NKHANI YOPHUNZILA 34
NYIMBO 3 Nimwe Mphamvu Zasu, Ciyembekezo Casu na Cidalilo Casu
Mukonkhala Osimikizhya Kuti Yehova Okhululuka
“Mweo mukhululukila zolakwa zangu na macimo ŵangu.” —SAL. 32:5.
ZATI TIPHUNZILE
M’nkhani ino, tiphunzile cifukwa cake tufunika kunkhala osimikizhya kuti Yehova okhululuka na mwamene Baibo yutisimikizhyila kuti Yehova okhululukila ŵala amene alapa.
1-2. Kansi Yehova ocitanji ngati talapa cendi macimo ŵasu? (Onani soti cithunzithunzi pacikuto.)
MFUMU Davide enzoziŵa mwaakumvwila munthu ngati oziimba mlandu cifukwa ca macimo yecicita kuvuli. (Sal. 40:12; 51:3, tumau twa palulu) Zili teti cifukwa cakuti pa nthawi iyakine mu umoyo wake, ecitako macimo akulu-akulu. Olo n’tetyo, elapa mofumila pansi pa mtima ndipo Yehova emukhululukila. (2 Sam. 12:13) Cifukwa ca izi, Davide enzoziŵa soti mwaakumvwila munthu ngati Yehova wamukhululukila.—Sal. 32:1.
2 Molingana na Davide, nase tingasangalale na mtendele wamene uwela cifukwa cooneshewa cifundo na Yehova. Ngati tacita cimo ikulu, tingatonthozewe poziŵa kuti Yehova angatikhululukile ngati talapa cendi, kusenga kuti atikhululukile, kuulula kwa akulu nocita zilizonse zatingakwanishe kuti tisakawezhyepo soti cimo yetecita. (Miy. 28:13; Mac. 26:20; 1 Yoh. 1:9) N’zosangalasa ngako kuziŵa kuti ngati Yehova watikhululukila macimo ŵasu, akatiimbe lini soti mlandu olo kutipasa cilango.—Ezek. 33:16.
Mfumu Davide eimba nyimbo zinyinji zamene zufotokoza mwakukhululukila Yehova (Onani ndime 1-2)
3-4. Kansi kalongosi muyakine enzokaikila cinji pavuli pakuti wabatizika, ndipo tilaŵizhyane cinji m’nkhani ino?
3 Koma nthawi ziyakine, ayakine ociona kunkhala covuta kusimikizhyila kuti Yehova okhululuka. Ganizilani cokumana naco ca kalongosi Jennifer, wamene ekulila m’banja ya Mboni. Monga wacilumbwana, yove eyamba kucita vinthu viipa ndipo enze na umoyo wapaŵili. Vyaka vinyinji pavuli pake, eleka kucita vinthu viipa ndipo eyenelela kubatizika. Yove elaŵila kuti: “Kale nenzokonda ngako kucita ciwelewele, kumwa ngako walwa, kukalipa kamangu ndipo nenzoona kuti kusakila ndalama niye cinthu cofunika ngako mu umoyo wangu. Nenzoziŵa kuti Baibo yulaŵila kuti cifukwa ca nsembe ya Khristu, Yehova angatikhululukile macimo ŵasu. Koma olo kuti nelapa nosenga Yehova kuti anikhululukile, nenzokaikila mphela kuti enikhululukila cendi.”
4 Kansi nthawi ziyakine muvutika kusimikizhyila kuti Yehova ekukhululukilani zinthu zemwelakwisa kuvuli? Mwa cifundo cake, Yehova ofuna kuti tikozimvwa kuti nise otetezeka monga ni mwecimvwila Davide. Tetyo m‘nkhani ino, tilaŵizhyane cifukwa cake tufunika kunkhala osimikizhya kuti Yehova okhululuka.
NDAŴA YANJI TUFUNIKA KUNKHALA OSIMIKIZHYA KUTI YEHOVA OKHULULUKA?
