I-Edeni—Bekulikhaya Lesintu Lokuthoma?

ZICABANGE usesimini. Azikho iimphazamiso, alikho itjhada elifahla ebodeni ledorobho eliseduze. Isimu le yikulu, begodu ayikho into ethikazisa ukuthula kwayo. Okuhle khulu, umkhumbulwakho awutshwenywa lilitho, umzimbakho awutshwenywa nginanyana ngikuphi ukugula namtjhana iinhlungu. Umkhumbulwakho utjhaphulukile bona ukwazi ukuthabela indawo ekubhodileko.

Kokuthoma wanelisa amehlwakho ngokuthabela ukubona imibalabala ekhanyako yamathuthumbo bese kuba kuphazima komlanjana, iingidi zeengidi zamakari ahlaza notjani elangeni nemthunzini. Uzwa umoyana omnandi ebusweni bakho unuke nephunga elimnandi oza nalo. Uzwa itjhadana lamakari, nelamanzi abetha amatje, imilozi nombhino weenyoni netjhadana leengogonyani eziberegako. Njengombana ucabanga ngalokhu, awukhanuki ukuba sendaweni enjalo?

Abantu ephasini mazombe bakholelwa bona isintu sathoma endaweni enjalo. Amakhulu weemnyaka, amalunga wobuJuda, iSingabukrestu namaSulumani afundiswa ngesimu ye-Edeni, lapho uZimu abeka khona u-Adamu no-Efa bonyana bahlale khona. NgokweBhayibhili, bebanokuthula nethabo. Bebanokuthula hlangana nabo, banokuthula neenlwana, banokuthula noZimu ngomusa owabanikela ithemba lokuphila ngokungapheliko endaweni ekarisako leyo.—Genesisi 2:15-24.

NamaHindu anombono ohlukileko ngeparadeyisi lekadeni. AmaBuddha akholelwa bona abarholi abakhulu abangokomoya, namtjhana aboBuddha, bavela eemnyakeni emihle nenepumelelo lapho iphasi belinjengeparadeyisi. Iinkolo ezinengi ze-Afrika zifundisa iindaba ezinokufana okukhulu neka-Adamu no-Efa.

Eqinisweni, umbono weparadeyisi lokuthoma ungatholakala eenkolweni nemasikweni amanengi wesintu. Omunye umtloli wathi: “Iimphakathi eminengi ephucukileko gade ikholelwa bona kwakhe kwaba neparadeyisi, ebeyinabantu abapheleleko, kunetjhaphuluko, ukuthula, ithabo, inala, ukungabikho kokugandeleleka nokuphikisana. . . . Ikolelo le yabangela isintu sisokana bona sikhanukele iparadeyisi elalahlekako nokulinga ukufumana indlela yokulibuyisela.”

Kungenzeka bona zoke iindabezi namasiko la kuvela emthonjeni ofanako? Kungenzeka bona “imikhumbulo yabantu iyoke” iimphumela wento yamambala? Beyikhona kwamambala na isimu ye-Edeni esikhathini eside esadlulako, no-Adamu no-Efa bebakhona kwamambala?

Abasoli bayawunyaza umbono loyo. Esikhathini sesayensesi, abanengi bacabanga bona umlando onjalo uyintolwana. Ngokurarako, abanye abasoli babantu bekolo. Abarholi bezekolo abanengi bakhuthaza ukungakholelwa endabeni yesimu ye-Edeni. Bathi indawo enjalo akhenge kheyibe khona. Bathi umlando lo singathekiso, intolwana nomfanekiso.

Liqiniso, iBhayibhili inayo iimfanekiso. UJesu ngokwakhe wakhuluma ngeemfanekiso evelele khulu kunayo yoke. Nokho, kuyakhanya bona iBhayibhili ikhuluma ngendaba ye-Edeni, ingasi njengomfanekiso, kodwana njengomlando. Nengabe isenzakalo esihlathululwe la akhenge khesenzeke, manje singayithemba njani iBhayibhili iyoke? Akhe sihlahlube bona kubayini abanye basola indaba yesimu ye-Edeni bese sibone bonyana amabangabo ayazwakala na. Ngemva kwalokho sizokubona bonyana kubayini umlando lo kufuze uthinte ngamunye wethu.

Yakhe Yaba Khona Kwamambala Isimu Ye-Edeni?

