Funda ELizwini LakaZimu

Kubayini AmaKrestu Kufuze Abhabhadiswe?

Isihlokwesi siphakamisa iimbuzo okungenzeka ukhe wazibuza yona bese sitjengisa lapho ungafumana khona iimpendulo eBhayibhilinakho. AboFakazi BakaJehova bazokuthabela ucoca nawe ngeempendulwezi.

1. Litjho ukuthini ibhabhadiso lobuKrestu?

Ibhabhadiso yindlela yokubawa uZimu bona ube nobuhlobo obuhle naye. Ngalokho, umKrestu kufuze abhabhadiswe ingasi nasesemntwana, kodwana nesele amkhulu ngokwaneleko bona azokufunda ngoZimu begodu abe mfundi kaJesu. (IZenzo 8:12; 1 KaPitrosi 3:21) Siba bafundi bakaJesu nesifunda begodu senze izinto asilayela bona sizenze.—Funda uMatewu 28:19, 20.

Ngesikhathi sabapostoli bakaJesu, abantu abanengi bathatha igadango lokufunda ngoZimu nangoJesu ngaphandle kokuriyada. Isibonelo, lapho enye indoda yazi bona ukufa kwakaJesu kwenze bona sikwazi ukusindiswa, khonokho yaba mfundi. Namhlanje, abantu abanengi abathobekileko bakhethe ukuba balandeli bakaJesu.—Funda IZenzo 8:26-31, 35-38.

2. Kubayini uJesu abhabhadiswa?

UJesu bekaneemnyaka ema-30 uJwanisi uMbhabhadisi nekamcwilisa ngemanzini woMlambo iJordani. Ukubhabhadiswa kwakaJesu bekujamele isiqunto sakhe sokwenza intando kaZimu. (KumaHebheru 10:7) Lokhu bekuhlanganisa nokunikela ngokuphila kwakhe njengomhlatjelo wezono zesintu. Ngitjho nangaphambi kobana ehle ezulwini azokuphila ephasini, uJesu gade asolo amthanda begodu amlalela uYise, uJehova.—Funda uMarkosi 1:9-11; Jwanisi 8:29; 17:5.

3. Kubayini umKrestu kufuze abhabhadiswe?

Ubujamo bethu buhlukile kunebakaJesu—sibelethwa sinesono. Nanyana kunjalo, ukufa kwakaJesu okumhlatjelo kwenza bona sikwazi ukuba nobuhlobo obuhle noZimu. (KwebeRoma 5:10, 12; 12:1, 2) Eqinisweni kuyakghoneka bona sibe ngebakhe njengamalunga womndenakhe. (2 KwebeKorinte 6:18) Silifumana njani ilungelwelo? Emthandazweni wangerhorhomejeni, sizinikela kuJehova, sizibopha bona sizokwenza intandwakhe ukuphila kwethu koke. Ngemva kokuzinikela okunjalo, sikubonakalisa tjhatjhalazi ngokubhabhadiswa.—Funda uMatewu 16:24; 1 KaPitrosi 4:2.

4. Ungakulungiselela njani ukubhabhadiswa?

AboFakazi BakaJehova bafunda iBhayibhili nananyana ngubani ofuna ukutjhidela kuZimu. Ukufunda iBhayibhili nokuya emihlanganweni yobuKrestu kuzokuqinisa ithando lakho ngoZimu nekholo lakho kuye. Godu kuzokusiza uhlawulele ubujamo bomkhumbulo nemikghwa emihle. Ukuthuthukisa ithando, ikholo nezinye iimfanelo zobuntu bakaZimu kuzokusiza bona uphile ngokuvumelana nesifungo sakho sokukhonza uJehova.—Funda uJwanisi 17:3; KumaHebheru 10:24, 25.

Bona ufumane imininingwana engeziweko, qala isahluko 18 sencwadi le Khuyini Kwamambala Okufundiswa YiBhayibhili?, egadangiswa boFakazi BakaJehova.