Ungariyadi Ukubhajadiswa

1. Ngimaphi amanye amabanga aqakathekileko wokubhajadiswa?

KGHANI uyamthanda uJehova uZimu, okuphe izipho ezinengi ezihlanganisa ukuphila? Uyafuna ukutjengisa ukuthi uyamthanda? Indlela ongatjengisa ngayo kukuthi uzinikele kuye begodu ubhajadiswe emanzini. Nawenza njalo uzokuba lilunga lomndeni kaJehova. UBabakho, omnganakho uzokunqophisa begodu uzokutlhogomela ngombana uzokuba ngewakhe. (Rhu. 73:24; Isa. 43:​1, 2) Ukuzinikela nokubhajadiswa kukunikela ithemba lokufumana ukuphila okungapheliko.—1 Pit. 3:21.

2. Sizokucoca ngani esihlokwenesi?

² Ikhona na into ekuvimbela bona ubhajadiswe? Nangabe kunjalo, awusiwedwa. Iingidi zabantu ngaphambi kwakho kutlhogeke zenze amatjhuguluko endleleni yokuziphatha neyokucabanga bona zilungele ukubhajadiswa. Nje sezilotjha uJehova ngethabo nangetjiseko. Khuyini ongayifunda ebantwini ababhajadiswa ekadeni? Sizokucoca ngeenqabo abaqalana nazo neemfundo ongazifunda kibo.

ABANTU BESAMARIYA BABHAJADISWA

3. Ngimaphi amatjhuguluko abantu beSamariya ebekufuze bawenze bona babhajadiswe?

³ Ngesikhathi sakaJesu, abantu beSamariya bebasiqhema sezekolo. Inengi labo belihlala edorobheni leTjhekemu neleSamariya etlhagwini yeJudiya. Ngaphambi kobana abantu beSamariya babhajadiswe, bekufuze bamukele woke amezwi kaZimu begodu bafunde kiwo. Abantu beSamariya bebakholelwa ukuthi ziincwadi zeBhayibheli ezihlanu kwaphela ezivela kuZimu yincwadi kaGenesisi ukuya kuDuteronomi kuhlanganise nencwadi kaJotjhuwa. Ngokwesithembiso esitlolwe kuDuteronomi 18:​18, 19, bebalindele bona uMesiya eze. (Jwa. 4:25) Bona babhajadiswe bekufuze bamukele uJesu njengoMesiya othenjisiweko. “AmaSamariya amanengi” amamukela. (Jwa. 4:39) Ekuthomeni amaKrestu amanengi bewamaJuda, nje-ke amaSamariya amanengi kungenzeka kwatlhogeka bona enze amatjhuguluko endleleni ebewaqala ngayo amaJuda.—Luk. 9:​52-54.

4. Ngokomtlolo wezEnzo 8:​5, 6, 14, abanye abantu beSamariya basabela njani etjumayelweni kaFlebhe?

⁴ Khuyini eyasiza abantu beSamariya bona babhajadiswe? UFlebhe umvangeli nakathoma “ukutjhumayela ngoKrestu kibo” abanye abantu beSamariya ‘bamukela ilizwi lakaZimu.’ (Funda izEnzo 8:​5, 6, 14.) UFlebhe bekamJuda nanyana kunjalo akhenge bamphikise. Kungenzeka bakhumbula amavesi avela eencwadini ezihlanu ezitjengisa ukuthi uZimu akakhethi. (Dut. 10:​17-19) Kwesinye isenzakalo, ‘batjheja lokho uFlebhe akutjhoko’ malungana noKrestu begodu bamukela ukuthi uFlebhe uthunywe nguZimu. UFlebhe bekenza iimbonakaliso ezinengi ebezihlanganisa ukulapha abagulako nokukhipha imimoya emimbi.—IzE. 8:7.

5. Khuyini ongayifunda ebantwini beSamariya?

⁵ Abantu beSamariya bebangavumela ibandlululo namkha ukungabi nelwazi ukuthi kubakhandele bona bangathuthuki. Kodwana akhenge bakuvumele lokho kwenzeke. Abantu beSamariya akhenge bariyade nakufuze babhajadiswe nabalemuka ukuthi abakufundiswe nguFlebhe kuliqiniso. IBhayibheli lithi: “Kuthe nabakholwa uFlebhe, obekatjhumayela iindaba ezimnandi zomBuso kaZimu nangegama lakaJesu Krestu, babhajadiswa, kokubili amadoda nabafazi.” (IzE. 8:12) Kghani uyaqiniseka na ukuthi iliZwi lakaZimu liliqiniso nokuthi aboFakazi bakaJehova bafunde ukuthanda abantu njengombana kwatjho uJesu? (Jwa. 13:35) Nakunjalo, ungasabi ukubhajadiswa, qiniseka ngokuthi uJehova uzokubusisa.