UYAYAZI indaba ka-Adamu no-Efa nesimu ye-Edeni? Ijayelekile ebantwini ephasini mazombe. Kubayini ungazifundeli yona? Uzoyifumana kuGenesisi 1:26–3:24. Nakhu okhunye akutjhoko ngendaba le:

UJehova uZimua wabumba umuntu ngethuli, wamthiya bona ngu-Adamu, wambeka esimini esesifundeni esibizwa ngokobana yi-Edeni. NguZimu ngokwakhe owatjala isimu le. Beyifumana amanzi aneleko begodu izele imithi emihle yeenthelo. Hlangana nayo “bekunomuthi wokwazi okuhle nokumbi.” UJehova walela abantu bona badle emthini lo, wathi nebangadla kiwo, bazokufa. Ngokukhamba kwesikhathi, uJehova wenzela u-Adamu umngani—umfazi u-Efa—amenze ngenye yeembambo zaka-Adamu. UZimu wabapha umsebenzi wokutlhogomela isimu begodu wabatjela bona bande bazalise iphasi.

U-Efa nekayedwa, inyoka yakhuluma naye yamlinga bona adle isithelo ekuthiwe bangasidli, yathi uZimu uleya amala nokobana umfihlela okuhle, into ezomenza afane noZimu. Wayilalela wadla isithelo ekuthiwe bangasidli. Kamva, u-Adamu wahlanganyela naye ekungalalelini uZimu. UJehova wasabela ngokubagweba u-Adamu, u-Efa nenyoka. Ngemva kobana abantu baqothwe esimini eyiparadeyisi, iingilozi zavimba indlela engenako.

Hlangana nezazi, abongqondongqondo nabosomlando, khe kwaba yinto ejayelekileko ukutjengisa bona izenzakalo ezisencwadini yeBhayibhili yakaGenesisi ziliqiniso begodu zingokomlando. Amalanga la ukuzaza ngazo zoke iindaba ezinjalo kujayeleke khulu. Kodwana kusekelwephi ukuzaza kokulandisa kwencwadi kaGenesisi malungana no-Adamu, u-Efa nesimu ye-Edeni? Akhe sihlole ukuphikisa okune okujayelekileko.

1. Isimu ye-Edeni bekuyindawo yamambala na?

Kubayini kunokuzaza ngendaba le? Kungenzeka bona ifilosofi inendima kilokhu. Amakhulu weemnyaka, izazi zekolo zaraya bona isimu kaZimu beyisesekhona ndawana. Nokho, isondo lalandela izazi zefilosofi zamaGirigi ezinjengoPlato no-Aristotle, ebebakholelwa bona ephasini ayikho into engaphelela. Lizulu kwaphela elingaba nokuphelela. Ngalokho, izazi zekolo zaphetha ngokobana iParadeyisi lokuthoma kufuze bona beliseduze nezulwini.b Abanye bathi isimu le beyiphezu kwesiqongo sentaba ephakamileko, ukungalungi kwephasini bekungafiki kiyo; abanye bathi beyiseNorth Pole namtjhana eSouth Pole; abanye bebasalokhu bathi beyisenyangeni namtjhana beyiseduze nayo. Akurari bona yoke indaba ye-Edeni yathoma ukuthathwa njengelibhudango. Ezinye izazi zanamhlanje ziqala indaba ye-Edeni njengombhedo, zigandelela bona akhenge khekube nendawo enjalo.

Nokho, iBhayibhili ayiyihlathululi ngendlela leyo isimu. KuGenesisi 2:8-14, sifunda imininingwana eemnengi enqophileko ngendawo leyo. Beyisengcenyeni yepumalanga yesifunda se-Edeni. Beyithelelelwa mlambo okwavela kiwo iimlambo emine. Ngamunye weemlambo unebizo nehlathululo efitjhani ngeendawo egade udlula kizo. Sekusikhathi eside imininingwana le ikara izazi, ezinengi zazo bezilokhu zifunisela iimkhondo yendima yeBhayibhili le yokobana ikuphi indawo leyo namhlanje. Nokho, bavela neembono eemnengi ephikisanako. Lokhu kutjho bona ihlathululo ye-Edeni, isimu yayo neemlambayo imamala namtjhana yintolwana?

