Jesaya
28 Matagwa a Efuraime a lebelela motse wa ona e le mphapahlogo o kgahlišago,
E bile e le o mobotse go swana le lepolomo leo le lego ntlheng ya moedi o nonnego, eupša batho ba moo ba tagilwe ke beine.
Ruri ke ba madimabe ka gobane lepolomo la bona le lebotse le tlo pona!
2 Bonang! Jehofa o na le yo matla.
O tla lahlela mphapahlogo ka matla lefaseng,
Go swana le pula ya sefako ya magadima, e lego ledimo le le senyago,
Le go swana le pula ya matlorotloro yeo e nago le mafula a matla.
3 Mefapahlogo yeo matagwa a Efuraime a ikgantšhago ka yona,
E tla gatakelwa ka maoto.
4 Le gona, lepolomo leo le ponago la letago la botse bja motse woo
Leo le lego ntlheng ya moedi o nonnego,
Le tla swana le mago ao a butšwago ka pela, pele selemo se tsena.
Ge motho a a bona o tla a kga, gomme a a metša kapelapela.
5 Letšatšing leo Jehofa wa madira o tla swana le mphapahlogo wa letago le selo se sebotse sa go kgabiša hlogo go batho ba gagwe bao ba šetšego. 6 Le gona o tla dira gore baahlodi ba ahlole ka toka, gomme a matlafatša bao ba šireletšago dikeiti tša motse gore manaba a se ke a hlasela.
7 Baperisita le baporofeta ba a aroga ka baka la beine,
Gomme ba thekesedišwa ke bjala.
Ba a aroga ka baka la bjala,
Beine e dira gore ba gakanege,
Ba thekesedišwa ke bjala bja bona.
Dilo tšeo ba di bonago di a ba aroša,
E bile ga ba ahlole gabotse.
8 Ditafola tša bona di tletše ka mahlatša a šišimišago,
Ga go na moo a sego gona.
9 Ba re: Ke mang yo a tlago go mo ruta gore a be le tsebo,
Le gona ke mang yo a tlago go mo hlalosetša molaetša?
Na ke bao ba sa tšwago go tshwešwa letswele,
E lego bao ba sa tšwago go tlogedišwa go anya?
10 Ka gobane ke “taelo ka morago ga taelo, taelo ka morago ga taelo,
Molao ka morago ga molao, le molao ka morago ga molao,
Ganyenyane mo, ganyenyane mola.”
11 Modimo o tla bolela le batho ba a diriša batho ba go kgamakgametša le bao ba bolelago leleme le lengwe. 12 O kile a ba botša a re: “Le ke lefelo la go khutša. Ereng bao ba lapilego ba khutše, ka gobane le ke lefelo la go iketla,” eupša bona ba ile ba gana go theetša. 13 Ka gona lentšu la Jehofa go bona e tla ba
“Taelo ka morago ga taelo, taelo ka morago ga taelo,
Molao ka morago ga molao, le molao ka morago ga molao,
Ganyenyane mo, ganyenyane mola.”
E le gore ge ba sepela ba kgopše
Gomme ba we ka sa ka morago,
Ba robege, ba tanywe gomme ba swarwe.
14 Ka gona, ekwang lentšu la Jehofa lena batho bao ba ikgantšhago,
Le lena batho bao le bušago batho bao ba lego Jerusalema.
15 Ka gobane le re:
“Re dirile kgwerano le Lehu,
E bile re dumelelane le Lebitla.*
Ge mafula a matla a feta,
A ka se fihle go rena
Ka gobane re tšhabela maakeng,
E bile re iphihla ka ona.”
16 Ka gona Mmuši Morena Jehofa o re:
“Ke bea motheo Tsione ka leswika leo go tsebegago gore le tiile,
E lego leswika la bohlokwa la khoneng leo le theilwego motheong wa nnete.
Yo a dumelago go lona a ka se tšhoge.
17 Ke tla dira gore toka e be thapo ya go meta,
E bile e be sedirišwa sa go lekalekanya leboto.
Sefako se tla senya lefelo leo le bego le tšhabela go lona la maaka,
Gomme meetse a tla gogola lefelo la go ikuta.
18 Kgwerano yeo le e dirilego le Lehu e tla senywa,
Gomme tumelelano yeo le e dirilego le Lebitla e ka se ke ya phethagala.
Ge mafula a matla a feta,
A tla le gogola.
19 Nako le nako ge mafula ao a feta,
A tla le gogola,
Ka gobane a tla feta mesong e mengwe le e mengwe,
Mosegare le bošego.
Letšhogo ke lona feela le tlago go dira gore ba kwešiše seo ba se kwelego.”
20 Ka gobane mpete ke o mokopana gore motho a ka naba maoto go wona,
E bile kobo e logilwego ke e nyenyane kudu gore motho a ka itatetša ka yona.
21 Jehofa o tla ema go swana le ge a ile a ema Thabeng ya Peratsime,
O tla dira seo a ilego a se dira moeding wa kgauswi le Gibeoni,
E le gore a dire modiro wa gagwe o makatšago,
Le go phetha mošomo wa gagwe o sa tlwaelegago.
22 Bjale le se ke la ba bakweri,
E le gore dilo tšeo le tlemilwego ka tšona di se ke tša tiišwa,
Ka gobane ke kwele Mmuši Morena, yena Jehofa wa madira,
A bolela gore o ikemišeditše go tlo fediša naga ka moka.
23 Hlwayang tsebe le ntheetšeng,
Elang hloko gomme le theetše seo ke se bolelago.
24 Na molemi o lema letšatši ka moka pele a ka bjala peu?
Na o dulela go thuba makwate le go lekalekanetša mobu?
25 Ge a fetša go lekalekanetša mobu,
Na a ka se gašanye kumine e ntsho gomme a bjala kumine?
Le gona na ga a bjale korong, leotša le mabele* moo a swanetšego go bjalwa gona,
Gomme a bjala mohuta o mongwe wa korong ka mathokong a tšhemo?
26 Modimo o ruta motho tsela ya nnete,
A ba a mo phošolla go ya ka seo se lokilego.
27 Kumine e ntsho ga e folwe ka selei,
Le gona o ka se fole kumine ka go e gatiša ka leotwana la kariki.
Go e na le moo, kumine e ntsho e folwa ka phata,
Gomme kumine ya folwa ka patla.
28 Na ge motho a fola mabele a go dira borotho, o a a šilaganya?
Aowa, a ka se dulele go a šilaganya.
Le gona ge a fetiša leotwana la kariki ya gagwe ya dipere godimo ga ona,
Ga a a šilaganye.
29 Mantšu a le ona a tšwa go Jehofa wa madira,
Yoo keletšo ya gagwe e kgahlišago kudu,
Le yoo a dirago mediro e megolo.