6. Isibonelo sakaRuben singakusiza njani?

⁶ URuben weGermany wakhulela emndenini waboFakazi. Njengomuntu omutjha uRuben bekazaza ukuba khona kwakaJehova. Wakuhlula njani ukuzaza? Nakalemuka ukuthi akanalwazi, waqunta ukwenza okuthileko ngalokho. Uthi: “Esifundweni sami seBhayibheli, ngaqalana nokuzaza ebenginakho. Ngafunda ngeenhloko ezikhuluma ngokuziphendukela kwemvelo iinkhathi ezimbalwa.” Wafunda incwadi ethi, Is There a Creator Who Cares About You? Incwadi le yamsiza khulu uRuben bona aqinise ukukholwa kwakhe. Wacabanga wathi: ‘Ngiyaqiniseka ukuthi uJehova umumuntu wamambala.’ Nakavakatjhele emzimkhulu wephasi loke, uRuben wathoma ukuthanda abafowethu nabodadwethu bephasini loke ababumbeneko. Nakabuyela eGermany, uRuben wabhajadiswa nakaneminyaka eli-17. Nawungaqiniseki ngezinto ozifundako, qinisa ukukholwa kwakho wenze irhubhululo eencwadini zethu. Ungakuhlula ukuzaza ngokuba ‘nelwazi elinembileko.’ (Efe. 4:​13, 14) Nawuzwa ngeendaba ezikhuluma ngethando labantu bakaJehova bakezinye iinarha begodu ubone nobufakazi ebandleni lakho, ithando onalo ngabafowenu bephasini loke lizokukhula.

USAWULA WETARSUSI WABHAJADISWA

7. Ngiyiphi indlela yokucabanga uSawula ebekufuze ayilungise?

⁷ Cabanga nesibonelo sakaSawula weTarsusi. Bekasifundiswa somThetho wamaJuda begodu bekamumuntu oqakatheke khulu emaJudeni. (Gal. 1:​13, 14; Flp. 3:5) Lokha amaJuda amanengi aqala amaKrestu njengeenhlubuki, uSawula wawahlunguphaza kabuhlungu. Ngokungazi wacabanga ukuthi wenza intando kaZimu. (IzE. 8:3; 9:​1, 2; 26:​9-11) USawula bekufuze alindele ukuthi naye uzokuhlunguphazwa nakafuna ukwamukela uJesu bekabhajadiswe njengomKrestu.

8. (a) Khuyini eyasiza uSawula wabhajadiswa? (b) NgokwezEnzo 22:​12-16, u-Ananiyasi wamsiza njani uSawula? (Qala isithombe.)

⁸ Khuyini eyasiza uSawula wabhajadiswa? Asezulwini uJesu wakhuluma noSawula, umkhanyo omkhulu waphophaza uSawula. (IzE. 9:​3-9) Amalanga amathathu, wazila ukudla begodu wacabangisisa ngalokho okwenzeke kuye. USawula waqiniseka ngokuthi uJesu unguMesiya nabalandeli bakhe basekolweni yeqiniso. Kungenzeka uSawula wazisola khulu ngebanga lokuhlanganyela ekubulaweni kwakaStefani. (IzE. 22:20) Ngemva kwamalanga amathathu, u-Ananiyasi obekamfundi watjhidela kuSawula, wamlapha, amehlwakhe avuleka begodu wamkhuthaza bona angariyadi ukubhajadiswa. (Funda izEnzo 22:​12-16.) USawula wazithoba wamukela isizo nepilo etjha.—IzE. 9:​17, 18.

9. Singafundani kuSawula?

⁹ Kuneemfundo esingazifunda kuSawula. Bekangavumela ukuzikhakhazisa nokusaba abantu kumenze angabhajadiswa. Kodwana akhenge akuvumele lokho bona kwenzeke. USawula wathobeka wamukela iqiniso ngoKrestu. (IzE. 26:​14, 19) USawula bekazimisele ukuba mKrestu ngitjho nanyana bekazi bona uzokutjhutjhiswa ngebanga lalokho. (IzE. 9:​15, 16; 20:​22, 23) Ngemva kokubhajadiswa, waragela phambili athembela kuJehova bona amsize ngeentjhijilo ezihlukahlukeneko. (2 Kor. 4:​7-10) Nawubhajadiswako uba nguFakazi kaJehova uzokuqalana neenlingo ezinengi kodwana uzokufumana isizo olitlhogako. Qiniseka bona uZimu noKrestu bazokuhlala bakusiza.—Flp. 4:13.

