Lefitiko

1 Jehofa a bitša Moshe a bolela le yena a le ka taberenakeleng* a re: 2 “Botša Baisiraele o re: ‘Ge e ba yo mongwe wa lena a nyaka go neela Jehofa sebego ka seruiwa, gona a tliše kgomo, nku goba pudi.

3 “‘Ge e ba a nyaka go neela kgomo e le sebego sa go fišwa, gona a tliše e tona yeo e phetšego gabotse. A e neele ka go rata, e bile a e tliše mojakong wa taberenakele pele ga Jehofa. 4 A bee seatla sa gagwe godimo ga hlogo ya phoofolo yeo a tlago go e neela e le sebego sa go fišwa, gomme Modimo o tla amogela sebego seo ke moka a mo lebalela dibe tša gagwe.

5 “‘Powana yeo e hlabje pele ga Jehofa, ke moka barwa ba Arone bao e lego baperisita, ba tliše madi a yona pele ga Modimo gomme ba a foketše mahlakoreng ka moka a aletare, e lego aletare yeo e lego kgauswi le mojako wa taberenakele. 6 Phoofolo yeo e buiwe gomme e segelelwe. 7 Barwa ba Arone bao e lego baperisita ba gotše mollo aletareng, gomme ba bešetše dikgong moo mollong. 8 Ba beakanye nama ya phoofolo yeo godimo ga dikgong tšeo di tukago aletareng. Ba bee le hlogo le makhura a yona gona moo. 9 Mala le maoto a yona di hlatswiwe ka meetse, ke moka moperisita a di fiše ka moka aletareng gore e be sebego sa go fišwa seo se thunyago muši wo o nkgago bose wo o yago go Jehofa.

10 “‘Ge e ba a tliša nku goba pudi gore e be sebego sa go fišwa, gona a tliše e tona yeo e phetšego gabotse. 11 E hlabelwe pele ga Jehofa ka lehlakoreng la ka leboa la aletare, gomme barwa ba Arone bao e lego baperisita, ba foketše madi a yona mahlakoreng ka moka a aletare. 12 E segelelwe e ntšhiwe diripanaripana, gomme moperisita a di beakanye godimo ga dikgong tšeo di lego mollong wo o lego aletareng, a bee le hlogo ya yona le makhura a yona gona moo. 13 A hlatswe mala le maoto a yona ka meetse. Moperisita a e fišetše ka moka aletareng gore e be sebego sa go fišwa seo se thunyago muši wo o nkgago bose wo o yago go Jehofa.

14 “‘Eupša ge e ba a neela Jehofa sebego sa go fišwa ka dinonyana, gona a neele ka maeba a nageng goba maebana. 15 Moperisita a tliše leebana aletareng, a le sege molala ke moka a le fišetše moo, eupša madi a lona a a tšhollele ka thoko ga aletare. 16 A tloše sejelo sa lona a be a le hlobe mafofa, ke moka a di lahlele ka thoko ya ka bohlabela ya aletare moo go tšhollelwago melora. 17 A le ripe kgauswi le maphego a lona, eupša a se ke a le ntšha diripa tše pedi. Ke moka moperisita a le fišetše aletareng gore e be sebego sa go fišwa, seo se thunyago muši wo o nkgago bose wo o yago go Jehofa.