USamyela Wokuthoma
24 Msinyana ngemva kobana uSawula abuye ekugijimiseni amaFilista, bathi kuye: “Qala! UDavida usemmangweni we-Eni-Gedi.”+
2 Nje-ke uSawula wathatha abantu abazii-3 000 abakhethwe ku-Israyeli woke, wakhamba wayokufuna uDavida nabantu bakhe emaweni weembuzi zentaba. 3 USawula wafika eembayeni zezimvu ezenziwe ngamatje magega nendlela, lapho bekunerholo khona, wangena ngerholweni bona ayozithuma khisibe uDavida nabantu bakhe bahlezi endaweni efihlekileko ngerholweni.+ 4 Abantu bakaDavida bathi kuye: “Namhlanjesi lilanga uJehova athi kuwe ngalo, ‘Qala! Nginikela inaba lakho esandleni sakho,+ ungazenzela umathanda kilo.’” Yeke uDavida wakhukhutha begodu wasika umphetho wejasi kaSawula enganamikhono. 5 Kodwana ngemva kwalokho, uDavida wasolo adliwa yihliziyo*+ ngombana bekasike umphetho wejasi kaSawula enganamikhono. 6 Wathi ebantwini bakhe: “Akucabangeki ngombono kaJehova ukuthi ngingenza into enje ekosinami, ozesiweko kaJehova, ngokumphakamisela isandla ngombana ungozesiweko kaJehova.”+ 7 Yeke uDavida wavimba* abantu bakhe ngamezwi la, azange abavumele bona basahlele uSawula. NakunguSawula yena, wasikima ngerholwenapho wazikhambela.
8 UDavida wasikima waphuma ngerholweni, warhuwelela uSawula wathi: “Kosami!”+ USawula nakaqala ngemva kwakhe, uDavida wakhothama wahloma ihloko phasi bewaguqa. 9 UDavida wathi kuSawula: “Kubayini ulalela amezwi wabantu abathi, ‘Qala! UDavida ufuna ukukulimaza’?+ 10 Namhlanjesi uzibonele ngewakho ukuthi uJehova ukunikele njani esandleni sami erholweni. Kodwana kuthe othileko nakathi ngikubulale,+ ngakurhawukela ngathi, ‘Angekhe ngiphakamisele ikosami isandla ngombana ingozesiweko kaJehova.’+ 11 Qala baba, iye, qala umphetho wejasakho enganamikhono esandleni sami; ngesikhathi ngisika umphetho wejasakho enganamikhono, akhenge ngikubulale. Nje-ke ungabona begodu uzwisise ukuthi angikahlosi ukukulimaza namkha ukuhlubuka, angikoni kuwe,+ kodwana wena uyangizuma ufuna ukungibulala.+ 12 Kwanga uJehova angahlulela phakathi kwami nawe+ begodu kwanga uJehova angangibuyiselela kuwe,+ kodwana mina angeze ngikuphakamisele isandla.+ 13 Njengombana isaga sekadeni sitjho, ‘Kwabambi kuvela ubumbi,’ kodwana mina angeze ngikuphakamisele isandla. 14 Kghani ikosi yakwa-Israyeli iphumele bani? Igijimisa bani? Inja efileko? Itsetse lakotsetse?+ 15 Kwanga uJehova angaba ngumahluleli, ahlulele phakathi kwami nawe. Yena uzokubona bekajamele indabami,+ angahlulele begodu angisindise esandleni sakho.”
16 UDavida nakaqeda ukutjho amezwi la, uSawula wathi: “Kghani lilizwi lakho leli Davida ndodanami?”+ USawula wathoma ukurhahlawula isililo. 17 Wathi kuDavida: “Ulunge ukudlula mina ngombana wena ungiphethe kuhle kodwana mina ngikubuyisele ngobumbi.+ 18 Namhlanjesi ungitjele ngobuhle obenzileko ngokungangibulali uJehova nakanginikela esandleni sakho.+ 19 Ngombana ngimuphi umuntu ofumana inaba lakhe kodwana alikhambise ngokuthula? UJehova uzokubusisa+ ngebanga lalokho ongenzele khona namhlanjesi. 20 Nje-ke qala! Ngiyazi ukuthi nanyana kungathiwani uzokuba yikosi+ nokuthi umbuso wakwa-Israyeli uzokuhlala usesandleni sakho. 21 Nje-ke funga kimi ngoJehova+ ukuthi angekhe uthanyele iinzukulwana zami ngemva kokuhlongakala kwami nokuthi angekhe utjhabalalise igama lami endlini kababa.”+ 22 Yeke uDavida wafunga kuSawula, ngemva kwalokho uSawula watjhinga kwakhe.+ Kodwana uDavida nabantu bakhe bakhuphukela endaweni efihlekileko.+