Cabanga: Izenzakalo ezikhuluma ngesimu ye-Edeni zenzeka eemnyakeni engaba zi-6 000 edlulileko. Ngokukhanyako zatlolwa nguMosisi, okungenzeka watjelwa zona ngomlomo namtjhana wazifunda emitlolweni egade ikhona. Nanyana kunjalo, uMosisi wazitlola eemnyakeni engaba zi-2 500 zenzeka. I-Edeni besele imlando wekadeni. Kwanje, kungenzeka na bona amatshwayo wendawo anjalo anjengeemlambo atjhentjha njengombana kudlula amakhulu weemnyaka? Ubujamo bephasi buhlala butjhuguluka. Isifunda okungenzeka i-Edeni beyikiso, siyindawo ethandwa kusikinyeka kwephasi—indawo okwenzeke kiyo amaphesenti ali-17 wakho koke ukusikinyeka kwephasi okukhulu. Eendaweni ezinjalo, itjhuguluko lijayelekile. Ngaphezu kwalokho, kungenzeka uKukhulamungu wangeenkhathi zakaNuwa watjhugulula ubujamo bephasi ngendlela esingeze sayazi namhlanje.c

Nokho, naka amaqiniso ambalwa esiwaziko: Ukulandisa kwakaGenesisi kukhuluma ngesimu njengendawo yamambala. Iimlambo eembili kwemine okukhulunywe ngayo—i-Ewufrathe neTigrisi namtjhana iHidekeli—isageleza nanamhlanje, begodu ezinye zeendawo okusuka kizo amanzi wayo zitjhidelene khulu. Ukulandisa kuzibiza nangamabizo iinarha iimlambo leyo ebeyigeleza kizo begodu kuhlathulula nezinto zemvelo ebezaziwa khulu endaweni leyo. Ebantwini bakwa-Israyeli wekadeni, okubabantu bokuthoma abafunda umlando lo, imininingwana le beyilirhelebho khulu.

Iintolwana zinjalo na? Namtjhana zijayele ukukhipha imininingwana engafakazelwa nofana iphikiswe? Iintolwanezo zithoma nje, “Kwasukelasukela, kwakukhona enarheni ethileko ekude.” Nokho, umlando ujayele ukufaka imininingwana eqakathekileko, njengombana nomlando nge-Edeni wenza.

2. Kuliqiniso na bona uZimu wenza u-Adamu ngehlabathi no-Efa ngenye yeembambo zaka-Adamu?

Isayensi yanamhlanje iqinisekisa bona umzimba womuntu wakhiwa zizakhi ezihlukahlukeneko—njenge-hydrogen, oxygen, ne-carbon—zoke ezifumaneka ehlabathini. Kodwana izakhezo zahlanganiswa njani zaba sibunjwa esiphilako?

Abososayensi abanengi bakholelwa bona ukuphila kwazivelela, kuthoma ngeendlela zokuphila ezilula okwathi kancani kancani, hlangana neengidi zeemnyaka, zaba kuphila okurareneko. Nokho, ibizo elithi “lula” lingakhohlisa, ngombana zoke izinto eziphilako—ngitjho nalezo ezincani khulu ezineseli eyodwa ongazibona kwaphela nge-microscope—zirara khulu. Akunabufakazi bokobana ihlobo elithileko lokuphila lazivelela namtjhana lingazivelela. Kunalokho, zoke izinto eziphilako zinikela ubufakazi bokobana ziklanywe ngokuhlakanipha okudlula kwethu kude.d—KwebeRoma 1:20.

Ungazicabanga ulalele umbhino omnandi namtjhana uthabela ubuhle bamagwalo nanyana ukarwa msebenzi othileko wetheknoloji bese uphetha ngokobana iintwezo azinamenzi? Angekhe! Kodwana imisebenzi yobukghwari enjalo ayibandameli nokubandamela ekuraraneni, ebuhleni, namtjhana ekuhlakanipheni esikubona emklamweni womzimba womuntu. Singaphetha njani ngokobana zange ube noMbumbi? Ukungezelela kilokho, ukulandisa kwakaGenesisi kuhlathulula bona kizo zoke izinto eziphilako ephasini, babantu kwaphela abenziwe ngomfanekiso kaZimu. (Genesisi 1:26) Kuyafaneleka-ke, bona ephasini babantu kwaphela abatjengisa isifiso sakaZimu sokubumba, ngezinye iinkhathi benze iimsebenzi erarako kezombhino, ubukghwari, netheknoloji. Kufuze kusirare na bona uZimu ubhedere khulu ekudaleni kunathi?

