‘Khambani Niyokwenza Abafundi’

1-2. Ingilozi yathini ebafazini abeza ethuneni lakaJesu begodu ngisiphi isinqophiso uJesu abanikela sona?

KUSEKUSENI ngoNisani-16, 33, ngeenkhathi zabapostoli. Abafazi abathanda uZimu badanile njengombana baya ethuneni. Sekudlule ama-awara ama-36 iKosi uJesu Krestu ibulungiwe. Nabafika ethuneni bebafuna ukuthela isidumbu ngamakha nangamafutha anuka kamnandi, kodwana nabafika lapho barareka khulu ngombana bafumana ithuna linganalitho. Ingilozi yatjela abafazabo ukuthi uJesu uvukile, ingezelela ngokuthi: “Unikhambela phambili uya eGalile. Nizombona lapho.”—Mat. 28:1-7; Luk. 23:56; 24:10.

² Nabaqeda ukukhamba ethuneni, abafazaba bahlangana noJesu begodu ubanikela isinqophiswesi: “Khambani niyokubikela abafowethu bona baye eGalile, bazongibona khona.” (Mat. 28:10) Into yokuthoma uJesu ayenzako nakaqeda ukuvuswa, uhlela umhlangano nabafundi bakhe. Emhlanganweni lo, ubanikela iinqophiso eziqakatheke khulu!

UJESU WATHUMA ABOBANI BONA BAYOKWENZA ABAFUNDI?

3-4. Kubayini sithi umyalo ofumaneka kuMatewu 28:19, 20, bewungakanikelwa abapostoli kwaphela? (Qala isithombe esingaphandle.)

³ Funda uMatewu 28:16-20. Emhlanganweni awuhlelako, uJesu watjela abafundi bakhe ngomsebenzi oqakathekileko ebebazowenza, nathi sisawenza umsebenzi loyo. Wathi: “Khambani niyokwenza abantu bazo zoke iintjhaba babe bafundi, . . . nibafundise ukwenza koke enginiyale ngakho.”

⁴ UJesu ufuna boke abalandeli bakhe batjhumayele. Akhenge atjele abapostoli bakhe abali-11 kwaphela bona benze umsebenzi lo, kubayini sitjho njalo? Lokha uJesu nakakhipha umyalo wokwenza abafundi, bekungasi bapostoli kwaphela ebebasentabeni yeGalile. Khumbula bona ingilozi yathi ebafazini: “Nizombona [eGalile].” Yeke, kungenzeka ukuthi abafazi abathembekilekwaba nabo bebakhona emhlanganweni loyo. Kodwana akupheleli lapho. Umpostoli uPowula waveza ukuthi uJesu ‘wabonakala kubafowethu abangaphezu kwama-500 ngesikhathi sinye.’ (1 Kor. 15:6) Kuphi?

5. Sifundani emtlolweni woku-1 kwebeKorinte 15:6?

⁵ Sinamabanga azwakalako wokukholelwa ukuthi amezwi akhulunywa nguPowula kweyoku-1 kwebeKorinte 15:6, aqalisele emhlanganweni ebewuseGalile ekukhulunywa ngawo encwadini kaMatewu 28. Ngimaphi amabanga lawo? Lokuthoma, abafundi bakaJesu abanengi bekungebeGalile. Ngalokho, bekuzokuba lula bona abe nomhlangano nabantu abanengi entabeni iGalile kunokuba nabo emzini othileko weJerusalema. Lesibili, uJesu besele ahlangene nabapostoli bakhe abali-11 emzini othileko eJerusalema. Ngathana uJesu bekafuna kube bafundi bakhe kwaphela abenza umsebenzi wokutjhumayela nokufundisa, bekangakwenza lokho eJerusalema kunokobana abawe nabantu bengubo nabanye bona bahlangane naye eGalile.—Luk. 24:33, 36.

6. Umtlolo kaMatewu 28:20, utjengisa njani ukuthi umyalo wokwenza abafundi usasebenza nanamhlanjesi begodu umyalo lo ulalelwa ngezinga elingangani?

⁶ Tjheja ibanga lesithathu eliqakathekileko. Umyalo kaJesu wokwenza abafundi bewungasi ngewamaKrestu ebewaphila ngesikhatheso kwaphela. Sikwazi njani lokho? UJesu waphetha iinqophiso azinikela abalandeli bakhe ngamezwi naka: “Nginani imihla yoke bekube sekupheleni kwephasi.” (Mat. 28:20) Njengombana uJesu atjho, abantu abanengi namhlanjesi benza abafundi. Akhucabange, qobe mnyaka abantu abangaphezu kwee-300 000 bayabhajadiswa babe boFakazi bakaJehova.

