Iinkhombiso Zencwajana Ethi IPilo NomSebenzi WobuKrestu IHlelo LomHlangano WeBandla
JUNI 3-9
AMAGUGU ASELIZWINI LAKAZIMU | GALATIYA 4-6
“‘Idrama Engokomfanekiso’ Isifundisa Okuthileko”
(Galatiya 4:24, 25) Izintwezi zingathathwa njengedrama engokomfanekiso; ngombana abafazaba bajamele iimvumelwano ezimbili, esinye ngeseNtabeni yeSinayi, esibeletha abantwana bobugqila, esinguHagari. 25 Nje-ke uHagari ujamele iSinayi, intaba ese-Arabhiya, ufanekisela iJerusalema lanamhlanjesi, ngombana lisebugqileni nabantwabalo.
it-1 1018 ¶2
UHagari
Ngokwalokho okwatjhiwo mpostoli uPowula, uHagari usetjenziswe edrameni engokomfanekiso njengombana ajamele isitjhaba saka-Israyeli wemvelo, owenza isivumelwano somThetho noJehova esasungulwa eNtabeni yeSinayi, isivumelwaneso sabeletha ‘abantwana beengqila.’ Ngebanga lokuba nesono kwabantu, isitjhaba akhenge sikghone ukugcina imibandela yesivumelwaneso. U-Israyeli khenge atjhaphuluke ngaphasi komthetho lo kodwana wajeziswa njengesoni esifanelwe kukufa, kungebangelo bekasigqila. (Jwa. 8:34; Rom. 8:1-3) IJerusalema langesikhathi sakaPowula belifana nelangesikhathi sakaHagari, njengombana belilikhulu, belijamele ihlangano ka-Israyeli wemvelo begodu wazifumana asigqila nabantwana bakhe. AmaKrestu azesiweko, nanyana abantwana ‘beJerusalema laphezulu,’ afanekisela umfazi kaZimu. NjengoSara umfazi otjhaphulukileko, iJerusalemeli khenge libe sigqila. Njengombana u-Isaka atjhutjhiswa ngu-Itjhimayeli, ngokufanako nabantwana ‘beJerusalema laphezulu,’ abatjhatjhululwa yiNdodana, nabo batjhutjhiswa bantwana beJerusalema elisigqila. Nanyana kunjalo, uHagari nendodanakhe bakhutjhelwa ngaphandle, lokho bekufanekisela ukulahla kwakaJehova isitjhaba saka-Israyeli wemvelo.—Gal 4:21-31; qala noJwa 8:31-40.
(Galatiya 4:26, 27) Kodwana iJerusalema laphezulu litjhaphulukile, begodu lingummethu. 27 Ngombana kutloliwe ukuthi: “Thaba, wena mfazi oyinyumba; rhuwelela ngethabo, wena mfazi onganamirhelo; ngombana abantwana bomfazi olahliweko babe banengi kunebaloyo onendoda.”
Qiniseka Bona UmBuso KaKrestu Uzowufeza Umnqopho KaZimu
11 Siyazi bona isivumelwano sakaZimu no-Abrahamu sazaliseka mhla iinzukulwana zakhe zithola inarha yesithembiso, kodwana imiTlolo iyatjho bona besizokuzaliseka ngokunabileko ngendlela engokomfanekiso. (Gal. 4:22-25) Ngokwamezwi umpostoli uPowula aphefumulelwa bona awatlole, ingcenye yokuthoma yesizukulwana saka-Abrahamu iqalisele emaKrestwini akhethiweko azi-144 000. (Gal. 3:16, 29; IsAm. 5:9, 10; 14:1, 4) Bese umfazi ozokubeletha isizukulwanesi ‘liJerusalema eliphezulu’—eliyingcenye yehlangano kaZimu esezulwini. (Gal. 4:26, 31) Yeke, isivumelwano sakaZimu no-Abrahamu sathembisa bona kuzokuba nesizukulwana somfazi ebesizokubusisa abantu.
(Galatiya 4:28-31 Nje-ke nina bafowethu, nibantwana besithembiso njengo-Isaka. 29 Kodwana njengesikhathineso loyo owabelethwa ngokwemvelo wathoma ukutlhorisa loyo obelethwe ngommoya, nanamhlanjesi kwenzeka okufanako. 30 Nanyana kunjalo, uthini umtlolo? “Qotha umntazana osisebenzi nendodanakhe, ngombana indodana yomntazana osisebenzi angekhe ibe yindlalifa nendodana yomfazi otjhaphulukileko.” 31 Nje-ke bafowethu, asisibantwana bomntazana osisebenzi, kodwana bomfazi otjhaphulukileko.
Rhubhulula Ngezinto ZakaZimu Eziligugu
(Galatiya 4:6) Nje-ke ngombana nimadodana, uZimu uthumele ummoya weNdodanakhe eenhliziyweni zethu, wona uyarhuwelela uthi: “Abha, Baba!”
w09 4/1 13
Bewazi?
Kubayini uJesu abiza uJehova ngokuthi, “Abha, Baba” lokha nakathandazako?
Igama lesi-Aramu elithi, “Abha” lingathi “ubaba” namkha “Baba.” Esenzakalweni ngasinye kezintathu igameli livela esenzakalweni ngasinye emiTlolweni, liyingcenye yomthandazo begodu liqalisela kuBaba wezulwini, uJehova. Liqakatheke ngani ibizweli?
