Bafowethu Abatjha Lingisani UMarkosi NoThimothi

1-2. Ngiziphi iintjhijilo ebezingakhandela uMarkosi noThimothi ukusiza abanye khulu?

BAFOWETHU abasese batjha kghani nifuna ukusebenzela uJehova khudlwana benisize abanye ebandleni? Siyaqiniseka ukuthi niyafuna. Kusithabisa khulu ukubona abafowethu abasese batjha abanengi bazimisele ukusiza abanye. (Rhu. 110:3) Nanyana kunjalo, kungenzeka kungabi bulula ukusebenzela uJehova khudlwana. Kghani usaba ukusebenzela uJehova ngebanga lokobana awazi ukuthi ukuphila kwakho kuzokuba njani? Kghani khewasaba ukwamukela isabelo ngebanga lokusaba ukuthi uzokubhalelwa kusenza kuhle? Nange kunjalo, awusingewokuthoma ukuzizwa njalo.

² UMarkosi noThimothi nabo bebazizwa njalo. Nanyana bebangazi ukuthi ukuphila kwabo kuzokutjhuguluka njani bakhetha ukwenzela uJehova okungeziweko. Kungenzeka uMarkosi bekasahlala ekhabo nonina lokha umpostoli uPowula noBharinabhasi nabamumema bona akhambe nabo ekhambweni labo lokuthoma baziinthunywa zevangeli. (IzE. 12:​12, 13, 25) Kodwana uMarkosi wakhamba ekhaya bona enzele uJehova okungeziweko. Kokuthoma, wathuthela e-Anthiyokiya. Ngokulandelako waphekelela uPowula noBharinabhasi kezinye iindawo ezikude. (IzE. 13:​1-5) Ngokufanako, kungenzeka uThimothi naye bekasahlala nababelethi bakhe lokha uPowula nakambawa bona akhambe naye emsebenzini wokutjhumayela. UThimothi bekasese mutjha yeke kungenzeka bekazizwa angakakulungeli ukukhamba noPowula. (Madanisa yoku-1 Korinte 16:​10, 11 neyo-1 Thimothi 4:12) Nanyana kunjalo, wasamukela isimemo sakaPowula begodu wafumana iimbusiso ezinengi ngebanga lokusebenzela uJehova.—IzE. 16:​3-5.

3.(a) Sazi njani ukuthi uPowula bekamthanda uMarkosi noThimothi? (2 Thimothi 4:​6, 9, 11) (Qala neenthombe.) (b) Sizokucoca ngani esihlokwenesi?

³ UMarkosi noThimothi bafunda ukuthi bangayenza njani imisebenzi eminengi nanyana basese batjha. UPowula wawathanda amasokana la kangangobana nasele azokuhlongakala wawabawa bona eze kuye. (Funda yesi-2 kaThimothi 4:​6, 9, 11.) Ngiziphi iimfanelo ezihle uMarkosi noThimothi ebeba nazo ezenza uPowula wabathanda bewabathemba? Abafowethu abasese batjha bangabalingisa njani? Iseluleko sakaPowula sethando singabasiza njani abafowethu abasese batjha namhlanjesi?

LINGISA UMARKOSI, ZIMISELE UKUSIZA

4-5. UMarkosi watjengisa njani ukuthi uzimisele ukusiza abanye?

⁴ Ukusiza abanye kungatjho ukusebenza budisi begodu siragele phambili nokubasiza nanyana kubudisi ukwenza njalo. UMarkosi usibekela isibonelo esihle endabeni le. UMarkosi kungenzeka wezwa ubuhlungu bewadana ngebanga lokuthi uPowula akhenge afune ukukhamba naye ekhambweni lakhe lokutjhumayela elilandelako. (IzE. 15:​37, 38) Kodwana lokho akhenge kuvimbe uMarkosi bona aragele phambili nokusiza abafowabo nabodadwabo.

⁵ UMarkosi wakhamba nomzawakhe uBharinabhasi bayokutjhumayela kwenye indawo. Ngemva kweminyaka engaba li-11 uMarkosi bekahlangana nalabo abasekela uPowula nakabotjhwa kokuthoma eRoma. (Flm. 23, 24) UPowula walithokoza khulu isekelo lakaMarkosi bewambiza ngokuthi “mthombo wenduduzo ekulu.”—Kol. 4:​10, 11.

