Lingisa Ukuthobeka KwakaJehova

1. Kubayini ukuthobeka kwakaJehova kukarisa?

NAWUQALA abadosi phambili bakarhulumende ephasini lanamhlanjesi, kghani ungatjho na ukuthi bathobekile? Awa akusinjalo. UJehova nanyana anguMninimandla woke, uthobekile. (Rhu. 113:​5-8) UJehova uthobeke ukudlula nanyana ngubani ephasini begodu akanakho nokuncani ukuzikhakhazisa. Kuzosizuzisa ukufunda ngeengcenye ezine zobuntu bakaJehova obuhle bese sibona ukuthi ukuthobeka kubuthinta njani ubuntobu ngabunye. Sizokucoca nangokuthi uJesu ukulingise njani ukuthobeka kwakaYise. Ukufunda ngobuntobu kuzosisiza sitjhidele kuJehova begodu silingise ukuthobeka kwakhe ngezinga elithileko.

UJEHOVA UHLALA AZIMISELE UKUSILALELA

2. IRhubo 62:​8, livezani ngoJehova? (Qala esingaphandle.)

² Ngokujayelekileko akusilula ukukhuluma nomuntu ozikhakhazisako. Abantu abazikhakhazisako kanengi baphatha abanye ngendlela enganamusa ngebanga lokobana bacabanga ukuthi bangcono kunabo begodu abanye abakuthabeli ukuba nabo. Kodwana uJehova uhlukile! Ngebanga lokuthi uBabethu wezulwini uthobekile, usimema bona size kuye nokuthi simtjele izinto ezisitshwenyako. (Funda iRhubo 62:8.) Njengombana ubaba onethando azimisela ukulalela abantwana bakhe ngezinto ezibatshwenyako noJehova uyasimema begodu uyasilalela nasithandaza kuye. Kuhlekuhle minengi imithandazo enjengale etlolwe eBhayibhelini. Lokho kutjengisa ukuthi uJehova ufuna kangangani ukulalela imithandazwethu. (Jotj. 10:​12-14; 1 Sam. 1:​10-18) Kodwana ngimaphi amabanga ngezinye iinkhathi angasenza sizizwe singafaneleki ukutjhidela kuJehova?

3. Kubayini singaqiniseka bona uJehova ufuna sihlale sithandaza kuye?

³ Singathandaza kuJehova nanyana sizizwa ngasuthi ithando lakhe alisifaneli. Kubayini sitjho njalo? Emfanekisweni kaJesu wendodana elahlekileko, uJehova ufaniswa noyise onethando owamukela indodanayo lokha nabeyizizwa ingakafaneleki ukwamukelwa emndenini ngebanga lemitjhapho eminengi eyayenzako. Wenzani ubaba lo indodanakhe nayibuya ekhaya? UJesu wathi msinyana ubabayo nakabona indodanakhe “wayigijimela, wayisingatha bese wayimanga.” (Luk. 15:​17-20) UJehova ufana nobaba lo. Nakezwa umthandazo wabantu abaneenhliziyo eziphukileko ngebanga lokuzizwa bamlandu nokutshwenyeka, ukuthobeka kwakhe kumenza abalalele. (IsiL. 3:​19, 20) Umusa kaJehova umenza agijimele kibo bona abaduduze abaqinisekise ngethando lakhe. (Isa. 57:15) UJehova ‘ugijimela njani kithi’ namhlanjesi? Kanengi usebenzisa abadala, imindenethu nabantu esilotjha kunye nabo uJehova. (Jak. 5:​14, 15) UJehova usisiza ngendlela ngombana ufuna sitjhidelane naye.

4. Kubayini bekubulula bona abantu bakhulume noJesu?

⁴ UJesu ulingisa uYise. NjengoYise, uJesu uthobekile. Ngesikhathi uJesu asephasini abantu bebatjhaphulukile ukuza kuye. Bekulula bona bambuze imibuzo. (Mar. 4:​10, 11) Nakababuza bona bazizwa njani ngendaba ethileko, bekulula ukuthi bamtjele indlela ebebazizwa ngayo. (Mat. 16:​13-16) Nabenze imitjhapho, bebangathukwa ngebanga lokuthi bacabanga bona uJesu uzobakwatela kunalokho bebazi ukuthi uJesu unomusa, unesirhawu begodu uyabekezela. (Mat. 17:​24-27) Ngebanga lokuthi uJesu bekalingisa uYise ngendlela ehle kangaka, abalandeli bakaJesu bamazi ngcono uJehova. (Jwa. 14:9) Bebazi bona uJehova akafani nabadosiphambili bekolo ebebaphatha abantu kabuhlungu begodu bazikhakhazisa. Kunalokho bekathobekile begodu bekahlala akulungele ukukhuluma nabantu.