Malungana nokubunjwa komfazi ngebambo lendoda, yini ebudisi ngokwenza lokho?e UZimu bekangasebenzisa ezinye iindlela, kodwana ukwenza umfazi ngendlela le bekunokuqakatheka okukarisako. Bekafuna bona indoda nomfazi batjhade bakhe isibopho esiqinileko, kube njengokungathi ‘banyamanye.’ (Genesisi 2:24) Indlela indoda nomfazi abaphelelisana ngayo, bakhe isibopho esiqinileko nesibazuzisako, ayisibufakazi obunamandla bokobana kunoMbumbi ohlakaniphileko nonethando?

Ukungezelela kilokho, izazi zanamhlanjesi zezakhi zefuzo ziyavuma bona kungenzeka boke abantu bavela endodeni nomfazi munye. Kwamambala, singatjho na bona ukulandisa kwakaGenesisi kuyintolwana?

3. Indaba yomuthi welwazi nomuthi wokuphila ibonakala iyintolwana.

Eqinisweni, ukulandisa kwakaGenesisi akufundisi bona imithi le ngokwayo gade inamandla ararako namtjhana angaphezu kwawomuntu. Kunalokho, gade imimithi yamambala uJehova ayenza yajamela okuthileko.

Abantu abenzi okufanako ngezinye iinkhathi? Isibonelo, ijaji lingayelelisa ngobugebengu bokudelela ikhotho. Akusiyifenitjhara, amaboda, nezinto ezisekhotho ijaji elifuna ukuzivikela ekudelelweni kodwana yihlelo lobulungiswa elijanyelwe yikhotho. Namakhosi ahlukahlukeneko asebenzisa intonga nomqhele njengamatshwayo wegunya lobukhosi bawo.

Ngalokho-ke, imithi eembili leyo gade ifanekiselani? Kuneenkolelo ezinengi ezirarejako ezinikelweko malungana nalokho. Ipendulo yamambala, ngitjho namtjhana ilula, iqakatheke khulu. Umuthi welwazi lokuhle nokumbi bewufanekisela ilungelo okungelakaZimu kwaphela—ilungelo lokuqunta bona yini ehle nokobana yini embi. (Jeremiya 10:23) Akurari bona bekubugebengu ukweba emthini loyo! Ngakelinye ihlangothi, umuthi wokuphila, ufanekisela isipho okunguZimu kwaphela ongasipha sona—ukuphila okungapheliko.—KwebeRoma 6:23.

4. Inyoka ekhulumako ibonakala iyintolwana.

Kuyavunywa, ukulandisa kwakaGenesisokhu kungarareja, khulukhulu nengabe akuhlanganiswa nakho koke ukulandisa kweBhayibhili. Nokho, kancani kancani iMitlolo iyayembula ifihlo erarejako le.

Ngubani namtjhana yini eyenza kwabonakala ngasuthi inyoka leyo iyakhuluma? Ama-Israyeli wekadeni bekazi namanye amaqiniso akhanyisa indima yenyoka leyo. Isibonelo, bekazi bona ngitjho nanyana iinlwana zingakhulumi, umuntu womoya angenza isilwana sibonakale kwanga siyakhuluma. UMosisi godu watlola ngendaba kaBhalami; uZimu wathumela ingilozi bona yenze idonki kaBhalami ikhulume njengomuntu.—Numeri 22:26-31; 2 KaPitrosi 2:15, 16.

Ezinye iimbujwa zomoya, kubandakanye nalezo ezimanaba kaZimu, zingazenza iimmangaliso? UMosisi wabona abapristi beGibhida abenza amasalamusi balingisa ezinye zeemmangaliso zakaZimu, njengokwenza intonga ibonakale kwanga yinyoka. Amandla wokwenza iinkarisomraro ezinjalo angavela kwaphela emanabeni wakaZimu asendaweni yemimoya.—Eksodosi 7:8-12.

Godu kubonakala kwanga nguMosisi owatlola incwadi kaJobhi. Incwadi leyo yafundisa okunengi ngenaba lakaZimu elikhulu, uSathana, owaleya amala abekela ukuthembeka kwazo zoke iinceku zakaJehova isitjhijilo. (Jobhi 1:6-11; 2:4, 5) Kungenzeka na bona ama-Israyeli aphetha ngokobana uSathana walawula inyoka ye-Edeni, wayenza kwabonakala ngasuthi iyakhuluma, yakhohlisa u-Efa bona angathembeki kuZimu? Kubonakala kunjalo.

