USamyela Wokuthoma
12 Emaswapheleni uSamyela wathi ku-Israyeli woke: “Ngenze koke eningibawe khona, benganibekela nekosi bona inibuse.+ 2 Nje-ke nasi ikosi enirholako!+ Mina sengiluphele neenhluthu zami sezimhlophe, amadodanami akhona lapha hlangana nani+ begodu nginirhole kusukela ebutjheni bami bekube kunamhlanjesi.+ 3 Nangu mina. Ngimangalelani phambi kwakaJehova naphambi kozesiwekwakhe:+ Khengathatha ikunzi namkha udumbana kabani?+ Ngubani ekhengamdlelezela namkha ngamgandelela? Ngubani ekhengathatha isifumbathiso kuye bona ngeqisele ubumbi amehlo?+ Nangabe khengakwenza lokho, ngizonibuyisela khona.”+ 4 Bamphendula bathi: “Akhenge usidlelezele namkha usigandelele namkha wamukele nanyana yini evela kubani.” 5 Yeke wathi kibo: “UJehova ungufakazi ngokujamelene nani, nozesiwekwakhe ungufakazi namhlanjesi wokuthi azange nifumane litho eningangimangalela ngalo.” Bona-ke bathi: “Ungufakazi.”
6 Yeke uSamyela wathi ebantwini: “UJehova, owasebenzisa uMosi no-Aroni begodu owakhuphula abokhokho benu wabakhupha enarheni yeGibhide,+ ungufakazi. 7 Nje-ke jamani eendaweni zenu, ngizonahlulela phambi kwakaJehova ngesisekelo sazo zoke izinto ezilungileko uJehova anenzele zona nina nabokhokho benu.
8 “Msinyana ngemva kobana uJakopo afike eGibhide+ begodu abokhokho benu bathome ukubawa isizo kuJehova,+ uJehova wathumela uMosi+ no-Aroni bona barhole abokhokho benu baphume eGibhide babahlalise endaweni le.+ 9 Kodwana bamkhohlwa uJehova uZimabo, yeke wabathengisela+ esandleni sakaSisera+ induna yebutho lakaRhatsori nesandleni samaFilista+ nesandleni sekosi yakwaMowabi+ begodu balwa nabo. 10 Yeke babawa isizo kuJehova+ bathi, ‘Sonile,+ ngombana sitjhiye uJehova salotjha aboBhali+ nemifanekiso yabo-Atjhitarothi;+ nje-ke sisindisa esandleni samanabethu bona sikulotjhe.’ 11 Ngalokho uJehova wathumela uJerubhali,+ uBhedani, uJafta+ noSamyela+ bewanisindisa esandleni samanaba anibhodileko bona nihlale ngokuphepha.+ 12 Kwathi nanibona ukuthi uNarhatjhi+ ikosi yama-Amoni uzokulwa nani, nasolo ningibalabalela nithi, ‘Awa, sizimisele ukuba nekosi ezosibusa!’+ Ngitjho nanyana uJehova uZimenu ayiKosenu.+ 13 Nasi-ke ikosi eniyikhethileko, le eniyibawileko. Qalani! UJehova unibekele ikosi ezonibusa.+ 14 Naningasaba uJehova,+ nimlotjhe,+ nilalele ilizwi lakhe,+ ningahlubuki emyalweni kaJehova begodu nina nekosi enibusako nilandele uJehova uZimenu, kulungile. 15 Kodwana naningalilaleliko ilizwi lakaJehova begodu nihlubuka emyalweni kaJehova, isandla sakaJehova sizokulwisana nani naboyihlo.+ 16 Nje-ke jamani eendaweni zenu, nibone into ekulu le uJehova ayenza phambi kwamehlwenu. 17 Kghani akuvunwa ikoroyi namhlanjesi? Ngizokubiza uJehova bona enze izulu lidume beline; ngokunjalo nizokwazi begodu nizwisise ukuthi yimbi kangangani into eniyenze emehlweni kaJehova yokuzibawela ikosi.”+
18 Yeke uSamyela wabiza uJehova begodu uJehova wenza izulu laduma begodu lana ngelangelo, kangangobana boke abantu bamsaba khulu uJehova noSamyela. 19 Boke abantu bathi kuSamyela: “Thandazela iinsebenzi zakho kuJehova+ uZimakho ngombana asifuni ukufa, ngebanga lokuthi singezelele kizo zoke izono zethu obunye ubumbi ngokubawa ikosi.”
20 Yeke uSamyela wathi ebantwini: “Ningasabi. Iye khona nibenzile boke ubumbobu. Kwaphela nje ningaphambuki ekulandeleni uJehova+ begodu nilotjhe uJehova ngehliziywenu yoke.+ 21 Ningaphambuki bona nilandele abozimu abalilize,*+ abangananzuzo+ begodu abangakghoni ukusindisa ngombana balilize.* 22 Ngebanga legama lakhe elikhulu,+ uJehova angekhe abalahle abantu bakhe+ ngombana uJehova uzikhethele ukunenza abantu bakhe.+ 23 Nakungimi, angeze ngathoma ngone kuJehova ngokulisa ukunithandazela, ngizokuragela phambili nginifundisa indlelehle nelungileko. 24 Sabani uJehova nje kwaphela,+ nimlotjhe ngokuthembeka* ngehliziywenu yoke, ngombana qalani ukuthi zikulu kangangani izinto anenzele zona.+ 25 Kodwana naningaphikelela ngekani nenza okumbi, nizokuthanyelwa,+ nina nekosenu.”+