Numeri

1 Ka letšatši la pele, kgweding ya bobedi ngwageng wa bobedi wa ge Baisiraele ba tšwile nageng ya Egepeta, Jehofa o ile a bolela le Moshe lešokeng la Sinai ka tenteng ya go kopana, a re: 2 “Wena le Arone le baleng setšhaba ka moka sa Baisiraele, le baleng motho ka o tee ka o tee. Le ngwadišeng maina ka moka a banna go ya ka malapa a bona, le go ya ka meloko ya bona. 3 Le ngwadišeng banna ka moka ba Baisiraele ba mengwaga e 20 go ya godimo bao ba ka kgonago go ya ntweng. Le ba ngwadiše go ya ka dihlopha tša bona tša mašole.

4 “Molokong o mongwe le o mongwe o tšee monna o tee, gomme yo mongwe le yo mongwe wa banna bao e be hlogo ya moloko woo. 5 A ke maina a banna bao ba tlago go le thuša: Molokong wa Rubeni e be Elitsuri morwa wa Shedeuri, 6 molokong wa Simeone e be Shelumiele morwa wa Tsurishadai, 7 molokong wa Juda e be Nahashone morwa wa Aminadaba, 8 molokong wa Isakara e be Nethanele morwa wa Tsuari, 9 molokong wa Sebulone e be Eliaba morwa wa Helone. 10 Go barwa ba Josefa e be ba ba latelago: Molokong wa Efuraime e be Elishama morwa wa Amihudi, molokong wa Manase e be Gamaliele morwa wa Pedatsuri, 11 molokong wa Benjamini e be Abidani morwa wa Gideoni, 12 molokong wa Dani e be Ahiesere morwa wa Amishadai, 13 molokong wa Ashere e be Pagiele morwa wa Okorane, 14 molokong wa Gada e be Eliasafa morwa wa Duele, 15 molokong wa Nafutali e be Ahira morwa wa Enani. 16 Ba ke bona bao ba kgethilwego setšhabeng. Ke dikgošana tša meloko ya botatago bona, e lego baetapele ba banna ba dikete Isiraeleng.”

17 Ka gona Moshe le Arone ba tšea banna ba bao ba bego ba kgethilwe ke Modimo. 18 Ba kgobokanya setšhaba ka moka ka letšatši la pele la kgwedi ya bobedi e le gore ba ba ngwadiše ka o tee ka o tee go ya ka maina a bona, malapa a bona le go ya ka meloko ya bona. Ba ngwadiša banna ba go tloga ka ba mengwaga e 20 go ya godimo, 19 ba dira go ya le ka mokgwa woo Jehofa a bego a laetše Moshe ka gona. A ba ngwadiša lešokeng la Sinai.

20 Barwa ba Rubeni, e lego morwa wa mathomo wa Isiraele, ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa ka o tee ka o tee, 21 gomme bao ba ngwadišitšwego molokong wa Rubeni e be e le ba 46 500 (dikete tše masomenne-tshela-makgolohlano).

22 Barwa ba Simeone ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa ka o tee ka o tee, 23 gomme bao ba ngwadišitšwego molokong wa Simeone e be e le ba 59 300 (dikete tše masomehlano-senyane-makgolotharo).

24 Barwa ba Gada ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 25 gomme bao ba ngwadišitšwego molokong wa Gada e be e le ba 45 650 (dikete tše masomenne-hlano-makgolotshela-masomehlano).

26 Barwa ba Juda ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 27 gomme bao ba ngwadišitšwego molokong wa Juda e be e le ba 74 600 (dikete tše masomešupa-nne-makgolotshela).

28 Barwa ba Isakara ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 29 gomme bao ba ngwadišitšwego molokong wa Isakara e be e le ba 54 400 (dikete tše masomehlano-nne-makgolonne).

30 Barwa ba Sebulone ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 31 gomme bao ba ngwadišitšwego molokong wa Sebulone e be e le ba 57 400 (dikete tše masomehlano-šupa-makgolonne).

