Puku ya Pele ya Samuele

5 Ge Bafilisita ba tšere Areka ya Modimo wa nnete kua Ebenetsere, ba ile ba e tliša Ashidodo. 2 Bafilisita ba tšea Areka ya Modimo wa nnete gomme ba e tliša ntlong* ya Dagoni modingwana wa bona, ke moka ba e emiša kgauswi le Dagoni. 3 Ge Baashidodo ba tsoga ka masa letšatšing leo le latelago, ba hwetša Dagoni modingwana wa bona a wetše fase ka sefahlego pele ga Areka ya Jehofa. Ka gona, ba tšea Dagoni ba mmušetša moo ba bego ba mmeile gona. 4 Ge ba tsoga ka masa letšatšing le le latelago, ba hwetša modingwana wa bona Dagoni a wetše fase ka sefahlego pele ga Areka ya Jehofa, hlogo ya Dagoni le diatla tša gagwe di be di ripegile e bile di wetše mojakong wa tempele. Go be go šetše feela mmele wa Dagoni woo o bopegilego go swana le hlapi. 5 Ke ka baka leo go fihla le lehono, baperisita ba Dagoni le batho ka moka bao ba tsenago ntlong ya Dagoni ba sa gatego karolong yeo e lego kgauswi le mojako wa tempele ya Dagoni kua Ashidodo, ka gobane ke moo Dagoni a wetšego gona.

6 Jehofa a otla Baashidodo kudu, gomme a hlasela batho ba Ashidodo ka moka le bao ba dulago ditikologong tša moo ka dikaku.* 7 Ge batho ba Ashidodo ba bona seo se diregilego ba re: “Tlošang Areka ya Modimo wa Isiraele mo go rena, ka gobane o otlile rena le modimo wa rena Dagoni.” 8 Ba romela batho gore ba yo kgoboketša baetapele ka moka ba Bafilisita gomme ba re go bona: “Re tlo dira’ng ka Areka ya Modimo wa Isiraele?” Bona ba re: “Areka ya Modimo wa Isiraele a e išwe Gathe.” Ke moka ba iša Areka ya Modimo wa Isiraele moo.

9 Ge ba e išitše Gathe, Jehofa a hlasela motse wa moo gomme a dira gore batho ba gakanege kudu. A hlasela batho ba motse woo go tloga ka yo monyenyane go fihla ka yo mogolo ka dikaku. 10 Ke moka ba romela Areka ya Modimo wa nnete Ekirone. Eupša ge Areka ya Modimo wa nnete e se na go fihla Ekirone, Baekirone ba goeletša ba re: “Ba re tlišeditše Areka ya Modimo wa Isiraele gore rena le batho ba rena re bolawe!” 11 Ba romela batho gore ba yo kgoboketša baetapele ka moka ba Bafilisita gomme ba re: “Tlošang Areka ya Modimo wa Isiraele le e bušetše mo e tšwago gona gore rena le batho ba gabo rena re se bolawe.” Ka gobane batho ka moka ba motse ba be ba tšhogile gore ba ka hwa. Modimo wa nnete o be a ba otlile kudu, 12 gomme batho bao ba sego ba hwa ba ile ba otlwa ka dikaku. Badudi ba motse ka moka ba ile ba llela godimo moo sello sa bona se ilego sa fihla magodimong.