7. Sizokucoca ngani begodu kubayini?

⁷ Inengi labantu abafunda iBhayibheli, liyabhajadiswa. Nanyana kunjalo, abanye esifunda nabo iBhayibheli bayasaba ukubhajadiswa. Bayakuthanda ukufunda, kodwana abathuthukeli ekubhajadisweni. Nakunomuntu ofunda naye iBhayibheli, siyaqiniseka ukuthi ufuna ukumsiza asebenzise lokho akufundako ukwenzela bona naye abe mfundi kaKrestu. Esihlokwenesi, sizokucoca ngeendlela esingathinta ngazo ihliziyo yomfundi ukwenzela bona simsize akhule ebuhlotjeni bakhe noZimu. Kubayini sicoca ngendaba le? Kungombana kuzokufika isikhathi la kuzokufuze siqunte ukuthi sizokuraga nesifundo namkha sizokulisa.

LINGA UKUSIZA ABANTU OBAFUNDELAKO BATHANDE UJEHOVA

8. Kubayini kungasibulula ukuthinta ihliziyo yomuntu?

⁸ UJehova ufuna abantu bamlotjhe ngombana bamthanda. Ngikho silinga ukusiza umuntu esifunda naye bona azwisise ukuthi uJehova umthanda khulu. Sifuna bazi ukuthi uJehova “unguyise weentandani nomjameli wabahlolokazi.” (Rhu. 68:6) Abantu ofunda nabo nababona indlela uJehova abathanda ngayo bazokuthinteka bese bamthande khulu. Ngebanga lokuthi abanye akhenge bathandwe babelethi babo, bangakufumana kubudisi ukukholelwa ukuthi uJehova unethando elinjengelakaBaba. (2 Thim. 3:1, 3) Njengombana uraga isifundo, tjengisa umuntu ofunda naye ubuntu bakaJehova obuhle. Menze azwisise ukuthi uZimu onethando ufuna ukumsiza afumane ukuphila okungapheliko. Khuyini okhunye ongamsiza ngakho?

9-10. Ngiziphi iincwadi ekufuze sizisebenzise nasifundela abantu iBhayibheli begodu kubayini?

⁹ Nanifundako, sebenzisani incwadi ethi, “Lifundisani IBhayibheli?” nethi, “Kutjho Ukuthini Ukuhlala Ethandweni LakaZimu?” Iincwadezi zilungiselelwe bona zithinte iinhliziyo zabantu esifunda nabo. Ngokwesibonelo, isahluko sokuthoma sencwadi ethi, Okufundiswa yiBhayibheli, siphendula imibuzo ethi: Inga-kghani uZimu unendaba nathi namkha akanasirhawu? UZimu uzizwa njani nakabona abantu abatlhagako? Inga-kghani ungaba mngani kaJehova? Kuthiwani ngencwadi ethi, Hlala Ethandweni LakaZimu? Incwadi le izokusiza umuntu ofunda naye azwisise ukuthi ukuvumelanisa ukuphila kwakhe neenkambisolawulo zeBhayibheli kuzokuthuthukisa indlela aphila ngayo kumtjhideze kuJehova. Kufuze ulungiselele kuhle, ucabange ngomuntu ofunda naye, ngitjho nanyana wena sewuzifundile ngaphambilini iincwadezi.

¹⁰ Uzokwenza njani nangabe umuntu ofunda naye ufuna ukwaziswa okusencwadini eseThulusini lethu lokuFundisa? Mkhuthaze bona azifundele yena ukwazisokho, bese wena uragela naye phambili nifunda iincwadi ekhesakhuluma ngazo ngaphambilini.

11. Kufuze nithome nini ukuvula nokuphetha isifundo senu ngokuthandaza begodu ungayethula njani indaba le?

¹¹ Thandaza ngaphambi kobana nithome ukufunda. Kuhlekuhle kungcono khulu ukuthoma nokuphetha ngomthandazo isifundo ngasinye nakukghonakalako, kungaba kuhle khulu naningakuthoma lokho ngemva kweemveke ezimbalwa nithome ukufunda. Siza umuntu ofunda naye azwisise bona ukuphela kwendlela engasisiza sizwisise iliZwi lakaZimu, mumoyakhe. Abanye bahlathulula ukuthi kubayini sithome ukufunda ngokuthandaza ngokuthi bafunde umtlolo kaJakopo 1:5, othi: “Nje-ke nangabe omunye wenu utlhoga ukuhlakanipha, akaragele phambili akubawa kuZimu.” Ngemva kwalokho babuza umuntu abafunda naye ukuthi, “Singambawa njani uZimu ukuhlakanipha?” Umuntu lo uzokuvuma bona nithome ngokuthandaza.

