USamyela Wokuthoma
8 Kwathi uSamyela nasele aluphele, wabeka amadodanakhe bona abe bahluleli kwa-Israyeli. 2 Igama lezibulo lakhe bekunguJuweli, igama lowesibili kungu-Abhiya;+ bebabahluleli eBheritjheba. 3 Kodwana amadodanakhe akhange akhambe eendleleni zakhe; bewathanda inzuzo yokungathembeki+ begodu avuma ukufunjathiswa+ ahlanekela nobulungiswa.+
4 Ngokukhamba kwesikhathi boke abadala bakwa-Israyeli babuthana batjhinga kuSamyela eRama. 5 Bathi kuye: “Qala! Sewuluphele kodwana amadodanakho awakhambi eendleleni zakho. Nje-ke sibekela ikosi ezosahlulela njengazo zoke ezinye iintjhaba.”+ 6 Kodwana azange kumthabise uSamyela ukutjho kwabo ukuthi: “Sinikela ikosi bona isahlulele.” Yeke uSamyela wathandaza kuJehova 7 begodu uJehova wathi kuSamyela: “Kulalele koke abantu abakutjho kuwe ngombana akusinguwe abamalileko, kodwana ngimi abale ukuthi ngibe yikosabo.+ 8 Benza lokho ebebasolo bakwenza kusukela ngelanga engabakhuphula ngalo eGibhide bekube kunamhlanjesi; basolo bangilahla+ balotjha abanye abozimu+ begodu ngilokho abakwenza kuwe. 9 Nje-ke balalele. Kodwana, ubayelelise ngokukhanyako; ubatjele ukuthi ikosi ezobabusa izokuba namaphi amalungelo phezu kwabo.”
10 Yeke uSamyela wakhuluma nabantu ebebambawa ikosi, wabatjela woke amezwi kaJehova. 11 Wathi: “Nakhu ikosi enibusako ezokuba nelungelo lokukwenza:+ Izokuthatha amadodanenu+ iwabeke eenkaraneni zayo+ begodu iwenze abakhweli bayo beenjomani,+ amanye kuzokufuneka bona agijime phambi kweenkarana zayo. 12 Amanye izowabeka bona abe ziinduna zeenkulungwana+ neenduna zamatjhumi amahlanu,+ amanye azoyilimela,+ avune isivuno sayo+ begodu ayenzele iinkhali zepi neentlabagelo zeenkarana zayo.+ 13 Izokuthatha amadodakazenu iwenze abadidiyeli bamafutha wokuzesa,* abapheki nababhagi.+ 14 Izonithathela amasimu eniwathanda khulu, amasimu wamadiribenu nemithenu yama-oliva,+ iwanikele neensebenzi zayo. 15 Izokuthatha kwetjhumi kwamasimenu weenthoro amasimu wamadiribenu, ikunikele iinkhulu zayo zesigodlo neensebenzi zayo. 16 Godu izokuthatha iinceku neensebenzi zenu eziduna nezisikazi, iinkomo zenu enizithanda khulu nabodumbana benu, ibasebenzisele umsebenzayo.+ 17 Izokuthatha kwetjhumi kwezimvu zenu+ begodu nina nizokuba ziinsebenzi zayo. 18 Liyeza ilanga enizokulila ngalo ngebanga lekosi enizikhethele yona,+ kodwana uJehova angekhe aniphendule.”
19 Kodwana abantu babhala ukulalela uSamyela, bathi: “Awa, sizimisele ukuba nekosi. 20 Ngokunjalo sizokufana nazo zoke ezinye iintjhaba, ikosethu izosahlulela, isidose phambili begodu isilwele epini.” 21 Ngemva kokuthi uSamyela ezwe woke amezwi atjhiwo babantu, wawabuyelela uJehova alalele. 22 UJehova wathi kuSamyela: “Balalele, ubabekele ikosi ezobabusa.”+ Yeke uSamyela wathi emadodeni wakwa-Israyeli: “Ngamunye wenu akabuyele edorobheni lakhe.”