NguSathana owenza bona inyoka ileye amala? Kamva uJesu waqalisela kuSathana ngokobana “unamanga, unguyise lamanga.” (Jwanisi 8:44) ‘Uyise lamanga’ kufuze kube mthomisi wamala wokuthoma akhulunywa, akusinjalo? Amala wokuthoma mamezwi inyoka eyawatjho ku-Efa. Iphikisa isiyeleliso sakaZimu sokobana ukudla isithelo ekuthiwe bangasidli kuzobalethela ukufa, inyoka yathi: “Ngokuqinisekileko ngekhe nife.” (Genesisi 3:4) Ngokukhanyako, uJesu bekazi bona nguSathana owenza inyoka yakhuluma. ISambulo uJesu asinikela umpostoli uJwanisi siyayilungisa indaba le, sibiza uSathana “inyoka yamambala.”—ISambulo 1:1; 12:9.

Kukuhlakanipha ukukholelwa bona umuntu womoya onamandla angenza inyoka ibonakale ngasuthi iyakhuluma? Ngitjho nabantu, nanyana banamandla amancani nebamadaniswa neengilozi, bangenza izinto ezirarako njengalokha umuntu onobukghoni angenza ngasuthi ilizwi lakhe livela kunompopi oseduze enze neminye imidumo.

Ubufakazi Obunamandla Kunabo Boke

Awuvumi bona iinsolo zokulandisa kwakaGenesisi azinasisekelo esiqinileko? Ngakelinye ihlangothi, kunobufakazi obunamandla bokobana indaba le iyiqiniso.

Isibonelo, uJesu Krestu ubizwa “ufakazi othembekileko noqinisileko.” (ISambulo 3:14) Njengombana gade aphelele, akhenge aleye amala, namtjhana ahlanekele iqiniso ngananyana ngiyiphi indlela. Ukungezelela kilokho, wafundisa bona waba khona isikhathi eside ngaphambi kobana aphile njengomuntu ephasini—eqinisweni, bekaphila eduze noYise, uJehova, “iphasi lingakabunjwa.” (Jwanisi 17:5) Ngalokho, besele akhona nekuthoma ukuphila ephasini. Ufakazi othembeke kunabo boke lo unikela buphi ubufakazi?

UJesu wakhuluma ngo-Adamu no-Efa njengabantu bamambala. Waqalisa emtjhadweni wabo nekahlathulula umthetho kaJehova wokuba nomlingani womtjhado oyedwa. (Matewu 19:3-6) Nengabe akhenge babe khona begodu nesimu ebebahlala kiyo iyintolwana, ngalokho uJesu bekakhohlisiwe namtjhana bekaleya amala. Kokubili lokho ngeze kwenzeka! UJesu bekasezulwini, wabona nekwenzeka ihlekelele esimini leyo. Bukhona ubufakazi obunamandla ukudlula lobo?

Kuhlekuhle, ukungakholelwa ekulandiseni kwakaGenesisi kunyaza ukuba nekholo kuJesu. Ukungakholwa okunjalo godu kwenza kungakghoneki nokuzwisisa ezinye iinhloko zeBhayibhili ezikulu neenthembiso ezikhuthaza kwamambala. Akhe sibone bona kubayini kunjalo.

[Imitlolo yaphasi]

Indlela Indaba Ye-Edeni Eqakatheke Ngayo Kuwe

OKHUNYE ukuphikisana okurarako ezinye izazi ezikuvezako ngokulandisa kwe-Edeni kukobana ayisekelwa yiBhayibhili iyoke. Isibonelo, uProfesa Weemfundo Zekolo uPaul Morris watlola wathi: “Asikho isikhombiso samva seBhayibhili esinqophileko esikhuluma nge-Edeni.” Umbonwakhe ungasekelwa yinengi “lezazi” ezihlukahlukeneko, kodwana uphikisana ngokunqophileko neqiniso.