6. UMarkosi wazuza njani ngokuba nabangani abamaKrestu avuthiweko? (Qala nomtlolo waphasi.)

⁶ UMarkosi kwamzuzisa ukuba mngani namaKrestu avuthiweko. Ngemva kokuhlala isikhatjhana noPowula eRoma, wakhamba wayokusebenza noPitrosi eBhabhiloni. Baba bangani abatjhideleneko kangangobana uPitrosi wambiza ngokuthi ‘nguMarkosi indodanami.’ (1 Pit. 5:13) Njengombana bebasebenza bobabili kungenzeka uPitrosi wacocela umnganakhe osese mutjha iindaba ezinengi ezikarisako ezimalungana nokuphila nomsebenzi kaJesu, ngokukhamba kwesikhathi uMarkosi wazitlola encwadini ebizwa ngegama lakhe.a

7. Umfowethu osesemutjha u-Seung-Woo wasilingisa njani isibonelo sakaMarkosi? (Qala nesithombe.)

⁷ UMarkosi wahlala amajadu ngokulotjha uJehova begodu wahlala atjhidelene nabafowethu abavuthiweko. Ungamlingisa njani uMarkosi? Nange ungakafumani ilungelo elithileko ebandleni mhlamunye lokuba yinceku esizako namkha umdala bekezela uragele phambili ufuna ezinye iindlela zokusebenzela uJehova nebandla. Ngilokho okwenzeka ku-Seung-Woo ongumdala nje. Nakasese mutjha bekahlala azimadanisa nabanye abafowethu ebebalingana naye. Abanye babo abadala babanikela izabelo ezingeziweko ukudlula yena. U-Seung-Woo wezwa ubuhlungu bewadana watjela nabafowethu abavuthiweko ngendlela azizwa ngayo. Omunye umdala wamtjela ukuthi arage nokwenza izinto ezihle bona asize abanye nanyana ngezinye iinkhathi abanye abantu bangekhe bazazi izinto ezihle azenzako. Iselulekweso samsiza khulu u-Seung-Woo bona azimisele ukusiza abalupheleko nabantu abatlhoga isithuthi sokuya esifundweni. Nakaqala emva uthi: “Ngazwisisa bona kutjho ukuthini ukusiza abanye ngokuzeleko. Ngafumana ithabo elikhulu ngebanga lokusiza abanye.”

LINGISA UTHIMOTHI NGOKUBA NENDABA NABANYE ABANTU

8. Kubayini uPowula akhetha uThimothi bona akhambe naye? (Filipi 2:​19-22)

⁸ UPowula bekatlhoga abafowethu abanesibindi bona bakhambe naye nakabuyela emadorobheni ahlunguphazwa kiwo ngaphambilini. Kokuthoma wakhetha umKrestu onelemuko uSilasi bona akhambe naye. (IzE. 15:​22, 40) Ngokukhamba kwesikhathi, uPowula wakhetha noThimothi bona akhambe naye. Kubayini uPowula bekafuna ukukhamba noThimothi? Kungebanga lokuthi abafowethu bendaweni uThimothi ebekavela kiyo bakhuluma izinto ezihle ngaye. (IzE. 16:​1, 2) UThimothi bekanendaba khulu nabanye abantu.—Funda kwebeFilipi 2:​19-22.

9. UThimothi watjengisa njani ukuthi unendaba nabafowabo nabodadwabo?

⁹ Kusukela ekuthomeni nakasebenza noPowula, uThimothi watjengisa ukuthi unendaba nabanye ukudlula yena. Kungebangelo uPowula nakakhamba eBheriya bekazi ukuthi uThimothi uzokukghona ukukhuthaza abafundi abatjha bendaweni leyo. (IzE. 17:​13, 14) Ngesikhatheso uThimothi kungenzeka besele afunde okunengi kuSilasi naye owahlala eBheriya. Ngokukhamba kwesikhathi, uPowula wathumela uThimothi eThesalonika bona ayokuqinisa amaKrestu wedorobhenelo. (1 Thes. 3:2) Ngaphezu kweminyaka eli-15, uThimothi wafunda ‘ukulila nabalilako’ begodu waba nesirhawu ebantwini abatlhagako. (Rom. 12:15; 2 Thim. 1:4) Abafowethu abasese batjha abamaKrestu bangamlingisa njani uThimothi?

10. Umfowethu u-Woo Jae wafunda njani ukuba nendaba nabanye abantu?

¹⁰ Umfowethu u-Woo Jae wafunda ukuba nendaba khulu nabanye abantu. Nakasese mutjha u-Woo Jae bekakufumana kubudisi ukukhuluma nabafowethu nabodadwethu abalupheleko. Yeke bekabalotjhisa kwaphela eWolweni lomBuso adlule. Omunye umdala watjela u-Woo Jae bona acoce nabantu ahlanganyela nabo, mhlamunye angathoma ngokubatjela ukuthi khuyini ayithandako ngabo. Umdala lo wamtjela nokuthi acabange ngokuthi abanye abantu bathandani. U-Woo Jae wasisebenzisa iselulekweso nakakhuluma nabanye abantu. Namhlanjesi u-Woo Jae sekamdala ebandleni uthi: “Sengikufumana kulula ukukhuluma nabantu beminyaka ehlukahlukeneko. Kuyangithabisa nokwazi ukuthi nje sengibuzwisisa ngcono ubujamo obuhlukahlukeneko abantu abaqalene nabo. Lokho kungisiza ngazi ukuthi abafowethu nabodadwethu batlhogani nokuthi khuyini engingayenza bona ngibasize.”

