Psalme
Ditaelo tšeo di yago go mohlahli: Diriša modumo wa koša yeo e rego “Dilili.” Koša ya Dafida.
69 Mphološe hle Modimo, gobane ke kgauswi le go kgangwa ke meetse.
2 Ke nweletše ka gare ga leraga, moo go se nago lefelo leo le omilego.
Ke ka gare ga meetse a mantšhi,
Gomme ke gogotšwe ke meetse ao a tlilego ka lebelo.
3 Ke lapišitšwe ke go goeletša,
Lentšu la ka le makgwakgwa,
Le mahlo a ka a ile a lapa ke dutše ke letetše gore Modimo wa ka a nthuše.
4 Bao ba ntlhoilego ntle le lebaka
Ke ba bantšhi kudu go feta meriri ya hlogo ya ka.
Manaba a ka ao a tletšego boradia ke a mantšhi kudu e bile a nyaka go mpolaya.
A nkgapeletša gore ke fane ka dilo tšeo ke sego ka di utswa.
5 Wena Modimo, o tseba dilo tša bošilo tšeo ke di dirilego,
E bile o a tseba gore ke na le molato.
6 Anke bao ba go tshepago ba se hlabje ke dihlong ka baka la ka,
Wena Mmuši Morena Jehofa wa madira.
Anke bao ba go tsomago ba se hlabje ke dihlong ka baka la ka,
Wena Modimo wa Isiraele.
7 Ke gobošitšwe ka baka la gago,
E bile ke lewa ke dihlong.
8 Banabešo ba ntshwere bjalo ka motho o šele,
Le bana ba mma ga ba sa ntseba.
9 Ke fišegela go hlankela ntlong ya gago bjalo ka ge eka ke tšhungwa ke mollo,
Gomme ke hlabilwe ke mantšu a bao ba go gobošago.
10 Ge ke be ke ikokobetša gomme ke ikona dijo,
Batho ba ile ba nkgoboša.
11 Ge ke be ke apara masaka,
Ba ile ba nkwera.
12 Bao ba dulago dikeiting tša motse, ba dulela go bolela ka nna,
Le gona matagwa a opela ka nna.
13 Eupša anke o kwe thapelo ya ka hle Jehofa,
Gomme o nkwe ka nako e swanetšego.
Nkarabe o be o mphološe ka baka la lerato la gago le le botegago hle Modimo.
14 Nntšhe ka gare ga leraga,
O se ntumelele ke nwelela.
Nntšhe ka gare ga meetse a mantšhi
O be o mphološe go bao ba ntlhoilego.
15 O se ntlogele ke gogolwa ke meetse ao a elelago ka lebelo,
O se ke wa ntlogela ke nwelela ka meetseng a mantšhi,
Goba wa ntlogela ke metšwa ke sediba.*
16 Nkarabe hle Jehofa, gobane lerato la gago le a botega.
Nthuše ka baka la kgaugelo ya gago e kgolo,
17 O se ke wa utela mohlanka wa gago sefahlego sa gago.
Ke kgopela o nkarabe ka pela ka gobane ke mathateng.
19 O tseba kamoo ke gobošitšwego ka gona, kamoo ke hlabišitšwego dihlong ka gona le kamoo ke hlompholotšwego ka gona.
O bona manaba a ka ka moka.
20 Pelo ya ka e kwele bohloko ka ge ke gobošitšwe gomme ntho ya gona ga e fole.
Ke be ke nagana gore go tla ba le motho yo a nkwelago bohloko eupša ga se a ba gona,
E bile ga se gwa ba le o tee yo a nkhomotšago.
21 Eupša go e na le gore ba mphe dijo ba mphile mpholo,
Ge ke be ke swerwe ke lenyora ba mphile binika gore ke e nwe.
22 Anke dijo tšeo di lego tafoleng ya bona di be moreo go bona,
Gomme mahumo a bona a fetoge molaba.
23 Anke mahlo a bona a swifale gore ba se ke ba bona,
Gomme o dire gore matheka a bona a dule a lokaloka.
24 Dira gore ba bone gore o ba galefetše,
Gomme kgalefo ya gago e ba wele.
25 Anke moo ba dulago gona go fetoge mašope,
Gomme go se be le yoo a dulago ditenteng tša bona.
26 Gobane ba tlaiša yoo o mo otlilego,
Ba dulela go bolela ka bohloko bja bao o ba hlabilego.
27 Ba okeletše melato ya bona,
Gomme o se ke wa ba bona ba lokile.
28 Anke ba phumolwe pukung ya bophelo,
Le gona anke ba se ke ba ngwalwa moo go ngwalwago maina a baloki.
29 Ke gateletšegile e bile ke kwa bohloko.
Anke o mphološe o be o ntšhireletše, hle Modimo.
30 Ke tla opela dikoša tša go reta leina la Modimo,
Ke tla mo tumiša ka ba ka mo leboga.
31 Se se tla kgahla Jehofa kudu go feta dihlabelo tša dipoo,
Go feta sehlabelo seo se dirilwego ka powana yeo e nago le manaka le ditlhako.
32 Ba boleta ba tla bona seo gomme ba thaba.
Lena bao le hlankelago Modimo, anke dipelo tša lena di matlafale.
33 Gobane Jehofa o theetša sello sa badiidi
E bile a ka se nyatše batho ba gagwe bao ba thopilwego.
34 Anke legodimo le lefase di mo tumiše,
Gotee le mawatle le dilo ka moka tšeo di lego go wona.
35 Gobane Modimo yena o tla phološa Tsione
Gomme o tla tsošološa metse ya Juda.
Batho ba gagwe ba tla dula nageng yeo gomme ba e tšea ya ba ya bona.
36 Ditlogolo tša bahlanka ba gagwe di tla tšea naga yeo ya ba ya tšona.
Bao ba ratago leina la gagwe ba tla dula go yona.