Usakhumbula ubhusuka phasi nawusese mncani? Usakhumbula uzisika esandleni namkha urhubuka idolo? Uyayikhumbula na indlela ummakho ebekakududuza ngayo? Mhlamunye bekasula inceba bese akubhanditjhe. Bewulila, kodwana amezwi wakhe aduduzako bekakwenza uzizwe ngcono. Ngesikhatheso sokukhula kwakho induduzo beyihlala iseduze nawe.

Kodwana ipilo iyatjharagana njengombana sikhula. Imiraro iya ngokwanda, nenduduzo ibe yimvela kancani. Kuyadanisa nokwazi bona imiraro yabantu abadala angekhe wayilungisa ngebhanditjhi, namkha ngokwanga. Nazi iimbonelo ezimbalwa.

• Wakhe waqalana nobudisi bokulahlekelwa msebenzi? UJulian uthi mhla aqotjhwa, wazizwa aphasi khulu. Wazibuza ukuthi ‘Ngiyowutlhogomela njani umndenami?’ ‘Ngemva kweminyaka eminengi kangaka ngisebenzela ikhamphani le, khona ibona nje ukuthi ayisangitlhogi?’

• Mhlamunye kungenzeka ungandelelwe kuphuka komtjhadwakho. URaquel uthi: “Ngemva kobana ubabakwami angitjhiye eenyangeni ezili-18 ezidlulileko, ngadana kwamambala. Ihliziywami beyincinca. Ubuhlungu bakhona bengibuzwa enyameni nangokomzwelo. Kwangithusa khulu lokho.”

• Mhlamunye unomraro wezamaphilo okubonakalako ukuthi angekhe ulunge. Kungaba neenkhathi lapho uzizwa khona njengoJobho owalila wathi: “Kwanje sengiphosele itewu, angeze ngisaphila ukuyaphi. Akhe ungisuduke ngombana amalanga ayile.” (Jobho 7:16) Kungenzeka uzizwa njengoLuis, indoda eseminyakeni yama-80, owanyekele wathi, “Ngas’khathi nginokuzibuza ukuthi ngifa nini.”

• Namkha kungenzeka uhlongakalelwe mumuntu omthandako, yeke ululukela induduzo. URobert uthi: “Mhla kuhlongakala indodanami engozini yesiphaphamtjhini, ngalilahla ithemba. Ngemva kwalokho kwalandela ubuhlungu, iBhayibheli ebufanisa nobuhlungu besabula nayingena enyameni.”—Lukasi 2:35.

URobert, uLuis, uRaquel noJulian bayitholile induduzo ebudisini ebebaqalene nabo. Bathole uMthombo wenduduzo—uZimu uMninimandla Woke. Ubaduduze njani? Angakghona na ukukududuza nawe?

Umpostoli uPowula uhlathulula uJehovaa ngokuthi nguZimu “wenduduzo yoke, osiduduza kizo zoke iinhlupheko zethu.” (2 Korinte 1:3, 4) Ngikho iBhayibheli lisiqinisekisa bona akunalitho elinzima emuntwini elingahlula uZimu nokuthi akunabudisi esingaqalana nabo uBabethu wezulwini angabhalelwa kusitjhiriya kibo.

Iye khona kuliqiniso ukuthi nathi kufuze sidlale yethu indima nasifuna induduzo evela kuZimu. Udorhodere angasisiza njani nasingayi kuye siyokufuna isizo? Umphorofidi u-Amosi wabuza ukuthi: “Abantu ababili bangakhamba ndawonye bangakavumelani na?” (Amosi 3:3) Ngikho-ke imiTlolo isikhuthaza ithi: “Tjhidelani kuZimu naye uzakutjhidela kini.”—Jakopo 4:8.

Singaqiniseka njani bona uZimu uzokutjhidela kithi? Kokuthoma, kungebanga lokuthi uhlala asitjela ukuthi ufuna ukusisiza. (Qala ibhoksi elikhambasana nendaba le.) Kwesibili, kungebanga lokuthi sinobufakazi obanelisako babantu abaduduzwa nguZimu—abantu bamambala, besikhathini sethu nebangesikhathi sakade.