I-The International Standard Bible Encyclopedia ithi: “Ekulumweni evamileko yangesikhathi sakaJesu, ibizo elithi, ‘Abha’ ngokuyihloko belisetjenziswa ngendlela ejayelekileko yokutjengisa ihlonipho nobuhlobo bomntwana noyise.” Belisetjenziswa ngendlela enethando begodu lihlangana namagama wokuthoma umntwana afunda ukuwabiza. UJesu bekathanda ukulisebenzisa nakathandazako kuYise. Ngesikhathi kusele ama-awara ambalwa ngaphambi kokufa kwakhe, nakasesimini yeGetsemani uJesu wathandaza kuJehova asebenzisa amezwi athi, “Abha, Baba.”—Markosi 14:36.
“Ukusebenzisa ibizo elithi, “Abha” kuqaliselwa kuZimu akukajayeleki ngelimi lesiJuda eencwadini zamaGreco-Roma,” Incwadi le iraga ithi, “umuntu nakangalisebenzisa akhuluma noZimu lokho bekuzokutjengisa ukungamhloniphi.” Nanyana kunjalo, “ukusebenzisa kwakaJesu . . . ibizweli emthandazweni kufakazela indlela ebekatjhidelene ngayo noZimu.” Eendaweni ezimbili emiTlolweni lapho kuvela khona ibizo elithi, “Abha”—kiyo yombili imitlolo kampostoli uPowula—iveza ukuthi namaKrestu wangekhulu lokuthoma bewalisebenzisa nawathandazako.—Roma 8:15; Galatiya 4:6.
(Galatiya 6:17) Kusukela nje akungabi namuntu ongitshwenyako, ngombana emzimbenami nginamatshwayo wokuthi ngisigqila sakaJesu.
Bewazi?
Bekaqalisele kuphi umpostoli uPowula nakathi wakghodlhelela ‘amatshwayo wokuba sigqila sakaKrestu’?—Galatiya 6:17.
▪ Amezwi kaPowula bekangatjho izinto ezinengi ezihlukahlukeneko ebantwini ebebamlaleleko bekhulu lokuthoma. Ngokwesibonelo, ekadeni i-ayina etjhisa bhe beyisetjenziselwa ukumerega iimbotjhwa zepi, abadlelezeli bamathempeli, neengqila ezimaphandle. Abantu abameregwe nge-ayina leyo, bebangahlonitjhwa.
Nanyana kunjalo, amatshwayo wokutjhiswa bekangaqalwa kumbi ngaso soke isikhathi. Inengi labantu bekadeni belisenzisa itshwayeli ukutjengisa ukuthi umuntu ongawasiphi isitjhaba namkha ungewayiphi ikolo. Ngokwe-Theological Dictionary of the New Testament, “ama-Asiriya ebewazinikele kibo zimabo uHadad no-Atargatis bewabonakala ngetshwayo esandleni namkha entanyeni . . . Umuntu ozinikele kuDionysus bekameregwa ngekari lesihlahla.”
Iimbikiindaba zanamhlanjesi ziphethe ngokuthi uPowula bekakhuluma ngamanceba wokutlhoriswa awafumana ngeenkhathi ezihlukahlukeneko nakasithunywa sevangeli. (2 Korinte 11:23-27) Mhlamunye uPowula bekakhuluma ngendlelakhe yokuphila, ingasi ngamanceba wamambala—amveza bona umKrestu.
Ukufundwa KweBhayibheli
(Galatiya 4:1-20) Nje-ke ngithi lokha indlalifa nayisesemntwana omncani, ayikahluki esigqileni, nanyana iyikosi yezinto zoke, 2 kodwana ingaphasi kwabaphathi nabatlhogomeli bekube lilanga elibekwe nguyise kusesengaphambili. 3 Nathi ngokufanako, nasisesebantwana, besigqilazwe zizinto zobuntwana zephasi. 4 Kodwana nakuphela isikhathi esibekiweko, uZimu wathumela iNdodanakhe, eyabelethwa mfazi begodu ebeyingaphasi komthetho, 5 bona itjhaphulule labo abangaphasi komthetho ngokubathenga, ukuze sifumane ukumbelekelwa njengamadodana. 6 Nje-ke ngombana nimadodana, uZimu uthumele ummoya weNdodanakhe eenhliziyweni zethu, wona uyarhuwelela uthi: “Abha, Baba!” 7 Nje-ke aniseseziingqila kodwana nimadodana; yeke nanimadodana, godu niziindlalifa ngoZimu. 8 Nanyana kunjalo, ngesikhathi ningakamazi uZimu, benigqilazwe bozimu bamala. 9 Kodwana njengombana senazi uZimu, namkha, senaziwa nguZimu, kuza njani bona nibuyele ezintweni zobuntwana ezibogabogako nezililize, nifune ukuba ziingqila zazo godu? 10 Ngokutjheja okukhulu, nihlonipha amalanga neenyanga neenkhathi neminyaka. 11 Ngiyanithukwela, ukuthi ngasuthi ngidlale ngamandlami kini. 12 Ngiyanirabhela bafowethu, yibani njengami, ngombana nami khengaba njengani. Akukho okumbi eningenze khona. 13 Kodwana niyazi ukuthi bekukugula enyameni okwangenza ngafumana ithuba lokumemezela iindaba ezimnandi kini. 14 Nanyana ubujamo bepilwami bebusilingo kini, azange ningidelele namkha ninginyenye; nangamukela njengengilozi kaZimu, njengoKrestu Jesu. 15 Liphi ithabo ebeninalo? Ngombana ngiyafakaza ukuthi, ukube bekukghoneka, benizokugobhodlha amehlwenu ninginikele wona. 16 Nje-ke, kghani sengibe linaba lenu ngombana nginitjela iqiniso? 17 Banetjisakalo yokunithumbela kibo, kodwana lokho abakwenzi ngomnqopho omuhle; bafuna ukunihlukanisa nami, ukuze nibe netjisakalo yokulandela bona. 18 Nanyana kunjalo, kuhle ngaso soke isikhathi bona othileko anifune ngetjiseko ngomnqopho omuhle begodu ingasi nanginani kwaphela, 19 bantwanyana bami, enginemirhelo ngani godu bekube kulapho uKrestu akheka kini. 20 Okwanjesi ngifisa ngathana ngingaba nani, ngikhulume ngendlela ehlukileko, ngombana niyangirara.
