-
Dipsalme 22:mongwalo wa ka godimo-31Beibele ya Phetolelo ya Lefase le Leswa
-
-
Ditaelo tšeo di yago go mohlahli. Diriša modumo wa koša yeo e rego: “Kgama e Tshadi ka Masa.”* Koša ya Dafida.
22 Modimo wa ka, Modimo wa ka, ke ka baka la’ng o ntahlile?
Ke ka baka la’ng o sa tle go mphološa?
Ke ka baka la’ng o sa nkwe ge ke lla ke le mathateng?
2 Wena Modimo wa ka, ke dula ke go bitša bošego le mosegare, eupša ga o nkarabe.
Ke dula ke go bitša bošego ka moka moo ke palelwago ke go homola.
3 Eupša o yo mokgethwa,
O gare ga Baisiraele bao ba dulago ba go reta.
4 Botatago rena ba be ba go tshepa.
Ka ge ba be ba go tshepa, o ile wa ba phološa.
5 Ba go lletše gomme wa ba phološa.
Ba be ba tshepile wena gomme ga se wa ka wa ba nyamiša.
6 Eupša ge e le nna, batho ba a nnyatša e bile ba a nkwera
Tše e kego ke nna seboko e sego motho.
7 Batho ka moka ba a nkwera ge ba mpona,
Ba šikinya dihlogo tša bona ba swere mahlaa ba re:
8 “O ithekgile ka Jehofa. A a mo thuše!
A a mo phološe ge e ba a mo rata kudu!”
9 Wena o nntšhitšego ka popelong ya mma,
Ke Wena o ilego wa dira gore ke dule ke šireletšegile ge mma a be a sa nnyantšha.
10 O ntlhokometše go tloga ke sa tšwa go belegwa.
O bile Modimo wa ka go tloga ge ke sa le ka popelong ya mma.
11 O se ke wa ba kgole le nna ka gobane mathata a kgauswi,
E bile ga go motho yo a ka nthušago.
12 Ke dikaneditšwe ke manaba a mantšhi
Tše e kego ke dikaneditšwe ke dipoo tše matla tšeo di tšwago nageng ya Bashani.
13 A nkgalefetše
Go swana le tau e rorago yeo e rathaganyago phoofolo.
14 Ke feletšwe ke matla, ke swana le meetse a ditšhila ao a tšholotšwego,
Marapo a ka ka moka a arogane.
Pelo ya ka e swana le mamapo ao a fišago.
E tologela ka teng ga ka.
15 Ga ke sa na matla, ke swana le karolwana ya sebjana sa go pšhatlega seo se dirilwego ka letsopa.
Leleme la ka le kgomaretše marinini a ka.
O nkišitše moleteng gore ke hwe.
16 Manaba a ka a ntikologile okare ke dikologilwe ke dimpša.
Ke dikologilwe ke sehlopha sa badiradibe.
Ba loma diatla tša ka le dinao tša ka go etša tau.
17 Marapo a ka ka moka a molaleng.
Manaba a ka a ntebeletše e bile a ntomoletše mahlo.
19 Eupša wena Jehofa, o se ke wa ba kgole le nna.
Ke wena o mphago matla, ke kgopela o nthuše ka pela.
20 Ke kgopela o mphološe, o se ke wa dumelela manaba a ka a mpolaya ka tšhoša,
O phološe bophelo bja ka go dimpša tšeo di ntlhaselago.
21 Mphološe molomong wa tau le go manaka a dipoo tša naga.*
Ke kgopela o nkarabe o be o mphološe.
22 Ke tla tsebatša leina la gago go banabešo.
Ke tla go tumiša gare ga phuthego.
23 Lena bao le boifago Jehofa, mo hlompheng ka mo go tseneletšego!
Lena ditlogolo tša Jakobo ka moka, mo tumišeng!
Lena ditlogolo tša Isiraele ka moka, emang gomme le bontšheng gore le a mo hlompha.
24 Ga se a hlokomologa mohlaki ka gobane a tlaišega,
E bile ga se a mo furalela.
Le gona, o ile a mo kwa ge a be a llela gore a mo thuše.
25 Ke tla go tumiša gare ga phuthego e kgolo ya bahlanka ba gago.
Ke tla dira seo ke se ennego ke le pele ga bao ba go boifago.