10. Ungazuza njani esibonelweni saka-Anna?

¹⁰ U-Anna wakhulela emndenini we-Kurdish, e-Eastern Europe. Ngemva kokuthi ummakhe abhajadisiwe, u-Anna wathoma ukufunda iBhayibheli ngesikhatheso bekaneminyaka eli-9. Kodwana lokho kwabanga imiraro nomndenakhe, ebewuhlala ekhabo-Anna. Iinhlobo zakhe bezikholwa bona uhlazise umndeni ngokutjhiya ikolwazo. U-Anna nakaneminyaka eli-12, wabawa uyise bona ufuna ukubhajadiswa. Uyise bekafuna ukwazi bona leso siqunto sakhe namkha kunomuntu omkatelela bona abhajadiswe. Waphendula wathi, “Ngithanda uJehova.” Uyise wavuma bona abhajadiswe. Ngemva kwalokho, waqalana nemihlobohlobo yokuphathwa kumbi. Esinye isihlobo sakhe sathi kuye: “Bekungaze kube ngcono ngathana bewuziphatha kumbi ngokwamabhayi namkha ubhema kunokuthi ube nguFakazi kaJehova.” U-Anna wenzani ngalokho? Uthi, “UJehova wangisiza ngaba namandla, umma nobaba nabo bangisekela khulu.” U-Anna unerhelo leenkhathi uJehova amsiza ngazo. Unande aliqala ukwenzela bona angalibali indlela uJehova amsiza ngayo. Nangabe usaba ukuhlunguphazwa, khumbula bona uJehova uzokusiza nawe.—Heb. 13:6.

UKORNELIYASI WABHAJADISWA

11. UKorneliyasi waqalana nabuphi ubujamo?

¹¹ IBhayibheli isinikela nesibonelo esihle sakaKorneliyasi. ‘Bekasikhulu sebutho’ bekunguye onqophisa amasotja weRoma angaba li-100. (IzE. 10:1) Ngebanga lalokho kungenzeka bekahlonitjhwa emphakathini nebusotjeni. Bekanomusa ‘apha abadududu’ izipho ezinengi. (IzE. 10:2) UJehova wathumela umpostoli uPitrosi kuye bona ayokutjhumayela iindaba ezimnandi. Kghani indlela uKorneliyasi ebekaziwa ngayo yamenza watshwilisa ukubhajadiswa?

12. Khuyini eyasiza uKorneliyasi wabhajadiswa?

¹² Khuyini eyasiza uKorneliyasi wabhajadiswa? Sifunda bona “yena nomndenakhe bebasaba uZimu.” Begodu uKorneliyasi bekathandaza kuZimu qobe. (IzE. 10:2) UPitrosi nakatjhumayela iindaba ezimnandi kuKorneliyasi, yena nomndenakhe bazamukela begodu babhajadiswa. (IzE. 10:​47, 48) Siyaqiniseka ukuthi uKorneliyasi bekazimisele ukwenza amatjhuguluko atlhogekako bona yena nomndenakhe balotjhe uJehova.—Jotj. 24:15; IzE. 10:​24, 33.

13. Ungafundani kuKorneliyasi?

¹³ NjengoSawula, uKorneliyasi bekangavumela isikhundla sakhe bona simenze angabi mKrestu. Kodwana akhenge akuvumele lokho kwenzeke. Kghani ukwamukela iqiniso kutjho ukuthi kufuze wenze amatjhuguluko amakhulu ekuphileni kwakho? Nangabe kunjalo, uJehova uzokuba Msizakho. Uzoyibusisa imizamwakho yokumlotjha ngokuvumelana neenkambiso zeBhayibheli.

14. Isibonelo saka-Tsuyoshi singakusiza njani?

¹⁴ U-Tsuyoshi we-Japan, bekufuze enze amatjhuguluko emsebenzini ebekawenza bona alungele ukubhajadiswa. Bekamsizi womphathi wesikolo esiphezulu ebesifundisa abantu bona bangawahlela njani amabhlomu. Lokha umphathi nakabhalelwa kukuya emngcwabeni, u-Tsuyoshi bekaya ayomjamela emasikweni ebewenziwa maBhuda. U-Tsuyoshi wafunda iqiniso ngabantu abahlongakeleko, umsebenzakhe wakwenza kwaba budisi bona abhajadiswe. Wakhetha ukungasahlanganyeli emasikweni lawo. (2 Kor. 6:​15, 16) U-Tsuyoshi wakhuluma nomphathakhe ngendaba le. Waba yini umphumela? U-Tsuyoshi wakghona ukuragela phambili asebenza kodwana bekangasahlanganyeli emasikweni ebewenziwa. Ngemva komnyaka athome ukufunda iBhayibheli, wabhajadiswa.a Nawutlhoga ukwenza amatjhuguluko emsebenzinakho bona uthabise uZimu, qiniseka ukuthi uJehova uzokutlhogomela wena nomndenakho.—Rhu. 127:2; Mat. 6:33.

