Singakuqinisa Njani Ukukholelwa Kwethu Eenthembisweni ZakaJehova Zephasi Elitjha?

1-2. Khuyini ekufuze siyenze nasisalinde iphasi elitjha?

SIYASITHOKOZA isithembiso sakaJehova sokujamiselela iphasi elimbeli ngephasi elitjha elinokulunga. (2 Pit. 3:13) Nanyana singazi ukuthi iphasi elitjha lizokufika nini kodwana izinto ezenzeka ephasini ziyatjengisa ukuthi sele litjhidele.—Mat. 24:32-34, 36; IzE. 1:7.

² Nanyana sinesikhathi eside kangangani siseqinisweni, soke kufuze siqinise ukukholwa kwethu esithembisweneso. Kubayini? Ngombana ngitjho nokukholwa okuqinileko kungabogaboga. Kuhlekuhle, umpostoli uPowula wathi ukutlhoga ukukholwa ‘sisono esisirareja lula.’ (Heb. 12:1) Bona sivikele ukholwa kwethu kungabogabogi, sitlhoga ukucabangisisa qobe ngobufakazi obutjengisa ukuthi iphasi elitjha sele lizokufika.—Heb. 11:1.

3. Sizokucoca ngani esihlokwenesi?

³ Esihlokwenesi, sizokucoca ngeendlela ezintathu ezingaqinisa ukukholwa kwethu esithembisweni sakaJehova sephasi elitjha: (1) ukucabangisisa ngesihlengo, (2) ukucabanga ngamandla kaJehova (3) nokwenza izinto ezisitjhideza kuJehova. Ngemva kwalokho, sizokucoca ngokuthi umlayezo kaJehova oya kuRhabakhukhu ukuqinisa njani ukukholwa kwethu namhlanjesi. Kokuthoma, khesicoce ngobunye ubujamo ekungenzeka siqalene nabo nje obutlhoga ukukholwa okuqinileko esithembisweni sephasi elitjha elizako.

UBUJAMO OBUTLHOGA UKUKHOLWA OKUQINILEKO

4. Ngiziphi iinqunto ezitlhoga ukukholwa okuqinileko?

⁴ Qobe langa senza iinqunto ezitlhoga ukukholwa okuqinileko. Ngokwesibonelo, senza iinqunto ezimalungana nabangani, zokuzithabisa, ifundo, umtjhado, abantwana nomsebenzi wokuziphilisa. Senza kuhle ngokuzibuza ukuthi, ‘Kghani iinqunto engizenzako zitjengisa ukuthi ngiyaqiniseka bona iphaseli lingelesikhatjhana begodu ingasikade lizokujanyiselelwa liphasi elitjha lakaZimu? Namkha ngikhetha ukwenza izinto ezenziwa ngilabo abangakholelwa ukuthi bangaphila ngokungapheliko?’ (Mat. 6:19, 20; Luk. 12:16-21) Sizokwenza iinqunto ezihlakaniphileko nange siqinisa ukukholelwa kwethu ephasini elitjha elizako ingasikade.

5-6. Kubayini sitlhoga ukukholwa okuqinileko ngeenkhathi ezibudisi? Fanekisa.

⁵ Godu siqalana neenlingo ezitlhoga ukukholwa okuqinileko. Mhlamunye kufuze sikghodlhelelele ukuhlunguphazwa, ukugula okumasikizi namkha ezinye izinto ezingasenza sidane. Ekuthomeni, singabona ngasuthi singakghona ukukghodlhelelela imirarwethu. Imiraro enjengale ithanda ukuthatha isikhathi, yeke sizokutlhoga ukukholwa okuqinileko nasizakukghodlhelela besiragele phambili silotjha uJehova ngethabo.—Rom. 12:12; 1 Pit. 1:6, 7.