12. Ungawusebenzisa njani umtlolo weRhubo 139:2-4, ukusiza umuntu ofunda naye bona athuthukise indlela athandaza ngayo?

¹² Fundisa umuntu ofunda naye ukuthandaza. Mqinisekise ngokuthi uJehova ufuna ukuzwa imithandazwakhe. Mhlathululele ukuthi nakathandaza ayedwa, angakhuluma okusesifubeni sakhe, atjele uJehova izinto okungenzeka abe neenhloni ukuzitjela abanye abantu. Kazi uJehova uyakwazi esikucabangako. (Funda iRhubo 139:2-4.) Kufuze sikhuthaze abantu esifunda nabo bona babawe uZimu abasize bangacabangi ngezinto ezimbi begodu bahlule imikghwa emimbi. Akhesithi umuntu esewufunde naye isikhathi kusesenamaholideyi awathandako asekelwe ekolweni yamala. Uyazi ukuthi amaholideyi la awakalungi, kodwana kunezinto azithandako ngawo. Mkhuthaze bona atjele uJehova ngendlela azizwa ngayo, amncenge bona amsize athande okulungileko kwaphela.—Rhu. 97:10.

13. (a) Kubayini kufuze simeme abantu esifunda nabo iBhayibheli bona beze esifundweni msinyana ngendlela ekungakghonakala ngayo? (b) Singamsiza njani umuntu esifunda naye athabele ukuya sesifundweni?

¹³ Mema umuntu ofunda naye bona eze esifundweni msinyana ngendlela ongakghona ngayo. Lokho azokuzwa namkha azokubona esifundweni, kungamthinta ihliziyo bekumenze athuthuke. Mtjengise ividiyo ethi Kwenzekani EWolweni LomBuso? umbawe akhambe nawe esifundweni. Nakukghonakalako, mtjele ukuthi uzokuza uzomthatha. Kungaba kuhle nawungamema abatjhumayeli abahlukahlukeneko bakuphekelele nawuyokuraga isifundweso. Nawenza njalo, umuntu ofunda naye uzokujayelana nabantu abahlukahlukeneko, nakavakatjha esifundweni uzozizwa atjhaphulukile.

SIZA UMUNTU OFUNDA NAYE ATHUTHUKE

14. Khuyini engenza umuntu esifunda naye iBhayibheli bona athande uJehova?

¹⁴ Sifuna ukusiza abantu esifunda nabo bathuthuke. (Efe. 4:13) Umuntu nakavuma bona nifunde iBhayibheli, kungenzeka acabange ngokuthi isifundweso sizomzuzisa njani yena. Njengombana ukuthanda kwakhe uJehova kukhula, kungenzeka afune ukusiza nabanye kuhlanganise nebebandleni. (Mat. 22:37-39) Khetha isikhathi esihle sokumtjela ngokunikela bona sisekele umsebenzi womBuso ephasini loke.

15. Singamsiza njani umuntu esifunda naye iBhayibheli bona enze okufaneleko nakaqalene nemiraro?

¹⁵ Fundisa umuntu ofunda naye iBhayibheli bona akwazi ukuzivikela nakuvela imiraro. Akhesithi umuntu ofunda naye iBhayibheli ongakabhajadiswa ukutjela ukuthi kunothileko omkhubileko ebandleni. Kunokumtjela ukuthi ngubani otjhaphileko, mhlathululele ukuthi iBhayibheli lithi kufuze enzeni. (Madanisa noMatewu 18:15.) Angakhetha ukumlibalela umfowethu loyo akhohlwe ngendaba le namkha nakangakghoni ukwenza njalo, kufuze ayokukhuluma naye anomnqopho wokubuyisana naye. Msize alungiselele azokutjho. Mtjengise iindlela zokusebenzisa i-JW Library^® Research Guide for Jehovah’s Witnesses, ne-jw.org^® afunde iindlela angazisebenzisa bona alungise ubujamobo. Nakafunda iindlela zokurarulula imiraro ngaphambi kokubhajadiswa, uzokukghona ukuba nobuhlobo obuhle nabanye ebandleni nasele abhajadisiwe.

16. Ngikuphi okuhle ongakufumana ngokumema abanye bona bakhambe nawe nawuyokuraga isifundo?

¹⁶ Mema amanye amalunga webandla nomjikelezi nakakhambele ibandla bona babekhona nawuyokuraga isifundo. Kubayini? Lokhu kungebanga lokuthi abanye abarhuweleli bangakghona ukumsiza ngendlela wena ebengekhe ukghone ukumsiza ngayo. Ngokwesibonelo, akhesithi umuntu ofunda naye ulinge kanengana ukulisa ukubhema kodwana uyabhalelwa. Khamba nomunye ufakazi okhewaqalana nomraro ofanako, mhlamunye naye khewalinga iinkhathi ezinengana kodwana abhalelwa kuwuhlula bona abe nawe esifundweneso. UFakazi lo kungenzeka amsize akghone ukuhlula umukghwa lo. Nawuzizwa ungakatjhaphuluki ukuraga isifundo nomfowethu onokuhlangabezanwe nakho, mbawe bona kube nguye oraga isifundo ngelangelo. Funda endleleni abanye abaraga ngayo isifundo seBhayibheli. Khumbula ukuthi umgomwethu kusiza umuntu esifunda naye bona athuthuke ebuhlotjeni bakhe noJehova.

