Baahlodi

2 Ke moka morongwa wa Jehofa a tloga Giligala a ya Bokime, a botša Baisiraele a re: “Ke le ntšhitše Egepeta ka le iša nageng yeo ke e enetšego borakgolokhukhu ba lena. Le gona, ke itše: ‘Le ka mohla nka se tshele kgwerano yeo ke e dirilego le lena, 2 gomme le lena le se ke la dira kgwerano le badudi ba naga ye e bile le swanetše go phušola dialetare tša bona.’ Eupša ke ka baka la’ng le se la ntheetša? 3 Ke ka baka leo ke ilego ka re: ‘Nka se rake badudi ba naga ye pele ga lena. Bona e tla ba melaba go lena gomme medimo ya bona e tla le goketša.’”

4 Ge morongwa wa Jehofa a boditše Baisiraele mantšu a, setšhaba se ile sa goeletša sa lla. 5 Ke moka ba reela lefelo leo ba re ke Bokime, gomme ba direla Jehofa dihlabelo moo.

6 Joshua a phatlalatša setšhaba, ke moka Baisiraele ba sepela, yo mongwe le yo mongwe a ya nageng yeo a e abetšwego gomme a dula go yona. 7 Baisiraele ba tšwela pele ba hlankela Jehofa nakong ka moka ya ge Joshua a sa phela le mehleng ka moka ya banna ba bagolo bao ba phetšego ka morago ga Joshua, le bao ba bonego dilo ka moka tše dikgolo tšeo Jehofa a di diretšego Isiraele. 8 Ka morago ga moo Joshua morwa wa Nuni, mohlanka wa Jehofa, a hlokofala a na le mengwaga e 110 (lekgolo le e lesome). 9 Ke moka ba mmolokela nageng yeo e bego e le bohwa bja gagwe kua Thiminathe-herese, yeo e lego tikologong ya dithaba tša Efuraime ka leboa la Thaba ya Gaashe. 10 Moloko woo ka moka le wona o ile wa hlokofala wa latela borakgolokhukhu ba wona, ka morago ga wona gwa tšwelela moloko o mongwe wo o bego o sa tsebe Jehofa goba dilo tšeo a di diretšego Isiraele.

11 Ke moka Baisiraele ba dira dilo tše mpe pele ga Jehofa, ba hlankela medingwana ya Baali. 12 Ka go re’alo, ba tlogela Jehofa Modimo wa botatago bona yo a ba ntšhitšego nageng ya Egepeta. Ba hlankela medimo e mengwe ya ditšhaba tšeo ba bego ba dula kgauswi le tšona, ba e khunamela gomme ba kgopiša Jehofa. 13 Ba tlogela Jehofa gomme ba rapela Baali le medimo ya diswantšho ya Ashiterothe. 14 Ge Baisiraele ba dira bjalo, Jehofa o ile a ba galefela kudu, a tlogela manaba a bona a ba fenya gomme a ba thopa, go fihlela ba se sa kgona go itwela go manaba a bona. 15 Ka mehla ge ba be ba eya ntweng, Jehofa o be a ba hlanogela gomme ba be ba fenywa, go etša ge Jehofa a be a ba boditše le go etša ge Jehofa a be a ba enetše, ba ba mathateng a magolo. 16 Ka gona Jehofa a ba kgethela baahlodi gomme ba ba phološa go batho bao ba bego ba ba thopile.

17 Eupša ba be ba gana go theetša baahlodi bao, gomme ba rapela* medimo e mengwe le go e khunamela. Ba be ba hlanoga kapejana gomme ba tlogela go sepela ka tsela yeo borakgolokhukhu ba bona ba bego ba sepela ka yona. Borakgolokhukhu ba bona ba be ba latela ditaelo tša Jehofa, eupša bona ga se ba ka ba di latela. 18 Ge Jehofa a be a ba kgethela baahlodi, Jehofa o be a thekga moahlodi yoo gomme a ba phološa go manaba a bona ge moahlodi yoo a sa phela, ka gobane Jehofa o be a ba kwela bohloko ge ba be ba llišwa ke bao ba bego ba ba gatelela le bao ba bego ba ba hlakiša.

19 Eupša ge moahlodi a hlokofala, ba be ba boela ba senyetša Modimo kudu go feta botatago bona ka go latela medimo e mengwe, ba e hlankela le go e khunamela. Ga se ba ka ba tlogela mekgwa ya bona le bonganga bja bona. 20 Mafelelong Jehofa a galefela Baisiraele kudu gomme a re: “Ka ge setšhaba se se tshetše kgwerano yeo ke e dirilego le borakgolokhukhu ba sona gomme sa se ntheetše, 21 gona le nna nka se rake le ge e le setšhaba se setee go tšeo Joshua a di tlogetšego ge a be a hlokofala. 22 Ke tlo dira se go bona ge e ba Baisiraele ba tla boloka ditaelo tša Jehofa gomme ba sepela go tšona go etša botatago bona.” 23 Ka gona Jehofa o ile a dumelela ditšhaba tšeo gore di dule moo, ga se a di tloša ka pela e bile ga se a dumelela Joshua gore a di fenye.