5. Kansi Satana ofuna kuti tikokhulupilila cinji? Fotokozani cisanzo.
5 Ngati tukhulupilila cendi kuti Yehova otikonda na kuti okhululuka, tikokhulupilila lini wenye wa Satana. Kumbukilani kuti Satana angacite ciliconse kuti atikangishe kutumikila Yehova. Kuti akwanilishe colinga cake, angayese kutipangisha kukhulupilila kuti macimo ŵasu angakhululukiwe lini. Ganizilani cisanzo ca munalume wa ku Korinto wamene enze ecosewa mu mpingo cifukwa cocita ciwelewele. (1 Akor. 5:1, 5, 13) M’kuluta kwa nthawi, yove elapa. Koma Satana enzofuna kuti Akhristu a mu mpingo uyu, akane kumukhululukila nomulandila. Kuti Akhristu aŵa enze ekana kumukhululukila, sembe munalume uyu eganiza kuti Yehova angamukhululukile lini. Ndipo izi sembe zemupangisha kuti akhumudwe noleka kutumikila Yehova. Satana aliyocinje zolinga zake. Koma ubwino wake ni wakuti seo “tuziŵa bwino viwembu vake.”—2 Akor. 2:5-11.
6. Kansi tingacitenji kuti tileke kuziimba mlandu pavuli pakuti talapa?
6 Ngati tukhulupilila cendi kuti Yehova otikhululukila, tingaleke kuziimba mlandu. Mwacibadwa, tikacimwa tuziimba mlandu. (Sal. 51:17) Kucita izi, n’kofunika. Talaŵila teti cifukwa cakuti cikumbumtima casu cingatisonkhezele kutola masitepu oyenelela noongolela nkhalidwe yasu. (2 Akor. 7:10, 11) Olo n’tetyo, ngati tupitilizhya kuziimba mlandu pavuli pakuti talapa, tingafoke. Koma ngati tukhulupilila kuti Yehova watikhululukila cendi, tingaleke kuziimba mlandu. Kuyangizhyila apo, tingapitilizhye kumutumikila tili na cidalilo cakuti yove okondwela nase. Izi niye zakufuna Yehova kuli seo. (Akol. 1:10, 11; 2 Tim. 1:3) Lomba kansi n’cinji cingatiyavye kusimikizhyila kuti Mulungu angatikhululukile?
KANSI N’CINJI CINGATIYAVYE KUSIMIKIZHYILA KUTI YEHOVA OKHULULUKA?
7-8. Kansi Yehova emuuzhya cinji Mose zokhuza yove, ndipo izi zutisimikizhyila cinji? (Ekisodo 34:6, 7)
7 Mukoganizila zinthu zecilaŵila Yehova zokhuza yove. Mwacisanzo, ganizilani zeciuzhya Mose pa Lupili ya Sinai.a (Ŵelengani Ekisodo 34:6, 7.) Olo kuti Yehova ali na minkhalidwe inyinji yabwino, esankha kuuzhya Mose kuti yove ni “Mulungu wacifundo koma soti muweme mtima.” Ngati Mulungu ali na minkhalidwe yabwino teti, kansi angakangiwe kukhululukila mtumiki wake wamene walapa macimo ŵake? Yai. Ngati zingankhale tetyo, niye kuti yove ni Mulungu aliye cifundo koma soti wosakhululuka, zamene ni mbali lini ya minkhalidwe yake.
8 Tingankhale osimikizhya kuti Yehova angatale lini wenye cifukwa yove ni Mulungu wacilungamo. (Sal. 31:5) Tetyo, tingakhulupilile mau ŵake. Ngati muona kuti n’covuta kuleka kuziimba mlandu cifukwa ca zinthu zemwelakwisa, mukozikonsha kuti: “Kansi nukhulupilila cendi kuti Yehova ni wacifundo koma soti muweme mtima na kuti angaleke lini kukhululukila munthu aliyense wamene walapa? Ngati nukhulupilila, kansi nufunika lini kunkhala wosimikizhya kuti Yehova enikhululukila?”