⁶ Nasiqalene nemiraro, singezwa ngasuthi iphasi elitjha lakaJehova angeze lifike. Kghani lokho kutjho ukuthi ukukholwa kwethu kuyabogaboga? Awa akusinjalo. Cabanga ngomfanekiso lo. Nakumakhaza khulu ebusika, singacabanga ukuthi ihlobo angekhe lifike kodwana liyafika. Ngendlela efanako, nasidane khulu singazizwa ngasuthi iphasi elitjha angekhe lifike. Nange ukukholwa kwethu kuqinile, siyazi ukuthi iinthembiso zakaZimu zizokuzaliseka. (Rhu. 94:3, 14, 15; Heb. 6:17-19) Njengombana siqiniseka ngalokho, sizokuragela phambili sibeka ukulotjha uJehova qangi ekuphileni kwethu.

7. Kufuze sibalekele ukucabanga okunjani?

⁷ Godu sitlhoga ukukholwa okuqinileko bona senze umsebenzi wokutjhumayela. Abantu abanengi esibatjhumayelako bacabanga ukuthi “iindaba ezimnandezi” malungana nephasi elitjha lakaZimu elizako azisiliqiniso. (Mat. 24:14; Hez. 33:32) Kufuze sitjhejisise bona singabi njengabo bese sizaze lokho uJehova asifundisa khona. Bona lokho kungenzeki, kufuze siragele phambili siqinisa ukukholwa kwethu. Khesicoce ngeendlela ezintathu esingakwenza ngakho lokhu.

CABANGISISA NGESIHLENGO

8-9. Ukucabangisisa ngesihlengo kukuqinisa njani ukukholwa kwethu?

⁸ Enye indlela esingaqinisa ngayo ukukholwa kwethu kucabangisisa ngesihlengo. Isihlengo siyasiqinisekisa ukuthi iinthembiso zakaZimu zizokuzaliseka. Nasicabangisisa ngokuthi kubayini kwaba nesihlengo nokuthi uJehova udele okungangani, siqinisa ukukholwa kwethu ngokuthi isithembiso sakaZimu sokuphila ngokungapheliko ephasini elingcono sizokuzaliseka. Kubayini sitjho njalo?

⁹ Khuyini uJehova ayidelako bona kube nesihlengo? UJehova wathumela iNdodanakhe ayithandako, umnganakhe oseduze, ukusuka ezulwini bona ibelethwe ephasini imumuntu onganasono. Nayisephasini, yakghodlhelela ubuhlungu obuhlukahlukeneko. Yatlhaga beyahlongakala kabuhlungu. UJehova wabhadela kabuhlungu! UZimethu onethando bengekhe avumele iNdodanakhe itlhage beyibulawe kabuhlungu bona asinikele ukuphila okungcono kwesikhatjhana. (Jwa. 3:16; 1 Pit. 1:18, 19) Ngebanga lokuthi uJehova unikele ngeNdodanakhe eligugu, uzokwenza isiqinisekiso sokuthi siphila ngokungapheliko ephasini elitjha.

CABANGA NGAMANDLA KAJEHOVA

10. Ngokwebe-Efesu 3:20, khuyini uJehova akghona ukuyenza?

¹⁰ Indlela yesibili yokuthi siqinise ukukholwa kwethu kukuthi sicabange ngamandla kaJehova. Unamandla wokwenza koke athembise ukukwenza. Abantu abanengi namhlanjesi bacabanga ukuthi ukuphila ngokungapheliko ephasini elitjha angekhe kwenzeka. Nanyana kunjalo, uJehova uhlale enza iinthembiso abantu abangekhe bakghone ukuzizalisa. Angakghona ukukwenza lokho ngombana unguZimu uMninimandla Woke. (Job. 42:2; Mar. 10:27) Akusirari ukuthi usithembisa izinto ezihle.—Funda kwebe-Efesu 3:20.

11. Nikela esibonelo seenthembiso zakaJehova ebesibonakala ngasuthi angekhe senzeka. (Qala ibhoksi elithi, “Ezinye Iinthembiso Ebezibonakala Zingeze Zazaliseka, Zizalisekile.”)