ABANTU BEKORINTE BABHAJADISWA

15. Khuyini ekungenzeka beyikhandela abantu beKorinte bona bangabhajadiswa?

¹⁵ Abantu ebebahlala edorobheni leKorinte ekadeni, bebaziwa ngokuthanda izinto zakanokutjho nangokuziphatha kumbi. Abantwabo bebaphila ngendlela uZimu angayamukeliko. Nje-ke bekuzokuba budisi khulu bona abantu abahlala endaweni enjalo balotjhe uJehova. Nanyana kunjalo, umpostoli uPowula nakeza edorobheneli azokutjhumayela iindaba ezimnandi ezimalungana noKrestu, ‘abanengi beKorinte abezwako bathoma ukukholwa, babhajadiswa.’ (IzE. 18:​7-11) Ngemva kwalokho, iKosi uJesu Krestu yabonakala kuPowula embonweni yathi: “Nginabantu abanengi edorobheneli.” UPowula waragela phambili atjhumayela khona umnyaka nesiquntu.

16. Khuyini eyasiza abanye eKorinte bona bahlule iinqabo bebabhajadiswe? (2 Korinte 10:​4, 5)

¹⁶ Khuyini eyasiza abantu beKorinte bona babhajadiswe? (Funda yesi-2 kwebeKorinte 10:​4, 5.) IliZwi lakaZimu nomoyakhe ocwengileko kwabasiza bona benze amatjhuguluko amakhulu ekuphileni kwabo. (Heb. 4:12) Labo abamukela iindaba ezimnandi ezimalungana noKrestu eKorinte bakghona ukulahla imikghwa njengokudakwa, ukweba nokuthandana kwabantu bobulili obufanako.—1 Kor. 6:​9-11.b

17. Khuyini oyifundako ebantwini beKorinte?

¹⁷ Tjheja ukuthi abanye eKorinte bebadzimelele khulu emikghweni emimbi ebekufuze bayihlule, akhenge baphethe ngokuthi kuzokuba budisi kibo bona babe maKrestu. Basebenza budisi bona bakhambe endleleni encani bona bafumane ukuphila okungapheliko. (Mat. 7:​13, 14) Kghani ukufumana kubudisi ukulisa umukghwa omumbi okukhandela bona ubhajadiswe? Ungalisi ukulwisana nomukghwa loyo. Bawa uJehova akuphe umoyakhe ocwengileko bona ukusize ulwisane nesifiso sokwenza okumbi.

18. Ufundani esibonelweni saka-Monika?

¹⁸ UMonika ohlala e-Georgia, wasebenza budisi ukulisa ukukhuluma ngendlela engakahlanzeki nokuzithabisa okungakahlwengeki bona alungele ukubhajadiswa. Uthi: “Ngaphambi kokubhajadiswa, umthandazo bewunginikela amandla. UJehova bekazi ukuthi ngiyafuna ukwenza okulungileko, bekahlala angisiza begodu anginqophisa.” Nakaneminyaka eli-16, uMonika wabhajadiswa. Kghani kunemikghwa ekufuze uyilise ngebanga lokufuna ukulotjha uJehova ngendlela ayamukelako? Ragela phambili umbawa amandla wokwenza amatjhuguluko. UJehova uphana ngomoyakhe ocwengileko.—Jwa. 3:34.

UKUKHOLWA KWAKHO KUNGASUSA IINTABA

19. Khuyini engakusiza uhlule imiraro emikhulu efana neentaba? (Qala isithombe.)

¹⁹ Qiniseka ngokuthi uJehova uyakuthanda begodu ufuna ube lilunga lomndenakhe. Lokhu kuliqiniso ngitjho nanyana uqalene nemiraro ekukhandela bona ubhajadiswe. UJesu watjela isiqubuthu sabafundi bakhe bekadeni, wathi: “Naningaba nokukholwa okulingana nembewu yemastedi, nizokuthi entabeni le, ‘Suka lapho uye lapha,’ izokusuka begodu ayikho into engekhe yenzeke kini.” (Mat. 17:20) Abantu ebebalapho bebaphile noJesu iminyaka embalwa, ukukholwa kwabo bekusakhula. UJesu wabaqinisekisa ngokuthi nabangaba nokukholwa okuqinileko, uJehova bekazobasiza bona bahlule imiraro efana nentaba. Nawe uJehova uzokusiza wenze okufanako.

20. Iimbonelo zamaKrestu wekadeni nezamaKrestu wesikhathi sethu, zikukhuthaze njani?

²⁰ Nawulemuka ukuthi kunezinto ezikukhandela bona ubhajadiswe, ungariyadi ukuthatha amagadango wokulwisana nazo. Fumana amandla eembonelweni ezingakukhuthaza zamaKrestu wekadeni newesikhathi sethu. Kwangathi isibonelo sawo singakukhuthaza bona uzinikele kuJehova ubhajadiswe. Leso siqunto esihle khulu ongasithatha.