Lefitiko

14 Jehofa a tšwela pele a bolela le Moshe a re: 2 “Molao wo le swanetšego go o latela wa mabapi le motho yo a nago le lephera letšatšing la ge a tlišwa go moperisita gore a hlwekišwe ke wo. 3 Moperisita a tšwele ka ntle ga ditente gomme a mo lekole. Ge e ba lephera la motho yoo le fodile, 4 gona moperisita a mo laele gore a tliše dinonyana tše pedi tše di hlwekilego, kota ya mohlare wa motsedara, lešela le le khwibidukhwibidu le semela se se bitšwago hisopo, e le gore a itlhwekiše. 5 Moperisita a laele gore nonyana e tee e bolaelwe ka sebjaneng sa letsopa seo se nago le meetse ao a gelwego ka nokeng. 6 Eupša ge e le nonyana yela e nngwe a e tšee le kota ya mohlare wa motsedara, lešela le le khwibidukhwibidu le semela se se bitšwago hisopo gomme a di ine ka mading a nonyana yela e bolaetšwego ka meetseng ao a gelwego ka nokeng. 7 Ke moka moperisita a gaše motho yo a itlhwekišago ka madi ao gašupa gomme a tsebiše batho gore motho yoo o hlwekile, ke moka a tlogele nonyana yela e nngwe e fofele nageng.

8 “Motho yo a itlhwekišago a hlatswe diaparo tša gagwe, a kote moriri wa gagwe ka moka, a hlape gomme o tla hlweka. Ka morago ga moo a ka tla ditenteng. Eupša a dule ka ntle ga tente ya gagwe matšatši a šupago. 9 Ka letšatši la bošupa a kote moriri ka moka, ditedu le dintšhi. Ka morago ga gore a kote moriri wa gagwe ka moka, a hlatswe diaparo tša gagwe le go hlapa mmele, gomme o tla hlweka.

10 “Ka letšatši la seswai a tšee dinku tše pedi tše tona tše di phetšego gabotse, kwana e tee ya tshadi yeo e nago le ngwaga o tee le sebjana sa dilithara tše pedi* seo se nago le folouru yeo e šitšwego gabotse yeo e tswakilwego le makhura e le sebego sa mabele, le komiki e tee* ya makhura. 11 Ke moka moperisita yo a tsebatšago gore motho yoo o hlwekile, a tliše motho yoo a itlhwekišago le dibego tša gagwe pele ga Jehofa mojakong wa taberenakele. 12 Moperisita a tšee nku e tee e tona le komiki ya makhura a dire sebego sa molato ka tšona, a di tšokoletše pele le morago e le sebego sa go tšokotšwa pele ga Jehofa. 13 Ke moka a hlabele nku yeo e tona moo phoofolo ya sebego sa sebe le ya sebego sa go fišwa di hlabelwago gona, e lego lefelong le lekgethwa, ka gobane go no swana le sebego sa sebe, sebego sa molato le sona ke sa moperisita. Ke selo se sekgethwakgethwa.

14 “Moperisita a tšee a mangwe a madi a phoofolo ya sebego sa molato a a tlotše karolong e boletiana ya tsebe ya le letona ya motho yo a itlhwekišago le monwaneng o mogolo wa letsogo la gagwe la le letona le monwaneng o mogolo wa leoto la gagwe la le letona. 15 Moperisita a tšee makhura a lego ka komiking gomme a tšhele a manyenyane ka letsogong la gagwe la le letshadi. 16 Ke moka moperisita a ine monwana wa gagwe wa le letona ka makhureng ao a lego ka letsogong la gagwe le letshadi gomme a rothetše a mangwe a makhura ao gašupa pele ga Jehofa. 17 Moperisita a tšee a mangwe a makhura ao a šetšego ao a lego ka letsogong la gagwe, gomme a a tlotše karolong e boletiana ya tsebe ya le letona ya yoo a itlhwekišago le monwaneng o mogolo wa letsogo la gagwe la le letona le monwaneng o mogolo wa leoto la gagwe la le letona, a a tlotše moo a tloditšego madi a sebego sa molato. 18 Moperisita a tšee makhura ao a šetšego a a tšhele hlogong ya motho yo a itlhwekišago, o tla dira seo e le gore Jehofa a lebalele motho yoo dibe tša gagwe.

