Kghani AboFakazi BakaJehovaMaKrestu Weqiniso?

Njengombana siboFakazi bakaJehova, sikholelwa bona simaKrestu weqiniso. Kubayini? Cabanga ngesisekelo seenkolelo zethu, igama elisenza sihluke nethando esinalo.

1. AboFakazi bakaJehova bakusekela kuphi lokho abakukholelwako?

UJesu wathi: “Ilizwi [lakaZimu] liliqiniso.” (Jwanisi 17:17) AboFakazi bakaJehova bebasolo basekela iinkolelo zabo eliZwini lakaZimu njengoJesu. Cabanga ngomlando wamva nje. Hlangana neminyaka yabo-1870, isiqhema sabafundi beBhayibheli sathoma ukulihlolisisa. Sasekela iinkolelo zaso kilokho iBhayibheli elikutjhoko, ngitjho nanyana iinkolelwezo bezihlukile kilokho okufundiswa masondo. Ngemva kwalokho, sathoma ukutjela abanye ngamaqiniso weBhayibheli.a

2. Kubayini sizibiza ngaboFakazi bakaJehova?

UJehova ubiza abantu abamlotjhako ngokuthi bofakazi bakhe ngombana bakhuluma iqiniso ngaye. (Hebheru 11:4–12:1) Ngokwesibonelo, ekadeni uZimu watjela abantu bakhe ukuthi: “Nibofakazi bami.” (Funda u-Isaya 43:10.) UJesu ubizwa ngokuthi ‘nguFakazi othembekileko.’ (IsAmbulo 1:5) Ngo-1931, sathoma ukuzibiza ngokuthi siboFakazi bakaJehova. Siyazikhakhazisa ngokubizwa ngegamelo.

3. AboFakazi bakaJehova balilingisa njaniithando lakaJesu?

UJesu bekabathanda khulu abafundi bakhe kangangokuthi bebanjengomndenakhe. (Funda uMarkosi 3:35.) Ngokufanako, aboFakazi bakaJehova babumbene, bamndeni wephasi loke. Kungebangelo sibizana ngokuthi mfowethu namkha dadwethu. (Filimoni 1, 2) Silalela nomyalo othi: “Thandani yoke ihlangano yabafowethu.” (1 Pitrosi 2:17) Ithandweli libonakala ngeendlela ezinengi, njengokusiza amanye amaKrestu ephasini mazombe ngeenkhathi ezibudisi.

FUNDA NGOKUNGENELELEKO

4. Sisekela esikukholelwako eBhayibhelini

UJehova wabikezela ukuthi iqiniso leBhayibheli lizokukhanya kancanikancani. Funda uDanyela 12:4, bese nicoca ngombuzo lo:

• Khuyini ‘ezokwanda’ hlangana nabantu bakaZimunjengombana baragela phambili bahlolisisa iBhayibheli?

Tjheja bona isiqhema sabafundi beBhayibheli, kuhlanganise no-Charles Russell, salifunda njani iliZwi lakaZimu. Dlala IVIDIYO, bese nicoca ngombuzo olandelako.

IVIDIYO: Ukufumana Iqiniso LeBhayibheli (7:45)

• Evidiyweni le, u-Charles Russell nabafundi beBhayibheli ebebanaye balifunde njani iBhayibheli?

Kghani bewazi?

Ngezinye iinkhathi, khesalungisa okhunye esikukholelwako. Kubayini? Njengombana ilanga nalivelako liveza ubuhle bendawo kancanikancani, noZimu usenza sizwisise iliZwi lakhe kancanikancani. (Funda IzAga 4:18.) Ngitjho nanyana iBhayibheli lingatjhuguluki, silungisa esikukholelwako njengombana sizwisisa iBhayibheli ngcono.

5. Siphila ngokuvumelana negama lethu

IVIDIYO: Igama Elisihlathululako (2:40)

• Kubayini igama elithi aboFakazi bakaJehova lisifanela?

Kubayini uJehova akhethe abantu bona babe boFakazi bakhe? Ngombana bazokufakazela ukuthi unguZimu weqiniso, njengombana kukhulunywe amala amanengi ngaye. Tjheja amabili wawo.

Ezinye iinkolo zifundisa amalungazo ukuthi uZimu ufuna asebenzise iinthombe nakamlotjhako. Nanyana kunjalo, funda uLevitikusi 26:1, bese nicoca ngemibuzo elandelako:

• Liyini iqiniso? UJehova uzizwa njani ngokulotjha iinthombe?

Abanye abarholi bekolo bafundisa ukuthi uJesu unguZimu. Nanyana kunjalo, funda uJwanisi 20:17, bese nicoca ngemibuzo elandelako:

• Liyini iqiniso? Kghani uZimu noJesu bamumuntu munye na?

• Kukwenza uzizwe njani ukwazi ukuthi uJehova uthumela aboFakazi bakhe bona batjhumayele iqiniso ngaye nangeNdodanakhe?

6. Siyathandana

IBhayibheli limadanisa amaKrestu namalunga ahlukahlukeneko womzimba. Funda yoku-1 kwebeKorinte 12:25, 26, bese nicoca ngemibuzo elandelako:

• AmaKrestu weqiniso kufuze enzeni lokha amanye amaKrestu nakatlhagako?

• Khuyini oyibonileko ngethando hlangana naboFakazi bakaJehova?

Lokha aboFakazi bakaJehova nabatlhagako kenye ingcenye yephasi, abanye aboFakazi ephasini loke basikimela phezulu bona basize. Nawuzakubona isibonelo salokho, dlala IVIDIYO. Bese nicoca ngombuzo olandelako.

IVIDIYO: I-Haiti Ikghodlhelela i-Hurricane Matthew (5:29)

• Umsebenzi waboFakazi bakaJehova wokuhlangula ulitjengisa njani ithando?

ISIRHUNYEZO

AboFakazi bakaJehova maKrestu weqiniso. Siyihlangano esephasini loke, sisekela esikukholelwako eBhayibhelini begodu sazisa abantu iqiniso ngoJehova.

Buyekeza

• Kubayini sizibiza ngaboFakazi bakaJehova?

• Siphathana njani?

• Ucabanga ukuthi aboFakazi bakaJehova maKrestu weqiniso?

HLOLA OKUNGENZASI

Qala isibonelo sendlela aboFakazi bakaJehova abaveze ngayo ifundiso yamala.

Abantu BakaZimu Baphazimulisa Igama Lakhe (7:08)

Fumana iimpendulo zemibuzo okungenzeka unayo ngaboFakazi bakaJehova.

“Okubuzwako NgaboFakazi BakaJehova” (ikhasi eliku-jw.org)

UStephen bekahloye abantu bezinye iinhlanga kangangokuthi bekabahlasela. Fumana ukuthi khuyini ayibona hlangana naboFakazi bakaJehova eyamenza watjhuguluka.

“Ipilwami Yasuka Kokumbi Yaya Kokumbi Khulu” (IsiThala, Julayi 1, 2015)