; Mik. 4:4) Bekube sikhatheso, kutlhogeka sisebenze budisi ukuthi sihlule ukusaba.

20. Khuyini ezosiza sihlule ukusaba?

²⁰ Kufuze siragele phambili siqinisa ukuthembela kwethu kuJehova ukuthi uyasithanda begodu uyabavikela abantu bakhe. Lokhu sizokwenza kuhle ngokuzindla, nokukhuluma ngendlela uJehova avikele ngayo iinceku zakhe ngaphambilini. Kufuze sikhumbule nendlela uJehova asisize ngayo nasiqalene nobujamo obugandelelako. Ngesizo lakaJehova, singakghona ukuhlula ukusaba!—Rhu. 34:4.