USamyela Wokuthoma

30 UDavida nabantu bakhe nabafika eTsikhilagi+ ngelanga lesithathu, ama-Amalekhi+ bewasahlele esewula,* asahlela neTsikhilagi begodu iTsikhilagi ayitjhisa. 2 Bewathumbe abafazi+ nabo boke ebebalapho, kusukela komncani kunabo boke bekube komdala kunabo boke. Akhenge babulale namunye kodwana babathatha bakhamba nabo. 3 UDavida nabantu bakhe nabafika edorobheni, bafumana bona litjhisiwe begodu abafazi babo, amadodanabo kunye namadodakazabo bathunjiwe. 4 Yeke uDavida nabantu bakhe bathoma ukurhahlawula bekwaba kulapho bangasanamandla wokulila. 5 Abafazi bakaDavida nabo bebathunjiwe, u-Arhinowami umJizriyela no-Abigeyili umhlolokazi kaNabhali umKarameli.+ 6 UDavida bekatshwenyeke khulu ngombana abantu bebakhuluma ngokumkghadlha ngamatje, ngebanga lokuthi woke umuntu bekaphatheke kabuhlungu ngokulahlekelwa madodana namadodakazabo. Kodwana uDavida waziqinisa ngoJehova uZimakhe.+

7 Yeke uDavida wathi ku-Abhiyathari+ umphristi, indodana ka-Arhimeleki: “Ngibawa ulethe i-efodi.”+ Ngalokho u-Abhiyathari waletha i-efodi kuDavida. 8 UDavida wabuza uJehova wathi:+ “Ngiligijimise na ibutho labadlelezeli? Ngizolifumana na?” Wamphendula wathi: “Ligijimise ngombana nakanjani uzolifumana begodu uzokusindisa elikuthetheko.”+

9 UDavida wakhamba khonokho nabantu bakhe abama-600+ ebebanaye, bakhamba bebayokufika emRhobeni* weBhesori, okukulapho abanye abasala khona. 10 UDavida waragela phambili nabantu abama-400 kodwana abantu abama-200 ebesele badinwe khulu bona bangayama umRhoba weBhesori basala lapho.+

11 Bafumana indoda emGibhide emmangweni begodu bayisa kuDavida. Bayipha ukudla namanzi, 12 bayipha nesiqetjhana sekhekhe lamafeyi agangadelweko namakhekhe amabili wamadiribe omisiweko. Nayiqeda ukudla, yaba namandla godu ngombana besele kudlule amalanga amathathu nobusuku obuthathu ingadli namkha ingaseli amanzi. 13 UDavida wathi kiyo: “Ungewakabani begodu uvelaphi?” Yathi kuye: “Ngisisebenzi esimGibhide, isigqila sendoda yomAmalekhi kodwana ikosami ingitjhiyile ngombana ngibanjwe kugula emalangeni amathathu adlulileko. 14 Ngithi esisahlele esewula* yamaKereti,+ endaweni yakwaJuda nesewula* yeKalebi+ begodu iTsikhilagi siyitjhisile.” 15 UDavida wathi kiyo: “Ungakhamba nami na uyongitjengisa ibutho labadlelezeli?” Yathi kuye: “Nange ungafunga kimi ngoZimu bona angeze ungibulale nokuthi angeze unginikele esandleni sekosami, ngingakhamba nawe ngiyokutjengisa ibutho labadlelezeli.”

16 Yeke wakhamba naye behlela lapho ebebarhatjhekele khona enarheni, bebadla, basela begodu bagidinga ngebanga lezinto ezinengi abazithethe enarheni yamaFilista nenarheni yakwaJuda. 17 UDavida wabarhayila kusukela ngamasa bekwaba sentambama; akunamuntu owaphunyurhako+ ngaphandle kwamadoda ama-400 abaleka ngamakamela. 18 UDavida wafumana koke ebekuthunjwe ma-Amalekhi+ begodu wasindisa nabafazi bakhe ababili. 19 Akunalitho labo elalahlekako, kusukela kokuncani kunakho koke bekube kokukhulu kunakho koke. Bafumana amadodanabo, amadodakazabo kunye nezinto abazifumene epini;+ uDavida wafumana koke ebekuthunjiwe. 20 Yeke uDavida wathatha zoke izimvu neenkomo, baziraga phambi kwefuywabo. Bathi: “Lezi zizinto uDavida azifumana epini.”

21 Ngemva kwalokho, uDavida wafika ebantwini aba-200 ebesele badinwe khulu bona bangakhamba noDavida begodu basala emRhobeni weBhesori,+ baphuma bayokuhlangabeza uDavida nabantu ebebanaye. UDavida nakafika eduze kwabo, wababuza amavuko. 22 Nanyana kunjalo, woke amadoda akhohlakeleko nangazisiko hlangana nalawo ebekakhambe noDavida athi: “Njengombana bangakhenge bakhambe nathi, angeze sibaphe litho ezintweni esizifumene epini, ngaphandle kokuthi omunye nomunye athathe umkakhe namadodanakhe akhambe.” 23 Kodwana uDavida wathi: “Bafowethu, ningakwenzi lokhu ngezinto esiziphiwe nguJehova. Usivikele bese wanikela ibutho labadlelezeli esandleni sethu.+ 24 Ngubani ongavumelana nani kilokhu? Isabelo esiyokufunyanwa ngiloyo owehlele epini sizokulingana nesabelo saloyo obekasele nomthwalo.+ Woke umuntu uzokwabelwa ngokulinganako.”+ 25 Kusukela ngelangelo, wakwenza kwaba sinqophiso nomthetho kwa-Israyeli bekube kunamhlanjesi.

26 UDavida nakafika eTsikhilagi, wathumela ezinye izinto ezifunyenwe epini ebadaleni bakwaJuda egade babangani bakhe, wathi: “Nasi isipho* senu esivela ezintweni esizifumene epini, emanabeni kaJehova.” 27 Wayithumela kilabo ebebaseBhetheli,+ eRamothi yeNegebhi,* eJatiri,+ 28 e-Aroweri, eSifmoti, e-Etjhitemowa,+ 29 eRakala, emadorobheni wamaJerarhimiyeli,+ emadorobheni wamaKheni,+ 30 eRhorema,+ eBhori-Atjhana, e-Ataka, 31 eRhebroni+ nakizo zoke iindawo uDavida nabantu bakhe ebebajayele ukuya kizo.