Lisebenzise Ngeenkhathi Zoke
1. Iphetjhana elithi, Lazi Iqiniso liqakatheke khulu ekwenzeni ini?
1 Iphetjhana elithi, Ungathabela Ukulazi Iqiniso? litlanyelwe ukusirhelebha ukuthomisa iimfundo zeBhayibhili. Kodwana godu liyithulusi eliphumelelako esingalisebenzisa ukurhatjha imbewu yeqiniso. (Mtj. 11:6) Nanzi ezinye iimphakamiso ezingasirhelebha bona silisebenzise kuhle.
2. Singalisebenzisa njani iphetjhana ukuthomisa ikulumiswano?
2 Ukuthomisa Ikulumiswano: Unganikela umninimuzi iphetjhana, qalisela eembuzweni esithandathu esekuthomeni kwalo, bese uyabuza: “Ngimiphi eminye yeembuzo le okhe wazibuza yona?” Ngemva kokufumana ipendulo yakhe, sebenzisa iBhayibhili ukuphendula eminye yeembuzo yomninimuzi esephetjhaneni begodu ufunde eminye imitlolo etjengisiweko. Funda namtjhana ukhulumele ngokurhunyeziweko ikhasi elingemva, begodu ukhambise incwadi ethi, Okufundiswa YiBhayibhili. Nanyana angayamukeli incwadi, ulifumene iphetjhana, okungenza bona iqiniso lingene ehliziywenakhe.—Mat. 13:23.
3. Nengabe umninimuzi umajadujadu, khuyini esingayenza?
3 Nengabe Umninimuzi Umajadujadu: Nakhu ongakutjho: “Njengombana lesi kungasi sikhathi esihle, ngibawa ukukutjhiyela iphetjhaneli. Litjengisa iimbuzo esithandathu esisekelo leyo inengi lethu elizibuza yona, belinikele ipendulo enqophileko evela eBhayibhilini komunye nomunye umbuzo. Nesibonanako godu, ngibawa ukwazi lokho okucabangako.”
4. Khuyini esingakutjho nesikhambisa iphetjhaneli endleleni?
4 Nesitjhumayela Endleleni: Nakhu ongakutjho: “Lotjha. Khe wazibuza eminye yeembuzo le? [Lindela ipendulo.] Iphetjhaneli litjengisa iimpendulo ezikhanyako nezanelisako ezifumaneka eBhayibhilini.” Nengabe umuntu loyo akakarhabi, ungakghona ukuhlathulula enye yeempendulo ezisephetjhaneni bewukhambise nencwadi ethi, Okufundiswa YiBhayibhili.
5. Singalisebenzisa njani iphetjhaneli ngezinye iinkhathi kilabo abangekho ekhaya?
5 Abangekho Emakhaya: Kwamanye amasimu, abarhuweleli batjhiya iincwadi endaweni engabonakaliko emizini enganabantu. Nengabe nijayele ukukwenza nani ebandleni lenu, kubayini ngezinye iinkhathi ningatjhiyi iphetjhana elithi, Lazi Iqiniso? Newubuyelako ungathi: “Khesafika la, sakuthola ungekho ekhaya, ngalokho satjhiya iphetjhana emnyango. Ngimiphi eembuzweni le ongathanda ukufumana ipendulo yawo?”
6. Khuyini eyenza iphetjhana elithi, Lazi Iqiniso libe yithulusi lokutjhumayela eliphumelelako?
6 Iphetjhana elithi, Lazi Iqiniso lidlulisela iqiniso ngendlela elula nenqophileko. Likara abantu bazo zoke iinkolo namasiko. Kubulula ukulethula; ngitjho nabarhuweleli abatjha kuhlanganise nabancani, bangakghona ukulikhambisa. Uyalisebenzisa na kibo boke ubujamo obufanelekako?