Kuhlekuhle UJesu Bekaqaleka Njani?

Akakho namunye umuntu onesithombe sakaJesu. Azange akhe atjhudwe isithombe namkha abazwe. Nanyana kunjalo, uvela eenthombeni ezinengi khulu ebezenziwa ziinkghwari emakhulwini weminyaka eyadlulako.

Iinkghwarezo nazo bezingazi ukuthi kuhlekuhle uJesu bekaqaleka njani. Amasiko wangesikhatheso, iimfundiso zesondo kunye nabalawuli bomsebenzi wobukghwari, bebahlale banento abangayitjho eenkghwarini ebezidweba imifanekiso kaJesu. Bekubhala sekuthiwa iinthombezo kunye nemibazo yakhona azibonakali kuhle, kodwana bezidlala indima ekulu ngoJesu neemfundiso zakhe.

Ezinye iinkghwari nazigwala umfanekiso kaJesu, bezimveza amumuntu otlhuwisako nomtherethere, indoda eneenhluthu ezide netjebe eburidzanyana. Keminye imigwalo avezwe anamandla angaphezu kewomuntu, nawumqalako unomkhanyo orondo ngehla kwehlokwakhe bese-ke ajamele kudanyana nabantu. Kghani imigwalo enjalo iimfanekisa kuhle na uJesu? Singafunisisa njani? Amezwi aseBhayibhelini asisiza ekuzwisiseni indlela ebakaqaleka ngayo. Angasithatha asibeke esithombeni okungiso ngoJesu.

“UNGILUNGISELE UMZIMBA”

Kungenzeka amezwi la uJesu wawatjho emthandazwenakhe ngesikhathi abhajadiswa. (Hebheru 10:5; Matewu 3:13-17) Umzimba akhuluma ngawo lo bewunjani? Eminyakeni ema-30 ngaphambilini, ingilozi yathi kuMariya: “Uzakuba sidisi, ubelethe indodana, . . . iNdodana kaZimu.” (Lukasi 1:31, 35) Kwaba njalo, uJesu bekayindoda epheleleko njengo-Adamu nakadalwako. (Lukasi 3:38; 1 Korinte 15:45) Kufuze ukuthi bekanejamo tle uJesu, kungenzeka nokuthi bekanokufana okuthileko nonina uMariya umfazi womJuda.

UJesu bekanetjebe, vele bekulisiko lamaJuda ebelibenza bahluke emaRomeni. Itjebe le beyitjho isithunzi nokuhlonitjhwa kwawo; beyingabi yide khulu godu beyingasi madlakadlaka. Asingabazi-ke ukuthi noJesu bekayitlhogomela kuhle itjebakhe ayikere abe aphungule neenhluthu zakhe kuhle. Bese kube namaNaziri, abantu ebebangathintwa sikere ehloko, omunye wabantwabo nguSamsoni, bengekhe athoma akere iinhluthu zakhe.—Numeri 6:5; AbaKhokheli 13:5.

UJesu waba mbazi iminyaka ema-30 yoke. Bekanganayo imitjhini yanamhlanje yetheknoloji engenza umsebenzakhe ube lula. (Markosi 6:3) Ukusebenza budisi okunjalo, mhlamunye kwamenza ikakaramba. Ekuthomeni kwekonzwakhe, “wabaqotjha boke ngethempelini, izimvu neenkomo; wapewula iintafula zabatlharululi bemali warhatjha imali yabo,” iintwezi zoke njalo wazenza ngaphandle kokusizwa mumuntu. (Jwanisi 2:14-17) Isenzo sakhesi bengeze wasenza umtheretherana womuntu, bekufuze ube namandla tle! UJesu wawusebenzisa kuhle umzimba uZimu amlungisela wona. Wakufeza koke amlayela khona, ngikho athi: “Kufanele ngitjhumayele iindaba ezimnandi ngombuso kaZimu nakezinye iindawo ngombana ngithunyelwe khona lokho.” (Lukasi 4:43) Bekutlhoga amandla ukuratha inarha yePalestina ngeenyawo utjhumayele umlayezo lo.