JUNI 10-16, 2012
AMAGUGU ASELIZWINI LAKAZIMU | EFESU 1-3
“Ihlelo LakaJehova Lokunqophisa Nomsebenzalo”
(Efesu 1:8, 9) Umusa omkhulu lo uwenze waphuphuma kithi kikho koke ukuhlakanipha nokuzwisisa 9 ngokuthi asenze sazi ifihlo ecwengileko yentandwakhe. Kuvumelana nalokho okumthabisako ukuthi yena ngokwakhe wanqopha
it-2 837 ¶4
Ifihlo Ecwengileko
UmBuso kaMesiya. Emitlolweni kaPowula usambulela ngokupheleleko umbono wefihlo ecwengileko kaKrestu. Kwebe-Efesu 1:9-11 ukhuluma ngoZimu ngokusenza sazi “ifihlo ecwengileko” yentandwakhe, uthi: “Kuvumelana nalokho okumthabisako ukuthi yena ngokwakhe wanqopha, bona kube nendlela yokunqophisa izinto lokha isikhathi esibekiweko sizaliseka, ukuze abuthele zoke izinto kuKrestu, izinto ezisezulwini nezinto ezisephasini. Iye, kuye loyo esimunye naye begodu esabelwe bona sibe ziindlalifa naye, njengombana sikhethwe kusesengaphambili ngokuvumelana nomnqopho waloyo owenza zoke izinto njengombana aqunta ngokuvumelana nentandwakhe.” “Ifihlo ecwengileko” le ihlanganisa urhulumende, okumBuso kaMesiya. “Izinto ezisezulwini,” uPowula akhuluma ngazo zizinto ezizokufunyanwa ziindlalifa zomBuso kaKrestu wezulwini. ‘Izinto ezisephasini’ zizokufunyanwa zizakhamuzi zephasini. UJesu watjela abafundi bakhe ukuthi ifihlo ecwengileko imalungana nomBuso, wathi: “Nina ninikelwe ifihlo ecwengileko yomBuso kaZimu.”—Mar 4:11.
(Efesu 1:10) bona kube nendlela yokunqophisa izinto lokha isikhathi esibekiweko sizaliseka, ukuze abuthele zoke izinto kuKrestu, izinto ezisezulwini nezinto ezisephasini. Iye, kuye
‘UJehova’ Ubuthelela Umndenakhe
3 UMosi watjela ama-Israyeli wathi: “UJehova uZimethu nguJehova yedwa.” (Dut. 6:4) Izenzo nomnqopho kaJehova kuyavumelana. Ngalokho, ‘nesekufike isikhathi esingiso’ uZimu wasebenzisa “ihlelo lokunqophisa” [NW]—elililungiselelo lokuhlanganisa zoke iimbunjwa zakhe ezihlakaniphileko. (Funda Kwebe-Efesu 1:8-10.) Ihlelo lokunqophiseli lizokuzalisa umnqopho walo ngeengaba eembili. Isigaba sokuthoma silungiselela ibandla labazesiweko ukuphila ezulwini ngaphasi kwakaKrestu Jesu njengeHloko yawo engokomoya. Isigabesi sathoma ngePentekoste laka-33 C.E. uJehova nekathoma ukubuthelela labo abazokubusa noKrestu ezulwini. (IZe. 2:1-4) Njengombana abazesiweko kuthiwa balungile kube kuphila ngesisekelo somhlatjelo kaKrestu wesihlengo, bayavuma ngetjiseko bona bamukelwe ‘njengabantwana bakaZimu’ bokutholwa.—Rom. 3:23, 24; 5:1; 8:15-17.
4 Isigaba sesibili silungiselela labo abozokuphila ePharadesi ephasini ngaphasi komBuso kaKrestu onguMesiya. “Isiqubuthu esikhulu” sakha ingcenye yokuthoma yesiqhemesi. (ISam. 7:9, 13-17; 21:1-5) Hlangana nokuBusa kweMinyaka eYikulungwana, sizokuhlanganiswa neengidigidi zabavusiweko. (ISam. 20:12, 13) Cabanga ngendlela ivuko elizokutjengisa ngayo ngokungeziweko ubunye bethu! Ekupheleni kweminyaka eyikulungwana, ‘okusephasini’ kuzokuqalana nevivinyo lamaswaphela. Labo abahlala bathembekile bazokuba ‘njengabantwana bakaZimu’ bephasini.—Rom. 8:21; ISam. 20:7, 8.
