Joshua
12 Ye ke pego ya dikgoši tša dinaga tšeo Baisiraele ba di fentšego le tšeo ba thopilego dinaga tša tšona ka bohlabela bja Noka ya Jorodane, go tloga Moeding wa Arinoni go fihla Thabeng ya Heremone le Araba ka moka go yela ka bohlabela: 2 Sihoni kgoši ya Baamore, yo a bego a dula Heshibone, e bile a buša go tloga ka Aroere yeo e bego e le moo Moedi wa Arinoni o bego o thoma gona le go tloga gare ga moedi le seripa sa Gileada go fihla Moeding wa Jaboko, e lego mollwane wa bana ba Amoni, 3 o ile a buša le Araba go fihla Lewatleng la Khinerethe* go ya ka bohlabela le go fihla lewatleng la Araba, e lego Lewatle la Letswai, go ya ka bohlabela bja Bethe-jeshimothe le go ya ka borwa ka tlase ga meboto ya Pisiga.
4 Baisiraele ba ile ba thopa le naga ya Ogo kgoši ya Bashani, yoo e bego e le Morefaimi wa mafelelo yoo a bego a dula Ashitherothe le Edirei, 5 yoo a bušitšego le tikologong yeo e bego e akaretša Thaba ya Heremone le Salika le Bashani ka moka go fihla mollwaneng wa Bageshuri le Bamaakati le go fihla ka seripa sa Gileada go ya nageng ya Sihoni kgoši ya Heshibone.
6 Moshe mohlanka wa Jehofa le Baisiraele ba ile ba fenya dikgoši tšeo, ke moka Moshe mohlanka wa Jehofa a nea Barubeni, Bagada le seripa sa moloko wa Manase naga ya dikgoši tšeo e le bohwa.
7 Joshua le Baisiraele ba fentše dikgoši tše dintšhi ka bodikela bja Noka ya Jorodane, go tloga Baaligada yeo e lego molaleng wa Libanoni le go fihla Thabeng ya Halake yeo e rotogelago Seire, Joshua a arola dinaga tšeo gomme a di nea Baisiraele go ya ka meloko ya bona, 8 tikologong yeo e lego dithabeng, metseng yeo e lego tlase ga dithaba, Araba, metheogeng, lešokeng le Negebe. Tše e be e le dinaga tša Bahethe, Baamore, Bakanana, Baperetse, Bahefe le Bajebusi. Dikgoši tša tšona ke tše di latelago:
9 Kgoši ya Jeriko, kgoši ya Ai, e lego motse wo o bego o le kgauswi le Bethele,
10 kgoši ya Jerusalema, kgoši ya Heburone,
11 kgoši ya Jaramuthe, kgoši ya Lakishi,
12 kgoši ya Egilone, kgoši ya Getsere,
13 kgoši ya Debiri, kgoši ya Gedere,
14 kgoši ya Horoma, kgoši ya Aradi,
15 kgoši ya Libina, kgoši ya Adulama,
16 kgoši ya Makeda, kgoši ya Bethele,
17 kgoši ya Thapua, kgoši ya Hefere,
18 kgoši ya Afeke, kgoši ya Lasasharona,
19 kgoši ya Madoni, kgoši ya Hatsora,
20 kgoši ya Shimorone-merone, kgoši ya Akashafa,
21 kgoši ya Thaanake, kgoši ya Megido,
22 kgoši ya Kedeshe, kgoši ya Jokoneama kua Karamele,
23 kgoši ya Doro mebotong ya Doro, kgoši ya Goime kua Giligala,
24 le kgoši ya Thiritsa. Dikgoši tše ka moka e be e le tše 31.