KGHANI KUFUZE NGILISE UKUFUNDA NAYE IBHAYIBHELI?

17-18. Khuyini ekufuze ucabange ngakho nawuzakuqunta ukulisa ukufunda nomuntu?

¹⁷ Nangabe umuntu ofunda naye akenzi amatjhuguluko, kuzokufuze uzibuze ukuthi, ‘Kghani kufuze ngilise ukufunda naye?’ Ngaphambi kokuthi wenze isiqunto, kuzokufuze ucabange ngomuntu ofunda naye ukuthi mumuntu onjani. Abanye kubathatha isikhathi eside ukwenza amatjhuguluko kunabanye. Yeke, zibuze: ‘Kghani umuntu engifunda naye wenza amatjhuguluko afaneleko ukuya ngobujamo bakhe?’ ‘Sele athomile “ukwenza” nokusebenzisa izinto azifundako?’ (Mat. 28:20) Kuthatha isikhathi bona umuntu abe mfundi weBhayibheli, kodwana kufuze awenze amatjhuguluko lawo.

¹⁸ Khuyini ekufuze siyenze nangabe sifunde nomuntu isikhathi eside kodwana angenzi amatjhuguluko aqakathekileko? Cabanga nganakhu, umuntu ofunda naye iBhayibheli sekaqedile ukufunda incwadi ethi, Okufundiswa yiBhayibheli mhlamunye uqedile nokufunda ethi, Hlala Ethandweni LakaZimu kodwana bekube nje akenzi amatjhuguluko begodu akayi nokuya emihlanganweni yebandla ingasaphathwa yokuya esiKhumbuzweni. Ngezinye iinkhathi ubeka amabanga angazwakaliko wokulisa ukufunda. Ebujamwenobo kuhle ukucoca nomfundi ngokulindeleke kuye.b

19. Ungathini emuntwini ongakuboni ukuqakatheka kokufunda iBhayibheli begodu khuyini ekufuze uyicabangele?

¹⁹ Mhlamunye ungathoma ngokumbuza ukuthi, ‘Bukhona na ubudisi obukwenza angabi nguFakazi kaJehova?’ Angaphendula ngokuthi, ‘Anginakinga ngokufunda iBhayibheli kodwana angeze ngaba nguFakazi kaJehova.’ Nangabe le yindlela aqala ngayo izinto, kghani isesekhona itlhogeko yokuraga nesifundo? Ngakelinye ihlangothi isifundo sakho singakuhlathululela ukuthi kubayini singathuthuki. Ngokwesibonelo, mhlamunye angathi uyasaba ukutjhumayela umuzi nomuzi. Njengombana sewazi bona uzizwa njani, uzokuba sebujamweni obuhle bokumsiza.

20. Ukuzwisisa umtlolo wezEnzo 13:48, kungasisiza njani bona siqunte ukuthi kufuze sirage nokufunda nomuntu namkha silise?

²⁰ Okudanisako kukuthi abanye abantu esifunda nabo iBhayibheli bafana nama-Israyeli wangesikhathi sakaHezekiya. Nakakhuluma noHezekiya uJehova wathi ngama-Israyeli lawo: ‘Qala-ke, kibo unjengengoma enomuzwa nenomkenenezo okhambisana neenara; iye, bayawezwa amezwakho, kodwana abafuni ukwenza okutjhoko.’ (Hez. 33:32) Kungaba budisi ukutjela umuntu ukuthi sizokulisa ukufunda naye. Nanyana kunjalo, “isikhathi esiseleko sinciphile.” (1 Kor. 7:29) Kunokusebenzisa isikhathi esinengi sifunda nabantu abangathuthukiko kufuze sifune abantu “abazimisele ukufumana ukuphila okungapheliko.”—Funda izEnzo 13:48.

21. Sithini isihloko somnyaka ka-2020 begodu kubayini sifaneleka?

²¹ Umtlolo womnyaka ka-2020 uzosisiza sidzimelele ekuthuthukiseni amakghonwethu wokwenza abafundi. Umtlolo lo uveza amanye wamezwi kaJesu awakhuluma emhlanganweni oqakathekileko ebewusentabeni iGalile nakazakuthi: ‘Yeke, khambani niyokwenza abafundi . . . , nibabhabhadise.’—Mat. 28:19.