11. Abafowethu abasese batjha bangatjengisa njani ukuthi banendaba nabantu bebandleni? (Qala nesithombe.)

¹¹ Bafowethu abasese batjha nani ningakghona ukutjengisa ukuthi ninendaba nabanye abantu. Nanisesifundweni zinikeleni isikhathi sokukhuluma nabantu boke. Babuzeni ukuthi baraga njani ngemva kwalokho nilalele. Ukwenza njalo kuzonisiza nazi ukuthi ningabasiza njani nabatlhoga isizo. Mhlamunye ungalemuka ukuthi abatjhadikazi abalupheleko batlhoga isizo lokusebenzisa i-JW Library^®. Namkha ungafumana ukuthi abanamuntu abangasebenza naye esimini. Kghani ungabasiza ngokubatjengisa ukuthi isetjenziswa njani i-JW Library^® namkha ngokukhamba nabo esimini? Nawusiza abafowenu nabodadwenu ngendlela le uzokuba sibonelo esihle ebandleni.

ISELULEKO SAKAPOWULA SINGAKUSIZA

12. Abafowethu abasese batjha bangazuza njani eselulekweni uPowula asinikela uThimothi?

¹² UPowula wanikela uThimothi iseluleko esamsiza wathaba begodu walotjha uZimu ngokuzeleko. (1 Thim. 1:18; 2 Thim. 4:5) Nange umfowethu osese mutjha iseluleko sakaPowula singakusiza. Njani? Funda iincwadi ezimbili uPowula azitlolela uThimothi zifunde ngasuthi zitlolelwe wena, ubone ukuthi iselulekweso ungasibenzisa njani ekuphileni kwakho. Cabanga ngeembonelo ezilandelako.

13. Khuyini engakusiza uthembeke kuJehova?

¹³ “Zibandule ngomnqopho wokuzinikela kuZimu.” (1 Thim. 4:7b) Khuyini ukuzinikela kuZimu? Kuthembeka kuJehova nokwenza izinto ezimthabisako. Ngebanga lokuthi asibelethwa sinefanelo le kufuze silwele ukuba nayo. Njani? Igama lesiGirigi elithi “zibandule” kanengi lisetjenziswa ngomqondo wokuhlathulula umgijimi osebenza budisi bona azibandulele iphaliswano. Lokho bekutlhogeka bona kusize umgijimi abalekele izinto ezingamthikazisa begodu adzimelele emnqophweni. Nathi kutlhogeka sizibambe nasizakuba nemikghwa emihle ezositjhideza kuJehova.

14. Kufuze kube yini umnqophethu nasifunda iBhayibheli? Fanekisa.

¹⁴ Kuqakathekile ukuba nomukghwa omuhle wokufunda iBhayibheli qobe langa nokukhumbula ukuthi ibanga lokufunda iBhayibheli kutjhidela kuJehova. Ngokwesibonelo khuyini ongayifunda ekulumiswaneni uJesu aba nayo nendoda ethileko? (Mar. 10:​17-22) Indoda leyo beyikholelwa ukuthi uJesu unguMesiya kodwana beyinganakho ukukholwa okuqinileko bona imlandele. Nanyana kunjalo, uJesu “wayithanda.” Kghani ayikukghwathi na indlela uJesu akhuluma ngayo nendoda le? Kuyakhanya bona uJesu bekafuna ukuyisiza ithabele ukulotjha uZimu. Indlela uJesu azizwa ngayo ngendoda le beyitjengisa indlela uJehova azizwa ngayo. (Jwa. 14:9) Njengombana ucabanga ngendaba le nangobujamo bakho zibuze, ‘Khuyini engitlhoga ukuyenza bona ngitjhidele kuJehova begodu ngisize abanye?’

