Joshua

4 Gateetee ge setšhaba ka moka se tshetše Noka ya Jorodane, Jehofa a re go Joshua: 2 “Kgetha banna ba 12 setšhabeng, o kgethe monna o tee molokong o mongwe le o mongwe, 3 o ba laele o re: ‘Eyang gare ga Noka ya Jorodane, moo baperisita ba bego ba eme ba sa šišinyege, gomme le tšee maswika a 12 le tshele le ona ke moka le a bee moo le yago go robala gona.’”

4 Ka gona Joshua a bitša banna ba 12 bao a ba kgethilego go Baisiraele, molokong o mongwe le o mongwe a bitša monna o tee. 5 Joshua a re go bona: “Etang pele areka ya Jehofa Modimo wa lena le yeng gare ga Noka ya Jorodane, gomme yo mongwe le yo mongwe wa lena a rwale leswika legetleng, e le gore palo ya maswika e lekane le palo ya meloko ya Baisiraele. 6 Maswika a a swanetše go le gopotša dilo tšeo Modimo a le diretšego tšona. Ge bana ba lena ba ka tla ba le botšiša gore: ‘Le beetše’ng maswika a mo?’ 7 Le re go bona: ‘Ka gobane meetse a Jorodane a ile a emišwa pele ga areka ya kgwerano ya Jehofa, ge baperisita ba be ba tshela Noka yeo ba e rwele. Maswika a ke segopotšo go Baisiraele go iša mehleng ya neng le neng.’”

8 Ka gona Baisiraele ba dira kamoo Joshua a ba laetšego ka gona. Ba ile ba tšea maswika a 12 gare ga Noka ya Jorodane, go ya kamoo Jehofa a bego a laetše Joshua ka gona, gore maswika ao a lekane le palo ya meloko ya Baisiraele. Ba tshelela le ona moo ba yago go robala gona ke moka ba a paka moo.

9 Joshua o ile a paka maswika a mangwe a 12 gare ga Noka ya Jorodane moo go bego go eme baperisita bao ba bego ba rwele areka ya kgwerano, maswika ao a sa le moo go fihla le lehono.

10 Baperisita bao ba rwelego areka ba ile ba ema gare ga Noka ya Jorodane go fihla go direga dilo ka moka tšeo Jehofa a bego a di laetše Joshua gore a di botše setšhaba, ka go dumelelana le dilo ka moka tšeo Moshe a bego a di laetše Joshua. Ka nako yeo setšhaba sa tshela Noka ya Jorodane kapelapela. 11 Ya re ge setšhaba ka moka se tshetše noka, baperisita bao ba bego ba rwele areka ya kgwerano ya Jehofa ba tshela batho ka moka ba ba lebeletše. 12 Barubeni, Bagada gotee le ba seripa sa moloko wa Manase ba be ba šetše ba tshetše noka ba itlhametše ntwa pele ga Baisiraele ba bangwe ka moka, go ya kamoo Moshe a bego a ba laetše ka gona. 13 Mašole ao e ka bago a 40 000 (dikete tše masomenne) ao a itlhametšego ntwa, a ile a tshela Noka ya Jorodane pele ga Jehofa, a tshelela leganateng la Jeriko.

14 Ka letšatši leo, Jehofa o ile a bontšha Baisiraele ka moka gore o be a thuša Joshua, gomme bona ba mo hlompha kudu mehleng yohle ya bophelo bja gagwe go etša ge ba be ba hlompha Moshe kudu.

15 Ke moka Jehofa a re go Joshua: 16 “Laela baperisita bao ba rwelego areka ya bohlatse gore ba tšwe Nokeng ya Jorodane.” 17 Ka gona Joshua a laela baperisita a re: “Etšwang Nokeng ya Jorodane.” 18 Ge baperisita bao ba rwelego areka ya kgwerano ya Jehofa ba tšwile gare ga Noka ya Jorodane gomme ba gatile ka ntle ga noka, noka yeo e ile ya boela ya elela, ya tlala la go falala go etša peleng.

19 Setšhaba se tšwile Nokeng ya Jorodane ka letšatši la bo-lesome la kgwedi ya pele, gomme sa hloma ditente kua Giligala ka bohlabela bja mollwane wa Jeriko.

20 Joshua o ile a tšea maswika a 12 ao ba a tšerego Nokeng ya Jorodane a a paka kua Giligala. 21 A re go Baisiraele: “Ge bana ba lena ba ka le botšiša nakong e tlago ba re: ‘Maswika a a bolela’ng?’ 22 Le ba botše le re: ‘Baisiraele ba ile ba tshela Noka ya Jorodane mo go omilego 23 ge Jehofa Modimo wa lena a be a gopišitše Noka ya Jorodane pele ga bona go fihla ge ba tshetše ka moka, go swana le ge Jehofa Modimo wa lena a ile a gopiša Lewatle le Lehwibidu pele ga rena go fihla ge re tshetše. 24 O dirile dilo tše e le gore batho lefaseng ka moka ba tsebe gore Jehofa o na le matla kudu, le gore le dule le boifa Jehofa Modimo wa lena.’”