Njengabanengi abafuna isizo elivela kuZimu namhlanjesi, iKosi uDavida nayo beyijayelene khulu nesizi. Yakhe yathi: “Yizwa ilizwi lesibawo sami, lokha nangilila kuwe [“Jehova,” NW].” Wasabela njani kilokho uJehova? UDavida unaba ngokuthi: “Ngisizakele nehliziywami isasile.”—IRhubo 28:2, 7.

INDIMA KAJESU EKUDUDUZENI BOKE ABASESIZINI

UZimu bekahlose bona uJesu abe mthombo wenduduzo. Phakathi kwezinye izabelo azithola kuZimu, uJesu ‘bekazokubopha abaneenhliziyo ezaphukeileko’ kunye ‘nokududuza boke abalilako.’ (Isaya 61:1, 2) Njengombana kwabikezelwa, uJesu bekazipha isikhathi sokuba nabantu ‘abadiniweko nabadisibezekako.’—Matewu 11:28-30.

UJesu waduduza abantu ngesiluleko sakhe sokuhlakanipha, ngokubaphatha ngomusa, begodu kobunye ubujamo nangokupholisa abagulako. Ngelinye ilanga umuntu onobulepheru wabawa uJesu wathi: “Nakube uyathanda, ungangihlambulula.” UJesu wamrhawukela, wathi kuye: “Ngiyathanda, hlambuluka!” (Markosi 1:40, 41) Nangambala umuntu loyo waphola.

Namhlanjesi, iNdodana kaZimu ayikho la ephasini ukuthi ingasiduduza bunqopha. Kodwana uYise, uJehova, uZimu “wenduduzo yoke,” uragela phambili nokubasiza labo atlhoga ukududuzwa. (2 Korinte 1:3) Cabanga ngeendlela ezine eziyihloko uZimu aduduza ngazo abantu.

• IBhayibheli. “Koke okwatlolwa ngaphambilini kwatlolelwa ukusifundisa ukuze kuthi ngokunyamezela nangokukhuthazeka kwemitlolo, sibe nethemba.”—Roma 15:4.

• Ummoya Ocwengileko KaZimu. Msinyana ngemva kokuhlongakala kwakaJesu, loke ibandla lobuKrestu langena esikhathini sokuthula. Lokho bekungebanga lokuthi “landa ngokuqiniswa [ngummoya ocwengileko], lakhamba ngokwesaba iKosi.” (IzEnzo 9:31) Ummoya ocwengileko umamandla kaZimu asebenzako. UZimu angawasebenzisela ukududuza nanyana ngubani okibuphi ubujamo.

• Umthandazo. IBhayibheli lisikhuthaza lithi: “Ningakhathazeki ngalitho kodwana kikho koke, iimbawo zenu azaziwe nguZimu ngomthandazo nangokuncenga okunokuthokoza. Ukuthula kwakaZimu okudlula koke ukuzwisisa, kuzakubulunga iinhliziyo zenu nemikhumbulwenu kuKrestu Jesu.”—Filipi 4:6, 7.

• AmaKrestu Esikhonza Nawo angaba bangani bamambala benduduzo esiyitlhogako nasigandelelekileko. Umpostoli uPowula wahlathulula abangani bakhe njengomthombo ‘wenduduzo’ eenkhathini ‘zesizi nokuzunywa.’—Kolose 4:11; 1 Thesalonika 3:7.

Kodwana ungazibuza ukuthi lokhu kusebenza njani nasekukoke. Akhe siqale naka amaphilo wabantu abaqalana nobudisi esikhulume ngabo esihlokweni sokuthoma. Nawe njengabo, ungabona ukuthi uZimu usasizalisa isithembiso sakhe esiduduzako esithi: “Njengomntwana odunduzelwa ngunina, ngokunjalo ngizanidunduzela, nizakudunduzelwa eJerusalema.”—Isaya 66:13.

NAWUNGAWUTHOLI UMSEBENZI

USetha uthi nakakhumbulako: “Mina nomkami salahlekelwa misebenzi ngesikhathi sinye. Kwaba minyaka emibili yoke siphila ngokupatanisa, sikhamba sibamba nemisebenzana yesikhatjhana. Umkami uPriscilla, wagcina sekagandelelekile emkhumbulweni, ngazizwa ngisihluleki.

