Esera

6 Ka yona nako yeo Kgoši Dario o ile a laela batho gore ba dire nyakišišo, ke moka bona ba ile ba ya go e dira ntlong ya kgoši kua Babilona moo go bego go bewa dilo tša bohlokwa le mangwalo. 2 Ba ile ba hwetša lengwalo la go phuthwa kua Ekebathana lefelong leo le šireleditšwego leo le lego profenseng ya Media. Lengwalo leo le be le ngwadilwe gore:

3 “Ngwageng wa mathomo wa ge go be go buša Kgoši Korese, o ile a ntšha taelo mabapi le ntlo ya Modimo kua Jerusalema a re: Anke Bajuda ba age ntlo yeo gape gore ba tle ba kgone go dira dihlabelo go yona, le gona difantešene tša yona di tiišwe, botelele bja yona go ya godimo e be e le dimithara tše e ka bago tše 27,* ke moka bophara bja yona e be e le dimithara tše e ka bago tše 27, 4 ba age mabato ka go hlatlaganya maswika a magolo gararo le go hlatlaganya dikota gatee. Dilo tše ka moka di patelwe ka tšhelete yeo e tšwago ka mošate. 5 Ba buše le dibjana tša gauta le tša silifera tšeo di tšwago ntlong ya Modimo tšeo Nebukadinetsara a bego a di tšere tempeleng yeo e bego e le Jerusalema gomme a di tliša Babilona, ke moka ba di bee mo di swanetšego go dula gona tempeleng ya Modimo kua Jerusalema.

6 “Bjale ke re wena mmuši Tatenai yo a bušago ka bodikela bja Noka ya Eforate, Shethara-bosenai, batho bao o šomago le bona le babuši ba banyenyane ba ka bodikela bja Noka ya Eforate, kgaoganang le Bajuda bao. 7 Le se ke la ba šitiša go aga ntlo ya Modimo. Mmuši wa Bajuda le banna ba bagolo ba Bajuda ba tla aga leswa ntlo ya Modimo mo e bego e le gona mathomong. 8 Ka gona ke le laela gore kapejana le tšee tšhelete ya ka mošate ya motšhelo wo o tšwago ka bodikela bja Noka ya Eforate gore le patelele dilo tšeo banna ba bagolo ba Bajuda ba di hlokago, e le gore mošomo wa bona o se ke wa šitišwa le gore ba kgone go aga leswa ntlo ya Modimo. 9 E bile letšatši le lengwe le lengwe le ba nee dilo ka moka tšeo ba di hlokago, e lego dipowana, dinku tše tona le dikwana gore ba tle ba direle Modimo wa legodimong dihlabelo tša go fišwa ka tšona. Le ba nee le korong, letswai, beine le makhura go ya le kamoo baperisita bao ba lego Jerusalema ba le botšago ka gona. 10 Se se tlo dira gore ba kgone go neela Modimo wa legodimong dihlabelo tše di mo thabišago le go rapelela kgoši le barwa ba yona gore ba phele nako e telele. 11 Ke laetše gore mang le mang yo a sa kwego taelo ye, go ntšhiwe kota ntlong ya gagwe gomme a kokotelwe go yona, ke moka batho ka moka ba tla fetoša ntlo ya gagwe gore e be lefelo la boithomelo ka baka la molato wo a o dirilego. 12 Le gona Modimo yo a dirilego gore leina la gagwe le be tempeleng, a a fediše kgoši le ge e le efe le batho bao ba sa kwego taelo ye le bao ba lekago go senya ntlo ya Modimo yeo e lego Jerusalema. Nna Dario ke nna ke ntšhago taelo ye. E bile ke re e latelwe kapelapela.”

13 Ke moka mmuši Tatenai yo a bego a buša ka bodikela bja Noka ya Eforate, Shethara-bosenai le batho bao ba bego ba šoma le bona ba dira dilo ka moka tšeo Kgoši Dario a bego a di laetše ntle le go senya nako. 14 Boporofeta bja moporofeta Hagai le Sakaria setlogolo sa Ido, bo ile bja dira gore banna ba bagolo ba Bajuda ba be le matla a go tšwela pele ba aga tempele. Le gona ba ile ba fetša go e aga go ya le kamoo ba bego ba laetšwe ke Modimo wa Isiraele, Korese, Dario le Kgoši Arithasasitha wa Peresia. 15 Ba feditše go aga tempele ye ka letšatši la boraro la kgwedi ya Adara,* ka ngwaga wa botshelela wa ge go buša Kgoši Dario.

16 Baisiraele, baperisita, Balefi le batho ka moka bao ba kilego ba ya bothopša ba neela ntlo ye ya Modimo ba thabile. 17 Ba ile ba neela ntlo ye ya Modimo ka go dira dihlabelo ka dipoo tše 100, dinku tše tona tše 200 (makgolo a mabedi) le dikwana tše 400 (makgolo a mane). Le gona ba ile ba direla Baisiraele ka moka sehlabelo sa sebe ka diphooko tše 12 go ya ka palo ya meloko ya Isiraele. 18 Ba ile ba kgetha baperisita go ya ka dihlopha tša bona le Balefi go ya ka dihlopha tša bona, e le gore ba šomele Modimo kua Jerusalema go ya ka seo se ngwadilwego pukung ya Moshe.

19 Bao ba kilego ba ya bothopša ba keteka Paseka ka letšatši la bo-14 la kgwedi ya pele. 20 Baperisita le Balefi ka moka ga bona ba itlhwekiša, ke moka ba itirela sehlabelo sa Paseka, ba se direla le bao ba kilego ba ya bothopša le baperisitagotee le bona. 21 Baisiraele bao ba bego ba boile bothopša ba ile ba ja nama ya sehlabelo seo, gwa ja le bao ba boilego le bona bao ba bego ba tlogetše go dira dilo tše mpe tšeo di dirwago ke batho ba ditšhaba tše dingwe, gore ba tle ba hlankele Jehofa Modimo wa Isiraele. 22 Ba keteka Monyanya wa Dinkgwa tše di sa Omelwago ka matšatši a šupago ba thabile, ka ge e le Jehofa yo a ilego a dira gore ba thabe, a ba a dira gore kgoši ya Asiria e ba sware gabotse e le gore e ba thekge gore ba tšwele pele ka mošomo wa go aga ntlo ya Modimo wa nnete, yena Modimo wa Isiraele.