Genesi

12 Jehofa a re go Aborama: “Tloga nageng ya geno le go meloko ya gago le go batho ba geno, o ye nageng yeo ke tlago go go bontšha yona. 2 Ke tla dira gore bana ba gago e be setšhaba se segolo, ka go šegofatša ka ba ka dira gore leina la gago le tume kudu, gomme batho ka moka ba tla šegofatšwa ka baka la gago. 3 Ke tla šegofatša bao ba go šegofatšago, ka roga yoo a go rogago, gomme malapa ka moka a mo lefaseng a tla šegofatšwa ka baka la gago.”

4 Aborama a sepela go etša ge Jehofa a boletše le yena, gomme Lota a sepela le yena. Aborama o be a na le mengwaga e 75 ge a be a tloga Harane. 5 Ka gona Aborama a tšea Sarai mosadi wa gagwe, Lota morwa wa ngwanabo, dithoto ka moka tšeo ba bego ba na le tšona le bahlanka ka moka bao ba bego ba na le bona kua Harane, ke moka ba swara tsela ya go ya nageng ya Kanana. Ge ba fihla nageng ya Kanana, 6 Aborama o ile a sepela naga yeo go fihlela a fihla ka thoko ya Shikeme, kgauswi le mehlare e megolo ya More. Ka nako yeo Bakanana ba be ba dula nageng yeo. 7 Bjale Jehofa a iponagatša go Aborama gomme a re go yena: “Bana ba gago ke tla ba nea naga ye.” Ka gona Aborama a agela Jehofa aletare moo, yena yo a iponagaditšego go yena. 8 Ka morago a thotha moo a ya dithabeng ka bohlabela bja Bethele gomme a hloma tente ya gagwe gona. Ge a le moo, Bethele e be e le ka bodikela gomme Ai e le ka bohlabela. O ile a agela Jehofa aletare moo ke moka a thoma go tumiša leina la Jehofa. 9 Ka morago Aborama a tšwela pele ka leeto la gagwe a lebile Negebe, a tšama a hloma ditente e bile a di hlomolla.

10 Bjale gwa wa tlala moo nageng ya Kanana, ke moka Aborama a ya Egepeta a yo dula moo ka nakwana, ka gobane tlala yeo e bego e le nageng e be e le e šoro. 11 Ge a le kgauswi le go fihla Egepeta, a bolela le Sarai mosadi wa gagwe a re: “Go na le taba yeo ke nyakago go go botša yona. Ntheetše hle! Ke a tseba gore o mosadi yo mobotse. 12 Ka gona ge Baegepeta ba go bona ba tla re: ‘Yo ke mosadi wa gagwe.’ Ke moka ba tla mpolaya eupša wena ba go tlogela wa phela. 13 Hle ba botše gore o kgaetšedi ya ka e le gore ba ntshware gabotse ka baka la gago, gomme ka go dira bjalo o tla phološa bophelo bja ka.”

14 Gateetee ge Aborama a fihlile Egepeta, Baegepeta ba bona gore Sarai e be e le yo mobotse kudu. 15 Bakgomana ba ka mošate wa Farao le bona ba mmona gomme ba botša Farao kamoo mosadi yoo e lego yo mobotse ka gona. Ka gona mosadi yoo o ile a išwa ntlong ya Farao. 16 Ka ge Farao a be a kgahlwa ke Sarai o ile a swara Aborama gabotse a ba a mo fa dinku, dikgomo, ditonki tše tona le tše tshadi, bahlanka ba banna le ba basadi le dikamela. 17 Ke moka Jehofa a otla Farao le ba lapa la gagwe ka dikotlo tše šoro ka baka la Sarai mosadi wa Aborama. 18 Farao a bitša Aborama gomme a re go yena: “Ke’ng tše o ntirilego tšona? Go re’ng o se wa mpotša gore Sarai ke mosadi wa gago? 19 Ke ka baka la’ng o rile: ‘Ke kgaetšedi ya ka?’ Ke be ke le kgauswi le go mo dira mosadi wa ka. Bjale mosadi wa gago šo. Mo tšee o sepele!” 20 Ka gona Farao a laela bahlanka ba gagwe gore ba felegetše Aborama le mosadi wa gagwe, e bile ba sepele le dilo ka moka tšeo Aborama a bego a na le tšona.