¹¹ Cabanga ngezinye izinto ebezibonakala ngasuthi angekhe zenzeka uJehova azithembisa abantu bakhe esikhathini esidlulileko. Wathembisa u-Abrahama noSara ukuthi bazokuba nendodana nanyana sele baluphele. (Gen. 17:15-17) Watjela u-Abrahama bona iinzukulwana zakhe zizokunikelwa inarha yeKanana. Ngesikhathi iinzukulwana zaka-Abrahama, ama-Israyeli, aziingqila eGibhide, kwabonakala kwangathi isithembiswesi angekhe sizaliseke kodwana sazaliseka. Ekukhambeni kwesikhathi, uJehova watjela u-Elisabethi ukuthi uzokuba nomntwana nanyana sele aluphele. Watjela intombi enguMariya ukuthi izokubeletha iNdodanakhe, lokhu bekuzokuzalisa isithembiso uJehova asenza esimini ye-Edeni eenkulungwaneni zeminyaka ngaphambili!—Gen. 3:15.

12. UJotjhuwa 23:14 no-Isaya 55:10, 11 basiqinisekisa ngani malungana namandla kaJehova?

¹² Nasicabanga ngazo zoke iinthembiso azenzako nangendlela azizalisa ngayo, siyazwisisa ukuthi unamandla bese lokho kuqinisa ukukholelwa kwethu esithembisweni sakhe sephasi elitjha. (Funda uJotjhuwa 23:14; Isaya 55:10, 11.) Lokho kusenza sikulungele khudlwana ukusiza abanye bazwisise ukuthi isithembiso sephasi elitjha akusilibhudango namkha inolwana. UJehova ngokwakhe wakhuluma ngezulu nephasi elitjha wathi: “Amezwi la athembekile begodu aliqiniso.”—IsAm. 21:1, 5.

YENZA IZINTO EZIZOKUTJHIDEZA KUJEHOVA

13. Ukuya esifundweni kungakuqinisa njani ukukholwa kwethu? Hlathulula.

¹³ Indlela yesithathu esingaqinisa ngayo ukukholwa kwethu kusebenzisa isikhathi esinengi senza izinto ezizositjhideza kuZimu. Ngokwesibonelo, cabanga ngendlela esizuza ngayo ngokuba khona esifundweni. U-Anna, osele asebenzele uJehova ngendlela ezihlukahlukeneko iminyaka eminengi, uthi: “Ukuya esifundweni kungisiza ngiqinise ukukholwa kwami. Nanyana isikhulumi singanalo ikghono elihle lokufundisa namkha singakhulumi into etja, ngizokuhlale ngizwa into ezongisiza ngizwisise khudlwana iqiniso leBhayibheli begodu lokho kuqinisa ukukholwa kwami.”b Ukukholwa kwethu kungaqina lokha nasilalela iimpendulo zabafowethu nabodadwethu esifundweni.—Rom. 1:11, 12; 10:17.

14. Ukuba sesimini kukuqinisa njani ukukholwa kwethu?

¹⁴ Singaqinisa ukukholwa kwethu ngokuthi siye esimini. (Heb. 10:23) U-Barbara, osele alotjhe uJehova iminyaka engaphezu kwema-70, uthi: “Ukuya esimini kuqinisa ukukholwa kwami. Lokha nangikhuluma nabantu ngeenthembiso zakaJehova ezihle, lokho kuqinisa ukukholwa kwami.”

15. Isifundo somuntu mathupha sikuqinisa njani ukukholwa kwethu? (Qala neenthombe.)

¹⁵ Cabanga ngokhunye okungaqinisa ukukholwa kwethu: isifundo somuntu mathupha. U-Susan uthi kuyamsiza ukwenza ihlelo lokuthi uzokufunda nini. Uthi: “NgoSondo ngifunda isiThala seveke elandelako. NgoMvulo nangeLesibili ngilungiselela isifundo saphakathi neveke. Ngamalanga aseleko, ngenza isifundo somuntu mathupha.” Ngebanga lokuthi ulandela ihlelo lakhe lokufunda, u-Susan uragela phambili akha ukukholwa kwakhe. U-Irene, osele asebenze isikhathi eside emzimkhulu wephasi loke ukufumane kuqinisa ukukholwa ukufunda ngeemphorofido zeBhayibheli. Uthi: “Kuyangikhuthaza ukubona iimphorofido zakaJehova zizaliseka ngazo zoke iindlela.”c

