U-Hulda Wafikelela Umnqophwakhe
NANGABE khewavakatjhela isihlengele esincani se-Sangir Besar e-Indonesia eminyakeni ethileko edlulileko, kungenzeka wababona abodadwethu abathathu abamaKrestu eligwini lelwandle. Baziwa khulu esihlengelenesi ngomsebenzabo wokutjhumayela—basize abantu bona bazwisise iBhayibheli. Kodwana kilokhu, bebenza okuthileko okuhlukileko.
Isihlengele se-Sangir Besar etlhagwini ye-Indonesia
Kokuthoma, bebakhamba elwandle badobha amatje amakhulu bawabeke eligwini lelwandle. Amanye wamatje lawo bewamakhulu alingana namabholo. Abafazaba bebahlala esitulweni esincani esenziwe ngesigodo, basebenzise amahamura bakghadlhe amatje abe ziinquqwana ezincani kuneqanda lekukhu. Ngemva kwalokho bebafaka amatje lawo ethunganeni leplastiki bawathwale bakhuphuke nawo ngeentepisi baye lapha bahlala khona. Bebafika bafake amatje lawo eenkhwameni ezikulu ezingafakwa elorini bese ayokusetjenziswa nakulungiswa indlela.
U-Hulda, ubuthelela amatje eligwini lelwandle
Omunye wabodadaba bekungu-Hulda. Ubujamo bakhe bebumvumela ukudlula abanye bona asebenze isikhathi eside emsebenzini lo. Kanengi bekasebenzisa imali ayifumeneko ukubhadala izinto ezitlhogwa mndenakhe qobe langa. Kodwana nje bekafuna ukubeka imali ngombana afuna ukuthenga okuthileko. Bekafuna ukuthenga i-tablet ukwenzela bona akghone ukungena ku-JW Library. U-Hulda bekazi ukuthi amavidiyo nezinye izinto eziku-app le zizomsiza athuthukise indlela atjhumayela ngayo nokuzwisisa iBhayibheli.
Inyanga nesiquntu u-Hulda wasebenza ama-iri amabili qobe langa ekuseni, akghadlha amatje alingeneko bona azalise ilori encani. Ekugcineni yahlangana imali yokuthenga i-tablet.
U-Hulda uphethe i-tablet yakhe
U-Hulda wathi, “Ngitjho nanyana bengidiniwe begodu ngizwa ubuhlungu ngebanga lokukghadlha amatje, msinyana ngakhohlwa ngabo boke ubuhlungu lokha nasele ngisebenzisa i-tablet etja ebeyingisiza bona ngikghone ukuphumelela emsebenzini wokutjhumayela nokulungiselela imihlangano yobuKrestu lula.” Godu uthe i-tablet yamsiza khulu ngesikhathi sesindabelaphi njengombana imihlangano yebandla nokutjhumayela bekwenziwa ngevidiyo. Sithaba no-Hulda ngokuthi ufikelele umnqophwakhe.