Bayahludi

16 Ka nako ye nngwana Samsoni o yye Ghaza ke mokane a bona mosadi ye mongwana wa go rekisa mmele gana hone, a ya gage. 2 Ba botsa Maghaza gore: “Samsoni o segele howa.” Ke mokane ba mo dukulugela mo ne a dula gona, fote ba dula gana hone bošego ka moka ku gheyiting ya mutši gore ba mo hlasele. Ba kgomolela bošego ka moka, ba tipotsa gore: “Mo letšatši le hlaba, re nyoko mmolaya.”

3 Mara Samsoni o f’lo ya mahlong a yetsele gana hone go segela gare ga bošego. Ke mokane a tsoga gare ga bošego a ntshanya digheyiti tsa mutši, dikholomo tsa gona ka dipedi le sa go khiya ka sona. A di beya ho magetleng ke mokane a di rwala a ya natso gedimo ga thaba ya gore yi libanne le Hebhrone.

4 Ka nthago ga hone, a kwana ka matla le mosadi wa ku Moyeding wa Soreke wa gore lebitso lage ke Delayila.+ 5 Byalo, ba go lawola Mafilisita ba ya gage ba re: “Mo hlalefetse+ gore o thogo tšiba gore king so se mo neyang matšhika le gore re ka maka byang gore re kgone go mo tlema, re mo hlule. Mo o ka maka ka mokgonone, ye mongwana le ye mongwana wa rune o nyoko go neya 1 100 ya ditšheleta tsa silva.”

6 Ka nthago, Delayila a re ga Samsoni: “Ke kgopela o mpotse gore matšhika yago ma tšwa kaye. Motho a ka maka byang gore a go tleme a thogo go hlula.” 7 Samsoni a re gage: “Mo ba ka ntlemelela ka dithapo kašupa ya tsona tsa gore a baa di womisa, tsotsone di nyoko maka gore ke lelemele go tshwana le banna ba bangwana.” 8 Byalo, ba go lawola ba Mafilisita ba neya Delayila kašupa ya dithapo tsa gore a baa di womisa ke mokane yene a mo tlema ka tsona. 9 Byalo ba wutama ga kamara ya ka ku teng, ke mokane Delayila yene a bitsa Samsoni a re: “Mafilisita ke yawa maa go hlasela Samsoni!” Ka nako yonone, a thasolanya dithapo tsela kašupa ya tsona, a di thasola lula nkare o thasola thapo ya gore ba yi lugiye gabedi ya gore yi fo tologa mo yi kwa mollo.+ A go na ye a yyeng a tšiba sephiri sa gore matšhika yage ma tšwa kaye.

10 Byalo, Delayila a re ga Samsoni: “Wene o mmakiye sephokophoko, o mputsiye matsaka. Barena mpotse, motho a ka go tlema ka ying?” 11 Ke mokane yene a re gage: “Mo ba ka ntlema ka dithapo tsa nyuwane tsa gore a di soko berekisiwa, tsotsone di nyoko maka gore ke lelemele ke tshwane le banna ba bangwana.” 12 Byalo Delayila a tseya dithapo tsa nyuwane a mo tlema ka tsona, a yahlamela a re: “Mafilisita ke yawa ma go hlasela Samsoni!” (Le ka nako yowa fote, Mafilisita ke mo ma wutamme ka ku ntlong ya Delayila.) Ka nako yonone, a thasolanya dithapo tso ne ba mo tlemme ka tsona nkare go ro ba digare.+

13 Ka nthago, Delayila a re ga Samsoni: “Le gana byalo lowa o sa na o mmakiye sephokophoko, o mputsiye matsaka.+ Mpotse gore motho a ka go tlema ka ying.” Ke mokane Samsoni a re ga Delayila: “O ka rokelela kašupa ya melogo yaka ka wulu.” 14 Ke mokane mosadi yewa a tlemelela moriri wa Samsoni sephataneng, a mo yahlamela a re: “Samsoni, Mafilisita ke yanane!” Ke mokane Samsoni a tsoga, a hlomolanya sephatane sela a boya a thasolanya le wulu yo ne ba yi rokelele ga sona.