“YIZANI KIMI, . . . MINA NGIZANIPHUMUZA”

Amezwakhe nendlela ebekenza ngayo izinto uJesu, ngiyo ebeyikara abantu “abadiniweko nabadisibezwako.” (Matewu 11:28-30) Ithando nesineke sakhe sasiqinisekisa isithembiso sokubaphumuza abazimisele ukufundiswa nguye. Woke umuntu omutjha bekafuna ukuzibona ahlanu kwakhe. IBhayibheli lithi: “Wathatha abantwana wabasingatha.”—Markosi 10:13-16.

Nanyana asuhleka ngaphambi kokufa kwakhe, kodwana bekangasuye umuntu ohlala atlhuwile. Isibonelo salokho, wafaka isandla nakutjhadiswako eKana, watjhugulula amanzi aba liwayini. (Jwanisi 2:1-11) Nakeminye iminyanya ebekayikhamba, wabatjhiya neemfundo ebengeze bazilibala.—Matewu 9:9-13; Jwanisi 12:1-8.

Ngaphezu kwakho koke, uJesu bekatjhumayela ngendlela yokuthi, iinlaleli zakhe zisale zinethemba lokuphila okungapheliko. (Jwanisi 11:25, 26; 17:3) Abafundi bakhe abama-70, babuya bambikela ngebakufumane nabatjhumayelako, uJesu ‘wathaba’ wathi: “Thokoziswani kukobana amabizwenu atloliwe ezulwini.”—Lukasi 10:20, 21.

“KODWANA ANIKAMELI UKUBA NJALO”

Abafundisi bemihleni kaJesu bebakuthanda khulu ukubukwa, bafuna nokuhlonitjhwa. (Numeri 15:38-40; Matewu 23:5-7) Umahluko ngoJesu kukuthi wakhalima abapostoli bakhe bonyana bangabi ‘makhosi’ phezu kwabanye abantu. (Lukasi 22:25, 26) Esikhundleni salokho wathi: “Lemukani abafundisi bomthetho, abathanda ukuzakalala ngeemphuraphura ezide, bathanda ukulotjhiswa eendaweni zokuthengisela.”—Markosi 12:38.

Enye into erarako ngoJesu kukobana bengeze wamhlukanisa hlangana nabantu. (Jwanisi 7:10, 11) Ngitjho naphakathi kwabapostoli bakhe aba-11, bekangazenzi avelele kube nguye nguye. Umkghaphelakhe uJudasi nakathengisa uJesu esiqubuthwini sabantu, kwafuze amncwange ‘abanikela isibonakaliso.’—Markosi 14:44, 45.

Ukungazi yoke imininingwana, lokho akutjho ukuthi imifanekiso ebiyigwalwa ngoJesu iliqiniso ngokuqaleka kwakhe. Ngaphezu kwendlela ebekaqaleka ngayo, okuqakatheke khulu yindlela esimqala ngayo njenganje.

“KUNGAKABI SIKHATHI ESIDE, IPHASI ANGEKHE LISANGIBONA”

Ilanga akhuluma ngalo amezwi la, ngilelo afa bewangcwatjwa ngalo. (Jwanisi 14:19) ‘Wanikela ipilwakhe njengesihlengo sabanengi.’ (Matewu 20:28) UZimu wamvusa ngelanga lesithathu waba “mmoya,” wenza bona abonwe bafundi bakhe. (1 Pitrosi 3:18; IzEnzo 10:40) Wavuka anjani-ke nasele abonakala ebafundini bakhe? Kwaba nomahluko omncani, kangangokuthi nabangani bakhe bahlulwa kumbona. UMariya Magdalina wacabanga ukuthi umnikazi wesimu, abafundi ababili nabo bakhambisana naye endleleni balibangise e-Emawusi bathatha ukuthi mumuntu abangamaziko.—Lukasi 24:13-18; Jwanisi 20:1, 14, 15.

Alo kufuze simthathe njani uJesu namhlanjesi? Besele kudlule iminyaka ema-60 yoke uJesu ahlongakala, umpostoli uJwanisi wambona embonweni. Kodwana uJwanisi akhenge abone umuntu ofele esigodweni. Wabona “iKosi yamakhosi noMbusi wababusi.” IKosi enikelwe umBuso kaZimu, kungasikade izokuhlula amanaba kaZimu amadimoni kunye nabantu, beyilethele abantu iimbusiso zokuphila okungapheliko.—IsAmbulo 19:16; 21:3, 4.