‘SIZOKUZALISEKA’

16. Kubayini isiqinisekiso uJehova asinikela uRhabakhukhu sisiqinisekisa ngokuthileko nathi namhlanjesi? (Hebheru 10:36, 37)

¹⁶ Abanye abantu bakaJehova sele kusikhathi eside balinde ukuphela kwephasi elimbeli. Ngokombono wabantu, ukuzaliseka kwesithembiso sakaZimu kungabonakala kuriyada. UJehova walungisa ukutshwenyekokho lokha nakaqinisekisa umphorofidi uRhabakhukhu athi: “Umbono uzokuzaliseka ngesikhathi esibekiweko, isikhathi sizokufika msinyana, angekhe sibe mamala. Nanyana ungabonakala ngasuthi uyariyada, hlala uwulindele! Ngombana uzokuzaliseka. Angekhe uriyade!” (Rhab. 2:3) Kghani uZimu wanikela isiqinisekiswesi bona kuzuze uRhabakhukhu yedwa? Namkha amezwi la atjho okuthileko nakithi namhlanjesi? UJehova wanqophisa umpostoli uPowula bona asebenzise amezwi la emaKrestwini alinde iphasi elitjha. (Funda amaHebheru 10:36, 37.) Singaqiniseka ukuthi nanyana isithembiso sokutjhatjululwa kwethu singabonakala ngasuthi siyariyada, ‘sizokuzaliseka. Angekhe siriyade!’

17. Omunye udadwethu wasisebenzisa njani iseluleko uJehova asinikela uRhabakhukhu?

¹⁷ Abantu abanengi abalotjha uJehova basebenzise iseluleko sakaJehova ‘sokuhlala balindile’ nanyana lokho kutjho ukulinda iminyaka eminengi. Ngokwesibonelo, u-Louise wathoma ukulotjha uJehova ngo-1939. Uthi: “Ngesikhatheso, bengicabanga ukuthi i-Arimagedoni izokufika ngaphambi kokuthi ngiqede isikolo. Lokho akhenge kwenzeke. Eminyakeni edlulileko, ukufunda ngabantu abalinda uJehova bona azalisekise iinthembiso zakhe kungisize ngalinda uJehova bona azalise iinthembiso zakhe. Ngifunde ngoNowa, u-Abrahama, uJosefa nabanye. Ukuhlale ukholelwa ukuthi iinthembiso zizokuzaliseka kusize mina nabanye ukuthi siqiniseke bona iphasi elitjha liseduze.” Abanengi abalotjhe uJehova isikhathi eside bavumelana nalokho!

18. Ukuqalisisa indalo kungakuqinisa njani ukukholwa kwethu ngesithembiso sephasi elitjha?

¹⁸ Kuliqiniso ukuthi iphasi elitjha alikafiki. Cabanga ngezinye izinto ezikhona—iinkwekwezi, imithi, iinlwana nabantu. Akekho ongazaza ukuthi izintwezi ngezamambala, ngitjho nanyana khekwaba nesikhathi lapha zingekho khona. Zikhona nje ngombana uJehova uzidalile. (Gen. 1:1, 26, 27) UZimethu uthembisile ukuthi uzokwenza iphasi elitjha. Uzosizalisa isithembisweso. Ephasini elitjha, abantu bazokuthabela ipilo ehle nengapheliko. Singaqiniseka ukuthi iphasi elitjha lizokufika ngesikhathi uZimu asiquntileko.—Isa. 65:17; IsAm. 21:3, 4.

19. Ungakuqinisa njani ukukholwa kwakho?

¹⁹ Okwanje, yenza koke ongakghona ukukwenza bona uqinise ukukholwa kwakho. Thokoza ngesihlengo ngaso soke isikhathi. Cabanga ngamandla kaJehova. Yenza izinto ezikutjhideza kuJehova. Ngokwenza njalo, uzokuba hlangana nalabo “abazuza iinthembiso njengelifa ngokukholwa nangokubekezela.”—Heb. 6:11, 12; Rom. 5:5.