Rhubhulula Ngezinto ZakaZimu Eziligugu
(Efesu 3:13) Nje-ke nginibawa bona ningapheli amandla ngebanga lesizi engilifumana ngokusiza nina, ngombana lokhu kutjho idumo kini.
Ungavumeli Litho Likukhandele Bona Uzuze Idumo
15 Ukuphikelela kwethu ekwenzeni intando kaJehova kusiza abanye bafumane idumo. UPowula watlolela ibandla le-Efesu wathi: ‘Yeke ngiyanirabhela ningapheli amandla ngokutlhaga kwami ngebanga lenu; koke lokhu kulidumo lenu.’ (Efe. 3:13) Kungamuphi umqondo ukutlhaga kwakaPowula “kulidumo” kwebe-Efesu? Ukulungela kwakaPowula ukubakhonza naphezu kweenlingo kwatjengisa be-Efesu bona amalungelo ebebawathabela njengamaKrestu gade aqakathekile begodu anenani eliphakemeko ngendlela engacabangekiko. Ngathana uPowula waliselela nekatlhagako, bekungeze na kwadlulisela umlayezo wokobana ubuhlobo babo noJehova, ikonzwabo, nethemba labo bekungakaqakatheki? Ukukghodlhelela kwakaPowula kwaphakamisa ubuKrestu begodu kwatjengisa nokobana ilungelo lokuba mfundi liyakufanelekela nanyana ngikuphi ukuzidela.
(Efesu 3:19) nokwazi ithando lakaKrestu, elidlula loke ilwazi, ukuze nizaliswe ngakho koke ukugcwala uZimu akunikelako.
cl 299 ¶21
“Ukwazi Ithando lakaKrestu”
21 Ibizo lesiGirigi elithi, “ukwazi” litjho ukwazi “into okhe wayenza.” Nasinethando njengoJesu—angekhe saba marhamaru kodwana sizozidela ngebanga labanye, sizokuba nomusa sibasize ngezinto abazitlhogako, begodu sibalibalele ngokusuka ehliziyweni—sizokuzwisisa indlela ebekazizwa ngayo. Nasenza njalo, sikghona ‘ukwazi ithando lakaKrestu, elidlula loke ilwazi.’ Asingakhohlwa ukuthi nasilwela ukufana noKrestu, sizokutjhidela kiloyo uJesu amlingisa ngokupheleleko, uZimethu onethando, uJehova.
Ukufundwa KweBhayibheli
(Efesu 1:1-14) UPowula, umpostoli kaKrestu Jesu ngokwentando kaZimu, kwabacwengileko abase-Efesu, abathembekileko ebunyeni noKrestu Jesu: 2 Kwangathi ningaba nomusa omkhulu nokuthula okuvela kuZimu uBabethu neKosini uJesu Krestu. 3 Akadunyiswe uZimu noYise weKosethu uJesu Krestu, ngombana usibusise ngazo zoke iimbusiso zommoya ocwengileko eendaweni zezulwini ngebanga lokuba kwethu sebunyeni noKrestu, 4 njengombana asikhetha bona sibe munye naye ngaphambi kokusungulwa kwephasi, bona kufuze sicwengeke begodu singabi nebala phambi kwakhe ngombana siyamthanda. 5 Ngombana wasikhetha kusengaphambili bona simbelekelwe njengamadodanakhe ngoJesu Krestu, ngokuvumelana nalokho okumthabisako nentandwakhe, 6 bona kudunyiswe umusakhe omkhulu ophazimulako asinikele wona ngesihle ngaloyo amthandako. 7 Ngaye siyatjhatjhululwa ngesihlengo ngebanga leengazi zakhe, okutjho, ukulitjalelwa kwemitjhaphwethu ngokuvumelana nokunotha komusa omkhulu kaZimu. 8 Umusa omkhulu lo uwenze waphuphuma kithi kikho koke ukuhlakanipha nokuzwisisa 9 ngokuthi asenze sazi ifihlo ecwengileko yentandwakhe. Kuvumelana nalokho okumthabisako ukuthi yena ngokwakhe wanqopha 10 bona kube nendlela yokunqophisa izinto lokha isikhathi esibekiweko sizaliseka, ukuze abuthele zoke izinto kuKrestu, izinto ezisezulwini nezinto ezisephasini. Iye, kuye 11 loyo esimunye naye begodu esabelwe bona sibe ziindlalifa naye, njengombana sikhethwe kusesengaphambili ngokuvumelana nomnqopho waloyo owenza zoke izinto njengombana aqunta ngokuvumelana nentandwakhe, 12 ukuze kuthi thina esingebokuthoma ukuba nethemba kuKrestu sisebenzele idumo lephazimulwakhe. 13 Kodwana nani naba nethemba kuye ngemva kokuzwa ilizwi leqiniso, iindaba ezimnandi zesindiso yenu. Kuthe nasenikholiwe, uZimu wanibeka itshwayo ngommoya ocwengileko othenjisiweko, 14 okukuqinisekiswa kusesengaphambili ngelifa lethu, ngomnqopho wokutjhaphulula ipahla kaZimu ngesihlengo, kube lidumo eliphazimulako kuye.