19 “Moperisita a neele sebego sa sebe e le gore Modimo a lebalele motho yo a itlhwekišago dibe tša gagwe gore e be yo a hlwekilego, ka morago ga moo a hlabe phoofolo ya sebego sa go fišwa. 20 Moperisita a neele sebego sa go fišwa le sebego sa mabele aletareng e le gore Modimo a lebalele motho yoo dibe tša gagwe, ke moka o tla hlweka.

21 “Eupša ge e ba motho yoo a diila gomme a ka se kgone go tliša dilo tšeo, gona a tliše nku e tee e tona ya sebego sa molato gore a dire sebego sa go tšokotšwa e le gore Modimo a mo lebalele dibe. A tliše le sebjana sa dilithara tše pedi seo se nago le folouru yeo e šitšwego gabotse yeo e tswakilwego le makhura gore e be sebego sa mabele, komiki e tee ya makhura, 22 le maeba a mabedi a nageng goba maebana a mabedi, go ya ka moo a kgonago ka gona. Leebana le lengwe e tla ba la sebego sa sebe gomme le lengwe ya ba la sebego sa go fišwa. 23 Ka letšatši la seswai ge a tlo hlwekišwa, a di tliše go moperisita kgauswi le mojako wa taberenakele pele ga Jehofa.

24 “Moperisita a tšee nku e tona ya sebego sa molato le makhura ao a lego ka komiking, a di tšokoletše pele le morago gore e be sebego sa go tšokotšwa pele ga Jehofa. 25 Ke moka moperisita a hlabe nku e tona ya sebego sa molato gomme a tšee a mangwe a madi a sebego sa molato a a tlotše karolong e boletiana ya tsebe ya le letona ya motho yoo a itlhwekišago le monwaneng o mogolo wa letsogo la gagwe la le letona le monwaneng o mogolo wa leoto la gagwe la le letona. 26 Moperisita a tšhele a mangwe a makhura ka letsogong la gagwe le letshadi. 27 Ke moka a tšee a mangwe a makhura ao a lego ka letsogong la gagwe le letshadi gomme a a rothetše gašupa ka monwana wa gagwe wa le letona pele ga Jehofa. 28 Moperisita a tšee a mangwe a makhura ao a lego ka seatleng sa gagwe a a tlotše karolong e boletiana ya tsebe ya le letona ya motho yoo a itlhwekišago le monwaneng o mogolo wa letsogo la gagwe la le letona le monwaneng o mogolo wa leoto la gagwe la le letona, a a tlotše moo a tloditšego madi a sebego sa molato. 29 Moperisita a tšee makhura ao a šetšego ao a lego ka letsogong la gagwe a a tšhele hlogong ya motho yoo a itlhwekišago, e le gore Jehofa a mo lebalele dibe tša gagwe.

30 “Moperisita a neele letee la maeba a nageng goba letee la maebana ao motho yoo a kgonnego go a tliša. 31 Le lengwe e be la sebego sa sebe gomme le lengwe e be la sebego sa go fišwa, a a neele gotee le sebego sa mabele. Moperisita o tla neela dibego tšeo e le gore Jehofa a lebalele motho yoo a itlhwekišago dibe.

32 “Wo ke molao woo le swanetšego go o latela bakeng sa motho yo a diilago yo a bego a swerwe ke lephera e le gore a tle a hlwekišwe.”

33 Ke moka Jehofa a bolela le Moshe le Arone a re: 34 “Ge le fihla nageng ya Kanana yeo ke le fago yona gore e be ya lena, gomme ka dumelela gore bolwetši bja lephera bo tšwelele ka ntlong yeo e lego nageng ya lena, 35 gona mong wa ntlo yeo a tle a botše moperisita a re: ‘Go na le selo seo e kego ke lephera ka ntlong ya ka.’ 36 Moperisita a laele batho ba moo gore ba ntšhe dilo ka moka ka ntlong pele ga ge a ka tla go tlo lekola selo seo, e le gore a se tlo tsebatša gore selo se sengwe le se sengwe seo se lego ka ntlong yeo ga se sa hlweka. Ka morago ga moo moperisita o tla tsena ka moo ntlong go tlo e lekola. 37 O tla lekola selo seo se bonagalago eka ke lephera, gomme ge e ba maboto a ntlong yeo a na le botala bjo bo nago le bokheri goba bohwibidu e bile bo bonagala bo tseneletše lebotong, 38 gona moperisita a tšwe ka moo ntlong gomme a e tswalele gore go se tsene motho ka matšatši a šupago.

