Nahume
3 Go madimabe motse wo o tletšego ka babolai.
O tletše ka batho ba go rata maaka le go rata go utswetša ba bangwe.
O dula o na le batho ba go swara ba bangwe poo!
2 Go kwagala modumo wa sefepi le wa maotwana a dikariki.
Ke bona dipere di kata le dikariki tša tšona di kitima.
3 Go na le monamedi wa pere, sabola e nago le mollo le lerumo la go phadima.
Go na le batho ba bantšhi bao ba bolailwego gasehlogo le ditopo tše dintšhi tšeo di pakelanego.
Ditopo tšeo di tletše gohle
E bile di wiša le batho.
4 Tše ka moka di bakwa ke mediro ya gagwe ya go gweba ka mmele.
Ke yo mobotse kudu e bile o kgona boloi kudu.
O goketša ditšhaba ka go gweba ka mmele le go goketša malapa ka boloi bja gagwe.
5 Jehofa wa madira o re: “Tsebang gore ke lwa le lena.
Ke tla phaya diaparo tša lena ka le khupetša difahlego ka tšona.
Ke tla dira gore ditšhaba di le bonele,
Gomme ka le tlontlolla pele ga mebušo.
6 Ke tla tšhollela ditšhila godimo ga gago
Gomme ka dira gore o nyatšege.
Ka tla dira gore batho ba go sege.
7 Yo mongwe le yo mongwe yo a go bonago o tla go tšhabela, a re:
‘Ninife e sentšwe!
Ke mang a tlago go e kwela bohloko?’
Ke tla hwetša kae batho bao ba tlago go go homotša?
8 Na o nagana gore o phala Noo-amoni yeo e bego e le kgauswi le noka ya Nile?
E be e dikologilwe ke meetse,
Lewatle le be le dira gore e hume e bile le e šireleditše bjalo ka leboto.
9 Ethopia le Egepeta e be e le tšona di e neago matla a magolo.
Bapute le Balibia le bona ba be ba e thuša.
10 Noo-amoni le yona e be e tla ya bothopša,
Gomme e ile ya ya.
Bana ba yona ba ile ba rathaganywa dikhoneng ka moka tša diterata.
Banna ba yona bao ba tumilego ba ile ba aroganywa ka matengwa,
Gomme banna ba yona bao ba hlomphegago ba tlengwa ka diketane.
11 Ninife le yona e tla itshwara bjalo ka motho yo a tagilwego.
E tla ya go ikuta
Gomme ya kgopela manaba a yona gore a e šireletše.
12 Mafelo a gago ao a go šireletšago a tla swana le mego yeo e nago le mago a go butšwa pele.
Ge e ka šikinywa, mago a yona a tla wela ka melomong ya batho bao ba swerwego ke tlala.
13 Mašole a gago a tla fokola bjalo ka basadi.
Dikeite tša motse wa gago di tla bulega gore manaba a tsene
Gomme di tla fišwa ka mollo.
14 Bolokang meetse go itokišeletša mohlang le hlaselwa.
Tiišang maboto a motse.
Dubang leraga
Gomme le forome ditena.
15 Le ge le ka dira bjalo le tlo tšhungwa ka mollo,
E bile le tlo bolawa ka tšhoša.
Le tlo fela bjalo ka dimela ge di jewa ke ditšie.
Dirang gore badudi ba naga ya lena e be ba bantšhi bjalo ka ditšie tše dinyenyane,
Dirang gore e be ba bantšhi bjalo ka ditšie.
16 Batho bao ba rekišago nageng ya gago ba oketšegile gomme ke ba bantšhi go swana le dinaledi tša magodimo.
Ditšie di hlobola matlalo gomme tša fofa.
17 Baleti ba motse wa gago ba swana le tšie,
Matona a gago a swana le ditšie tše dintšhi.
Ge go tonya, ba dula mašakeng ao a dirilwego ka maswika.
Eupša ge letšatši le hlaba ba a tšhaba
Gomme gwa se tsebje gore ba ile kae.
18 Wena kgoši ya Asiria, badiši ba gago ba swerwe ke boroko.
Batho ba gago bao ba hlomphegago ba iketlile dintlong tša bona.
Batho ba gago ba tletše gohle dithabeng,
Ga go na yo a ba kgoboketšago.
19 Ga go na yo a tlago go go thuša ge o wetšwe ke masetlapelo.
Ntho ya gago ga e fole.
Batho ka moka bao ba kwago ditaba tša gago ba tla betha matsogo ba thabile,
Ka gobane, ke mang yo a sa kago a tlaišega ka baka la dilo tše mpe tšeo o dulago o di dira?”