JUNI 17-23, 2012
AMAGUGU ASELIZWINI LAKAZIMU | EFESU 4-6
“Mbathani Izembatho Zepi Ezipheleleko Ezivela KuZimu”
(Efesu 6:11-13) Mbathani izembatho zepi ezipheleleko ezivela kuZimu ukuze nikghone ukujamelana ngokuqinileko namaqhinga kaDeveli; 12 ngombana asikurakurani neengazi nenyama, kodwana sikurakurana naborhulumende, nabalawuli, nababusi bephasi bobumnyamobu, namabutho wemimoya emimbi eendaweni zezulwini. 13 Ngebangeli mbathani izembatho zepi ezipheleleko ezivela kuZimu, ukuze nikghone ukudzimelela ngelanga elimbi begodu ngemva kokuqeda koke, nijame niqine.
Bantu Abatjha—Jamelanani NoDeveli
UMPOSTOLI uPowula wasifanisa namasotja asepini. Watjho kufanele ngombana vele sisepini kodwana asilwi nabantu kunalokho silwa noSathana namadimonakhe. Kazi amanabethu la kade asepini, kuhlekuhle ipi ibuzwa kiwo. Yeke lokho kungakwenza ubone ngasuthi ngeze wayithumba ipi le, khulukhulu nawusesemutjha. Alo yini engasiza abantu abatjha bahlule inabakazi elimbi nelinamandla angaphezu kewomuntu? Iqiniso elimsulwa kukuthi abantu abatjha bangathumba begodu sikhuluma nje bayathumba vele. Yini le ebenza bathumbe? ‘Baragele phambili bafumana amandla eKosini.’ Abafumani amandla kuZimu kwaphela kodwana bambethe nezembatho zepi. Banjengamasotja abanduliweko, bambethe “izembatho zepi ezipheleleko ezivela kuZimu.”—Funda kwebe-Efesu 6:10-12.
(Efesu 6:14, 15) Nje-ke, jamani niqine, nibophe ibhande leqiniso emadinini wenu, nembathe isivikelo sesifuba sokulunga, 15 iinyawo zenu zimbathiswe amanyathelo wokulungela ukutjhumayela iindaba ezimnandi zokuthula.
Bantu Abatjha—Jamelanani NoDeveli
4 Yeke namaqiniso esiwafunda eliZwini lakaZimu ayasivikela ekutheni singasilaphazwa ziimfundiso zamala. (Jwa. 8:31, 32; 1 Jwa. 4:1) Nasizifundisa ukuthanda amaqiniso la khulu kuzokuba bulula ukuthi sithwale “isivikelo sesifuba,” okutjho bona sizokuphila ngeenkambisolawulo zakaZimu. (Rhu. 111:7, 8; 1 Jwa. 5:3) Kanti godu nasizwisisa amaqiniso aseliZwini lakaZimu kuhle, sizokukghona ukuwavikela amanabethu nakasahlelako.—1 Pit. 3:15.
7 Lokho kuyifanekisa kuhle khulu indlela imithetho kaJehova evikela ngayo iinhliziyo zethu. (IzA. 4:23) Isotja angeze lakhetha isivikelo sesifuba esenziwe ngesimbi engakaqini kunalokho lizokukhetha esenziwe ngesimbi eqinileko. Yeke angekhe salahla imithetho kaZimu sakhetha ukuzenzela yethu. Asikwazi ukwahlulela kuhle, kuyatjho-ke nokuthi nokuzivikela kuzosibhalela. (IzA. 3:5, 6) Kungebangelo sihlala siqala ukuthi isivikelo sesifuba uJehova asiphe sona sisayivikela na ihliziywethu.
10 Amabhudzu wamasotja weRoma bekasiza amasotja bona aye epini, kodwana amanyathelo angokomfanekiso ambathwa maKrestu awasiza atjhumayele umlayezo wokuthula. (Isa. 52:7; Rom. 10:15) Nanyana kunjalo, kufuze abe nesibindi bona atjhumayele. UBo oneminyaka ema-20 uthi, “Bekungithusa ukutjhumayeza abantwana engifunda nabo. Bekungenza ngibe neenhloni. Nangiqala emva, angazi bona kubayini bengizizwa njalo. Nje kungithabisa khulu ukutjhumayeza iintanga zami.”
(Efesu 6:16, 17) Ngaphandle kwakho koke lokhu, phathani isihlangu esikhulu sokukholwa, enizokukghona ngaso ukucima yoke imisubela evuthako yomumbi. 17 Godu, yamukelani isikoporo sesindiso, nesabula yommoya, okutjho, ilizwi lakaZimu,
Bantu Abatjha—Jamelanani NoDeveli
13 USathana usebenzisa iinkhali ezifana ‘nemisubela evuthako.’ Iinkhalezo zihlanganisa ukukhuluma amanga ngoJehova, athi akanandaba nawe nokuthi angekhe kwenzeka ukuthi akuthande. U-Ida oneminyaka eli-19 ulwisana nokuzizwa angathandeki. Uthi, “Kukanengi ngizizwa ngingakatjhidelani noJehova, ngizizwe ngasuthi akafuni ukuba Mnganami.” Yini emsizako? Uthi, “Ukuya esifundweni kungisiza khulu. Kade bekhe ngihlale phasi ngingaphenduli, ngizitjela ukuthi akekho umuntu ofuna ukuzwa ukuthi ngicabangani. Kodwana nje ngiyalungiselela ngaphambi kokuthi ngiye esifundweni begodu ngilinge ukuphendula kabili namkha kathathu. Nanje kusesebudisi kodwana ngizizwa kamnandi khulu nakhe ngaphendula. Abafowethu nabodadwethu bayangikhuthaza tle! Qobe nakuphela isifundo ngiyaqiniseka ukuthi uJehova uyangithanda.”
