Jesaya
56 Jehofa o re: “Dirang dilo tša toka,
Gomme le dire le dilo tše di lokilego.
Ka gobane phološo ya ka e kgauswi le go tla,
E bile ke kgauswi le go bontšha go loka ga ka.
2 Go thaba motho yo a dirago se,
Le yo a se kgomarelago ka go tia,
Yo a bolokago Sabatha e bile a sa e šilafatše,
Le yo a sa dirego selo le ge e le sefe se sebe.
3 Anke motho yo e sego Moisiraele yoo a hlankelago Jehofa a se ke a re:
‘Ruri Jehofa o tlo nkaroganya le batho ba gagwe.’
Le gona anke monna yo a sa kgonego go ba le bana* a se ke a re: ‘Bonang! Ke nna mohlare wo o omilego.’”
4 Jehofa o re: “Banna bao ba sa kgonego go ba le bana bao ba bolokago disabatha tša ka, bao ba kgethago go dira seo se nkgahlago le bao ba tshepagalelago kgwerano ya ka,
5 Ke tla ba nea lefelo ka ntlong ya ka e bile ka gopola maina a bona,
E lego selo se sekaone go feta barwa le barwedi.
Ke tla ba nea leina leo le tlago go dula le le gona,
Leo le ka se kego la senyega.
6 Batho bao e sego Baisiraele bao ba tlago go Jehofa e le gore ba mo hlankele,
Ba rate leina la Jehofa,
E bile e be bahlanka ba gagwe,
Batho ka moka bao ba bolokago Sabatha e bile ba sa e šilafatše,
Gomme ba tshepagalela kgwerano ya ka,
7 Le bona ke tla ba tliša thabeng ya ka e kgethwa,
E bile ka dira gore ba thabe ba le ntlong ya ka yeo go rapelwago go yona.
Ke tla amogela dibego tša bona tše di feletšego tša go fišwa le dihlabelo tša bona aletareng ya ka.
Ka gobane ntlo ya ka e tla bitšwa ntlo ya thapelo ya ditšhaba ka moka.”
8 Mmuši Morena Jehofa yo a kgoboketšago bao ba gašanego ba Isiraele, o re:
“Ke tla kgobokeletša ba bangwe go yena ka ntle le bao ba šetšego ba kgobokeditšwe.”
9 Lena diphoofolo ka moka tša lešokeng
Le lena diphoofolo ka moka tša sethokgweng, etlang le je.
10 Batho ba gagwe bao ba letago motse ba foufetše, ga go le o tee wa bona yo a ntšhitšego mahlo dinameng.
Ka moka ga bona ke dimpša tša dimumu, tšeo di sa kgonego go goba.
Di no hemelana, di patlame e bile di rata boroko.
11 Ke dimpša tša megabaru,
Le ge di eja ga di khore.
Ke badiši bao ba sa kwešišego.
Yo mongwe le yo mongwe o tšere ka tsela ya gagwe,
Le gona yo mongwe le yo mongwe wa bona o nyaka go ikhola, gomme ba re:
12 “Etlang! E reng ke yo tšea beine,
Gomme re nweng bjala go fihlela re tagwa.
La gosasa le tla swana le la lehono, e bile mohlomongwe la le phala kudu.”