5. Kubayini kubulula bona abanye bakhulume nathi nasithobekileko?

⁵ Singamlingisa njani uJehova? Nasilwela ukuba babantu abathobekileko sizokwenza kube bulula bona abanye bakhulume nathi. Ukuthobeka kuzosisiza bona singabi nomona, singazikhakhazisi besingabi babantu abangalibaleliko, okububuntu obungenza abantu bangatjhidelani nathi kodwana ukuthobeka kuzosisiza sibe nomusa, sibekezele begodu silibalele, okububuntu obenza abantu batjhidele kithi. (Kol. 3:​12-14) Abadala kufuze baqiniseke bona abafowethu nabodadwethu ebandleni bazizwa batjhaphulukile ukutjhidela kibo. Bona bakghone ukwenza njalo abadala kufuze benze isikhathi sokuba nabafowethu nabodadwethu. Yeke abadala bazokulinga ngakho koke bona nakukghonakalako baye bunqopha emihlanganweni yebandla kunokobana bangene nge-Zoom. Ubujamo babo nabuvumako, bazokusebenza nabafowethu nabodadwethu emsebenzini wokutjhumayela endlini ngendlu. Lokho kuzokusiza abafowethu nabodadwethu ukuthi babazi ngcono abadala begodu bazizwe batjhaphulukile ukubavulela isifuba nakutlhogekako.

UJEHOVA UYALINGANISELA

6-7. Nikela iimbonelo ezitjengisa ukuthi uJehova uzimisele ukutjhugulula indlela enza ngayo izinto abantu bakhe nabathandaza kuye.

⁶ Abantu abazikhakhazisako kanengi bazitjela ukuthi bazi ngcono begodu abazimiseli ukutjhugulula indlela abenza ngayo izinto. UJehova wazi ukudlula nanyana ngubani kodwana akasinjengabantwaba, ngebanga lokuthi uthobekile uhlala azimisele ukulalela abanye. Tjheja indlela asebenzelana ngayo nodadwabo kaMosi uMiriyamu. Yena no-Aroni banghonghoyila ngomfowabo uMosi obekamkhulumeli kaJehova. Ngokwenza njalo uMiriyamu bekangahloniphi uJehova. Ngebanga lalokho, uJehova wasilingeka khulu wambetha ngobulepheru. Khuyini uJehova ayenzako ngesikhathi u-Aroni noMosi bancenga begodu babawa bona alaphe uMiriyamu? Umuntu othobekileko bekangekhe atjhugulule umkhumbulwakhe kodwana uJehova wenza okuhlukileko. Ngebanga lokuthi uthobekile, wasizwa isibawo sakaMosi begodu walapha uMiriyamu.—Num. 12:​1-15.

⁷ Sibuye sibone indlela uJehova athobeke ngayo nasicabanga ngendlela alalela ngayo iKosi uHezekiya. UJehova wasebenzisa umPhorofidakhe ukwazisa ikosi uHezekiya bona izokuhlongakala. Yalila yancenga uJehova bona ayilaphe. UJehova waba nesirhawu wangezelela ukuphila kwayo ngeminyaka eli-15. (2 Kho. 20:​1, 5, 6) Kwamambala ukuthobeka kwenza uJehova waba nesirhawu begodu wazimisele ukutjhugulula indlela ebekazokwenza ngayo izinto.

8. Ngiziphi iimbonelo ezitjengisa ukuthi uJesu uyalinganisela? (Markosi 3:​1-6)

⁸ UJesu ulingisa uYise. UJesu nakasephasini bekenzela abantu izinto ezihle nakukghonakalako. Ngokwesibonelo, walapha abantu ngeSabatha ngitjho nanyana abaphikisi bakhe bebangafuni enze njalo. (Funda uMarkosi 3:​1-6.) UJesu nanamhlanjesi uyalinganisela begodu unomusa njengombana anqophisa amabandla. Ngokwesibonelo, nakungenzeka omunye ebandleni enze isono, uyambekezelelela, abe amnikele nethuba lokulungisa izinto.—IsAm. 2:​2-5.

9. Singatjengisa njani ukulinganisela endleleni esenza nesicabanga ngayo? (Qala neethombe.)

⁹ Singamlingisa njani uJehova? Kufuze sifunde kuJehova bona singacabanga besenze njani ngendlela elinganiselako. (Jak. 3:17) Ngokwesibonelo, ababelethi abalingisa uJehova angekhe balindele abantwana babo benze izinto abangakghoni ukuzenza. UJakopo usibonelo esihle salokhu, watjengisa ukulinganisela ebantwaneni bakhe. (Gen. 33:​12-14) Ababelethi abathobekileko nabalinganiselako kufuze bakubalekele ukumadanisa abantwana babo. Abadala emabandleni nabo kufuze balinganisele. Ngokwesibonelo, umdala angeze akatelele umbonwakhe kunalokho uzokusekela umbono wabanye abadala nange ukhambisana neenkambisolawulo zakaJehova. (1 Thim. 3:​2, 3) Soke kufuze silinge ukuzwisisa indlela abanye ababona ngayo ngitjho nanyana sinemibono ehlukileko. (Rom. 14:1) Soke ebandleni kufuze silwele bona ‘ukubonelela kwethu kwaziwe ngibo boke abantu.’—Flp. 4:5.