15 Byalo Delayila a re ga Samsoni: “Ke ntaba o re, ‘Ke ya go nyaka,’+ mara o sa ntshepe? O mmakiye sephokophoko gararo fote a wa mpotsa gore matšhika yago ma tšwa kaye.”+ 16 Ka taba la gore ke mo a mo llela ka moka matšatši fote a mo gapeletsa, Samsoni a tinega ka matla.+ 17 Byalo mafelelong a mmotsa nnete, a re gage: “Ho hlogong yaka a go soko feta legare, ka taba la gore nna ke nna Lenazari la Modimo go tlugisela ke belegiwa.*+ Mo nka kupa moriri waka, matšhika yaka ma nyoko tloga ho gaka fote ke nyoko lelemela ka tshwana le banna ba bangwana ka mokana ga bona.”

18 Mo Delayila a di bona gore o mmutsiye nnete, a napa a bitsa ba go lawola Mafilisita+ a re: “Gana byalo tlanneng, ka gore o mputsiye nnete.” Byalo ba go lawola Mafilisita ba ya gage, ba tla ba na le tšheleta yela. 19 A mo yetsedisa ho diropeng tsage; a bitsa ye mongwana gore ba tle ba mo hlube melogo ya ho hlogong yage kašupa ya yona. Ka nthago a thomisa go mo lawola, ka taba la gore matšhika ke mo ma tloga ho gage. 20 Byalo Delayila a yahlamela a re: “Mafilisita ke yawa ma tl’le go hlaseleng Samsoni!” ke mokane yene a tsoga a re: “Ke nyoko tiphonisa go tshwana le mathomisong.”+ Mara ke mo a sa di tšibi gore Jehova aa sa le naye. 21 Byalo, Mafilisita ma mo tshwara ma mo gonya maahlo yage. Ba mo yisa Ghaza, ba mo tlema ka diketane ka dipedi tsa koporo, ke mokane a bereka mmereko wa go šila mabele ku jele. 22 Byalo moriri wage wa thomisa go gola fote ka nthago ga gore ba mo hlube.+

23 Ba go lawola Mafilisita ba kgobakana gore ba makele modimo wa bona Daghone+ dihlabelo tsa go tlala le go maka monyanya, ka taba la gore ke mo ba re: “Byalo modimo wa rune o re neyye lenaba la rune Samsoni gore re mo hlule!” 24 Mo batho ba mmona ba thanaka modimo wa bona ba re: “Mara modimo wa rune o makiye gore re hlule lenaba la rune, la gore le sinyannye naga ya rune+ la boya la bolaya batho ba rune ba go tlala.”+

25 Ka taba la gore ne ba jabodiye, ba re: “Botsaneng Samsoni gore a tle a re ntshe bodutu.” Byalo ba ntsha Samsoni ku jele gore a tle a ba ntshe bodutu; ba maka gore a yeme segare ga dikholomo. 26 Byalo Samsoni a botsa sešomanyana sa gore ke mo se mo tshwere ka letsogo a re: “Ke kgopela o ntshwarise dikholomo tsa go thega ntlo yowa gore ke thogo tithega ka tsona.” 27 (Di f’lo makega gore mone ntlong go be go tlele banna le basadi. Ba go lawola Mafilisita ka mokana ga bona ke mo ba le gona gana hone, fote ho gedimo ga ntlo ke mo go na le gana hala ga 3 000 ya banna le basadi ba gore ke mo ba lebelele Samsoni mo a ba ntsha bodutu.)

28 Byalo Samsoni+ a llela Jehova a re: “Wene Jehova Morena wa Malenghelengheng, n’gopole barena, ntiyise barena+ la mafelelo wene Modimo, gore ke patedise ga Mafilisita ka taba la le lengwana la maahlo yaka ya ba ma gonnyeng.”+

29 Byalo Samsoni a yema gare ga dikholomo ka dipedi tsa gore di thegiye ntlo, a tithega ka tsona, ka letsogo la go ja a tshwara kholomo ka yyoši ke mokane ka letsogo la sepata a tshwara kholomo ye nngwana. 30 Samsoni a yahlamela a re: “Ntisetse ke kgwe le Mafilisita!” Ke mokane a tšhofa ntlo yela ka matšhika yage ka moka, ya wela ba go lawola Mafilisita le batho ka mokana ga bona bo ne ba le ka hone teng.+ Byalo, bo a ba bolayyeng ka nako yonone mo a kgwa ke mo ba feta bo a ba bolayyeng nakwela a sa phela.+

31 Ka nthago, bobhuti bage le ba mutši wage ka moka ba ya gore ba ye tseya setopo sage. Ba sipidiye naye, ba segela ba mmoloka ga naga ya gore yi gare ga Zora+ le Ešitawole ku lebitleng la papage Manowa.+ O fetsiye 20 ya mengwaga a yahlula Israyele.+