9. Kansi kukhululukila kutanthauza cinji? (Salimo 32:5)
9 Mukoganizila pa zinthu zakutiuzhya Yehova kupitila m’Baibo zokhuza mwaakutikhululukila. Ganizilani mwamene Davide efotokozela cikhululukilo ca Yehova. (Ŵelengani Salimo 32:5.) Yove elaŵila kuti: “Mweo mwenikhululukila zolakwa zangu na macimo ŵangu.” Mau Aciheberi akuti “kukhululukila,” angatanthauze “kunyamula” cinthu ciyakine “nocitwala” kutali. Tetyo Yehova pecikhululukila Davide, zenze monga kuti yove wanyamula macimo yake noyatwala kutali. Cifukwa ca izi, Davide enkhala na mtendele wa mumtima ndipo eleka kuziimba mlandu. (Sal. 32:2-4) Nase tingankhale na mtendele wa mumtima pavuli pakuti takhululukiwa. Ngati talapa macimo ŵasu, tufunika lini kupitilizhya kuziimba mlandu cifukwa cakuti Yehova otikhululukila macimo yasu noyatwala kutali na seo.
10-11. Kansi Salimo 86:5 yutiuzhyanji zokhuza Yehova pa nkhani yokhululukila?
10 Ŵelengani Salimo 86:5. Davide elaŵila kuti Yehova ni “wokonzeka kukhululuka.” Izi zutanthauza kuti Yehova okalipa lini kamangu ngati talakwisa zinthu. Ndipo nthawi zonse ni wokonzeka kukhululukila ŵala amene alapa. Ndaŵa yanji yove ali teti? Lemba iyi yupitilizhya kuti: “Muonesha cikondi cokhulupilika cikulu kwa onse amene oita mweo.” M’nkhani yapita, tephunzila kuti Yehova oonesha cikondi cokhulupilika kuli ŵala amene omukonda na kuti yove angaŵasiye lini. Cifukwa cosonkhezelewa na cikondi cokhulupilika, yove ‘okhululukila na mtima wonse’ ŵala amene alapa. (Yes. 55:7) Ngati muvutika kusimikizhyila kuti Mulungu okhululukila cendi, mungazikonshe kuti: “Kansi nukhulupilila kuti Yehova ni wokonzeka kukhululukila ŵala onse amene alapa na ŵala amene osenga cifundo cake? Ngati nukhulupilila, ningankhale wosimikizhya kuti enikhululukila penemusenga kuti anioneshe cifundo cake.”
11 Tingatonthozewe kuziŵa kuti Yehova omvwisha kuti nise ocimwa. (Sal. 139:1, 2) Lomba, tiyeni tione zecilaŵila Davide mu Salimo iyakine na mwazingatiyavyile kunkhala osimikizhya kuti Yehova ni wokonzeka kutikhululukila.
KANSI YEHOVA OKUMBUKILA CINJI COKHUZA SEO?
12-13. Molingana na Salimo 103:14, kansi Yehova okumbukila cinji zokhuza seo, ndipo izi zumusonkhezela kucita cinji?
12 Ŵelengani Salimo 103:14. Ponena za Yehova, Davide elaŵila kuti “okumbukila kuti nise lito.” Na mau aya, yove efotokoza cinthu cimozi camene cuonesha cifukwa cake Yehova ni wokonzeka kukhululukila atumiki ŵake olapa. Yove okumbukila kuti tiliye ungwilo. Kuti timvwishe mfundo iyi, tiyeni tilaŵizhyane mau yecilaŵila Davide.