16 Isikoporo sivikela ihloko yesotja, ngendlela efanako ‘ithemba lesindiso’ ngengomuso livikela ingqondwethu nendlela esicabanga ngayo. (1 Thes. 5:8; IzA. 3:21) Ithemba esinalo lisisiza sihlale sicabanga ngeenthembiso uZimu azenzileko, libuye lisisize bona siqale imiraro esihlangabezana nayo ngendlela elungileko. (Rhu. 27:1, 14; IzE. 24:15) Nasifuna “isikoporo” sethu bona sisebenze kuhle kufuze sisithwale ehloko singasibambi ngezandla.
20 UPowula ufanisa iliZwi lakaZimu nesabula esiyinikelwe nguJehova. IliZwi lakaZimeli kufuze silisebenzise kuhle nasihlathulula esikukholelwako namkha nasilisebenzisa ekuphileni kwethu. (2 Kor. 10:4, 5; 2 Thim. 2:15) Ungayithuthukisa njani indlela olisebenzisa ngayo iBhayibheli? USebastian oneminyaka ema-21 uthi, “Qobe nangifunda iBhayibheli bengitlola ivesi linye kesinye nesinye isahluko engisifundako. Ngitlola imitlolo engiyithanda khulu. Ukwenza njalo kungenza ngizwisise indlela uJehova acabanga ngayo.” UDaniel ekhesakhuluma ngaye uthi, “Nangifunda iBhayibheli ngikhetha amavesi engicabanga ukuthi azokusiza abantu engihlangana nabo esimini. Ngitjhejile ukuthi esimini, abantu bayazimisela ukukulalela nababona ukuthi iBhayibheli uyalazi, uyalithanda bewenza koke okusemandlenakho ukubasiza.”
Rhubhulula Ngezinto ZakaZimu Eziligugu
(Efesu 4:30) Godu, ningawenzi ube lisizi ummoya ocwengileko kaZimu, ngawo enitshwayelwe ilanga lokutjhatjhululwa ngesihlengo.
it-1 1128 ¶3
Cwengileko
Ummoya ocwengileko. Mamandla kaJehova asebenzako, namkha mmoya, ulawulwa nguye begodu uhlala uzalisa umnqophwakhe. Uhlwengile, ucwengile, begodu uZimu uwusebenzisa ngendlela ehle. Yeke ubizwa ngokuthi “mmoya ocwengileko.” (IR 51:11; Luk 11:13; Rom 1:4; Efe 1:13) Ummoya ocwengileko osebenza emuntwini umamandla wokucwengeka namkha wokuhlwengeka. Nanyana ngikuphi ukuziphatha okumbi okuragela phambili kwenza ummoya ocwengileko ube ‘lisizi.’ (Efe 4:30) Nanyana ummoya ocwengileko uveza ubuntu bakaZimu obucwengileko, nawo ungaba ‘lisizi.’ Nanyana ngikuphi ukuziphatha okumbi ‘kuyawucima umlilo wommoya.’ (1Te 5:19) Nange umuntu aragela phambili aziphatha njalo, ‘ukhubekisa’ ummoya ocwengileko kaZimu, begodu lokho kungenza bona umuntu ohlubukako abe sisitha sakaZimu. (Isa 63:10) Umuntu owenza lisizi ummoya ocwengileko angagcina sele awuhlambalaza, okusisono uJesu Krestu athi ngaso umuntu onjalo angeze alitjalelwe ephasineli namkha kwelizako.—Mat 12:31, 32; Mar 3:28-30.
(Efesu 5:5) Ngombana niyakwazi lokhu, nikulemukile ngokwenu, ukuthi akunamuntu owenza izenzo zomseme ezisisono namkha umuntu osilapheleko namkha umuntu omarhamaru, okutjho ukulotjha iinthombe, ozokuzuza ilifa emBusweni kaKrestu noZimu.
it-1 1006 ¶2
Ukuba Marhamaru
Kubonakala Ngezenzo. Umuntu omarhamaru ubonakala ngokwenza izinto ezimbi nezithandwa nguye. Umtloli weBhayibheli uJakopo usitjela ukuthi isifiso esimbi nasele sivundile, sibeletha isono. (Jak 1:14, 15) Yeke, umuntu omarhamaru ubonakala ngezenzo zakhe. Umpostoli uPowula wathi ukuba marhamaru kutjho ukulotjha iinthombe. (Efe 5:5) Umuntu omarhamaru wenza izinto ezifunwa nguzimakhe, uzibeka qangi ukudlula ukulotjha uMdali.—Rom 1:24, 25.