UJEHOVA UYABEKEZELA

10. UJehova utjengise njani ukuthi uyabekezela?

¹⁰ Kungenzeka utjhejile ukuthi kanengi abantu abangakathobeki abakuthandi ukulinda. Ukuzikhakhazisa kubenza bangabekezeli. UJehova akasinjalo nakancani ubekezela ukudlula nanyana ngubani. Ngokwesibonelo, ngemihla kaNowa uJehova wathi uzokulinda iminyaka eli-120 ngaphambi kobana atjhabalalise abantu abakhohlakeleko. (Gen. 6:3) UNowa wakghona ukukhulisa abantwabakhe bewakha nomkhumbi asizwa mndenakhe. Ngokukhamba kwesikhathi, abajameli bakaJehova abaziingilozi babekezela ngesikhathi u-Abrahama abuza ngokutjhatjalaliswa kweSodoma neGomora. Umuntu ozikhakhazisako bekangaphendula athi: ‘Ungibuza njani into enjalo!’ Kodwana ngebanga lokuthi ingilozi le beyilingisa uJehova yabekezelela u-Abrahama.—Gen. 18:​20-33.

11. Njengombana kuvezwe kweye-2 kaPitrosi 3:​9, kubayini uJehova abekezela namhlanjesi?

¹¹ Ngokuthobeka uJehova utjengisa ukuthi uyabekezela namhlanjesi. Ulindele bona isikhathi asibekileko sifike ngaphambi kobana kufike isiphelo. Kubayini abekezela? ‘Ngombana akafisi ukuthi namunye atjhabalale kodwana ufisa bona boke batjhuguluke.’ (Funda yesi-2 kaPitrosi 3:9.) Kghani ukubekezela kwakaJehova kuyasiza? Iye! Iingidigidi zabantu abalungileko zikghonile ukutjhidela kuJehova begodu sithemba bona ezinye godu iingidigidi zizokwenza njalo. Nanyana kunjalo, ukubekezela kwakaJehova kunala kuphelela khona. UJehova uyabathanda abantu kodwana angekhe abavumele benze nanyana yini abayifunako. Angekhe avumele abantu abakhohlakeleko baphile ngokungapheliko.—Rhab. 2:3.

12. UJesu ukulingisa njani ukubekezela kwakaJehova?

¹² UJesu ulingisa uYise. Sekuphele iinkulungwana zeminyaka uJesu alingisa ukubekezela kwakaJehova. UJesu wabona uSathana akhulumela uJehova nabantu bakhe abathembekileko amala. (Gen. 3:​4, 5; Job. 1:11; IsAm. 12:10) UJesu ubone abantu abanengi batlhaga kabuhlungu. Cabanga bona sekuphele isikhathi esingangani afisa ‘ukutjhabalalisa imisebenzi kaDeveli.’ (1 Jwa. 3:8) Khuyini esiza uJesu abekezele njengombana alinde uJehova amtjele ukuthi sekusikhathi sokutjhabalalisa imisebenzi kaDeveli ngokupheleleko? Ibanga elinye elenza uJesu akghone ukulinda kuthobeka, uyazi ukuthi nguJehova ozokuqunta bona usiletha nini isiphelo.—IzE. 1:7.

13. UJesu wababekezelela njani abapostoli bakhe begodu kubayini?

¹³ Ngesikhathi uJesu asephasini wabekezelela abapostoli bakhe. Ngokwesibonelo, ngesikhathi abapostoli baphikisana kanengi ngokuthi ngubani omkhulu, uJesu akhenge abalahlele izandla. Kunalokho waragela phambili ababekezelela. (Luk. 9:46; 22:​24-27) Bekaqiniseka bona ngokukhamba kwesikhathi bazokwenza amatjhuguluko afaneleko. Kghani nawe uyawubuyelela umitjhapho ofanako kanengi? Nakunjalo, kungenzeka kukuthokozisa khulu ukuthi unekosi ethobekileko nebekezelako.