“Saphumelela njani? UPriscilla bekahlala azikhumbuza amezwi kaJesu akuMatewu 6:34. UJesu wathi akukafaneli sitshwenyeke ngelangomuso, njengombana ilanga ngalinye lineenkathazo zalo. Imithandazwakhe ethinta ihliziyo leyo yamsiza waba namandla wokukhuthazela. Ebujamweni bethu ngaduduzwa mtlolo weRhubo 55:22. Ngalingisa umrhubi, ngaphosela umthwalo wami kuJehova, ngalemuka bona uyangisekela. Nanyana nje senginawo umsebenzi, silinga ukuphila ipilo elula ngokuvumelana namezwi kaJesu akuMatewu 6:20-22. Ngaphezu kwakho koke, sesitjhidelene khulu noZimu kunye nathi ngokwethu.”

UJonathan uthi: “Bengithuswa kukuthi lizokuba njani ingomuso, ibhizinisi lethu elincaneli nalingawa. Ukuwa komnotho kwawenza wangasaba lilitho umsebenzi wokuzikhandla weminyaka ema-20. Sinomkami sathoma ukuphikisana ngemali. Besingasakghoni nokuthenga ngekarada lesikolodo, sisaba ukuthi kungenzeka alisasebenzi.

“Kodwana iliZwi lakaZimu nommoyakhe ocwengileko wasisiza sathatha iinqunto zokuhlakanipha. Ngafunda ukwamukela nanyana ngimuphi umsebenzi, saphungula neendleko ezingatlhogekiko. Sasekelwa nangabanye aboFakazi bakaJehova esikholwa nabo. Basisiza sakhuthala basivulela nesandla sabo ngokusisiza iinkhathi nazibudisi.”

NAKUPHUKA UMTJHADO

URaquel naye uyakhumbula: “Mhla ubabakwami akhetha ukungitjhiya, ngalimala khulu, ngaba nelaka. Ngemva kwalokho ngadana kwamambala. Kodwana ngatjhidelana noJehova, okunguye owangiduduza. Ukuthula kwakaZimu bekuyivikela ihlizwami nangikhuluma naye ngomthandazo mihle namalanga. Ngagcina sengizizwa kwanga uyilungisile ihlizwami ephukileko.

“Ngiyalithokoza neliZwi lakhe iBhayibheli ngokungisiza ngilwisane namazizo welaka newokubamba ivunda. Ngazindla nangamezwi wompostoli uPowula akumaRoma 12:21 athi: ‘Ungabindwa bubumbi kodwana wena kumele ubinde ubumbi ngobuhle.’

“Omunye umnganami ohlakaniphileko wangisiza ngaragela phambili nepilo. Wangitjengisa uMtjhumayeli 3:6, wangitjela nokuthi kunesikhathi ‘sokukutjhiya phasi okusilahlekele.’ Bekusiluleko esibudisi leso, kodwana ngilokho kanye ebengikutlhoga. Sikhuluma nje, ngineminye iminqopho emitjha engizibekele yona epilweni.”

U-Elizabeth uthi: “Umtjhadwakho nawuphuka, uyalitlhoga isekelo. Benginomngani ebekahlala angisekela mihla yoke. Bekalila nami, angiduduze, be angenze ngizizwe ngithandwa kunokuzizwa ngilahliwe. Ngiyaqiniseka bona uJehova bekasebenzisa yena ukuthi angipholise amanceba wami angokomzwelo.”

NAWUGULAKO NAMKHA ULUPHALA

ULuis odzujulwe esihlokweni esivule ngaso emlandelandeni lo, unobujamo obumaphorodlha behliziyo, begodu wapheze wafa ezenzakalweni ezimbili. Nje sekufuze apontjelwe umoya wokuphila ama-awara ali-16 ngelanga. Uthi: “Ngihlala ngithandaza kuJehova qobe. Nangiqeda ukuthandaza kuZimu, ngiyezwa ukuthi ummoyakhe ungipha amandla. Umthandazo ungipha isibindi sokuragela phambili nepilo ngombana ngiyamkholwa, begodu ngiyazi nokuthi uyangithanda.”

