Isihloko Esitjha Sokuthomisa Iimfundo ZeBhayibhili
1. Ngisiphi isihloko esitjha esizokuvela kuSithalasokulinda somphakathi, begodu senziwe njani?
1 Kusukela ngenyanga ezako, kuzokuvela isihloko esitjha kuSithalasokulinda somphakathi esizosirhelebha ukuthomisa iimfundo zeBhayibhili. Sinesihloko esithi, “Funda ELizwini LakaZimu.” Akunakuzaza bona abanye esimini bazokuthabela ukufunda irhelo lesihlokwesi, iinhlokwezi zenzelwe bona sizisebenzise nesikhuluma nabantu.
2. Ngikuphi okhunye okumumethwe ziinhlokwezi?
2 Okumumethwe Sihlokwesi: Isihloko neehlokwana zitlolwe njengeembuzo ozoyibuza umninimuzi nenicoca. Iimtlolo eyihloko iveziwe ayikadzubhulwa, ukwenzela bona umninimuzi athabele ukufunda ngokunqophileko eLizwini lakaZimu. Iingaba zifitjhani ukwenzela bona zingafundwa kujanywe eemnyango. Esinye nesinye isihloko sikuthumela encwadini ethi, Okufundiswa YiBhayibhili ukukurhelebha bona udlulisele ofunda naye encwadini ethi, Okufundiswa YiBhayibhili nekufanelekako.
3. Nesitjhumayela umuzi nomuzi, singalisebenzisa njani irhelo lokuthomisa isifundo seBhayibhili sijame emnyango?
3 Indlela Ongasisebenzisa Ngayo: Newukhambisa abomagazini ungabuza umninimuzi umbuzo ovusa ikareko ngendaba ejayelekileko esesihlokweneso. Isibonelo, umagazini kaJanabari 1 ukhuluma ngokuqakatheka kweBhayibhili. Ungabuza umninimuzi uthi: “IBhayibhili uyiqala njengencwadi nje ehle kwaphela namtjhana njengeLizwi lakaZimu? [Lindela ipendulo.] Ngikuphathele okuthileko okukarisako ngendaba le.” Buza umbuzo wokuthoma, funda isigaba sokuthoma, bese ufunda umtlolo oveziweko. Buyelela umbuzo godu, bese ubawa umninimuzi aphendule. Nekufanelekako coca naye okunengi ngendlela ekungakghoneka ngayo, usebenzisa iimbuzo enomboriweko njengengamaphuzu enicoca ngawo. Ngaphambi kobana ukhambe, mbuze umbuzo olandelako bese uhlela ukubuyela godu bona nicoce ngawo. Linga ukubuyela godu ufunde naye okungeziweko ngesihlokweso qobe veke bekube kulapho umlethela omunye umagazini. Enye indlela ongayisebenzisa kubawa umninimuzi ngokunqophileko ukumragela isifundo seBhayibhili. Ngemva kwalokho sebenzisa isihloko sakamagazini umtjengise indlela isifundo esiragwa ngayo.
4. Singazisebenzisa njani iinhlokwezi nesenza amabuyelo?
4 Ungasebenzisa irhelo elitjheli godu ngokuphumelelayo newukhambisa abomagazini endleleni nalokha nawenza amabuyelo. Nakhu ongakutjho: “Kunesihloko esitjha kuSithalasokulinda. Ngibawa ukukutjengisa bona sisebenza njani.” Sithandazela bona irhelo elitjheli lirhelebhe abantu abanengi bona “balazi iqiniso.”—1 Thi. 2:4.