Eqinisweni iBhayibhili iqalisa kanengi esimini ye-Edeni, u-Adamu, u-Efa nenyoka.a Umtjhapho owenziwe zizazi ezimbalwa mncani newumadaniswa nomtjhapho owenziwe barholi bekolo nabaphikisi beBhayibhili. Ngokunyaza ukulandisa kwakaGenesisi ngesimu ye-Edeni, abadosiphambili bekolo nalabo abaphikisa iBhayibhili eqinisweni balinga ukunyaza koke okutjhiwo yiBhayibhili. Kubayini singatjho njalo?

Ukuzwisisa bona khuyini eyenzeka e-Edeni kuqakathekile ekuzwisiseni iBhayibhili iyoke. Isibonelo, iLizwi lakaZimu lenzelwe ukusirhelebha sifumane iimpendulo zeembuzo ebudisi khulu neqakathekileko abantu abaqalana nayo. Ngokuphindiweko, iimpendulo zeBhayibhili zeembuzo leyo zilandisa ngalokho okwenzeka esimini ye-Edeni. Qala nanzi ezinye iimbonelo.

● Kubayini siluphala begodu sifa? U-Adamu no-Efa bekufuze baphile ngokungapheliko ukube bahlala balalela uJehova. Bebazokufa kwaphela nebahlubukako. Ngelanga abahlubuka ngalo, bathoma ukufa. (Genesisi 2:16, 17; 3:19) Balahlekelwa kuphelela, into ebebazoyidlulisela enzalwenabo, sisono nokungapheleli kwaphela. Ngalokho iBhayibhili iyahluthulula: “Isono seza ephasinapha ngomuntu oyedwa, kwathi isono sakhe saletha ukufa ebantwini boke, ngombana boke bonile.”—KwebeRoma 5:12.

● Kubayini uZimu avumele ubumbi? Esimini ye-Edeni, uSathana wabiza uZimu ngomleyimala odima iimbunjwa zakhe okuhle. (Genesisi 3:3-5) Ngalokho wazaza bona uJehova ubusa ngendlela elungileko. U-Adamu no-Efa bakhetha ukulandela uSathana; ngalokho baphikisa ukubusa kwakaJehova, eqinisweni, bagandelela bona umuntu angazikhethela ngokwakhe phakathi kokuhle nokumbi. Ngokulunga nokuhlakanipha kwakhe okupheleleko, uJehova bekazi bona kunendlela eyodwa kwaphela yokuphendula isitjhijilwesi ngendlela efaneleko—ukuvumela ukudlula kwesikhathi, ukunikela abantu ithuba bonyana bazibuse njengombana bakhethile. Umphumela wobumbi, ngokuyingcenye ngebanga lomthelela kaSathana oragela phambili, kancani kancani waveza iqiniso elinamandla: Umuntu akakwazi ukuzibusa ngaphandle kwakaZimu.—Jeremiya 10:23.

● Uyini umnqopho kaZimu ngephasi? Esimini ye-Edeni, uJehova wabeka ikambisolawulo yokuhle ngephasi. Walayela u-Adamu no-Efa bona bazalise iphasi ngenzalo yabo “balihlule,” bonyana balethe ubuhle nokuvumelana ephasini loke. (Genesisi 1:28) Ngalokho umnqopho kaZimu ngephasi kukobana libe yiparadeyisi elihlalwa mndeni opheleleko nobumbeneko wenzalo ka-Adamu no-Efa. Okunengi okuseBhayibhilini yindlela kaZimu yokuzalisa umnqophwakhe wekuthomeni.

● Kubayini uJesu eza ephasini? Ukuhlubuka esimini ye-Edeni kwaletha isigwebo sokufa ku-Adamu no-Efa nayo yoke inzalo yabo, kodwana ngethando uZimu wasinikela ithemba. Wathumela iNdodanakhe ephasini bona inikele lokho iBhayibhili ekubiza ngokobana sihlengo. (Matewu 20:28) Kutjho ukuthini lokho? UJesu ‘bekangu-Adamu wamaphelelo’; waphumelela kilokho u-Adamu abhalelwa kukwenza. UJesu wabulunga ukuphelela kwakhe kobuntu ngokuhlala athembekile kuJehova. Ngemva kwalokho, wanikela ngokuphila kwakhe njengomnikelo namtjhana isihlengo, enza kukghoneke kibo boke abantu abathembekileko bona bafumane ukulitjalelwa kwezono zabo, ekugcineni bafumane ukuphila okufana negade kuthatjelwa ngu-Adamu no-Efa e-Edeni ngaphambi kobana bone. (1 KwebeKorinte 15:22, 45; Jwanisi 3:16) Ngalokho uJesu waqinisekisa bona umnqopho kaJehova wokutjhugulula iphaseli libe yiparadeyisi efana ne-Edeni uzokuzaliseka.b