14. Khuyini engasisiza sibekezele khudlwana?

¹⁴ Singamlingisa njani uJehova? Nasilwela ukuba ‘nomkhumbulo kaKrestu,’ sizibeka emathubeni wokucabanga nokwenza njengoJehova. (1 Kor. 2:16) Singawuzwisisa njani ngcono umkhumbulo kaKrestu? Ezinye iindlela eziqakatheke khulu kufunda ngokuphila kwakaJesu eBhayibhelini. Ngemva kwalokho senze isikhathi sokucabangisisa ukuthi khuyini uJesu akwenzako nokuthi kubayini enza njalo. Kufuze sithandaze kuJehova simbawe asisize sithobeke besibekezele njengoJesu. Njengombana sizokuba nomkhumbulo kaKrestu sizokukghona ukulingisa ukuthobeka kwakaJehova ngokuthi sibekezelele abanye nathi sizibekezelele.—Mat. 18:​26-30, 35.

UJEHOVA UYABATJHEJA ABATHOBEKILEKO

15. Nikela iimbonelo ezitjengisa ukuthi uJehova uyabathanda abantu abathobekileko. (IRhubo 138:6)

¹⁵ Funda iRhubo 138:6. Akhucabange: UJehova umuntu omKhulu kunabo boke ephasini, uyathaba nakabona abantu abathobekileko. Cabanga ngeembonelo ezimbalwa zabantu abanengi eminyakeni edlulileko, ekungenzeka abanye abantu bebababaqalela phasi. Abanye babo kungenzeka asibazi kuhle kodwana uJehova utlole ngabo eBhayibhelini. UJehova waphefumulela uMosi bona atlole ngomhlengikazi igama lakhe elinguDibhora, owaphila hlangana nesikhathi seenhloko zemindeni. Wasebenza ngokuthembeka endlini ka-Isaka noJakopo iminyaka engaba li-125. Nanyana singazi okunengi ngomfazi othembekileko lo, uJehova wenza isiqinisekiso sokobana okwenziwa mfazi lo kuyatlowa. (Gen. 24:59; 35:8) Eminyakeni eminengi eyadlulako, uJehova wenza uDavida obekamsana olusako bona abe yikosi yesitjhaba sakwa-Israyeli. (2 Sam. 22:​1, 36) Msinyana ngemva kokubelethwa kwakaJesu, uZimu wathumela iingilozi esiqhemeni sabelusi begodu wabapha nelungelo lokuthi kube ngibo bokuthoma abaziko ukuthi uJesu ubelethiwe eBhetlehema. (Luk. 2:​8-11) UJosefa noMariya nabaletha uJesu ethempelini, uJehova wapha uSimiyoni noHana ilungelo lokuthi kube ngibo ababona iNdodanakhe. (Luk. 2:​25-30, 36-38) Kuliqiniso ukuthi “ngitjho nanyana uJehova aphakeme, utjhejisisa othobekileko”!

16. UJesu wayilingisa njani indlela uYise aphatha ngayo abanye?

¹⁶ UJesu ulingisa uYise. NjengoYise, uJesu uyabathanda abathobekileko. Bekafundisa abantu ‘ebebangakafundi begodu abajayelekileko’ amaqiniso malungana nomBuso kaZimu. (IzE. 4:13; Mat. 11:25) UJesu walapha abagulako begodu wabaphatha ngendlela eyabenza bazizwa bathandwa begodu bahlonitjhwa. (Luk. 5:13) Ngaphambi kobana ahlongakale, uJesu wahlambisa abapostoli bakhe iinyawo okumsebenzi owenziwa ziinsebenzi. (Jwa. 13:5) Ngaphambi kobana aye ezulwini, wanikela abalandeli bakhe kuhlanganise nathi ilungelo lokwenza umsebenzi oqakatheke khulu wokusiza abantu bafumane ukuphila okungapheliko.—Mat. 28:​19, 20.

17. Singabahlonipha njani abanye? (Qala nesithombe.)

¹⁷ Singamlingisa njani uJehova? Sitjengisa ukuthi siyabahlonipha abantu ngokuthi sabelane nananyana ngubani olalela iindaba ezimnandi kunganandaba ukuthi uvelaphi, unebala elinjani lesikhumba nokuthi ufunde kangangani. Sihlonipha abafowethu nabodadwethu nasibaqala njengabakhulu kunathi kunganandaba ukuthi sinamakghono namkha amalungelo wekonzo athileko. (Flp. 2:3) UJehova uyathaba ‘nasidosa phambili’ ngokuthobeka ekuthandaneni nekuhloniphaneni.—Rom. 12:10; Zef. 3:12.

18. Kubayini sifuna ukulingisa ukuthobeka kwakaJehova?

¹⁸ Njengombana silwela ukulingisa ukuthobeka kwakaBabethu onethando wezulwini, sizozimisela ukulalela abanye, silinganisele begodu sizokubekezela khudlwana. Sizokukghona nokuqala abanye ngendlela uJehova abaqala ngayo. Nasenza koke okusemandlenethu bona sithobeke njengoZimu kuzo senza sibe ligugu khulu emehlwenakhe!—Isa. 43:4.