Imibuzo Evela Ebafundini
UJesu nakathomisa isiDlo seKosi saNtambama, bebakuphi abafundi abama-70 abathumele bona bayokutjhumayela? Kghani batjhiya uJesu?
Ngebanga lokuthi abafundi abama-70 bebangekho nakathomisa isiDlo seKosi saNtambama akukafuzi sicabange ukuthi uJesu bekangabamukeli namkha bamtjhiya. UJesu bekafuna ukuba nabapostoli bakhe abali-12 esenzakalweneso.
Boke bebabalandeli bakhe abali-12 nabama- 70. Ebafundini bakhe abanengi uJesu wakhetha amadoda ali-12, wawabiza ngokuthi bapostoli. (Luk. 6:12-16) BekaseGalile lokha ‘abiza abaliTjhumi namBili’ begodu “wabathuma bona bayokutjhumayela ngomBuso kaZimu nokuthi balaphe,” abagulako. (Luk. 9:1-6) Ngemva kwesikhathi aseJudiya, uJesu ‘wakhetha abanye abama-70 ‘wabathuma ngababili.’ (Luk. 9:51; 10:1) Kubonakala ngasuthi uJesu bekanabafundi abanengi eendaweni ezihlukahlukeneko ebebatjhumayela ngomlayezwakhe.
AmaJuda ebekabalandeli bakaJesu, kungenzeka bekagidinga iPhasika qobe mnyaka, nemindenawo. (Eks. 12: 6-11, 17-20) Nasele kutjhidela isikhathi uJesu azokuhlongakala ngaso, yena nabapostoli bakhe baya eJerusalema. Nanyana kunjalo, akhenge abawe abalandeli bakhe boke ebebaseJudiya, eGalile nePereya ukuthi beze bazokugidinga ndawonye iPhasika. Kuyakhanya ukuthi uJesu bekafuna ukuba nabapostoli bakhe esenzakalwenesi. Wathi kibo: “Bengifisa khulu ukudla iPhasikeli nani ngaphambi kobana ngitlhage.”—Luk. 22:15.
Bekunebanga elizwakalako lokwenza lokho. UJesu bekazokuhlongakala msinyana ‘njengeMvana kaZimu esusa isono sephasi.’ (Jwa. 1:29) Bekazokuhlongakalela eJerusalema, lapho umhlatjelo oya kuZimu ebewunikelwa khona. Imvu yePhasika beyikhumbuza ama-Israyeli ukuthi uJehova uwasindise eGibhide. Umhlatjelo kaJesu bewuzokwenza okungaphezu kwalokho, bewuzokutjhaphulula abantu boke esonweni nekufeni. (1 Kor. 5:7, 8) Ngebanga lomhlatjelo kaJesu, abapostoli abaliTjhumi namBili bebazokuba sisekelo samalunga webandla lobuKrestu. (Efe. 2:20-22) Okukarisako, kukuthi idorobho elicwengileko iJerusalema ‘linesisekelo samatje ali-12’ atlolwe ‘amagama ali-12 wabapostoli abali-12 beMvana.’ (IsAm. 21:10-14) Iye, abapostoli abathembekileko bebazokuba nendima ekulu ekuzaliseni umnqopho kaZimu. Yeke kuyazwisiseka ukuthi kubayini uJesu bekafuna ukuba nabo ngePhasika lamaswaphela nokuthonyiswa kwesiDlo seKosi saNtambama.
Abalandeli abama-70 nabanye abafundi akhenge bahlanganyele esidlweni noJesu. Nanyana kunjalo, abalandeli ebebathembekile bazokuzuza esiDlweni seKosi saNtambama. Boke laba ekukhambeni kwesikhathi ababamaKrestu azesiweko bazokungena esivumelwaneni somBuso, uJesu akhuluma ngaso nabapostoli bakhe ngobusukobo.—Luk. 22:29, 30.