26 Batho ba boleta ba tla ja ba khora.
Batho ba tla tsoma Jehofa gomme ba mo tumiša.
Anke le thabele bophelo go ya go ile.
27 Batho bao ba tšwago lefaseng ka moka ba tla gopola Jehofa gomme ba ya go yena.
Batho ba meloko ka moka ba tla khunama pele ga gagwe.
28 Ka gobane Jehofa ke kgoši,
Gomme o buša ditšhaba ka moka.
29 Bahumi ka moka ba lefase ba tla ja gomme ba khunama pele ga gagwe.
Bohle bao ba yago lebitleng* ba tla khunama pele ga gagwe.
Ga go yo a ka iphološago.
30 Bana ba bona ba tla mo hlankela.
Moloko o tlago o tla botšwa ka Jehofa.
31 Ba tla botša batho bao ba sa tlago go belegwa ka dilo tša go loka tšeo a di dirilego.
Ba tla ba botša gore ke yena a dirilego dilo tše.
-
-
Jesaya 53:1-12Beibele ya Phetolelo ya Lefase le Leswa
-
-
53 Ke mang yo a dumetšego seo re se boletšego?
Le gona ke mang yo Jehofa a mo utolletšego matla a gagwe?
2 O tla tšwelela pele ga gagwe go swana le lekalana, go swana le modu wo o tšwago nageng e omilego,
Ga a kgahliše, e bile ga a na seriti.
Ge re mmona, ponagalo ya gagwe ga e re kgahle.
3 Batho ba be ba mo nyatša e bile ba sepelela kgole le yena,
O be a tla tseba gore go kwa bohloko go bjang, le gore bolwetši ke eng.
Go be go le bjalo ka ge eka re utetšwe sefahlego sa gagwe.
O be a nyatšwa, e bile re mmona e se selo.
4 Ka nnete o ile a kuka malwetši a rena,
Gomme a rwala mahloko a rena.
Eupša re ile ra mo tšea e le yo a otlilwego, a iteilwe ke Modimo e bile a mo tlaišitše.
5 Eupša o ile a hlabja ka baka la melato ya rena,
A tlaišwa o šoro ka baka la diphošo tša rena.
O ile a otlwa e le gore re be le khutšo le Modimo,
Le gona re ile ra fodišwa ka baka la dintho tša gagwe.
6 Ka moka ga rena re ile ra timela go swana le dinku,
Yo mongwe le yo mongwe a leba tseleng ya gagwe.
Jehofa o dirile gore diphošo tša rena ka moka di be godimo ga yena yoo.
7 Batho ba ile ba mo tlaiša, le gona o ile a ba tlogela ba mo swara gampe,
Eupša o ile a no ikhomolela.
O ile a tlišwa go swana le nku yeo e tlogo hlabja,
Go swana le nku ya tshadi yeo e ikhomoletšego pele ga bao ba e kotago,
Le gona ga se a ka a bolela le ge e ka ba lentšu letee.
8 O ile a tlošwa ka gobane o be a gateletšwe e bile a ahlotšwe ka go hloka toka.
Le gona ke mang yo a ka itshwenyago ka ditaba tša mabapi le moloko wa gagwe?*
O ile a tlošwa nageng ya bao ba phelago.
O ile a otlwa ka baka la ge batho ba ka ba ile ba tshela molao.
9 Le gona ge a ehwa, o ile a bolokwa
Gare ga batho ba babe le bahumi,
Le ge a be a se a dira selo se sebe,
E bile ka molomong wa gagwe go se gwa ka gwa tšwa maaka.
10 Eupša Jehofa o ile a kgetha gore a tlaišwe o šoro, e bile a dumelela gore a babje.
Modimo, ge o ka neela bophelo bja gagwe e le sebego sa molato,
Yena o tla bona ditlogolo tša gagwe e bile a phela nako e telele,
Gomme seo Jehofa a se nyakago se tla phethagala ka yena.
11 Ka morago ga gore a tlaišege, o tla kgotsofatšwa ke seo a se bonago.
Ka baka la dilo ka moka tšeo mohlanka wa ka yo a dirago dilo tše di lokilego a ithutilego tšona,
O tla thuša batho ba bantšhi gore ba amogelwe ke Modimo,
Gomme o tla rwala melato ya bona.
-