13 Davide elaŵila kuti Yehova “oziŵa bwino mwecitilengela.” Yove elenga Adamu “kufumila ku lito.” Tetyo, oziŵa bwino mwecipangila ŵanthu. Mwacisanzo, yove oziŵa kuti ŵanthu ofunika kulya, kulala na kufuza. (Gen. 2:7) Cifukwa cakuti Adamu na Eva ecimwa, tuvyalika tiliye ungwilo ndipo tulimbana na kusoŵa ungwilo uku. Monga mbadwa zake, nase tetolelako ucimo ndipo izi zuticitisha kuti tikocita vinthu viipa. Yehova oziŵa lini tyala kuti nise ocimwa, koma “okumbukila” soti monga ni mwecilaŵilila Davide. Cifukwa cakuti Yehova oziŵa kuti nise ocimwa, yove ocita nase zinthu mwacifundo. Tetyo tingalaŵile kuti mau a Davide otanthauza kuti: Yehova omvwisha kuti nthawi ziyakine tingalakwise zinthu. Ndipo ngati talakwisa, yove osonkhezelewa kutionesha cifundo mwa kutikhululukila ngati talapa.—Sal. 78:38, 39.
14. (a) Kansi Davide elaŵila cinji zokhuza mwaakukhululukila Yehova? (Salimo 103:12) (b) Kansi tingaphunzilepo cinji tikaona mwamene Yehova ekhululukila Davide? (Onani kabokosi kakuti “Mwaakutikhululukila Yehova.”)
14 Kansi n’cinji ciyakine cingatiyavye kukhulupilila kuti Yehova otikhululukila cendi? (Ŵelengani Salimo 103:12.) Davide elaŵila kuti ngati Yehova watikhululukila, oika macimo ŵasu kutali “monga ni mwamene kofumila zuŵa [kummawa] kulili kutali na koloŵela zuŵa [kumcingulo].” N’cendi kuti kummawa ni kutali na kumcingulo ndipo mbali ziŵili izi zingakumane lini. Izi zutanthauza kuti ngati Yehova watikhululukila macimo ŵasu, zunkhala monga kuti wayatwala kutali ngako na seo. Yove oyatwala kutali ngako na seo cakuti paliye ciliconse cingamupangishe kuyakumbukila olo kutipasa cilango.—Ezek. 18:21, 22; Mac. 3:19.
15. Kansi tingacitenji ngati tupitilizhya kuziimba mlandu cifukwa ca zinthu zetelakwisa kuvuli?
15 Kansi mau a Davide opezeka mu Salimo 103 angatiyavye tyani kusimikizhyila kuti Yehova okhululuka? Ngati mupitilizhya kuziimba mlandu cifukwa ca macimo yemwecita kuvuli, mukoganizila mwaakumvwila Yehova. Yove okumbukila kuti muliye ungwilo. Kuyangizhyila apo, okhululukila ŵala amene akumvwa cisoni cifukwa ca zinthu zecilakwisa nolapa. Tetyo, mukokumbukila kuti ngati Yehova wasankha kukukhululukilani, okumbukila lini zemwelakwisa olo kukuimbani mlandu pa zinthu zakuti ekukhululukilani kale. Yove oika lini maganizo ŵake pa zinthu zetelakwisa kuvuli, ndipo nase tufunika kucita cimozimozi. (Sal. 130:3) Ngati tukhulupilila kuti Yehova otikhululukila cendi, tingaleke kuziimba mlandu nopitilizhya kumutumikila mwacimwemwe.
16. Fotokozani cisanzo coonesha ngozi ingankhalepo ngati tuika maganizo ŵasu pa zinthu zetelakwisa kuvuli. (Onani soti cithunzithunzi.)