Umnqopho kaZimu awusiyo into engazwakaliko namkha umbono onganasisekelo. Yinto yamambala. Njengombana isimu ye-Edeni bekuyindawo yamambala ephasineli, ineenlwana zamambala nabantu bamambala, ngalokho isithembiso sakaZimu ngengomuso siqinisekile, sizokwenzeka msinyana. Lizokuba yingomuso lakho kwamambala? Okunengi kwalokho kukuwe. Ingomuso elinjalo uZimu ulifunela abantu abanengi ngendlela okungakghoneka ngayo, ngitjho nalabo ebebangaphili ngeenkambisolawulo zaKhe.—1 KuThimothi 2:3, 4.

Njengombana uJesu afa, wakhuluma nendoda egade iphila ukuphila okumbi khulu. Indoda le gade isilelesi; beyazi bona ifanelwe kukufa. Kodwana yaphendukela kuJesu bona ifumane induduzo nethemba. UJesu wasabela njani? Wathi kiyo: “Uzaba nami eParadeyisini.” (Luka 23:43) Nengabe uJesu ufuna ukubona ogade ayisoni lapho—avusiwe begodu abusiswe ngethuba lokuphila ngokungapheliko eparadeyisini efana ne-Edeni—akakufuneli isibusiso esifanako nawe? Uyakufunela! NoYise uyakufunela! Nengabe nawe uzifunela ingomuso elinjalo, yenza koke ongakwenza ukufunda ngoZimu owenza isimu ye-Edeni.

[Imitlolo yaphasi]

[Ibhoksi/Iinthombe ekhasini 10]

ISIPOROFIDO ESENZA IBHAYIBHILI YOKE IVUMELANE

“Ngizokubeka ubunaba phakathi kwakho [inyoka] nomfazi naphakathi kwenzalo yakho nenzalo yakhe. Izokuphadlha ihloko wena uzokukghubula isithende sayo.”—Genesisi 3:15.

Leso siporofido seBhayibhili sokuthoma esatjhiwo nguZimu e-Edeni. Bobani abalingiswa abanaba: umfazi, inzalwakhe, inyoka nenzalwayo? Kungayiphi indlela ‘kunobunaba’ hlangana nabalingiswaba?

INYOKA

NguSathana uDeveli.—ISambulo 12:9.

UMFAZI

Yihlangano kaJehova yeembunjwa zezulwini. (KwebeGalatiya 4:26, 27) U-Isaya wakhuluma ‘ngomfazi,’ abikezela bona uzokubeletha isitjhaba esingokomoya sangomuso.—Isaya 54:1; 66:8.

INZALO YENYOKA

Ngilabo abakhetha ukwenza intando kaSathana.—Jwanisi 8:44.

INZALO YOMFAZI

Ngokuyihloko nguJesu Krestu, owavela engcenyeni yehlangano kaJehova yezulwini. Okhunye godu okuhlanganiswa ‘nenzalo,’ banakwabo lakaKrestu abangokomoya, ababusa naye ezulwini. AmaKrestu azesiweko layo akha isitjhaba esingokomoya, ‘u-Israyeli kaZimu.’—KwebeGalatiya 3:16, 29; 6:16, NW; Genesisi 22:18.

ISILONDA ESITHENDENI

Kulinyazwa kwakaMesiya okubuhlungu kodwana ingasi kwesikhathi eside. USathana waphumelela ekubulaleni uJesu ephasini. UJesu wavuswa.

ISILONDA EHLOKO

Kutjho ukutjhatjalaliswa kwakaSathana. UJesu uzokususa uSathana unomphela. Ngitjho nangaphambi kwalokho, uJesu uzokulungisa umonakalo owathonywa nguSathana e-Edeni.—1 KaJwanisi 3:8; ISambulo 20:10.

Ukubuyekeza okurhunyeziweko ngesihloko seBhayibhili esikhulu, qala incwajana ethi, IBhayibhili—Inamuphi Umlayezo? egadangiswe boFakazi BakaJehova.

[Isithombe ekhasini 11]

U-Adamu no-Efa baba nemiphumela ebuhlungu ngesono sabo