IMIBUZO YABANTU ABATJHA
Kubayini Kufuze Ngithandaze?
Ngokuya ngokweembalobalo ze-America, kumaphesenthi ayi-80 wabantu abatjha abathandazako, isiquntu sabo sithandaza qobe. Nanyana kunjalo, abanye bayazibuza: ‘Kghani umthandazo seyinto nje esengqondweni namkha ungaphezu kwalokho?’
Uyini umthandazo?
Umthandazo uyindlela esikhuluma ngayo noMdali wazo zoke izinto. Akhucabange ukuthi lokho kutjho ukuthini. UJehova uphakeme khulu kunabantu ngazo zoke iindlela, nanyana kunjalo, ‘akasikude komunye nomunye wethu.’ (IzEnzo 17:27) Ekhabolakhona, iBhayibheli linesimemo esihle elisinikela sona: “Tjhidelani kuZimu, naye uzokutjhidela kini.”—Jakopo 4:8.
Ungatjhidela njani kuZimu?
Ngokuthandaza, ngileyo indlela esikhuluma ngayo noZimu.
Enye indlela kufunda iBhayibheli, le yindlela uZimu ayisebenzisako bona ‘akhulume’ nawe.
Ukukhulumisanokhu ngomthandazo nangokufunda iBhayibheli kuzokusiza ube nobuhlobo obuqinileko noZimu.
“Ukukhuluma noJehova, umuntu oPhakeme Khulu, kulilungelo elihle khulu umuntu angaba nalo.”—Jeremy.
“Ukukhuluma ngomthandazo noZimu ngimtjela indlela engizizwa ngayo kungenza ngizizwe ngitjhidelene khulu naye.”—Miranda
Kghani UZimu Uyasizwa?
Ngitjho nanyana ukholelwa kuZimu, uthandaza kuye, kungaba budisi ukukholelwa ukuthi uyasizwa. Nanyana kunjalo, iBhayibheli libiza uJehova ngokuthi, ‘Mumuzwi womthandazo.’ (IRhubo 65:3) Liyakumema nawe ukuthi ‘uphosele koke okukutshwenyako kuye.’ Kubayini? ‘Kungombana unendaba nawe.’—1 Pitrosi 5:7.
Cabanga nganaku: Uyaba nesikhathi sokucoca nabangani bakho qobe? Ungenza okufanako nangoZimu. Thandaza kuye qobe, sebenzisa igama lakhe elithi Jehova nawukhuluma naye. (IRhubo 86:5-7; 88:9) IBhayibheli likumema bona ‘uthandaze qobe.’—1 Thesalonika 5:17.
“Umthandazo yikulumiswano phakathi kwami noBabami wezulwini, ngikghona ukumthululela okusehliziywenami.”—Moises.
“Ngikhuluma noJehova ngokudephileko ngezinto, ngendlela engenza ngayo lokha nangikhuluma nomma namkha umnganami engitjhidelene naye.”—Karen.
Khuyini engingayithandazela?
IBhayibheli lithi: “Kikho koke, iimbawo zenu azaziwe nguZimu ngomthandazo, ngokurabhela kunye nokuthokoza.”—Filipi 4:6.
Kghani lokho kutjho ukuthi KULUNGILE ukuthandaza ngezinto ezingitshwenyako? Iye! Ekhabolakhona, iBhayibheli lithi: “Phosa umthwalwakho kuSomnini, yena uzakusekela.”—IRhubo 55:23.
Nawuthandaza kuZimu, akukafuzi ukhulume ngezinto ezikutshwenyako kwaphela. U-Chantelle uthi: “Bengekhe kube bungani obuhle nabengizokusolo ngikhuluma noJehova ngimbawe isizo kwaphela. Ngikubona kuqakathekile ukuthoma ngokumthokoza ngazo zoke izinto angenzela zona, kuhlekuhle izinto engimthokoza ngazo kufuze zibe zinengi khulu.”
Cabanga nganaku: Ngiziphi izinto ezikuthabisako epilwenakho? Kghani ungakghona ukucabanga ngezinto ezintathu omthokoza ngazo uJehova namhlanjesi?
“Izinto ezisemehlwenethu njengokubona ithuthumbo elihle kungenza bona simthokoze uJehova nasithandazako.”—Anita.
“Zindla ngokuthileko okusendalweni okukukarako namkha ivesi leBhayibheli bese uthokoza uJehova ngalokho.”—Brian.