Kghani Bewazi?

Abosomlando bayiqinisekise njani indima kaBhelitjhatsari weBhabhiloni?

EMINYAKENI eminengi abantu ebebaphikisana neBhaybheli bebathi iKosi uBhelitjhatsari ekukhulunywa ngayo encwadini kaDaniyeli akhenge abekhona. (Dan. 5:1) Bebakukholelwa lokho ngombana bebungekho ubufakazi obutjengisa ukuthi wakhe waphila. Nanyana kunjalo, koke lokho kwatjhuguluka ngomnyaka ka-1854. Kubayini?

Ngomnyaka loyo umzenda weBrithani uJ. G. Taylor wafumana amarubhi wedorobheni le-Ur, namhlanjesi elibizwa ngokuthi yi-Iraq. Lapho bekunombhotjhongo omkhulu, umzenda lo wafumana iinsalela zamaphayiphu ezenziwe ngebumba. Amaphayiphu lawo bewamasenthimitha ali-10 ubude begodu bekatloliwe ngaphakathi. Iphayiphi ngalinye belitlolwe umthandazo othi, kwanga iKosi yeBhabhiloni uNabonidasi nendodanayo ekulu uBhelitjhatsari bangaphila isikhathi eside. Lokho kwenza abaphikisi bavuma ukuthi ubufakazobu butjengisa ukuthi uBhelitjhatsari wakhe waphila.

Nanyana kunjalo, iBhayibheli alivezi ukuthi uBhelitjhatsari waphila kwaphela kodwana litjengisa nokuthi bekayikosi. Nangalokho bebakhona abantu abaphikisako. Ngokwesibonelo, usosayensi uWilliam Talbot watlola ukuthi, “UBhelitjhatsari wabusa ngesikhathi esifanako noyise uNabonidasi. Kodwana asinabo ubufakazi balokho.”

Ukuphikisanokho kwalungiswa, ngesikhathi eminye imitlolo engemaphayiphini iveza ukuthi ubabakaBhelitjhatsari iKosi uNabonidasi bekakude nedorobho leBhabhiloni iminyaka eminengi. Kwenzekani ngesikhathi angekho? I-Encyclopaedia Britannica ithi, “Ngesikhathi uNabonidasi asekudingisweni waphathisa uBhelitjhatsari ubukhosi, wamphathisa nengcenye ekulu yebutho lakhe.” Yeke uBhelitjhatsari waba yikosi yeBhabhiloni ngesikhatheso. Ngikho usomlando osisazi samalimi u Alan Millard athi bekufanele bona “incwadi kaDanyala ibize uBhelitjhatsari ngokuthi ‘yikosi.’”

Iye khona, iinceku zakaZimu, ubufakazi ezibukholelwako ngendaba le, ngobuvela eBhayibhelini ngokwalo ngombana livela kuZimu.—2 Thim. 3:16.