UPetra oseminyakeni yama-80 yena uthi: “Zinengi khulu izinto engifuna ukuzenza, kodwana ngiyabhalelwa. Kuyangidanisa ukubona amandlami aphela kancani kancani. Ngizizwa ngibuthakathaka begodu sengiphila ngemitjhoga. Ngihlala ngicabanga ngendlela uJesu abawa ngayo uYise ukuthi adlulise ubudisi ekhabe akibo, nakungenzeka.” Kodwana uJehova wamupha uJesu amandla, nami uyangipha. Ngizilapha nangomthandazo woke malanga. Ngizizwa ngingcono khulu nakhe ngakhuluma noZimu.”—Matewu 26:39.

UJulian, esekuminyaka engaba ma-30 alwisana nobulwelwe obaziwa nge-multiple sclerosis naye uzizwa njalo. Uthi: “Akunamhlobo wesihlalomavilo engingawazi. Kodwana ipilwami inomnqopho ngombana ngiphilela ukusiza abanye abantu. Ukupha kungawusunduza umtlhago, begodu uJehova uyasizalisa isithembiso sakhe sokusiqinisa lokha nasimtlhogako. Nami ngingatjho njengompostoli uPowula ukuthi: ‘Ngikghona ukwenza yoke into ngaloyo ongiqinisako.’”—Filipi 4:13.

NAWUHLONGAKALELWEKO

U-Antonio nakakhumbulako uthi: “Ngesikhathi ubaba ahlongakala engozini yendlela, azange ngikholwe kuhle ekuthomeni. Ngabona kwanga manikelela, ngombana bekamumuntu ozilungeleko okhamba ngeenyawo. Kodwana bekungekho ebengingakwenza. Wahlala amalanga amahlanu ngekumbeni yababangwa neenzibi esibhedlela, ngaphambi kobana ahlongakale. Bengizibamba ukuthi ngingalili nanginomma, kodwana nangingedwa bengiphosa esingangani isililo. Ngihlala ngizibuza kuthi ‘Kubayini? Kubayini?’

“Phakathi nesikhathi esibuhlungweso, bengihlala gibawa uJehova angisize ngilawule amazizo wami, angiphe nokuthula. Ngokukhamba kwesikhathi ngadamba. Ngakhumbula nokuthi iBhayibheli liyakhuluma ‘nangesikhathi’ esingakalindeleki ukuthi singehlela nanyana ngubani. Yeke njengombana uZimu anganawo amala, ngiyaqiniseka bona ngizombona nakanjani ubaba evukweni.”—UMtjhumayeli 9:11; Jwanisi 11:25; Titosi 1:2.

URobert, okukhulunywe ngaye esihlokweni sokuthoma naye uzizwa njalo. Uthi: “Sinomkami besithandaza kuJehova, ngazizwa nginokuthula komcabango okukhulunywa ngakho kwebeFilipi 4:6, 7. Ukuthulokhu kwasenza sakghona ukukhuluma nababikindaba ngethemba esinalo levuko. Nanyana isiphaphamtjhineso sabulala indodanethu, sinezinto ezinengi ezihle esizikhumbulako esazenza nayo. Sizama ukuhlala sicabanga ngezintwezo.

“Ngesikhathi omunye uFakazi esikhonza naye asitjela ukuthi usibone kumabonakude sikhuluma ngokukholwa kwethu, samtjela ukuthi sithokoza imithandazo eminengi eyatjhiwo bafowethu malungana nathi. Ngiyakholwa ukuthi uJehova bekasisekela ngemilayezo eminengi yenduduzo esayithola.”

Njengombana iimbonelwezi zitjengisa, uZimu angakghona ukududuza abantu abaqalene nemiraro kunye neentjhijilo ezimaphorodlha. Kuthiwani ngawe? Kungakhathaliseki bona uqalana namiphi imiraro epilweni, ikhona induduzo ezokusiza nawuqalene nobudisi.b Kubayini-ke ungabawi uJehova akusize? UnguZimu “wenduduzo yoke.”—2 Korinte 1:3.