Ukufundwa KweBhayibheli
(Efesu 4:17-32) Yeke ngilokhu engikutjhoko nengifakaza ngakho eKosini, ukuthi ningasakhamba njengombana iintjhaba zikhamba, ekubeni lilize kweengqondo zazo. 18 Zisebumnyameni ngokwengqondo begodu zihlukaniswe nokuphila okuvela kuZimu, ngebanga lokungafuni ukwazi uZimu, nangebanga lobukhuni beenhliziyo zazo. 19 Njengombana bangasanawo namancani amazizo wokuziphatha okuhle, bazinikela ekwenzeni amanyala bangabi neenhloni bona benze yoke imihlobo yokusilaphala ngokuba marhamaru. 20 Kodwana azange nifunde bona uKrestu unjalo, 21 nangabe kwamambala namuzwa begodu nafundiswa ngaye, njengombana iqiniso likuJesu. 22 Nafundiswa bona nihlubule ubuntu obudala obuvumelana nendlela ebeniziphatha ngayo esikhathini esidlulileko begodu obonakaliswako ngokuvumelana neenkanuko zabo ezikhohlisako. 23 Nokuthi kufuze niragele phambili nenziwe batjha emandleni alawula imikhumbulwenu, 24 begodu kufuze nimbathe ubuntu obutjha obadalwa ngokuvumelana nentando kaZimu ngokulunga kwamambala nokuthembeka. 25 Nje-ke, njengombana senihlubule ukukhohlisa, ngamunye wenu akakhulume iqiniso nomakhelwanakhe, ngombana nimalunga womunye nomunye. 26 Thukuthelani, kodwana ningoni; ilanga lingatjhingi nisathukuthele; 27 ningamnikeli uDeveli ithuba. 28 Owebako akalise ukweba; kunalokho, akasebenze budisi, enze umsebenzi omuhle ngezandla zakhe, ukuze abe nokuthileko angakuhlanganyela nomuntu odududu. 29 Kungaphumi ilizwi elibolileko emlonyenenu, kodwana akuphume okuhle kwaphela ngomnqopho wokwakha kuye ngetlhogeko, bona nidlulisele okuzuzisako kwabezwako. 30 Godu, ningawenzi ube lisizi ummoya ocwengileko kaZimu, ngawo enitshwayelwe ilanga lokutjhatjhululwa ngesihlengo. 31 Hlubulani yoke imihlobo yehloyo elimazako, itukuthelo, ilaka, ukuphudlhelana, ikulumo elimazako, nayo yoke into elimazako. 32 Kodwana yibani nomusa komunye nomunye, nirhawukelane ngesisa, nilibalelane ngokutjhaphulukileko njengombana noZimu anilibalele ngokutjhaphulukileko ngoKrestu.
JUNI 24-30, 2012
AMAGUGU ASELIZWINI LAKAZIMU | FILIPI 1-4
“Ningatshwenyeki Ngalitho”
(Filipi 4:6) Ningatshwenyeki ngalitho, kodwana kikho koke, iimbawo zenu azaziwe nguZimu ngomthandazo, ngokurabhela kunye nokuthokoza;
“Ukuthula KwakaZimu Okudlula Koke Ukuzwisisa”
10 Yini engasisiza bona singatshwenyeki begodu sifumane “ukuthula kwakaZimu”? Amezwi kaPowula awatjela beFilipi asitjengisa ukuthi isisombululo sokulwisana nokutshwenyeka kukobana sithandaze. Yeke lokha nasitshwenyekile, kufuze sithandaze. (Funda yoku-1 Pitrosi 5:6, 7.) Thandaza kuJehova unokukholwa, wazi bona unendaba nawe. Thandaza kuye ‘ngokuthokoza’ ufumane neembusiso. Lokha nasikhumbula ukuthi “unamandla wokwenza okukhulu ngokungalinganisekiko ukudlula lokho esikukhombelako namkha esikucabangako,” ukukholwa kwethu kuyaqina.—Efe. 3:20.
(Filipi 4:7) begodu ukuthula kwakaZimu okudlula koke ukuzwisisa kuzokuvikela iinhliziyo zenu nemicabangwenu ngoKrestu Jesu.
“Ukuthula KwakaZimu Okudlula Koke Ukuzwisisa”
7 Kusemtarini ukuthi abazalwana beFilipi nabafunda incwadi uPowula abatlolele yona, bakhumbula koke okwenzeka kuye nendlela uJehova enza ngayo ngesikhathi boke bangakalindeli. Ngisiphi isifundo uPowula ebekabafundisa sona? Kuhlekuhle uPowula bekabatjela ukuthi bangatshwenyeki. Kwakufuze bathandaze khona bazofukumana ukuthula kwakaZimu, akube ngiso leso nakithi. Kodwana tjheja ukuthi “ukuthula kwakaZimu . . . kudlula koke ukuzwisisa.” Atjho ukuthini amezwi la? Abanye abatjhugululi batjhugulule amezwi la ngokuthi “kudlula woke amabhudangwethu” namkha “kudlula koke ukuhlela komuntu.” UPowula bekathi, “ukuthula kwakaZimu” kuhle ukudlula nanyana yini esingayicabanga. Iye khona ngezinye iinkhathi angeze sayibona indlela yokuphuma lokha nasiqalene neentjhijilo, kodwana uJehova yena uyayibona begodu angenza okuthileko esingakakulindeli.—Funda yesi-2 Pitrosi 2:9.
