UJesu Ulapha Umsana Onedimoni

UJesu, uPitrosi, uJakopo noJwanisi nabehla entabeni, bahlangana nesiqubuthu esikhulu. Kukhona okungakhambi kuhle. Abatloli babungelele abafundi, baphikisana nabo. Abantu bathaba khulu nababona uJesu, bagijimela kuye bayomlotjhisa. UJesu uyababuza uthi: “Niphikisana ngani nabo?”​—Markosi 9:16.

Indoda ethileko esiqubuthwini iguqa phambi kwakaJesu bese iyahlathulula: “Mfundisi, ngilethe indodanami kuwe ngombana inommoya oyenza ingakghoni ukukhuluma. Uthi nawuyibambako, uyidule phasi, ibhubhudlhe amagwebu, iququde amazinyo beyiphelelwe mamandla. Ngibawe abafundi bakho bona bawukhuphe, kodwana babhalelwe.”​—Markosi 9:17, 18.

Kubonakala ngasuthi abatloli basola abafundi ngombana babhalelwe kulapha umsana lo, kungenzeka bayabahleka nokubahleka. Kunokuthi aphendule ubaba otshwenyekileko lo, uJesu ukhuluma nesiqubuthu uthi: “Maye sizukulwana esingakholwako nesikhohlakeleko, kuzabe kube nini nginani? Kufuze nginibekezelele isikhathi esingangani?” Ngokuqinisekileko, amezwi anamandla la asebenza ebatlolini ebebatshwenya abafundi bakhe ngesikhathi yena angekho. Akhuluma nobaba otshwenyekileko, uJesu uthi: “Lethapha indodanakho.”​—Lukasi 9:41.

Njengombana umsana lo atjhidela kuJesu, idimoni elimphetheko limbhudabhuda phasi, limphathise nesithunthwani esimbi khulu. Umsana lo usolo agedeka phasi, abhubhudlha namagwebu. UJesu ubuza uyise: “Sekusikhathi esingangani lokhu kwenzeka?” Uyaphendula uthi: ‘Kusukela ebuntwaneni bakhe, sekukanengi limlahlela emlilweni nemanzini lifuna ukumbulala.’ Indoda le irabhela uJesu ithi: “Nawungakghona ukumlapha, sibawa usirhawukele, usisize.”​—Markosi 9:21, 22.

Ubaba lo sekaphelelwe lithemba ngombana ngitjho nabafundi bakaJesu babhalelwe kumsiza. Aphendula isibawo sendoda ephelelwe lithemba le, uJesu utjho amezwi akhuthazako: “Kubayini uthi, ‘Nawungakghona’? Ngombana zoke izinto ziyenzeka emntwini okholwako.” Msinyana uyise lomsana uyarhuwelela uthi: “Ngiyakholwa! Ngisiza lapha ngitlhoga khona ukukholwa!”​—Markosi 9:23, 24.

UJesu ubona isiqubuthu esigijimako siza kuye. Phambi kwabo boke, uJesu ukhalima idimoni uthi: “Wena mmoya omenza angakghoni ukukhuluma begodu angezwa, ngikuyala bona uphume kuye, ungasangeni kuye godu!” Naliphumako, idimoni lenza umsana lo arhuwelele begodu azibhudabhude phasi. Ngemva kwalokho urabhalala phasi angasikinyeki. Nababona lokhu, abantu abanengi bathi: “Uhlongakele!” (Markosi 9:25, 26) Kodwana uJesu ubamba umsana lo ngesandla, uyavuka ‘alapheke khonokho.’ (Matewu 17:18) Abantu barareka khulu nababona lokho uJesu akwenzako.

Phambilini, ngesikhathi uJesu athuma abafundi bakhe bona bayokutjhumayela, bakghona ukuqotha amadimoni. Nje-ke, nasebabodwa ngendlini bayambuza: ‘Kubayini thina sibhalelwe kuliqotha?’ UJesu uhlathulula ukuthi kungebanga lokungakholwa kwabo, uthi: “Umhlobo lo ungaphuma kwaphela ngomthandazo.” (Markosi 9:28, 29) Bekutlhogeka ukukholwa okuqinileko nokuthandazela amandla kaZimu bona bakghone ukuqotha idimoni elinamandleli.

UJesu uyaphetha uthi: “Kwamambala ngithi kini, naningaba nokukholwa okulingana nembewu yemastedi, nizokuthi entabeni le, ‘Suka lapho uye lapha,’ izokusuka, begodu ayikho into engekhe yenzeke kini.” (Matewu 17:20) Ukukholwa kunamandla ararako!

Iinqabo nemiraro evimba ituthuko ekulotjheni uJehova ingabonakala imikhulu begodu idzimelele njengentaba yamambala. Kodwana nasilwela ukukholwa, singazihlula iinqabo nemiraro enjengentaba.