32 Go barwa ba Josefa ya ba ba latelago: Barwa ba Efuraime ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 33 gomme bao ba ngwadišitšwego molokong wa Efuraime e be e le ba 40 500 (dikete tše masomenne-makgolohlano).

34 Barwa ba Manase ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 35 gomme bao ba ngwadišitšwego molokong wa Manase e be e le ba 32 200 (dikete tše masometharo-pedi-makgolopedi).

36 Barwa ba Benjamini ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 37 gomme bao ba ngwadišitšwego molokong wa Benjamini e be e le ba 35 400 (dikete tše masometharo-hlano-makgolonne).

38 Barwa ba Dani ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 39 gomme bao ba ngwadišitšwego molokong wa Dani e be e le ba 62 700 (dikete tše masometshela-pedi-makgološupa).

40 Barwa ba Ashere ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 41 gomme bao ba ngwadišitšwego molokong wa Ashere e be e le ba 41 500 (dikete tše masomenne-tee-makgolohlano).

42 Barwa ba Nafutali ba ile ba ngwadišwa go ya ka maina a bona, malapa a bona le meloko ya bona. Banna ka moka ba mengwaga ya go tloga ka e 20 go ya godimo bao ba bego ba ka kgona go ya ntweng, ba ile ba balwa, 43 gomme bao ba ngwadišitšwego molokong wa Nafutali e be e le ba 53 400 (dikete tše masomehlano-tharo-makgolonne).

44 Banna bao ke bona ba ilego ba ngwadišwa ke Moshe a na le Arone le dikgošana tše 12 tša Isiraele. Yo mongwe le yo mongwe wa banna bao o be a emetše moloko wa gabo. 45 Banna ka moka ba Baisiraele go tloga ka ba mengwaga e 20 go ya godimo bao ba bego ba ka kgona go ya ntweng, ba ile ba ngwadišwa go ya ka meloko ya bona. 46 Ka moka bao ba ngwadišitšwego e be e le ba 603 550 (dikete tše makgolotshela-tharo-makgolohlano-masomehlano).

47 Eupša Balefi ba be ba se ba ngwadišwa gotee le meloko e mengwe. 48 Ka gona Jehofa a botša Moshe a re: 49 “Ba moloko wa Lefi ke bona feela bao o sa swanelago go ba ngwadiša, le gona palo ya bona o se ke wa e hlakanya le ya Baisiraele ba bangwe. 50 Wena o kgethe Balefi gore ba hlokomele taberenakele yeo e bego e na le diphaphathi tša maswika,* dibjana tša yona ka moka le dilo ka moka tšeo di lego mo go yona. Ba rwale taberenakele le dibjana tša yona ka moka, e bile e be bona ba hlankelago go yona, gomme ba hlome ditente tša bona go dikologa taberenakele yeo. 51 Nako e nngwe le e nngwe ge taberenakele e tlošwa e išwa lefelong le lengwe, Balefi ba e hlahlamolle, ke moka ge e le nako ya go hloma taberenakele gape, Balefi e be bona bao ba e hlomago. Motho le ge e le ofe yo a batamelago go yona e se moperisita,* a bolawe.

52 “Moisiraele yo mongwe le yo mongwe a hlome tente ya gagwe moo a abetšwego gona, monna yo mongwe le yo mongwe a hlome tente ya gagwe moo sehlopha sa gagwe sa meloko e meraro se lego gona, a e hlome sehlopheng sa gagwe. 53 Balefi ba hlome ditente go dikologa taberenakele yeo e nago le diphaphathi tša maswika, e le gore ke se ke ka galefela setšhaba sa Baisiraele, gomme Balefi e be bona ba hlokomelago taberenakele yeo.”

54 Baisiraele ba dira dilo ka moka tšeo Jehofa a di laetšego Moshe. Ba di dira ka wona mokgwa woo.