Esera

5 Ke moka moporofeta Hagai le moporofeta Sakaria e lego setlogolo sa Ido, ba ile ba porofetela Bajuda bao ba bego ba le kua Juda le Jerusalema ka leina la Modimo wa Isiraele yo a bego a na le bona. 2 Serubabele morwa wa Shealatiele le Jeshua morwa wa Jehosadaka ba thoma go aga gape ntlo ya Modimo yeo e bego e le kua Jerusalema. Le gona ba be ba na le baporofeta ba Modimo bao ba bego ba ba thuša. 3 Ka nako yeo, mmuši Tatenai yo a bego a buša ka bodikela bja Noka ya Eforate le Shethara-bosenai le bao ba bego ba šoma le bona, ba ile ba tla go bona gomme ba ba botšiša gore: “Ke mang yo a le laetšego gore le age ntlo ye le go feleletša moago wo?” 4 Ba ba botšiša le gore: “Banna bao ba agago moago wo ke bomang?” 5 Eupša Modimo o be a hlokometše banna ba bagolo ba Bajuda, gomme Tatenai le batho bao a bego a šoma le bona ga se ba ka ba ba tlogediša go aga go fihlela ge Dario a boditšwe seo se diregago e bile a ba arabile ka lengwalo.

6 Le ke lengwalo leo mmuši Tatenai yo a bego a buša ka bodikela bja Noka ya Eforate, Shethara-bosenai le bao a bego a šoma le bona le babuši ba banyenyane bao ba bego ba buša ka bodikela bja Noka ya Eforate ba ilego ba le romela Kgoši Dario. 7 Lengwalo leo le be le re:

“Khutšo a e be le wena

Kgoši Dario! 8 Anke kgoši e tsebe gore re ile ra ya profenseng ya Juda ntlong ya Modimo yo mogolo. Ra hwetša ntlo yeo e agwa ka maswika a magolo gomme maboto a yona a tsentšwe le dikota. Batho ba šoma ka mafolofolo e bile mošomo o tšhaba diatla. 9 Ke moka re ile ra botšiša banna ba ba bagolo ba Bajuda ra re: ‘Ke mang yo a le laetšego gore le age ntlo ye le go feleletša moago wo?’ 10 Re ile ra ba ra ba botšiša maina a batho bao ba agago gore re tle re go tsebiše ona, gomme ra ba ra ngwala maina a banna bao ba eteletšego pele mošomo woo.

11 “Ba ile ba re araba ka gore: ‘Re bahlanka ba Modimo wa magodimo le lefase, re aga leswa ntlo yeo e bego e agilwe kgale, yeo kgoši e kgolo ya Isiraele e ilego ya e aga. 12 Eupša ka ge botatago rena ba ile ba galefiša Modimo wa magodimo, o ile a dumelela Kgoši Nebukadinetsara wa Babilona wa Mokaladea gore a ba fenye. Ke yena yo a phušotšego ntlo ye gomme a iša batho bothopša kua Babilona. 13 Eupša ngwageng wa mathomo wa ge go buša Kgoši Korese wa Babilona, Kgoši Korese o ile a laela gore ntlo ye ya Modimo e agiwe leswa. 14 Le gona, Kgoši Korese o ile a ntšha dibjana tša gauta le tša silifera tša ntlong ya Modimo tšeo di bego di le ka tempeleng ya Babilona, tšeo Nebukadinetsara a bego a di tšere tempeleng ya Jerusalema a di tliša tempeleng ya Babilona. Ba di fa monna yo a bitšwago Sheshebatsara, yoo Korese a bego a mo dirile mmuši. 15 Korese a re go yena: “Tšea dibjana tše. Eya o di bušetše tempeleng yeo e lego Jerusalema, e lego ntlo ya Modimo yeo e tlago go agwa leswa moo e bego e le gona.” 16 Ge Sheshebatsara a fihla, o ile a dira fantešeni ya ntlo ya Modimo yeo e lego Jerusalema, gomme go tloga ka nako yeo go ba go fihla gona bjale e sa agiwa, eupša ga se ya tšwa e fela.’

17 “Bjale ge e ba kgoši e bona go lokile, a e romele batho go yo nyakišiša taba ye ntlong ya kgoši kua Babilona moo go bewago dilo tše bohlokwa le mangwalo, e le gore go hwetšwe gore ka nnete Kgoši Korese o ile a laela gore ntlo ya Modimo e agwe leswa kua Jerusalema. Le gona, anke kgoši e re romele karabo ya yona mabapi le taba ye.”