“Bebafuna Ngizifumanele Mina Bona IBhayibhili Ithini Kwamambala”

UKUPHILA KWAMI KWANGAPHAMBILI:

Ngabelethelwa eSanto Domingo, eDominican Republic, ngibuphetjhani ebantwaneni abane. Ababelethi bami bebafundile begodu bebafuna ukukhulisa abantwana babo ngendlela ehle. Iminyaka emine ngaphambi kokubelethwa kwami, ababelethi bami bahlangana neenthunywa zevangeli zamaMormon. Bakarwe yindlela amasokana wakhona ambethe kuhle ngayo nahlonipheke ngayo, msinyana ababelethi bami baqunta bona umndeni wekhaya uzokuba ngewokuthoma esihlengelenesi ukuba malunga we-Church of Jesus Christ of Latter-day Saints, namtjhana isonto lamaMormon.

Njengombana ngikhula, bengizithanda izinto ebebazenza esontweni begodu ngahlonipha nendlela yamaMormon yokudzimelela eendabeni zokuphila komndeni nokuziphatha. Bengizikhakhazisa ngokuba yiMormon begodu ngakwenza umnqophwami ukuba sithunywa sevangeli.

Nengineminyaka eli-18 ubudala, umndenami wafudukela e-United States ngomnqopho wokobana ngifumane ifundo engcono khulu eyunivesithi ephambili. Esikhathini esingangomnyaka ngemva kwalokho, umani nendodakwakhe, ababoFakazi bakaJehova, beza bazosivakatjhela eFlorida. Basimemela emhlanganweni wesigodi. Kwangikara ukubona bonyana woke umuntu bekaqala imitlolo begodu atlola namaphuzu. Nami ngabawa ipeni nephepha ngathoma ukwenza okufanako.

Ngemva komhlangano wesigodi umani nendodakwakhe bathi njengombana nginekareko yokuba sithunywa sevangeli, bangangisiza ukufunda okuthileko eBhayibhilini. Ngacabanga bona mbono omuhle loyo ngombana ngesikhatheso, bengijayele khulu iNcwadi yamaMormon kuneBhayibhili.

INDLELA IBHAYIBHILI EYATJHUGULULA NGAYO UKUPHILA KWAMI:

Hlangana neengcoco zethu zeBhayibhili emtatweni, ngaso soke isikhathi umani nendodakwakhe bebangikhuthaza bona ngimadanise iinkolelo zami neemfundiso zeBhayibhili. Bebafuna ngizifumanele mina bona iBhayibhili ithini kwamambala.

Besele zizinengi izinto ebengizamukele ngekholo lamaMormon, kodwana bengingaqiniseki bona iMitlolo ithini ngemibono leyo. Umani wangithumela umagazini we-Phaphama kaNovemba 8, 1995, ogadangiswa boFakazi bakaJehova, ebewuhlanganisa nezinye iinhlokwana ezimalungana nekholo lamaMormon. Ngarareka bona bengingakajayelani neemfundiso ezinengi zamaMormon. Lokho kwangitjhukumisela bona ngiyokurhubhulula ku-Web site engokomthetho yamaMormon ukuqinisekisa bona lokho ebekutjhiwo yi-Phaphama! bekuliqiniso na. Bekuliqiniso, amaqiniso layo aqinisekiswa ngokupheleleko lokha nengivakatjhela imyuziyamu yamaMormon e-Utah.

Ngaso soke isikhathi bengikholelwa bona iNcwadi yamaMormon neBhayibhili ziyavumelana. Kodwana nengithoma ukufunda iBhayibhili ngokutjheja okukhulu, ngabona ukungavumelani okukhona hlangana neemfundiso zamaMormon nalokho okutjhiwo yiBhayibhili. Ngokwesibonelo, encwadini ka-Ezekiyeli 18:4, iBhayibhili ithi umphefumulo uyafa. Nokho, iNcwadi yamaMormon, ku-Alma 42:9, ithi: “Umphefumulo angeze wafa.”

Ngaphezu kokungavumelani endabeni yezekolo, bengitshwenywa ngilokho ebekufundiswa maMormon endabeni yobutjhaba. Ngokwesibonelo, amaMormon afundiswa bona isimu ye-Edeni beyiseJackson County, eMissouri, e-U.S.A. Begodu abaporofidi besonto bathi “uMbuso kaZimu uzokubusa iphasi loke ngokusebenzisa umbuso we-United States.”

Ngazibuza bona kuzokwenzakalani ngezinye iinarha ezifana naleyo engabelethelwa kiyo. Ngaveza indaba le nengikhuluma nelinye isokana eliyiMormon ebelibandulelwa ukuba sithunywa sevangeli elangidosela umtato ntambama. Ngalibuza ngaphandle kokuzaza bona lingalwa na namanye amaMormon nengabe inarha leyo beyingaba sepini iqalane nenarha yekhabo. Kwangirara khulu ukuvuma kwalo! Ngarhubhulula khudlwana ngeemfundiso zekholo lami begodu ngabuza nabadosi phambili beSonto lamaMormon. Bangitjela bona iimpendulo zeembuzo yami zihlanganisa iindaba eziyifihlo okuzokuthi ngelinye ilanga zisombululwe njengombana ukukhanya kuba kukhulu.

Ngidaniswe yihlathululwabo, ngaziqalisisa ngaqalisisa neenzathu zami zokufuna ukuba sithunywa sevangeli samaMormon. Ngabona bona bengithanda ukuba sithunywa sevangeli ngombana bengifuna ukusiza abanye. Esinye isizathu ebesingenza ngifune ukuba sithunywa sevangeli kungombana abantu bebazongihlonipha. Kodwana nekuziwa ehlangothini lakaZimu, bengingazi okungako ngaye. Nanyana ngikhe ngafunda iBhayibhili iinkhathi ezinengi esikhathini esidlulileko, bengingakhenge khengizuze kiyo. Bengingayazi ihloso kaZimu ngephasi namtjhana ngabantu.

INDLELA ENGAZUZA NGAYO:

Ekufundeni kwami iBhayibhili naboFakazi bakaJehova, phakathi kwezinye izinto engizifundileko, kukobana ibizo lakaZimu ngubani, kwenzakalani ekuhlongakaleni, begodu nokuthi ngiyiphi indima kaJesu ekuzalisekeni kwehloso kaZimu. Ekugcineni besele ngijayelana nencwadi ehle le, begodu bengikuthabela ukukhuluma nabanye ngamaqiniso ebengiwafunda. Besolo ngazi bona uZimu ukhona, kodwana kwanje ngiyakwazi ukukhuluma naye ngomthandazo njengomNgani wami wamambala. Ngabhabhadiswa njengomunye waboFakazi bakaJehova ngo-July 12, 2004, begodu eenyangeni ezisithandathu ezalandelako ngangenela ikonzo yesikhathi esizeleko ekonzweni yobuKrestu.

Iminyaka emihlanu, ngasebenza emzimkhulu waboFakazi bakaJehova eBrooklyn, eNew York. Ngikuthabela kwamambala ukwazi ukusiza ekwenziweni kwamaBhayibhili neencwadi ezisekelwe kiyo ezisiza iingidi zabantu ephasini loke, begodu ngiragela phambili ngithabela ukusiza abanye bafunde ngoZimu.