Kubayini AboFakazi BakaJehova Bakhetha Ukungathathi Ihlangothi Eminyanyeni Yezepolotiki?

AboFakazi bakaJehova bayamhlonipha urhulumende namatshwayo ajamele urhulumende. Siyazi ukuthi abantu bangakhetha ukuzihlanganisa nehlangano ethileko, ukuhlonipha iflarha namkha ukubhina ingoma yesitjhaba.

AboFakazi bakaJehova bakhetha ukungahlanganyeli ezintwenezi ngombana bakholelwa ukuthi ziphikisana neemfundiso zeBhayibheli. Siyakuthabela ukuhlonitjhwa okufanako nakuziwa kilokho esikukholelwako ngombana nathi siyabahlonipha abantu nabenza iinqunto ezihlukileko kwezethu.

Esihlokwenesi sizokucoca nganakhu

• Ngiziphi iimfundiso zeBhayibheli esiphila ngazo?

• Kuthiwani nange umthetho ufuna sithathe ihlangothi?

• Kghani aboFakazi bakaJehova balinga ukuthatha ihlangothi emphakathini namkha kwezepolotiki?

Ngikuphi esikufunda eBhayibhelini?

Iimfundiso zeBhayibheli ezimbili ezilandelako zithinta indlela esikhetha ngayo:

• Kufuze silotjhe uZimu kwaphela. IBhayibheli lithi: “Kufuze ulotjhe uJehova uZimakho begodu nguye kwaphela okufuze umenzele umsebenzi ocwengileko.” (Lukasi 4:8) Iimfungo zokuzinikela ehlanganweni ethileko kunye neengoma zesitjhaba kanengi zinamezwi akhuluma ngokuzinikela enarheni ethileko ukudlula nanyana kukuphi. Yeke unembeza waboFakazi bakaJehova awubavumeli bona bahlanganyele eminyanyeni enjengale.

  Ngendlela efanako, aboFakazi bakaJehova baqala ukuhlonipha iflarha njengesenzo sokulotjha iinthombe esingavumelani nokutjhiwo liBhayibheli. (1 Korinte 10:14) Ezinye izazi ziyakuvuma ukuthi amaflarha weenarha alitshwayo lezekolo. Usomlando u-Carlton J. H. Hayesa watlola wathi: “Ukuba yingcenye yenarha kufana nekolo enetshwayo eliveleleko njengeflarha.” Malungana namaKrestu wokuthoma, umtloli u-Daniel P. Mannix wathi: “AmaKrestu khenge avume ukwenza umhlatjelo ku-emperor’s genius [wamaRoma], ngendlela efanako namaKrestu namhlanjesi awayilotjhi iflarha.”b

  Nanyana aboFakazi bakaJehova bangayilotjhi iflarha, abayimotjhi, bayitjhise namkha bayidelele, kuhlanganise namanye amatshwayo wenarha.

• Boke abantu bayafana phambi kwakaZimu. (IzEnzo 10:34, 35) IBhayibheli lithi uZimu “ngomuntu munye wenza iintjhaba ezinengi zabantu.” (IzEnzo 17:26) Ngebangeli, aboFakazi bakaJehova bakholelwa ukuthi akusikuhle ukuphatha abantu besinye isitjhaba ngcono ukudlula abanye. Sihlonipha woke umuntu kunganandaba ukuthi bavela kuphi namkha bahlala kuphi.—1 Pitrosi 2:17.

Kuthiwani nange umthetho ufuna sithathe ihlangothi?

AboFakazi bakaJehova abaphikisani norhulumende. Sikholelwa ukuthi aborhulumende bayingcenye ‘yelungiselelo lakaZimu’ alibekileko bona libe khona. (Roma 13:1-7) Siyakholelwa nokuthi amaKrestu kufuze alalele iimphathimandla.—Lukasi 20:25.

Kuthiwani-ke nange iimphathimandla zithi senze into uZimu angayifuniko? Kobunye ubujamo kuyakghoneka ukufaka isibawo esingokomthetho bona urhulumende atjhugulule umthetho loyo.c Nange kungakghonekiko, aboFakazi bakaJehova ngehlonipho bakhetha ‘ukulalela uZimu njengombusi kunabantu.’—IzEnzo 5:29.

Kghani aboFakazi bakaJehova balinga ukuthatha ihlangothi emphakathini namkha kwezepolotiki?

Awa. AboFakazi bakaJehova abathathi hlangothi emphakathini neendabeni zepolotiki. Ukungazihlanganisi neenhlangano ezithileko, ukungalotjhi iflarha namkha ukungabhini iingoma zenarha, akutjho ukuthi siphikisana nezepolotiki. Kunalokho, silandela iinkolelo zethu ezisekelwe eBhayibhelini malungana neminyanya le.