Tsa go ya ga Maroma

1 Lengwalo lowa le tšwa gaka, nna Pawulo lelata la Kreste Jeso. Ba nhlawodiye gore ke be lepostola fote ke tšhomayele ditaba tsa go bafala tsa Modimo.+ 2 Ke botala Modimo a tshepisiye ditaba tsowa tsa go bafala ka Mangwalong ya go hlawolega a berekisa baporofeta. 3 Ditaba tsone di bolabola ka Morwayi wage wa gore ke mo go le setlogolwane sa Dafita.+ 4 Di fo ba lekgwaying gore ke Morwayi wa Modimo+ ka taba la gore Modimo o berekisiye moya wage wa go hlawolega gore a mo tsose ga bo ba kgwileng,+ yenene ke Morena wa rune Jeso Kreste. 5 Modimo o šupetsiye gore o re kwela go baba ka yene. Jeso o nkgetiye gore ke be lepostola,+ gore ke thogo gelepa batho ba ditšhaba+ gore ba dumele gage le go hlompa lebitso lage. 6 Le lune ba le hlawodiye ditšhabeng gore le thogo latelela Jeso Kreste. 7 Lengwalo lowa le ya ga batho ba Roma, ba gore Modimo o kwana nabo, fote o re ke ba go hlawolega, le re:

Nkare Modimo Papa wa rune le Morena Jeso Kreste ba ka le kwela go baba fote ba maka gore le bebe.

8 Sa mathomo, ke berekisa lebitso la Jeso Kreste mo ke leboga Modimo ka taba la lune ka mokana ga lune, ka gore batho lefaseng ka mokana ga lona ba bolabola ka tumelo ya lune. 9 Ke berekela Modimo ka pelo yaka ka moka mo ke tšhomayela ditaba tsa go bafala ka Morwayi wage, fote Modimo wa di tšiba gore ke fo dula ke le gopola dithapelong tsaka mo ke rapela,+ 10 ke mo kgopela gore mo go thulega lešuba ke tle hone ga lune, mo yene a nyakiye. 11 Ka gore ke hlologele go le bona, gore ke thogo le botsa dilo tsa gore di nyoko tiyisa senghana sa lune le Modimo; 12 kela kere re thogo tiyisana+ ka so re se dumelang.

13 Magageru ke nyaka le di tšibe gore ke botala ke nyaka go tla mone ga lune, mara ne ke sa kgone go tl’le tšhutisa batho mone gore go be malata, go fo tshwana le mo ke makiye ga ditšhaba tse dingwana. Mara mo ke re ke ya tla, go fo ba le se sengwana sa go nthibelela. 14 Ditaba tsowa tsa go bafala ke di kolota Magerika le ba gore ba tšwa ba sepela,* ba go hlalefa le ba gore ke diphokophoko; 15 fote ke tikemisele go di sabalatsa le mone Roma.+ 16 Ditaba tsowa tsa go bafala a di ntšebisi.+ Gabutšibutši Modimo o berekisa tsona gore a thogo phonisa ye mongwana le ye mongwana wa gore o dumela gage,+ go thomisa ka Majuda+ le Magerika.+ 17 Bowa ba gore ba na le tumelo baa di bona gore Modimo o lukiye fote tsotsone di tiyisa tumelo ya bona+ go ya ka mokgo mangwalo ma hlayyeng gore: “Mara wa go loka o nyoko phela ka taba la gore o na le tumelo.”+

18 Modimo o šupetsa gore o kwatiye ka matla+ a le ku legedimong, o kwatisa ke batho ka mokana ga bona ba gore a ba mo theetsele ba gore ba maka dilo tsa go sa loka, ka gore ba maka gore nnete+ yi sa tšibege. 19 Ka taba la gore Modimo o makiye dilo tsa go šupetsa gore ba mo tšibe fote o makiye gore dilo tsone di be lekgwaying ga batho bowa.+ 20 Ka gore le mo Modimo a sa bonale, go tlugisela ka nako yo a makiyeng lefase go ya mahlong batho ke mo ba kgona go tšiba+ gore o na le matšhika ya magolo+ le gore ka nnete ke Modimo+ ka gore ba bona tso a di makiyeng byalo a ba na so ba ka phemang ka sona. 21 Le mo ba kene ba tšiba Modimo, a baa mo thanaka ka mokgo ba tshwaneleng go mo thanaka ka gona.+ 22 Bona beng ne ba tseya nkare ba hlalefiye, anthe ke diphokophoko. 23 Hala ba tshwanele gore ba thanake Modimo wa gore aa kgwe, bona ba tshwere ya bona ya go thanaka dithombhe tsa go maka ke batho ba gore baa kgwa, le dithombhe tsa go tshwana le dinonyane le diphoolwane tsa go ba le kanne ya mawoto, le tse dingwana tsa go phela tsa go tshwana le dinoga le bomampelekuše.+

24 Byalo, Modimo o ba dumelele gore ba make dilo tso ba di nabelang tsa go kekema, le go maka tsa go tšebisa ka mmele wa bona. 25 Ba tšhentšhiye nnete ya Modimo ba yi maka matsaka, fote ba rapela* dilo tsa gore o di makiye, ba lisetsa go rapela yene wa gore o tshwanele a thanakiwe go ya go yye. Amene. 26 Ke tsona di makiyeng gore Modimo a ba lisetse ba nabele go maka tsa ka mapaying tsa go tšebisa,+ ka taba la gore le basadi ba bona ba titšhentšhiye, ba maka dilo tsa gore a baa makediwa tsona tsa go phigisana le hlago.+ 27 Banna le bona a ba sa yetsela le basadi ka taba la gore baa nabelana bonabeng, ba maka dilo tsa go silikisa le banna ba bangwana,+ baa tisinyela* ka bo bona beng.+

28 Ka gore a baa yisa felo ka Modimo,* o ba lisetsiye gore ba nagane ka mokgo ba naganang le go maka dilo tsa gore a di ya tlwayelega.+ 29 Ba kwana ka matla le dilo ka mokana ga tsona tsa go sa loka,+ tsa go tshosa fote ba na le dipawo,+ baa sinya, ba na le mona,+ baa bolaya,+ ba kwana le dintwa, ba kwana le matsaka,+ ba kwisa ba bangwana go baba,+ baa sebana, 30 baa rekisana,+ ba hloyye Modimo, baa dhelela, ba na le magetla, baa kganya, ba polanelana dilo tsa go sa loka, a ba theetsele babelegi ba bona,+ 31 a ba kwisisi,+ ba fo tshepisa selo mara ba sa se make, a ba šupetsi ba bangwana gore baa ba nyaka fote ba na le lešidi. 32 Le mo ba di tšiba gabutši gore Modimo o re bo ba makang dilo tsa mošaga wonone ba nyoko kgwa,+ mara ba fo ya mahlong ba di maka fote ba jabola ka matla mo ba bona batho ba bangwana ba di maka.