39 “Ke moka moperisita a boele go yona ka morago ga matšatši a šupago gomme a e lekole. Ge e ba selo seo ekego ke lephera se kekile mo mabotong a ntlo, 40 gona moperisita a laele gore ba ntšhe maswika ao a nago le selo seo ke moka ba a lahlele lefelong leo le sego la hlweka ka ntle ga motse. 41 A laele gore ba gope ntlo yeo gabotse ka mo gare, gomme dilo tšeo di gopilwego di lahlelwe lefelong leo le sa hlwekago ka ntle ga motse. 42 Ka morago ga moo ba tla tšea maswika a mangwe ba a tsenya moo go bego go na le maswika ao ba a ntšhitšego, gomme ba diriše leraga le leswa go poleistera ntlo yeo.

43 “Ge e ba selo seo e kego ke lephera se ka boa gape sa tšwa ka mo ntlong ka morago ga ge maswika ao a ntšhitšwe e bile ntlo yeo e gopilwe le go poleisterwa gape, 44 gona moperisita a tsene ka moo ntlong a e lekole. Ge e ba selo seo se kekile ka moo ntlong, gona go ra gore go na le lephera le lešoro ka moo ntlong. Ntlo yeo ga se ya hlweka. 45 Ka gona a laele gore ntlo yeo e phušolwe, go phušolwe maswika a yona, dikota le leraga la ntlo yeo gomme di ntšhetšwe lefelong leo le sego la hlweka ka ntle ga motse. 46 Eupša motho le ge e le ofe yo a ka tsenago ka moo ntlong yeo letšatšing le ge e le lefe nakong ya ge go se gwa dumelelwa gore go tsene motho ka moo, e tla ba yo a sa hlwekago go fihla mantšiboa. 47 Le gona motho le ge e le ofe yo a ka robalago ka ntlong yeo le yo a ka jelago ka ntlong yeo o swanetše go hlatswa diaparo tša gagwe.

48 “Eupša ge e ba moperisita a ka tla go lekola ntlo yeo gomme a hwetša selo seo e kego ke lephera se se sa keka ka ntlong ka morago ga ge e poleisterilwe gape, gona moperisita a botše batho gore e hlwekile ka gobane selo seo se tlogile. 49 E le gore a hlwekiše ntlo yeo, a tšee dinonyana tše pedi, kota ya mohlare wa motsedara, lešela le le khwibidukhwibidu le semela se se bitšwago hisopo. 50 A bolaele nonyana e tee ka sebjaneng sa letsopa seo se nago le meetse ao a gelwego ka nokeng. 51 Ke moka a tšee kota ya mohlare wa motsedara, semela seo se bitšwago hisopo, lešela le le khwibidukhwibidu le nonyana yela e nngwe, a di ine ka mading a nonyana yeo a e bolailego le ka meetseng ao a gelwego ka nokeng, gomme a gaše madi ao lebatong la ntlo gašupa. 52 A hlwekiše ntlo yeo ka madi a nonyana, meetse ao a gelwego ka nokeng, nonyana e phelago, kota ya mohlare wa motsedara, semela se se bitšwago hisopo le lešela le le khwibidukhwibidu. 53 A tlogele nonyana yeo e phelago e fofele kua nageng ka ntle ga motse, ka go dira bjalo o tla tloša ditšhila ntlong yeo gomme e tla hlweka.

54 “Woo ke molao wa mabapi le bolwetši le ge e le bofe bja lephera, go hlobega ga moriri goba ditedu, 55 lephera leo le tšwago seaparong goba ntlong, 56 go ruruga, go tšwa dišo le dilwana tše tshehla, 57 e le gore go tsebje ge selo se hlwekile le ge se se sa hlweka. Woo ke molao wa mabapi le lephera.”