15. Kubayini umfowethu osese mutjha kufuze alwele ukuba sibonelo esihle kwabanye? Fanekisa. (1 Thimothi 4:​12, 13)

¹⁵ “Yiba sibonelo sabathembekileko.” (Funda yoku-1 kaThimothi 4:​12, 13.) UPowula watjela uThimothi bona angabi namakghono afana nokufunda nokufundisa kwaphela, kunalokho kufuze godu abe neemfanelo ezifana nethando, ukukholwa nokuba msulwa. Kubayini? Ngombana lokho umuntu akwenzako kuqakatheke khulu ukudlula lokho akutjhoko. Akhesithi wabelwe ukunikela ikulumo ekhuluma ngokuthi ungakwenza njani okunengi emsebenzini wokutjhumayela. Angekhe ube neenhloni zokubeka ikulumo leyo nange wazi ukuthi wenza koke ongakghona ukukwenza bona utjhumayele. Abantu abakulaleleko bazokukhuthazeka khulu bona benze lokho obatjela khona nababona wena ukwenza.—1 Thim. 3:13.

16. (a) Ngiziphi iindawo ezihlanu umKrestu osesemutjha angaba sibonelo kizo? (b) Umfowethu osesemutjha angaba njani sibonelo esihle “ekukhulumeni”?

¹⁶ Njengombana kuvezwe kweyo-1 kaThimothi 4:​12, uPowula ukhuluma ngeendawo ezihlanu umfowethu osesemutjha angaba kizo sibonelo esihle. Ukuzipha isikhathi sokufunda ngeendawezi kungakuzuzisa. Ngokwesibonelo, akhesithi ufuna ukuba sibonelo esingcono “ekukhulumeni.” Cabanga ngokuthi ungakhuluma njani ngendlela ezokukhuthaza abanye. Nangabe usahlala ekhenu nababelethi bakho, kghani ungabathokoza ngalokho abakwenzela khona? Nakuphela isifundo, kghani ungatjela umfowenu namkha udadwenu ukuthi khuyini oyithandileko ngekulumwakhe? Esifundweni, linga ukuphendula usebenzisa amezwakho. Nawulinga ukusebenza budisi bona ube sibonelo endleleni okhuluma ngayo nabanye, bazokubona ukuthi uyathuthuka.—1 Thim. 4:15.

17. Khuyini engasiza umfowethu osese mutjha bona afikelele umnqophakhe wokusebenzela uJehova khudlwana? (2 Thimothi 2:22)

¹⁷ “Balekela iimfiso zobutjha kodwana lwela ukulunga.” (Funda yesi-2 kaThimothi 2:22.) UPowula watjela uThimothi bona alwisane neemfiso ezingamthikazisa ekusebenzeleni uJehova begodu zilimaze ubuhlobo bakhe noJehova. Ungalemuka bona izinto ozithabisa ngazo nanyana zingasi zimbi kodwana zikudlela isikhathi esinengi sokusebenzela uJehova. Ngokwesibonelo, zibuze bona singangani isikhathi osisebenzisela kwezemidlalo, ku-inthanethi nokudlala imidlalo yamavidiyo? Kghani ungasebenzisa isikhatheso ukusebenzela uJehova khudlwana? Mhlamunye ungabawa ukusiza ekutlhogomeleni iWolo lomBuso lendaweni yangekhenu namkha usekele ihlelo lokutjhumayela ngekarana. Nawukhetha ukuhlanganyela emsebenzini efana nale, kungenzeka ufumane abangani abatjha abazokusiza ubeke bewufikelele iminqopho emitjha yokusebenzela uZimu.

UKUSIZA ABANYE KULETHA IIMBUSISO

18. Kubayini singathi uMarkosi noThimothi baphila ukuphila okuthabisako nokwanelisako?

¹⁸ UMarkosi noThimothi benza amatjhuguluko amanengi bona basize abanye khudlwana begodu baphila ukuphila okuthabisako nokwanelisako. (IzE. 20:35) UMarkosi wakhamba iindawo ezikude khulu bona asize abafowabo nabodadwabo. Watlola nencwadi ekarisako ekhuluma ngokuphila kwakaJesu nomsebenzakhe wokutjhumayela. UThimothi wasiza uPowula bona bathomise amabandla amatjha begodu bakhuthaze abafowabo nabodadwabo. UJehova wayibona yoke imizamo eyenziwa nguMarkosi noThimothi bona bamsebenzele khudlwana begodu lokho kwamthabisa khulu.

19. Kubayini abafowethu abasese batjha kufuze balalele iseluleko uPowula asinikela uThimothi begodu umphumela uzokuba yini?

¹⁹ Iincwadi uPowula azitlolela uThimothi zitjengisa indlela ebekamthanda ngayo. Iincwadezi godu zitjengisa indlela uJehova anithanda ngayo nina bafowethu abasese batjha. Ufuna nikuthabele ukumlotjha. Yeke, yenzani okusemandlenenu ukusebenzisa iseluleko sakaPowula begodu nisize abanye khudlwana. Nanenza njalo nizokuthabela ukuphila nje begodu ‘nizokukakarela ukuphila kwamambala’ esikhathini esizako.—1 Thim. 6:​18, 19.