16 Ganizilani cisanzo ici. Kupitilizhya kuziimba mlandu cifukwa ca zinthu zetelakwisa kuvuli tingakulinganizhye na kuyendesha motoka uku tulolesha pa cilola cunkhala m’motoka camene cingatiyavye kuziŵa zucitika kuvuli. N’cendi kuti kucita izi n’kwabwino cifukwa kungatiyavye kupewa ngozi. Olo n’tetyo, tufunika lini kucita izi mowelezhyawelezhya. M’malo mwake, tufunika kuika ngako maganizo ŵasu kusogolo, zamene zingatiyavye kuti tinkhale otetezeka. Molingana na izi, n’cendi kuti kuganizila zinthu zetelakwisa kuvuli kungatiyavye kuti tiphunzilepo kanthu na kuti tisakawezhyepo soti. Koma ngati tupitilizhya kuika ngako maganizo ŵasu pa zinthu zamene izo, niye kuti tipitilizhye kuziimba mlandu ndipo zingapangishe kuti tileke kutumikila Mulungu. Tetyo, tiyeni tipitilizhye kuika maganizo ŵasu pa kutumikila Yehova koma soti kuganizila malonjezo a msogolo pamene “zinthu zakale zikakumbukiliwe lini soti.”—Yes. 65:17; Miy. 4:25.
Monga ni mwamene dilaiva ofunikila kuika maganizo ŵake kusogolo m’malo mololesha ngako pa galasi yuyavya kuona zucitika kuvuli, tufunika kuika ngako maganizo ŵasu pa madaliso yati tikalandile msogolo m’malo moika maganizo ŵasu pa zinthu zetelakwisa kuvuli (Onani ndime 16)
PITILIZHYANI KUNKHALA OSIMIKIZHYA KUTI YEHOVA OKUKONDANI NDIPO NI WOKONZEKA KUKUKHULULUKILANI NTHAWI ZONSE
17. Ndaŵa yanji tufunika kupitilizhya kunkhala osimikizhya kuti Yehova otikonda na kuti ni wokonzeka kutikhululukila nthawi zonse?
17 Tufunika kupitilizhya kunkhala osimikizhya kuti Yehova otikonda na kuti otikhululukila. (1 Yoh. 3:19) Ndaŵa yanji? N’cifukwa cakuti Satana apitilizhye kutipangisha kukhulupilila kuti nise ocimwa ngako cakuti Yehova angatikonde lini olo kutikhululukila. Masilizhyilo payovwendela pafupi, yove ayeseyese mwamphamvu kucita izi cifukwa oziŵa kuti wasala tyala na kanthawi katontho. (Chiv. 12:12) Olo n’tetyo, tufunika kupitilizhya kulimbana naye nopitilizhya kutumikila Yehova mokhulupilika.
18. Kansi tingacitenji kuti tinkhale osimikizhya kuti Yehova otikonda na kuti ni wokonzeka kutikhululukila nthawi zonse?
18 Kuti mutang’ishe cidalilo canu pa Yehova, yesani kucita zetelaŵizhyana m’nkhani yapita. M’nkhani ino, taphunzila mwatingankhalile osimikizhyila kuti Yehova okhululuka. Kuti musimikizhyile kuti Yehova okukhululukilani cendi, mukokumbukila mwamene yove ezifotokozela yeka. Kuyangizhyila apo, mukopatula nthawi yoganizila mwamene Baibo yufotokozela mwakutikhululukila Yehova. Mukokumbukila soti kuti yove oziŵa kuti tiliye ungwilo ndipo nthawi zonse akocita nase zinthu mwacifundo. Ndipo yove akakhululuka, okhululuka na mtima wonse. Tikacita izi, tinkhale na cidalilo monga ni ceenze naco Davide cokhuza cifundo ca Yehova, ndipo tingalaŵile kuti zikomo Yehova ponikhululukila “zolakwa zangu na macimo ŵangu.”—Sal. 32:5.
NYIMBO 1 Minkhalidwe ya Yehova
a Onani nkhani ya mutu wakuti “Yandikilani Mulungu—Yehova Anafotokoza Makhalidwe Ake” mu Nsanja ya Mulonda ya m’Chichewa ya May 1, 2009.