“Ukuthula KwakaZimu Okudlula Koke Ukuzwisisa”
16 Yini ebamphumela wokufumana “ukuthula kwakaZimu okudlula koke ukuzwisisa”? ImiTlolo iphendula ngokuthi ‘kuzakubulunga iinhliziyo zethu nemikhumbulwethu kuKrestu uJesu.’ (Flp. 4:7) Igama lamambala elithi “kuzakubulunga” bekuligama elisetjenziswa masotja wepi. Liqalisele ebuthweni lepi ebelabelwe bona ligade idorobho eenkhathini zekadeni. IFilipi bekulidorobho elinjalo. Izakhamuzi zeFilipi bezilala zife ebusuku, bezazi ukuthi ibutho elivikelako beligadile emasangweni wedorobho. Ngendlela efanako, ‘nasinokuthula kwakaZimu,’ iinhliziyo nemikhumbulwethu iba nokuthula. Siyazi ukuthi uJehova unendaba nathi begodu ufuna ukusibona siphumelela. (1 Pit. 5:10) Ukwazi lokho kuyasisiza kusenze singagandelelwa matshwenyeko namkha ukudana.
Rhubhulula Ngezinto ZakaZimu Eziligugu
(Filipi 2:17) Ngitjho nanyana ngithululwa njengomnikelo wesiselo emhlatjelweni nemsebenzini ocwengileko ukukholwa kwenu okunirholele kiwo, ngithaba kunye nani noke.
it-2 528 ¶5
Iminikelo
Iminikelo eselwako. Iminikelo eselwako beyikhambisana neminye imihlatjelo, lokho kwenzeka ngemva kobana ama-Israyeli sele afike eNarheni yesiThembiso. (Num 15:2, 5, 8-10) Lokhu kuhlanganisa (“utjwala”) newayini ebelithululwa e-aldareni. (Num 28:7, 14; madanisa no-Eks 30:9; Num 15:10.) Umpostoli uPowula watlolela amaKrestu weFilipi: “Ngitjho nanyana ngithululwa njengomnikelo wesiselo emhlatjelweni nemsebenzini ocwengileko ukukholwa kwenu okunirholele kiwo, ngithaba kunye nani noke.” La usebenzise umnikelo oselwako, bona atjengise ukuthi uzimisele ukwenza nanyana yini ukusiza amaKrestu akunye nawo. (Flp 2:17) Ngaphambi kokufa kwakhe, watlolela uThimothi: “Ngombana sengithululwa njengomnikelo wesiselo begodu isikhathi sokutjhatjhululwa kwami sesitjhidele.”—2Tm 4:6.
(Filipi 3:11) ukubona ukuthi kungenzeka na ngifumane ivuko lokuthoma kwabafileko.
w07 1/1 26-27 ¶5
“lvuko lokuthoma”—Liyenzeka!
5 Amalunga azesiweko ‘ka-Israyeli kaZimu’ kufuze ahlanganyele neKosi uJesu Krestu ephazimulweni yezulwini, lapho ‘azokuhlala khona neKosi.’ (Galatiya 6:16; 1 Thesalonika 4:17) Isenzakalweso sibizwa ngokuthi ‘livuko lokuthoma.’ (Filipi 3:10, 11; IsAmbulo 20:6) Nasele ivukwelo liphelile, kuzokuba sikhathi sokobana kuvuswe iingidi zabantu ezinethemba lokuphila ngokungapheliko ePharadesi. Kungakhathaliseki ukuthi sinethemba lokuphila ezulwini namkha ephasini, soke sinekareko yokwazi ‘ngevuko lokuthoma.’ Livuko elinjani? Lizokwenzeka nini?
Ukufundwa KweBhayibheli
(Filipi 4:10-23) Ngithaba khulu eKosini ngokuthi emaswapheleni nikuvuselele ukutshwenyeka kwenu ngami. Nanyana benitshwenyekile ngami, beninganalo ithuba lokukutjengisa. 11 Angitjho lokhu ngombana kukhona engikutlhogako, ngifunde ukwaneliseka kungakhathaliseki ukuthi ngisebujamweni obunjani. 12 Ngiyazi ukuthi kunjani ukuba nokuncani nokuba nenala. Kikho koke begodu kibo boke ubujamo ngifunde ifihlo yokusutha nokulamba, yokuba nenala nokuba dududu. 13 Nginamandla kikho koke ngebanga lalowo ongipha amandla. 14 Nanyana kunjalo, nenze kuhle ngokuhlanganyela nami esizini lami. 15 Kuhlekuhle, nina beFilipi niyazi nokuthi ekuthomeni kokumenyezelwa kweendaba ezimnandi, nangisuka eMasedoniya, alikho ibandla elahlanganyela nami endabeni yokupha nokwamukela, ngaphandle kwenu nodwa; 16 ngombana ngesikhathi ngiseThesalonika, nangithumela okuthileko engikutlhogako ingasi kanye kodwana kabili. 17 Ingasi bona ngifuna isipho, kodwana ngifuna isithelo esizokwandisa umnothwenu. 18 Kunalokho, nginokungaphezu kwalokho engikutlhogako. Nginayo yoke into, njengombana sengifumene lokho enikuthumele ngo-Ephafrodithu, iphunga elimnandi, umhlatjelo owamukelekako, omthabisa khulu uZimu. 19 Ngebanga lalokho uZimami uzoninikela koke enikutlhogako ngokuya ngokunotha kwakhe ngephazimulo ngoKrestu Jesu. 20 Nje-ke iphazimulo ayibe kuZimethu uBaba bekube phakade naphakade. Amen. 21 Ningilotjhisele boke abacwengileko abasebunyeni noKrestu Jesu. Abafowethu abanami bayanilotjhisa. 22 Boke abacwengileko, kodwana khulukhulu bendlu kaKhesari, bayanilotjhisa. 23 Umusa omkhulu weKosi uJesu Krestu awube nommoya eniwutjengisako.