Nakubusa uZimu, yoke indalo beyibumbene begodu inokuthula

Kubayini Sitlhoga UmBuso KaZimu?

Ekuthomeni kokudalwa kwabantu, uMdali wethu ibizo lakhe elinguJehova, nguye kwaphela obekabusa. Wabusa ngethando. Watjala isivande esihle esaziwa ngokuthi yisimu ye-Edeni, ngemva kwalokho wabeka abantu kiso, sabalikhaya labo. Wenza nesiqiniseko sokuthi baba nokudla okwaneleko. Ngaphezu kwalokho wabanikela umsebenzi owanelisako ebekufuze bawenze. (Genesisi 1:28, 29; 2:8, 15) Abantu bebazokuhlala bathabile begodu banokuthula ngathana bavumela uZimu bona ababuse.

U-Adamu uphethe isithelo uZimu athe bangasidli usinikelwe ngu-Eva. — Abantu bokuthoma akhenge bavumele uZimu bona abaBuse

IBhayibheli lisitjela ukuthi ingilozi embi, kamva eyabizwa ngokuthi nguSathana uDeveli, yathi uZimu akanalungelo lokubusa abantu. Yathi abantu bangaphila kamnandi nange bangazibusa. Okubuhlungu kukuthi, ababelethi bethu bokuthoma, u-Adamu no-Eva, balalela uSathana bahlubuka kuZimu.—Genesisi 3:1-6; IsAmbulo 12:9.

Ngebanga lokuthi u-Adamu no-Eva akhenge bavumele uMdali wabo bona ababuse, balahlekelwa likhaya labo eliyiPharadesi nelungelo lokuphila ngokungapheliko. (Genesisi 3:17-19) Umphumela wesiqunto sabo wadlulela nebantwaneni babo. IBhayibheli lithi, ngebanga laka-Adamu ‘isono sangena ephasini nokufa kwangena ngesono.’ (Roma 5:12) Isono saletha neminye imiphumela emimbi, iBhayibheli lithi: “Kunesikhathi lapha umuntu aba negunya khona phezu komunye umuntu ngokwenza okumbi.” (UMtjhumayeli 8:9) Lokho kutjho ukuthi umuntu nakabusa omunye umuntu kuba nemiraro eminengi evelako.

UMUNTU UTHOMA UKUBUSA

UNimrodi ujame ngokuzikhukhumeza. Ngemva kwakhe abantu bayakha. — UNimrodi wahlubuka kuZimu

IBhayibheli lisitjela ukuthi umuntu wokuthoma owabusa abantu nguNimrodi. Bekangalotjhi uZimu begodu watjengisa ukuthi akafuni uZimu abuse abantu. Kusukela emihleni kaNimrodi, abantu abanamandla wokubusa basebenzisa amandlabo bona balimaze abanye. Pheze eminyakeni ezii-3 000 eyadlulako, iKosi uSolomoni yatlola yathi: “Ngabona loke igandelelo ebegade lenzeka ngaphasi komthunzi welanga: Qala bekuneenyembezi zabagandelelweko, gade banganamduduzi; amandla alele kubagandeleli.”—UMtjhumayeli 4:1.

Nanamhlanjesi kusesenjalo. Ngo-2009, incwadi i-United Nations yathi, ukuphathwa kumbi kwabantu ‘kuyimbangela yezinto ezimbi esizibona zenzeka ephasini namhlanjesi.’

SIKHATHI SOKUTHATHA IGADANGO!

Abantu batlhoga ababusi norhulumende olungileko. Ngilokho uMdali wethu asithembisa khona.

Isithombe: Imiphumela yabarhulumende babantu. 1. Umma we-Asiya uphethe umntwanakhe olilako uhlezi endleleni esilapheleko. 2. Indoda ekhulileko iyagula isesibhedlhela. 3. Amasotja asepini ayadumuzana. 4. Abantu abatoyitoyako abasilingekileko. 5. Umma nomntazanakhe bajame ngaphandle lapha bahlala khona, bafumene umnyango wangaphambili endlinabo uphuliwe. 6. Amaphayiphu akhupha intunthu edorobheni neentambo zegezi. — Ngitjho naborhulumende ababonakala balungile bahlulekile ukurarulula imiraro yabantu

UZimu uhlome umBuso, namkha urhulumende, ozokujamiselela yoke imibuso yabantu begodu umBuso loyo, “uzakujama nini nanini.” (Danyela 2:44) UmBuso lo ngiwo iingidi zabantu eziwuthandazelako. (Matewu 6:9, 10) UZimu angekhe azibambele yena ngenyama. Kunalokho, ubeke umuntu okhe waphila ephasini bona abeyiKosi. Ngubani umuntu loyo?