Iimbuzo Evela Kubafundi
UMbuso wePhasi wamaNgisi namaMerika waba nini mbuso wephasi wekhomba wesiporofido seBhayibhili?
▪ Ubhazabhaza wesithombe owabonwa yiKosi uNebukadinezari, akakajameli yoke iimbuso yephasi. (Dan. 2:31-45) Kunalokho, sijamele iimbuso emihlanu eyabusa kusukela esikhathini sakaDanyela kuye phambili begodu eyasebenzelana ngokutjhideleneko nabantu bakaZimu.
Indlela uDanyela ahlathulula ngayo isithombesi itjengisa bona uMbuso wePhasi wamaNgisi namaMerika kunokobana uthumbe umbuso wamaRoma, bewuzokuvela kiwo. Esithombenesi, uDanyela ubona isimbi emlenzeni kwehle kuye eenyaweni nemazwanini. (Eenyaweni nemazwanini, isimbi ivangene nomdaka.)a Ihlathululo le itjengisa bona uMbuso wePhasi wamaNgisi namaMerika bewuzokuvela emilenzeni yesimbi. Umlando ufakazela ihlathululo leyo ngokunembileko. IBrithani, eyakhe yaba yingcenye yoMbuso WamaRoma, yathoma ukuvelela ekupheleni kweemnyaka yabo 1700. Kwamva i-United States of America, yaba sitjhaba esazekako. Nanyana kunjalo, umbuso wephasi wekhomba wesiporofido seBhayibhili bewungakaveli. Kubayini bekunjalo? IBrithani ne-United States bezingakasebenzi ndawonye ngendlela ebonakalako. Lokhu kwenzeka ngePi yePhasi I.
Ngesikhatheso, ‘abantwana bombuso’ bebasebenza khulu e-United States, emzimkhulu wabo wephasi loke eBrooklyn, eNew York. (Mat. 13:36-43) Amalunga wesigaba sabazesiweko bekamajadu ekutjhumayeleni eenarheni ebezibuswa Mbuso weBrithani. Hlangana nePi yePhasi I, iimbuso yeBrithani neyeMerika yakha ubungani obukhethekileko neyilwa namanabayo wezepolotiki. Godu ipi leyo yabangela ukwanda kokuhlukana ngokobuhlanga, yatjengisa ihloyo kilabo egade bayingcenye yenzalo ‘yowesifazana’ kaZimu, bakhandelwa ukurhatjha iincwadi egade bazenza begodu babopha labo egade badosa phambili emsebenzini wokutjhumayela.—ISam. 12:17.
Ngalokho, ngokwesiporofido seBhayibhili, umbuso wephasi wekhomba akhenge ujanyiswe ekupheleni kwabo-1700 iBrithani neyithoma ukuvelela. Kunalokho, wajanyiswa ekuthomeni kwelanga leKosi.b
[Imitlolo yaphasi]
a Umdaka ovangene nesimbi ujamele iimbuso engaphakathi eMbusweni wePhasi wamaNgisi namaMerika onjengesimbi. Ngokukhamba kwesikhathi, umdaka wenza kwaba budisi ngombuso loyo bona ube namandla ngendlela egade ungathanda ngayo.
b Ihlathululo le ilungisa iimniningwana esekhasini 57, isigaba 24, sencwadi ethi Isiprofetho SikaDaniyeli nokutjengiswe ematjhadini asekhasini 56 ne-139.
[Isithombe ekhasini 19]
Abazalwana ababunane abavela emzimkhulu we-Watchtower bathunyelwa ejele ngoJuni 1918